ၽိုၼ်တၢမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 27/2/2024
ၵူၼ်းမိူင်း 6,000 ပၢႆပၢႆႈၶိူင်ႈမိၼ်တိုၵ်းသိုၵ်းမၢၼ်ႈ၊ သိုၵ်းမၢၼ်ႈဢဝ်ၵွင်ႈလူင်ယိုဝ်း၊ ဢဝ်ၾႆးၽဝ်ႁိူၼ်းၵူၼ်းမိူင်း၊ ၶႃႈႁႅမ်ၵူၼ်းမိူင်းႁၢမ်းပၵ်းႁၢမ်းပိူင်လႄႈ ၵၼ်ႉၸၼ်ၼၢင်းယိင်းပဵၼ်မူႇ ၼႂ်းမိူင်းမိတ်ႈ ၸိုင်ႈတႆးပွတ်းႁွင်ႇ
ၵူၼ်းမိူင်းၼႂ်းဝဵင်းမိူင်းမိတ်ႈလႄႈဝၢၼ်ႈႁိမ်းႁွမ်း 6,000 ပၢႆဢွၼ်ၵၼ်ပၢႆႈယွၼ်ႉသိုၵ်းမၢၼ်ႈၶိူင်ႈမိၼ်တိုၵ်း၊ ဢဝ်ၵွင်ႈလူင်ယိုဝ်း သေပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်း ၶႃႈႁႅမ်ၵူၼ်းမိူင်းတၢႆ 27 ၵေႃႉ၊ မၢတ်ႇၸဵပ်း 12 ၵေႃႉလႄႈ ၸုတ်ႇၽဝ်ပိုၼ်ႉတီႈၵႂၢင်ႈယႂ်ႇလူင်ၼႂ်းဝဵင်းတင်ႈတႄႇဝၼ်းထိ 1/1/2024 ထိုင် 2/2/2024။
ၵူၼ်းဝၢၼ်ႈၸိူဝ်းၺႃးၶႃႈတၢႆၼၼ်ႉ တႃႇ 17 ၵေႃႉပဵၼ်ႁွႆးမိုဝ်းသိုၵ်းမၢၼ်ႈတပ်ႉၸုမ်းလူင် (တပ်ႉမ) (99) ၶႃႈႁႅမ်၊ သိုၵ်းမၢၼ်ႈၸုမ်းၼႆႉ လုၵ်ႉတၢင်းဝဵင်းလိူဝ်ႇ (မၼ်းတလေး) သေၶဝ်ႈၼႂ်းမိူင်းမိတ်ႈ မိူဝ်ႈ ဝၼ်းထိ 2/1/ 2024 ဝၢႆးသိုၵ်းၶၢင် KIA, တႅဝ်းႁူမ်ႈလုၵ်ႈႁဵၼ်းၸၼ်ႉၸွမ်မိူင်းမၢၼ်ႈပတ်းပိုၼ်ႉ All Burma Students’ Democratic Front (ABSDF), တပ်ႉၵႅတ်ႇၶႄၵူၼ်းမိူင်း PDF, လႄႈသိုၵ်းတဢၢင်း (ပလွင်ႈ/လွႆ) TNLA တႄႇပၢင်တိုၵ်းႁႃတၢင်းတေၶဝ်ႈယိုတ်းဝဵင်းမိူင်းမိတ်ႈၼၼ်ႉယဝ်ႉ။ သိုၵ်းမၢၼ်ႈၸုမ်းၼႆႉ ယိုဝ်းၵူၼ်းမိူင်းတၢႆ ၵိုၵ်းၼႂ်း ႁိူၼ်းဢမ်ႇၼၼ်ယိုဝ်းတၢႆ တီႈၼႂ်းထိူၼ်ႇ၊ ဢဝ်ၶၢပ်ႈတူဝ်တၢႆ ၵူၼ်းဝၢၼ်ႈၽဝ်၊ ၵူၼ်းၼုမ်ႇသွင်ၵေႃႉၺႃးပၢတ်ႇၶေႃးတႅပ်းႁူဝ်။ ၼၢင်းယိင်းၵေႃႉၼိုင်ႈၺႃး ၵၼ်ႉၸၼ်ပဵၼ်ၽုင် ဢွၼ်တၢင်းတေယိုဝ်းမၼ်း ၼၢင်း တၢႆ- 1 ၼႂ်း 3 လွင်ႈႁူမ်ႈၵၼ်ၵၼ်ႉၸၼ်ၼၢင်းယိင်းပဵၼ်ၽုင်ၼႆႉ ပဵၼ်သိုၵ်းမၢၼ်ႈတပ်ႉၸုမ်းလူင်/ တပ်ႉမ 99 မႃးထႅမ်ႁႅင်းသိုၵ်းယူႇ ၼႂ်းမိူင်း မိတ်ႈ ၵေႃႉပူၼ်ႉပႅၼ်။
သိုၵ်းမၢၼ်ႈ တပ်ႉၸုမ်းလူင် (တပ်ႉမ) (99) ၼႆႉယင်းၶဝ်ႈၶူၼ်ႉသွၵ်ႈတဝ်ဢဝ်ၶူဝ်းၶွင်ၵူၼ်းမိူင်းသေဢဝ်ၾႆးၸုတ်ႇၽဝ် ပဵၼ်ပိုၼ်ႉတီႈဝူင်းၵႂၢင်ႈထႅင်ႈ၊ ႁိူၼ်းၵူၼ်းဝၢၼ်ႈ 150 လင်ပၢႆၺႃးသိုၵ်းမၢၼ်ႈၸုမ်းၼႆႉဢဝ်ၾႆး ၸုတ်ႇၽဝ်ႁိူၼ်းၵူၼ်းမိူင်း ဝၢႆးၸုမ်းလုၵ်ႉၽိုၼ်ႉၶဝ်ထွႆထွၼ်ဢွၵ်ႇဝဵင်းမိူင်းမိတ်ႈ မိူဝ်ႈဝၼ်းထိ 27/1/2024။
ၵူၼ်းမိူင်း 4,000 ပၢႆ လႆႈဢွၼ်ၵၼ်ပၢႆႈၽေးသိုၵ်းပိုင်ႈႁူမ်ႈယူႇၸွမ်းသၢႆဝၢၼ်ႈၼွၵ်ႈ၊ ၸွမ်းႁႆႈၼႃးလႄႈၼႂ်းထိူၼ်ႇမိူင်းမိတ်ႈသေ တႃႇႁူဝ်ၵူၼ်းထႅင်ႈမွၵ်ႈ 2,000 ဢွၼ်ၵၼ်ပၢႆႈၽေးၶဝ်ႈၵႂႃႇ တၢင်းဝဵင်းလိူဝ်ႇ (မၼ်းတ လေး) ပၢင်ႇဢူးလူင်လႄႈၵျွၵ်းမႄး ၸိူဝ်းၼႆႉ။ မိူဝ်ႈသဵင်ႈလိူၼ် ၸၼ်ႊၼႃႊဝႃႊရီႊၼၼ်ႉ ပဵၵ်ႉသမ်ႉပၢင်တိုၵ်းယဵၼ်လူင်းယဝ်ႉသေတႃႉ ၵူၼ်းပၢႆႈၽေးတႄႉ ပႆႇႁတ်း ဢွၼ်ၵၼ် ပွၵ်ႈၶိုၼ်းဝၢၼ်ႈၽႂ် ႁိူၼ်းၽႂ် ယွၼ်ႉသိုၵ်းမၢၼ်ႈတပ်ႉၸုမ်းလူင် (တပ်ႉမ) (99) ၼႆႉယင်းတိုၵ်ႉယူႇသဝ်းၸွမ်းတိုၵ်းႁိူၼ်း ၼႂ်းဝဵင်းဝႆႉယူႇ။
မိူင်းမိတ်ႈၼႆႉ ၵွပ်ႈပဵၼ်မိူင်းဢၼ်လမ်ႇလွင်ႈတၢင်းပၢႆးတိုၵ်းသေ သမ်ႉပဵၼ်မိူင်းဢၼ်မီးၵၢၼ် ၶုတ်းမိူင်ႁႄႊ လႄႈ ပဵၼ်ၽၵ်းတူဢၼ်လုၵ်ႉမိူင်းတႆးပွတ်းႁွင်ႇသူႇၸူးထိုင်ဝဵင်းလိူဝ်ႇ၊ ၵွပ်ႈၼၼ်တႃႇသိုၵ်းမၢၼ်ႈ တေလူတ်းယွၼ်ႇၵၢၼ်သိုၵ်းၶဝ်ၼၼ်ႉမိူဝ်ႈလဵဝ် တိုၼ်းပႆႇႁၼ်သၢႆငၢႆမၼ်း။
ၼႃႈတၢင်းၸဵင်ႇႁွင်ႇမိူင်းမိတ်ႈ ပဵၼ်ပိုၼ်ႉတီႈဢၼ်မီးၵၢၼ်ႁၢင်ႈႁႅၼ်းသၢင်ႈၽၢႆၼမ်ႉမၢဝ်း 3-ပဵၼ် ၶူင်းၵၢၼ် ၾႆးၾႃႉႁႅင်းၼမ်ႉ ဢၼ်သိုၵ်းမၢၼ်ႈလႆႈၸႂ်ႉငိုၼ်းတိုၼ်း/ထုၼ်း 1.5 ႁဵင်လၢၼ်ႉဝႆႉ ၼႂ်းပီ 2023 သေ ၽႂ်ႁူမ်ႈ လူင်းတိုၼ်းလၢႆလၢႆၼႆ ယင်းပႆႇမီးလွင်ႈပိုတ်ႇၽိူၺ် ဝၢႆးၶွမ်ႊပၼီႊ EDF မိူင်းၾရင်ႊသဵတ်ႊ ထွၼ်တူဝ် ဢွၵ်ႇ တီႈ ၶူင်ၵၢၼ်မိူဝ်ႈၼႂ်းပီ 2021 ဝၢႆးသိုၵ်းမၢၼ်ႈ ယိုတ်းဢႃႇၼႃႇ/ဢၢမ်း ၼၢတ်ႈ ၸိုင်ႈမိူင်း။
ႁူဝ်ယွႆႈလွင်ႈသိုၵ်းမၢၼ်ႈဢဝ်ၶိူင်ႈမိၼ်တိုၵ်း၊ ဢဝ်ၵွင်ႈလူင်ယိုဝ်း၊ သွၵ်ႈတဝ်ဢဝ်ၶူဝ်းၶွင်ၵူၼ်းမိူင်း လႄႈဢဝ် ၾႆးၸုတ်ႇၽဝ်ႁိူၼ်းၵူၼ်းမိူင်း
ၸုမ်းလုၵ်ႉၽိုၼ်ႉၶဝ်တႄႇၼႃႈသိုၵ်းတေႃႇသိုၵ်းမၢၼ်ႈ တၢင်းဢွၵ်ႇဝဵင်းမိူင်းမိတ်ႈ မိူဝ်ႈၸဝ်ႉလိူၼ်ၸၼ်ႊၼႃႊဝႃႊရီႊ။ မိူဝ်ႈဝၼ်းထိ 1/1/2024 ၼၼ်ႉ သိုၵ်းၶၢင် KIA, သိုၵ်းလုၵ်ႁဵၼ်း ABSDF, တပ်ႉၵႅတ်ႇ ၶႄၵူၼ်းမိူင်း PDF ႁူမ်ႈၵၼ်ဢဵၼ်ႁႅင်းပၢၵ်ႇပၢႆ ၶဝ်ႈတိုၵ်းသိုၵ်းမၢၼ်ႈၶမယ 276 ဢၼ် ပၵ်း တပ်ႉဝႆႉႁိမ်းဝၢၼ်ႈပၢတ်ႈ ဢၼ်ယူႇၼႃႈတၢင်းၸဵင်ႇၸၢၼ်းဝၼ်းဢွၵ်ႇဝဵင်းမိူင်းမိတ်ႈ ႁၢင်ႇၵႆဝဵင်းမွၵ်ႈ 12 ၵီႊလူဝ်ႊမႄႊတိူဝ်ႊ။ ဝၼ်းထိ 2/1/2024 သမ်ႉသိုၵ်းတဢၢင်းၶဝ်ႈယိုဝ်းသိုၵ်းမၢၼ်ႈ ဢၼ်မီးတီႈဝၢၼ်ႈ ၸၢင်ႈၵၢင်ႇ ၸွမ်းသၢႆမႄႈၼမ်ႉမိတ်ႈ ယူႇၼႃႈတၢင်းၸဵင်ႇႁွင်ႇ ဝၼ်းဢွၵ်ႇ ႁၢင်ႇၵႆဝဵင်း မွၵ်ႈ 5 ၵီႊလူဝ်ႊမႄႊတိူဝ်ႊ။
သိုၵ်းမၢၼ်ႈဢၼ်ပၵ်းဝႆႉႁိမ်းဝဵင်းၼၼ်ႉၵေႃႈ တွပ်ႇၶိုၼ်းၼႆသေဢဝ်ၵွင်ႈလူင်ၶဝ် ယိုဝ်းလူင် ၵႂႃႇၵူႈႁူး ၵူႈ တၢင်း၊ လိူဝ်ၼၼ်ႉသိုၵ်းမၢၼ်ႈတၢင်းဝဵင်းလိူဝ်ႇၵေႃႈၶဝ်ႈမႃးထႅမ်ႁႅင်းထႅင်ႈ။ မိူဝ်ႈဝၼ်းထိ 2/1/2024 ဝၢႆးဝၼ်း ၼၼ်ႉ သိုၵ်းမၢၼ်ႈတပ်ႉၸုမ်းလူင် 99 ဢဵၼ်ႁႅင်းၵူၼ်းမွၵ်ႈ 200 ပႃးတင်းရူတ်ႊ/ ၵႃးသိုၵ်းသၢမ်လမ်းသေ ၶဝ်ႈမႃးမိူင်းမိတ်ႈ၊ မႃးၸႅၵ်ႇပဵၼ်လၢႆၸုမ်းယဝ်ႉမၢင်ၸိူဝ်းၵႂႃႇယူႇၼႂ်းဝဵင်း လႄႈမၢင်ၸိူဝ်းၵႂႃႇတူင်ႉၼိုင်ၸွမ်းသၢႆ မႄႈၼမ်ႉမိတ်ႈ။
တင်ႈတႄႇဝၼ်းထိ 3-9/1/2024 မႃးသိုၵ်းပလွင်ႈ/လွႆ တႄႇပိုတ်ႇယိုဝ်းသိုၵ်းမၢၼ်ႈတၢင်းဢွၵ်ႇဝဵင်း မိူင်းမိတ်ႈသေ သိုၵ်းမၢၼ်ႈၶိုၼ်းဢဝ်ၶိူင်ႈမိၼ်တိုၵ်းလႄႈဢဝ်ၵွင်ႈလူင်ယိုဝ်းတွပ်ႇၶိုၼ်းယဝ်ႉ ႁဵတ်းႁႂ်ႈၵူၼ်းဝၢၼ်ႈသွင်ၵေႃႉမၢတ်ႇၸဵပ်း၊ ႁိူၼ်းၵူၼ်းမိူင်းလုၵွႆပႃးထႅင်ႈလၢႆလၢႆလင်။
မိူဝ်ႈဝၼ်းထိ 8/1/2024 ၼၼ်ႉသိုၵ်းၶၢင် KIA, သိုၵ်းလုၵ်ႁဵၼ်း ABSDF, တပ်ႉၵႅတ်ႇၶႄၵူၼ်းမိူင်း PDF ႁူမ်ႈၵၼ် ႁုပ်ႈယိုတ်းဢဝ်တပ်ႉၶလယ 276 သိုၵ်းမၢၼ်ႈ တီႈဝၢၼ်ႈၼမ်ႉၶွႆႈ/မျိတ်ႉၸူင်ႇ ဢၼ်ယူႇတၢင်းႁွင်ႇဝဵင်း မိူင်း မိတ်ႈ ႁၢင်ႇၵႆမွၵ်ႈ 20 ၵီႊလူဝ်ႊမႄႊတိူဝ်ႊ၊ ပဵၼ်ဢွင်ႈတီႈမႄႈၼမ်ႉမၢဝ်းလႄႈ ၼမ်ႉမိတ်ႈမႃးၶွႆႈၵၼ် ၼိူဝ်လႅၼ် လိၼ်ၸႄႈဝဵင်းမၢၼ်ႈပဵင်း။
မိူဝ်ႈဝၼ်းထိ 11-12/1/2024 ၼၼ်ႉ သိုၵ်းမၢၼ်ႈယူႇတီႈတပ်ႉၶဝ်ႁိမ်းဝဵင်းမိူင်းမိတ်ႈသေသိုပ်ႇ ဢဝ်မၢၵ်ႇလူင်ယိုဝ်းၵႂႃႇၼႃႈတၢင်းႁွင်ႇ ၵူႈၸွၵ်ႉၵူႈၸဵင်ႇ၊ ၸၢၵ်ႇမၢၵ်ႇၵႂႃႇတိူဝ်ႉၺႃးၵူၼ်းဝၢၼ်ႈ 2 ၵေႃႉတၢႆ၊ ဢွၼ်ႇၸၢႆးၵေႃႉ 1 မၢတ်ႇၸဵပ်းယဝ်ႉတိူဝ်ႉၺႃးဝတ်ႉ/ၵျွင်းလင်ၼိုင်ႈလုၵွႆ ႁဵတ်းႁႂ်ႈႁိူၼ်းၵူၼ်းဝၢၼ်ႈဢုင်းၵျေႃးမႂ်ႇလုၵွႆပႃး 10 လင် ။
ဝၼ်းထိ 18/1/2024 ဝၢႆးဝၼ်း သိုၵ်းၶၢင် KIA၊ သိုၵ်းလုၵ်ႈႁဵၼ်း ABSDF၊ တပ်ႉၵႅတ်ႇၶႄၵူၼ်းမိူင်း PDF ႁူမ်ႈၵၼ်ၶဝ်ႈတိုၵ်းတပ်ႉၽႅၼ်ၵၢၼ်တိုၵ်း (ပိဝ်ႇႁႃႇ) သိုၵ်းမၢၼ်ႈ ဢၼ်မီးတၢင်းၸၢၼ်း ဝဵင်းမိူင်းမိတ်ႈ လႄႈႁူင်းပလိၵ်ႊမၢၼ်ႈ။ သိုၵ်းမၢၼ်ႈၶိုၼ်းဢဝ်ၶိူင်ႈမိၼ်ၵျႅတ်ႊတိုၵ်းပွႆႇမၢၵ်ႇလူင်းၸွမ်းဝဵင်း ပွႆႇလူင်ၵႂႃႇၵႃႈဝႃႈၵႃႈပဵၼ် တွပ်ႇတႅၼ်းသေ ႁဵတ်းၵူၼ်းမိူင်းၸၢႆးၵေႃႉ 1 တၢႆ၊ ၼၢင်းယိင်းၵေႃႉ 1 မၢတ်ႇ ၸဵပ်းပႃးတင်းလုၵ်ႈဢွၼ်ႇထႅင်ႈ 4 ၵေႃႉ၊ တုမ်ႉတိူဝ်ႉပႃးဝတ်ႉဝႃး 2 လင်လႄႈ ႁိူၼ်းၵူၼ်း မိူင်း 20 လင်လုၵွႆ။
မိူဝ်ႈဝၼ်းထိ 19/1/2024 ၼၼ်ႉသိုၵ်းၶၢင် KIA လႄႈၸုမ်းဢူၺ်းလီမၼ်း ၶဝ်ႈႁုပ်ႈယိုတ်းႁူင်းပလိၵ်ႊမိူင်းမိတ်ႈ။ ၶမ်ႈၼၼ်ႉ ၶၢဝ်းယၢမ်းမွၵ်ႈ 7 မူင်း သိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇလူင်းသေ ႁဵတ်းႁႂ်ႈၵၢတ်ႇမိူင်း မိတ်ႈၺႃးၾႆးမႆႈပဵၼ်ၽဝ်ႇ၊ လိူဝ်ၼၼ်ႉၶူဝ်းၶွင်ၵူၼ်းမိူင်းၵေႃႈလုၵွႆသုမ်းပႃးထႅင်ႈ တင်းၼမ်တင်းလၢႆ။ ၾႆးမႆႈ ႁိုင်လၢႆၸူဝ်ႈမူင်း။ ၽွင်းတဵင်ႈၶိုၼ်းၼၼ်ႉ သိုၵ်းမၢၼ်ႈၼႂ်းပိုၼ်ႉတီႈၶဝ်ႈ ၵႂႃႇၼႂ်းဝၢၼ်ႈ ပွၵ်ႉပိၼ်ႇတၼ်ႇ သေ ၵႂႃႇၶူၼ်ႉသွၵ်ႈတဝ်ဢဝ်ၶူဝ်းၶွင်ၵူၼ်းမိူင်း 40 ႁိူၼ်း ၸိူဝ်းဢၼ် ၸဝ်ႈႁိူၼ်းပၢႆႈၽေးသိုၵ်းဝႆႉ။ ဝၼ်းၼၼ်ႉ သိုၵ်းမၢၼ်ႈတတ်းပႅတ်ႈလွင်ႈၵပ်းသိုပ်ႇသၢၼ် ၸိူဝ်းပဵၼ် ၾူၼ်ႊ၊ ဢိၼ်ႊတိူဝ်ႊၼႅတ်ႊၸိူဝ်းၼႆႉ။
ဝၼ်းထိ 20/1/2024 သိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမွၵ်ႇလူင်းၼႂ်းဝဵင်းမိူင်းမိတ်ႈ၊ ႁဵတ်းႁႂ်ႈၵူၼ်း မိူင်း တၢႆ 6 ၵေႃႉ ပႃးတင်းၼၢင်းယိင်း 4 ၵေႃႉ။
ပၢင်တိုၵ်းၼႂ်းၵႄႈ သိုၵ်းမၢၼ်ႈလႄႈသိုၵ်းၶၢင် သိုပ်ႇလၢမ်းထိုင်ၼႂ်းဝဵင်းမိူင်းမိတ်ႈလႄႈႁိမ်းႁွမ်းထိုင် ဝၼ်းထိ 27/1/2024 တေႃႇထိုင်ၸုမ်းဢူၺ်းလီသိုၵ်းၶၢင်ၺႃးမိပ်ႇဢီးႁႂ်ႈထွၼ်ဢွၵ်ႇတီႈဝၢၼ်ႈၸႃႇလီႇ လႄႈဝၢၼ်ႈဢုင်းၵျေႃးမႂ်ႇ ဢၼ်မီးတၢင်းႁွင်ႇဝဵင်း။ ဝၢႆးၼၼ်ႉသိုၵ်းမၢၼ်ႈၶိုၼ်းဢဝ်မၢၵ်ႇလူင်ယိုဝ်း ၶဝ်ႈၼႂ်းဝၢၼ်ႈႁဵတ်းႁႂ်ႈ ၾႆးမႆႈလႄႈႁဵတ်းႁႂ်ႈႁိူၼ်းၵူၼ်းဝၢၼ်ႈ 20 လင်လုၵွႆ။
ဝၼ်းထိ 27/1/2024 ၶၢဝ်းယၢမ်း 4 မူင်းဝၢႆးဝၼ်း သိုၵ်းမၢၼ်ႈၶဝ်ႈၵႂႃႇၼႂ်းပွၵ်ႉ လႅတ်ႊၶူၵ်ႉတၢၼ်း သေၵႂႃႇ သွၵ်ႈ တဝ်ဢဝ်ၶူဝ်းၶွင်ၵူၼ်းမိူင်းမွၵ်ႈ 50 လင်၊ ဝၢႆးၼၼ်ႉၶဝ်ဢဝ်ၾႆးၸုတ်ႇၽဝ်ႁိူၼ်းၵူၼ်း မိူင်းပႅတ်ႈ။ ဝၢႆးၼၼ်ႉ မႃးထႅင်ႈ 6 ဝၼ်းသိုၵ်းမၢၼ်ႈသိုပ်ႇသွၵ်ႈတဝ်ဢဝ်ၶူဝ်းၶွင်ၵူၼ်းမိူင်းယဝ်ႉ ဢဝ်ၾႆးၽဝ်ႁိူၼ်းယေး ၼႂ်းပွၵ်ႉၸၢၼ်းဝဵင်းမိူင်းမိတ်ႈၸိူဝ်းၼၼ်ႉထႅင်ႈ၊ ဢဝ်ၾႆးၸုတ်ႇႁိူၼ်း ၵူၼ်းမိူင်း ထႅင်ႈ 100 လင်။
| လွင်ႈသိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇလူင်း၊ ယိုဝ်းၵွင်ႈလူင် ႁဵတ်းႁႂ်ႈၵူၼ်းမိူင်းမီးလွင်ႈလုသုမ်းလႄႈ ၶဝ်ႈသွၵ်ႈတဝ် ဢဝ်ၶွင်လၢႆၵူၼ်းမိူင်းယဝ်ႉ ဢဝ်ၾႆးၽဝ် ၼႂ်းၸႄႈဝဵင်းမိူင်းမိတ်ႈ လိူၼ်ၸၼ်ႊ-ၾေႊ 2024 | ||||||
| ၶပ်ႉမၢႆ | ဝၼ်းထိ | ဝၢၼ်ႈ/ပွၵ်ႉ | ႁူဝ်ယွႆႈ | ၵူၼ်းမိူင်း တၢႆ | ၵူၼ်းမိူင်း မၢတ်ႇၸဵပ်း | ၶူဝ်းၶွင် လုသုမ်း |
| 1 | 1.1.2024 | ဝၢၼ်ႈပၢတ်ႈ | သိုၵ်းမၢၼ်ႈဢဝ်ၵွင်ႈ လူင်ယိုဝ်းၶဝ်ႈၼႂ်း ဝၢၼ်ႈ ဝၢႆးဝၼ်း | ႁိူၼ်း 12 လင် လုၵွႆ | ||
| 2 | 3.1.2024 | ၸမ်ဝၢၼ်ႈဝဵင်းမႂ်ႇ | ၶၢဝ်းယၢမ်းမွၵ်ႈ 5.20 ဝၢႆးဝၼ်းသိုၵ်းမၢၼ်ႈ ယူႇတီႈတပ်ႉၶဝ်ၼႂ်း ဝဵင်းမိူင်းမိတ်ႈသေ ဢဝ်ၵွင်ႈလူင်ယိုဝ်း၊ ၵူၼ်းဝၢၼ်ႈ 2 ၵေႃႉ မၢတ်ႇ ၸဵပ်းတီႈၼႂ်း ႁႆႈ ၼႃးၶဝ် | ၸၢၵ်ႇမၢၵ်ႇ တိူဝ်ႉၺႃး ၵူၼ်းၸၢႆး 1 လႄႈ လုၵ်ႈ ယိင်းမၼ်း မၢတ်ႇၸဵပ်း | ||
| 3 | 5.1.2024 | ဝဵင်းမိူင်းမိတ်ႈ | ၵၢင်ၶမ်ႈ သိုၵ်းမၢၼ်ႈ ဢဝ်မၢၵ်ႇလူင်ယိုဝ်း ၵႂႃႇတၢင်းဝၢၼ်ႈ ၸၢင်ႈၵၢင်ႇ | ႁိူၼ်းလင် 1 ၼႂ်းဝဵင်းမိူင်း မိတ်ႈလုၵွႆ | ||
| 4 | 6.1.2024 | ဝၢၼ်ႈတူၼ်ႈၵႅင်း ဢိူင်ႇလွၵ်းလူင် | ယၢမ်းတဵင်ႈၶိုၼ်း 12.10 မူင်းသိုၵ်းမၢၼ်ႈ ၶလယ 348 ဢဝ်မၢၵ်ႇ လူင် ယိုဝ်းၶဝ်ႈၵႂႃႇ ၼႂ်း ဝၢၼ်ႈ | ႁိူၼ်းလင် 1 လုၵွႆ | ||
| 5 | 9.1.2024 | ဝၢၼ်ႈၽၢႆၶမ်း | ၶိူင်ႈမိၼ်တိုၵ်း ၵျႅတ်ႉ 2 လမ်းလႄႈ ႁိူဝ်း မိၼ်မႅင်းမီႈ ဢဝ် မၢၵ်ႇ မႃးပွႆႇ | ႁိူၼ်း 2 လင် ၼႂ်း ဝၢၼ်ႈၽၢႆၶမ်းလုၵွႆ | ||
| 6 | 11-12.1.2024 | ဝၢၼ်ႈဢုင်းၵျေႃးမႂ်ႇ | သိုၵ်းမၢၼ်ႈ ဢဝ်ၵွင်ႈ လူင် ယိုဝ်းၶဝ်ႈဝၢၼ်ႈ | ၵူၼ်းဝၢၼ်ႈ 2 ၵေႃႉတၢႆ။ ၸၢႆး 1 ယိင်း 1 | ဢွၼ်ႇၸၢႆး ၵေႃႉ 1 ဢႃ ယု (9 ၶူပ်ႇ) မၢတ်ႇၸဵပ်း | ဝတ်ႉ/ၵျွင်း လင် 1 လႄႈ ႁိူၼ်းယေး 10 လင်လုၵွႆ |
| 7 | 18.1.2024 | ဝဵင်းမိူင်းမိတ်ႈ | ၶၢဝ်းယၢမ်း မွၵ်ႈ 6 ၵၢင်ၼႂ် ၶိူင်ႈမိၼ် တိုၵ်းၵျႅတ်ႊ သိုၵ်း မၢၼ်ႈ 2 လမ်း ဢဝ်မၢၵ်ႇမႃးပွႆႇ | ၸၢႆးၵေႃႉ 1 (ဢႃယု 28 ) | ဢွၼ်ႇၸၢႆး 3 ၵေႃႉ (ဢႃ ယု မွၵ်ႈ 10 ), ၼၢင်း ယိင်း ၵေႃႉ 1 (ဢႃယု မွၵ်ႈ 30), ဢွၼ်ႇယိင်း ၵေႃႉ 1 (ဢႃ ယုမွၵ်ႈ 10) | ဝတ်ႉ/ၵျွင်း 2 လင် (မီးပႃးၶူဝ်းၵိုၵ်းပိုၼ်း ႁေႃမိူင်းမိတ်ႈ) လႄႈ ႁိူၼ်းၵူၼ်း မိူင်း ထႅင်ႈ 20 လင် လုၵွႆ |
| 8 | 19.1.2024 | ဝဵင်းမိူင်းမိတ်ႈ | ၶၢဝ်းယၢမ်းမွၵ်ႈ 7 မူင်းႁူဝ်ၶမ်ႈ သိုၵ်း မၢၼ်ႈ ၸႂ်ႉၶိူင်ႈမိၼ် တိုၵ်း | ထဝ်ႈယိင်း ၵေႃႉၼိုင်ႈ တူၵ်းၸႂ်သေ တၢႆ | ၵၢတ်ႇဝဵင်းမိူင်းမိတ်ႈ ၺႃးၾႆးၽဝ် | |
| 9 | 19.1.2024 | ပွၵ်ႉပိၼ်ႇတၼ်ႇ | တဵင်ႈၶိုၼ်းဝၼ်းထိ 19/1/2024 သိုၵ်း မၢၼ်ႈ ၶဝ်ႈသွၵ်ႈ တဝ်ဢဝ် ၶူဝ်းၶွင် ၵူၼ်းဝၢၼ်ႈ ပွၵ်ႉ ပိၼ်ႇ တၼ်ႇ ၽွင်း ၵူၼ်းဝၢၼ်ႈ ပၢႆႈ ၽေး သိုၵ်းၵႂႃႇပိုင်ႈ ႁူမ်ႈ တီႈဝၢၼ်ႈ ၵျီႇတေႃႇ သု | ႁိူၼ်းၵူၼ်းဝၢၼ်ႈ ၺႃးသွၵ်ႈတဝ် 40 လင် | ||
| 10 | 20.1.2024 | ပွၵ်ႉၸၢၼ်း မိူင်းမိတ်ႈ | သိုၵ်းမၢၼ်ႈဢဝ် ၶိူင်ႈမိၼ်တိုၵ်း ၼိူဝ်ဝဵင်း | ၸၢႆးၵေႃႉ 1, ယိင်းၵေႃႉ 1 | တီႈဢေႇသုတ်း ႁိူၼ်းၵူၼ်းမိူင်း 2 လင်လုၵွႆ | |
| 11 | 20.1.2024 | ပွၵ်ႉလႅတ်ႉၶူၵ်ႉတၼ်း ဝဵင်းမိူင်းမိတ်ႈ | သိုၵ်းမၢၼ်ႈဢဝ် ၶိူင်ႈ မိၼ်တိုၵ်း ၼိူဝ်ဝဵင်း | ၸၢႆးၵေႃႉ 1 (ဢႃယုမွၵ်ႈ 30), ယိင်း 3 ၵေႃႉ (ဢႃယု ၼႂ်းၵႄႈ 20-50) | တီႈဢေႇသုတ်း ႁိူၼ်းၵူၼ်းမိူင်း 4 လင်လုၵွႆ | |
| 12 | 20.1.2024 | ဝဵင်းမိူင်းမိတ်ႈ | သိုၵ်းမၢၼ်ႈ တပ်ႉမ 99 ႁႄႉၵူၼ်းၵႃႉၶမ်း သွင် ၵေႃႉဢၼ်ပၢႆႈ ၽေး ၵိုတ်း သေ သွၵ်ႈတဝ် ၸွမ်းတူဝ် ၶိင်းႁၼ် ၺႃးၶမ်း 7 ၸွႆႉလႄႈ ငိုၼ်းၸႄႈ 600 သႅၼ် တီႈၶဝ် ယဝ်ႉဢဝ်ၵႂႃႇ | |||
| 13 | 27.1.2024 | ဝၢၼ်ႈသူၺ်ႇၸႃႇလီႇ လႄႈဝၢၼ်ႈဢုင်းၵျေႃး မႂ်ႇ | သိုၵ်းမၢၼ်ႈဢဝ် ၵွင်ႈ လူင်ယိုဝ်း၊ ဢဝ်ၶိူင်ႈ မိၼ် ပွႆႇမၢၵ်ႇလူင်း ၼႂ်းဝၢၼ်ႈ | ႁိူၼ်းၵူၼ်းမွၵ်ႈ 200 လင်ၺႃးၽဝ် ၵမ်ႈ ၼမ် ပဵၼ်ၼႂ်းဝၢၼ်ႈ သူၺ်ႇၸႃႇလီႇ | ||
| 14 | 27.1.2024 | ပွၵ်ႉလႅတ်ႉၶူၵ်ႉတၢၼ်း ဝဵင်းမိူင်းမိတ်ႈ | ၶၢဝ်းယၢမ်း 4 မူင်း ဝၢႆး ဝၼ်း သိုၵ်းမၢၼ်ႈ ၶဝ်ႈ သွၵ်ႈတဝ် ႁိူၼ်း ၵူၼ်း မိူင်း 50 လင် သေ ဢဝ်ၾႆးၸုတ်ႇ ၽဝ်ပႅတ်ႈ | ႁိူၼ်းမွၵ်ႈ 50 လင် သွၵ်ႈတဝ်သေဢဝ် ၾႆးၽဝ် | ||
| 15 | 27.1.2024-2.2.2024 | ပွၵ်ႉၸၢၼ်းဝဵင်း မိူင်းမိတ်ႈ | ၽွင်းၵၢင်ဝၼ်း သိုၵ်း မၢၼ်ႈ သွၵ်ႈတဝ် ႁိူၼ်း ၵူၼ်းမိူင်းသေ ဢဝ်ၾႆး ၸုတ်ႇၽဝ် ပႅတ်ႈ | ႁိူၼ်းမွၵ်ႈ 100 လင် သွၵ်ႈတဝ်သေဢဝ် ၾႆးၽဝ် | ||
ႁူဝ်ယွႆႈလွင်ႈသိုၵ်းမၢၼ်ႈ ၶႃႈႁႅမ်ၵူၼ်းမိူင်းတၢႆႁၢမ်းပၵ်းႁၢမ်းပိူင်လႄႈ ၵၼ်ႉၸၼ်ၼၢင်းယိင်း
ၼႂ်းၶၢဝ်းတၢင်းဝၼ်းထိ 19/1/2024 ထိုင်ဝၼ်းထိ 2/2/2024 ၼၼ်ႉ သိုၵ်းမၢၼ်ႈတပ်ႉၸုမ်းလူင်/ တပ်ႉမ 99 ဢွၵ်ႇသၢႆသိုၵ်းတၢင်းၼွၵ်ႈဝဵင်းမိူင်းမိတ်ႈသေ ၵႂႃႇၶႃႈႁႅမ်ၵူၼ်းမိူင်းတၢႆ 17 ၵေႃႉ ၺႃးမၢတ်ႇၸဵပ်း 2 ၵေႃႉ။ ၵူၼ်းမိူင်းၸိူဝ်းၺႃးသိုၵ်းမၢၼ်ႈၶႃႈႁႅမ်တၢႆၼၼ်ႉ ၵမ်ႈၼမ်ပဵၼ်ၵူၼ်းၸၢႆးၸိူဝ်းပႂ်ႉၵႅတ်ႇၶႄၶူဝ်းၶွင်ႁိူၼ်းယေး ဝၢႆးသေႁႂ်ႈလုၵ်ႈမေးပီႈၼွင်ႉၵူၼ်းၼႂ်းႁိူၼ်းပၢႆႈၽေးသိုၵ်းၼၼ်ႉယဝ်ႉ။
ၼႂ်းဝၢၼ်ႈသူၺ်ႇၸႃႇလီႇ ဝၢၼ်ႈလဵဝ်ၵူၺ်း ၵူၼ်းဝၢၼ်ႈၸၢႆးၺႃးသိုၵ်းမၢၼ်ႈယိုဝ်းတၢႆ 7 ၵေႃႉ တႃႇသွင်ၵေႃႉတႄႉ ယိုဝ်းတၢႆယဝ်ႉ ဢဝ်ၽဝ်ပႅတ်ႈ။ ၼႂ်းပွၵ်ႉ ၵျီႇတေႃႇသုသမ်ႉ ၵူၼ်းဝၢၼ်ႈၸၢႆး 5 ၵေႃႉလႄႈ ယိင်း 1 ၵေႃႉ ၺႃးယိုဝ်းတၢႆ- ၵူၼ်းၸၢႆးၸိူဝ်းၼၼ်ႉၺႃးၸိူင်ႉမတ်ႉဝႆႉ ၼႃႈတေၺႃးယိုဝ်းတၢႆ၊ ၶၢပ်ႈတူဝ်တၢႆၼၢင်းယိင်းသမ်ႉၺႃးၽဝ်ၾႆး။
ၼွၵ်ႈသေၼၼ်ႉယင်းမီးလွင်ႈဢၼ်သိုၵ်းမၢၼ်ႈတပ်ႉမ 99 ၼႆႉ ဢဝ်ၾႃႉပၢတ်ႇထိူဝ်တူဝ်ၶိင်းၵူၼ်း ဝၢၼ်ႈ ၸိူဝ်းၼၼ်ႉသေ ဢဝ်တၢႆ။ ၵူၼ်းၼုမ်ႇၸၢႆးၵူၼ်းဝၢၼ်ႈသွင်ၵေႃႉ ၺႃးဢဝ်မိတ်ႈပၢတ်ႇ ၶေႃး ႁိမ်းၶူဝ် တၢင်း ၶဝ်ႈဝဵင်းမိူင်းမိတ်ႈ။
သိုၵ်းမၢၼ်ႈတပ်ႉမ 99 ၼႆႉ ၵႂႃႇၵၼ်ႉၸၼ်ၼၢင်းယိင်း ထႅင်ႈသၢမ်လွင်ႈ။ မိူဝ်ႈဝၼ်းထိ 19/1/2024 ၶၢဝ်းယၢမ်း 4 မူင်းၵၢင်ၼႂ်ၼၼ်ႉသိုၵ်းမၢၼ်ႈသၢမ်ၵေႃႉ ၶဝ်ႈ ၵႂႃႇၼႂ်းႁိူၼ်းလင်ၼိုင်ႈၼႂ်းပွၵ်ႉ ယႂႃႇတေႃႇလေး ဢၼ်မီး တၢင်း ၸဵင်ႇဝၼ်းတူၵ်းဝဵင်းမိူင်းမိတ်ႈ၊ သိုၵ်းမၢၼ်ႈ ဢဝ်ၵွင်ႈငႃပေႃႈမႄႈ ပီႈၼွင်ႉ မၼ်းၼၢင်းဝႆႉသေ ႁူမ်ႈ ၵၼ်ၵၼ်ႉၸၼ်ၼၢင်းယိင်းဢႃယု 24 ပီၵေႃႉၼိုင်ႈ ၼႂ်းလုၵ်းၼွၼ်း မၼ်းၼၢင်း။
ဝၼ်းထိ 20/1/2024 သိုၵ်းမၢၼ်ႈထႅင်ႈၸုမ်းၼိုင်ႈ ၵႂႃႇႁူပ်ႉၺႃးသွင်ၽူဝ်မေး ဢၼ်ၸူဝ်းၵၼ် ပၢႆႈ ၽေး ၵႂႃႇ ယူႇ ၼႂ်းထိူၼ်ႇသေ တေပွၵ်ႈၶိုၼ်းႁိူၼ်းပိူဝ်ႈတႃႇမိူဝ်းၸႂ်း ဝူဝ်းၵႂၢႆးၶဝ် ၼႂ်းဝၢၼ်ႈဢုင်း ၵျေႃးမႂ်ႇ။ သိုၵ်းမၢၼ်ႈဢဝ်ၵွင်ႈယိုဝ်းၵေႃႉပဵၼ်ၽူဝ်တၢႆပႅတ်ႈသေ ၵၼ်ႉၸၼ်ၼၢင်းယိင်းၵေႃႉပဵၼ်မေးယဝ်ႉ ဢဝ်ၵွင်ႈယိုဝ်းၶဝ်ႈ ၵူင်ၶေႃးမၼ်းၼၢင်းတၢႆ။
မိူဝ်ႈဝၼ်းထိ 26/1/2024 ၼၼ်ႉၵေႃႈသိုၵ်းမၢၼ်ႈ 5 ၵေႃႉၵႂႃႇႁူမ်ႈၵၼ်ၵၼ်ႉၸၼ် ၼၢင်းယိင်းဢႃယု 32 ပီ ၵေႃႉဢၼ်ပၢႆႈၽေးသိုၵ်းယူႇၼႂ်းထိူၼ်ႇ ႁိမ်းဝၢၼ်ႈသူၺ်ႇၸႃႇလီႇ၊ တီႈတူဝ်မၼ်းၼၢင်းမီးႁွႆး မၢတ်ႇၸဵပ်း တင်းၼမ်။
ၼွၵ်ႈသေၼၼ်ႉ သိုၵ်းမၢၼ်ႈယင်းၶိုင်ဢၢင်ႈၵၼ်ႉၸၼ်ၼၢင်းယိင်းထႅင်ႈမိူဝ်ႈဝၼ်းထိ 21/1/2024 ၽွင်း သိုၵ်းမၢၼ်ႈႁၼ်ၸုမ်းၵူၼ်းဝၢၼ်ႈၸုမ်းၼိုင်ႈဢၼ်တိုၵ်ႉဢွၼ်ၵၼ်ပၢႆႈၽေးသိုၵ်းတီႈဝၢၼ်ႈ မၢၵ်ႇမူင်ႈ ဝၢၼ်ႈ/တယႅၵ်ႉတေႃး၊ ၼႂ်းၼၼ်ႉပႃးၼၢင်းယိင်းၼုမ်ႇ 4 ၵေႃႉ။ သိုၵ်းမၢၼ်ႈၸိသင်ႇ ႁႂ်ႈ ၼၢင်း ယိင်းၼုမ်ႇ ၸိူဝ်းၼၼ်ႉ ယူႇတၢင်းလင်သေ ၸႅင်ႈလႅင်းဝႃႈၶဝ်ၶိုင်ဢၢင်ႈၵၼ်ႉၸၼ် ၼၢင်း ယိင်း။ ၵူၺ်းၵႃႈ ၵူၼ်းဝၢၼ်ႈ ၸၢႆးၵေႃႉၼိုင်ႈ ထဵင်ၶိုၼ်းဢမ်ႇယွမ်းသိုၵ်းမၢၼ်ႈသေ ႁႂ်ႈၼၢင်းယိင်း ၶဝ်ႁႃ တၢင်းဢွၵ်ႇ၊ မၼ်းၸၢႆးၺႃးသိုၵ်း မၢၼ်ႈဢဝ်ၸိူၵ်ႈမတ်ႉသေ ပေႃႉထုပ်ႉႁၢဝ်ႉႁႅင်း။ မၼ်းၸၢႆးတၢႆ ႁိုဝ်လိပ်းယင်းပႆႇမီးၽႂ်ႁပ်ႉႁူႉ။
| သိုၵ်းမၢၼ်ႈၶႃႈႁႅမ်ၵူၼ်းမိူင်းတၢႆႁၢမ်းပၵ်းႁၢမ်းပိူင် ၼႂ်းၸႄႈဝဵင်းမိူင်းမိတ်ႈ ၼႂ်းလိူၼ် ၸၼ်ႊ-ၾေႊ 2024 | ||||||
| ၶပ်ႉမၢႆ | ဝၼ်းထိ | ဝၢၼ်ႈ/ပွၵ်ႉ | ႁူဝ်ယွႆႈ | ၵူၼ်းမိူင်းတၢႆ | ၵူၼ်းမိူင်း မၢတ်ႇၸဵပ်း | ၶူဝ်းၶွင် လုသုမ်း |
| 1 | 19.1.2024 | ပွၵ်ႉယႂႃႇတေႃႇလေး | ၶၢဝ်းယၢမ်း 4 မူင်း ၵၢင်ၼႂ် သိုၵ်းမၢၼ်ႈ (တပ်ႉမ 99) သၢမ် ၵေႃႉ ၶဝ်ႈၵႂႃႇၼႂ်း ႁိူၼ်း လင်ၼိုင်ႈ သေ ႁူမ်ႈၵၼ် ၵၼ်ႉ ၸၼ် ၼၢင်း ယိင်း ဢႃယု 24 ၼႂ်းလုၵ်း ၼွၼ်း မၼ်းၼၢင်း | ၼၢင်းယိင်း ၵေႃႉ 1 ( ဢႃ ယု 24) | ||
| 2 | 19.1.2024
|
ဝၢၼ်ႈၵျီႇတေႃႇသု | သိုၵ်းမၢၼ်ႈ (တပ်ႉ မ 99) တိမတ်ႉ ၵူၼ်း ၸၢႆးၵေႃႉ ၼိုင်ႈသေ ပေႃႉထုပ်ႉ ယိုဝ်းတၢႆ ၽွင်းမၼ်းမၼ်းၸၢႆး ၵႅတ်ႇၶႄႁိူၼ်း | ၸၢႆးၵေႃႉ 1 (ဢႃယု 28) | ||
| 3 | 20.1.2024 | ဝၢၼ်ႈဢုင်းၵျေႃးမႂ်ႇ | သိုၵ်းမၢၼ်ႈ (တပ်ႉ မ 99) ႁူပ်ႉၺႃးသွင်ၽူဝ် မေး ပၢႆႈၽေး သိုၵ်း ၼႂ်းထိူၼ်ႇသေ ပွၵ်ႈ ၶိုၼ်း ဢၢၼ်းမိူဝ်းၸႂ်း ဝူဝ်း ၵႂၢႆး၊ သိုၵ်းမၢၼ်ႈ ယိုဝ်း ၵေႃႉပဵၼ်ၽူဝ် တၢႆသေ ၵၼ်ႉၸၼ် ၵေႃႉပဵၼ် မေး ယဝ်ႉ ဢဝ် ၵွင်ႈ ယိုဝ်းၶဝ်ႈ ၼႂ်းၵူင်ၶေႃး မၼ်း ၼၢင်းတၢႆ | ၸၢႆးၵေႃႉ 1 (ဢႃယု မွၵ်ႈ 30), ယိင်း ၵေႃႉ 1 (ဢႃ ယု မွၵ်ႈ 30) | ||
| 4 | 21.1.2024 | ဝၢၼ်ႈမၢၵ်ႇမူင်ႈဝၢၼ်/ တယႅတ်ႉတေႃႇ | သိုၵ်းမၢၼ်ႈ (တပ်ႉ မ 99) မတ်ႉၵူၼ်း ဝၢၼ်ႈ ၸၢႆးၵေႃႉ ၼိုင်ႈ ဢၼ် ႁႄႉ ႁၢမ်ႈၶဝ် ယႃႇႁႂ်ႈ ၼၢင်းယိင်းၼုမ်ႇ 4 ၵေႃႉတီႈဝၢၼ်ႈ | ၸၢႆးၵေႃႉ 1 (ဢႃယုမွၵ်ႈ 50) – ယင်း ပႆႇမီးႁပ်ႉႁူႉ ဝႃႈမၼ်းၸၢႆး တၢႆႁိုဝ်လိပ်း | ||
| 5 | 26.1.2024 | ဝၢၼ်ႈသူၺ်ႇၸႃႇလီႇ | သိုၵ်းမၢၼ်ႈ 5 ၵေႃႉ (တပ်ႉမ 99) ႁူမ်ႈၵၼ် ၵၼ်ႉၸၼ်ၼၢင်း ယိင်းၵေႃႉၼိုင်ႈ ဢၼ် ပၢႆႈၽေးသိုၵ်း မူၵ်းယူႇ ၼႂ်းထိူၼ်ႇ ႁိမ်းဝၢၼ်ႈမၼ်းၼၢင်း | ယိင်းၵေႃႉ 1 (ဢႃယု 32) | ||
| 6 | 2.2.2024 | ဝၢၼ်ႈသူၺ်ႇၸႃႇလီႇ | သိုၵ်းမၢၼ်ႈ (တပ်ႉမ 99) ၶူၼ်ႉသွၵ်ႈၼႂ်း ဝၢၼ်ႈသေ ယိုဝ်းတၢႆ ၵူၼ်းၸၢႆး ၸိူဝ်း ယူႇ ပႃႈလင်ႁိူၼ်း ၶဝ် သေပႂ်ႉၵႅတ်ႇၶႄ ၶူဝ်း ၶွင်ႁိူၼ်းယေး | ၸၢႆး 5 ၵေႃႉ (ဢႃယု 20-50 ပီ) | ||
| 7 | 12.2.2024 | ဝၢၼ်ႈသူၺ်ႇၸႃႇလီႇ | ၵူၼ်းဝၢၼ်ႈပွၵ်ႈၶိုၼ်း ႁိူၼ်းသေ ထူပ်းႁၼ် ၶၢပ်ႈတူဝ်တၢႆ ၵူၼ်း ဝၢၼ်ႈ 2 ၵေႃႉ ဢၼ် သိုၵ်းမၢၼ်ႈ ယိုဝ်းတၢႆ သေၽဝ် | ၸၢႆး 2 ၵေႃႉ | ||
| 8 | 13.2.2024 | ဝၢၼ်ႈၵျီႇတေႃႇသု | ၵူၼ်းဝၢၼ်ႈပွၵ်ႈၶိုၼ်း ႁိူၼ်းသေ ထူပ်းႁၼ် တူဝ်တၢႆၵူၼ်းဝၢၼ်ႈ ၵေႃႉၼိုင်ႈ ဢၼ် သိုၵ်းမၢၼ်ႈ မတ်ႉ သေယိုဝ်း တၢႆၼႂ်း ႁိူၼ်း | ၸၢႆး 1 ၵေႃႉ | ||
| 9 | 13.2.2024 | ပွၵ်ႉၵျီႇတေႃႇသု | ၵူၼ်းဝၢၼ်ႈဢွၼ်ၵၼ် ပွၵ်ႈႁိူၼ်းသေ ထူပ်း ၺႃးၶၢပ်ႈတူဝ်တၢႆၵူၼ်း ဝၢၼ်ႈ 6 ၵေႃႉဢၼ် သိုၵ်း မၢၼ်ႈယိုဝ်း တၢႆ- ၸၢႆးၵေႃႉ 1 ၺႃးမတ်ႉ သေယိုဝ်းတၢႆၵိုၵ်းႁိူၼ်း လင် ၼိုင်ႈ သေႁိမ်း ႁိူၼ်းလင် ၼႆႉသမ်ႉ မီးၶၢပ်ႈတူဝ် တၢႆၼၢင်း ယိင်းၵေႃႉ 1 ဢၼ်ၽဝ် ဢမ်ႇတၼ်းမႆႈသဵင်ႈ- ယိင်းၸွၵ်ႉၸဵင်ႇသူၼ် သမ်ႉထူပ်းႁၼ် ၵူၼ်း ၸၢႆး 4 ၵေႃႉၺႃးၸိူၵ်ႈ မတ်ႉ ပေလင်သေ ယိုဝ်းတၢႆ | |||
ႁူဝ်ယွႆႈလွင်ႈၵူၼ်းပၢႆႈၽေး
ဝၢႆးသိုၵ်းမၢၼ်ႈတႄႇဢဝ်ၵွင်ႈလူင်လႄႈဢဝ်မၢၵ်ႇပွႆႇၸွမ်းဝၢၼ်ႈ ဢၼ်ယူႇႁိမ်းဝဵင်းမိူင်းမိတ်ႈ တင်ႈတႄႇၸဝ်ႉလိူၼ်ၸၼ်ႊၼႃႊဝႃႊရီႊ ယဝ်ႉၵူၼ်းဝၢၼ်ႈဢွၼ်ၵၼ်ပၢႆႈၽေးၵႂႃႇပိုင်ႈႁူမ်ႈတီႈ ဝတ်ႉ/ၵျွင်းၼႂ်းဝဵင်း ပႃးၸဵမ်ၼႂ်းဝၢၼ်ႈၸိူဝ်းယူႇသၢႆၼွၵ်ႈ၊ ၸွမ်းႁႆႈၼႃးလႄႈၸွမ်းထိူၼ်ႇၶိူဝ်း။ ပေႃးပၢင်တိုၵ်းသိုပ်ႇလၢမ်းၶဝ်ႈၼႂ်း ဝဵင်းယဝ်ႉၵေႃႈ ၵူၼ်းမိူင်းၸိူဝ်းယူႇၼႂ်းဝဵင်း သမ်ႉဢွၼ်ၵၼ် ပၢႆႈဢွၵ်ႇဝဵင်းသေ ႁႃပိုင်ႈႁူမ်ႈပၢႆႈၽေးၸွမ်း ဝၢၼ်ႈၼွၵ်ႈ။ ၵူၼ်းမိူင်းမွၵ်ႈ 2,000 ၵေႃႈဢွၼ်ၵၼ် ပၢႆႈၸႄႈဝဵင်းသေၵႂႃႇပိုင်ႈႁူမ်ႈထိုင်ဝဵင်းလိူဝ်ႇ၊ ထိုင်ၵျွၵ်း မႄးလႄႈပၢင်ႇဢူးလူင် ၸိူဝ်းၼႆႉ။
ပဵၵ်ႉသမ်ႉ ပၢင်တိုၵ်းယဵၼ်မိူဝ်ႈႁၢင်လိူၼ် ၸၼ်ႊၼႃႊဝႃႊရီႊယဝ်ႉသေတႃႉ ၵူၼ်းပၢႆႈၽေး တိုၵ်ႉဢွၼ်ၵၼ် လွမ်ၵူဝ်တႃႇတေပွၵ်ႈၶိုၼ်းဝၢၼ်ႈၽႂ်ႁိူၼ်းမၼ်းယူႇ ၵွပ်ႈဝႃႈသိုၵ်းမၢၼ်ႈ တိုၵ်ႉယူႇဝႆႉၸွမ်းၼႂ်းဝဵင်းလႄႈ ႁိမ်း ႁွမ်း။
| ၶပ်ႉမၢႆ | ဢွင်ႈတီႈဢၼ်ၵူၼ်းပၢႆႈၽေးၼႂ်းမိူင်းမိတ်ႈပိုင်ႈႁူမ်ႈယူႇသဝ်းဝႆႉ | ႁူဝ်ၼပ်ႉ ၵူၼ်းပၢႆႈ ၽေး ဢၼ်လၢမ်း ၶၢတ်ႈ |
| 1. | ၸွမ်းဝတ်ႉ/ၵျွင်း၊ ဝၢၼ်ႈၼွၵ်ႈ၊ ၸွမ်းႁႆႈၼႃးလႄႈၸွမ်းၼႂ်း ထိူၼ်ႇ ၸႄႈဝဵင်းမိူင်းမိတ်ႈ | 4,300 |
| 2. | တိူင်းဝဵင်းတႃႈလိူဝ်ႇ (မၼ်းတလေး) | 1,560 |
| 3. | ၸႄႈဝဵင်းၵျွၵ်းမႄး | 200 |
| 4. | ၸႄႈဝဵင်းပၢင်ႇဢူးလူင် | 100 |
| ႁူမ်ႈတင်းမူတ်း | 6,160 |
တွင်ႈထၢမ်
ၸၢႆးႁေႃသႅင် +66 99 246 5673 / +66 94 728 6696 Signal (တႆး, ဢင်းၵိတ်း)
ယိင်းလႅင်းႁၢၼ် +66 99 289 6080 Signal (မၢၼ်ႈ)
Download PDF files >>>>>