ၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆးမၢႆ 02/2018
ဝၼ်းထိ01/03/2018
ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆးသၢၼ်ၶတ်းလွင်ႈပၼ်တၢမ်ႇၶွၵ်ႈဢမ်ႇပဵၼ်ထမ်း (တြႃး) တေႃႇၵူၼ်းမိူင်းၼႂ်းထုင်ႉႁူဝ်ပူင်းထိုင်သိပ်းပီ
ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆးသၢၼ်ၶတ်းလွင်ႈပၼ်တၢမ်ႇၶွၵ်ႈၵူၼ်းဝၢၼ်ႈပႅတ်ႇၵေႃႉၼႂ်းထုင်ႉပူင်းၸိုင်ႈတႆးပွတ်းၸၢၼ်းမိူဝ်ႈဝၼ်းထိ 26/02/2018 တင်ႈတႄႇသီႇပီထိုင်သိပ်းပီ။
ၵူၼ်းဝၢၼ်ႈၸၢဝ်းၼႃးၺႃးတိမတ်ႉတင်ႈတႄႇလိူၼ်ၵျူႊလၢႆႊ 2017 သေလႆႈထုၵ်ႇၵုမ်းၶင်ဝႆႉၼႂ်းၶွၵ်ႈႁူဝ်ပူင်းယွၼ်ႉထၢင်ႇထိူမ်ဝႃႈမီးလွင်ႈၵွင်ႉၵၢႆႇၸွမ်းၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/ SSA ဝၢႆးပဵၼ်ပၢင်တိုၵ်းၵၼ်ၸွမ်းသိုၵ်းမၢၼ်ႈမိူဝ်ႈဝၼ်းထိ 14/07/2017။ဝၢႆးပၢင်တိုၵ်းယဝ်ႉသိုၵ်းမၢၼ်ႈၽိူမ်ႉထႅမ်ဢဵၼ်ႁႅင်းၼပ်ႉႁူဝ်ပၢၵ်ႇၶဝ်ႈၼႂ်းပိုၼ်ႉတီႈသေၶဝ်ႈဝႅတ်ႉလွမ်ႉလႄႈပေႃႉထုပ်ႉၵူၼ်းဝၢၼ်ႈဢမ်ႇလိူၵ်ႈၼႃႈသင်ယဝ်ႉမၢပ်ႇၼႄးဝႃႈၵူၼ်းဝၢၼ်ႈၵမ်ႉထႅမ်ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၼႆယဝ်ႉ။
ၵူၼ်းဝၢၼ်ႈၺႃးတိမတ်ႉယွၼ်ႉမီးၶူဝ်းၶွင်ၸၢၵ်ႈလၢတ်ႈ၊ၵွင်ႈသတ်ႉယၢမ်း၊မၢၵ်ႇၵွင်ႈပဵၵ်ႉသမ်ႉၶူဝ်းၶွင်ၸိူဝ်းၼႆႉပဵၼ်ဢၼ်ၵူၼ်းဝၢၼ်ႈၸႂ်ႉတိုဝ်းၵၼ်ၵူႈဝၼ်းတၢမ်ၾိင်ႈထုင်းပႂ်ႉႁႆႈလႄႇထိူၼ်ႇၸိူဝ်းၼႆႉ။
ၵူၼ်းဝၢၼ်ႈၺႃးတိၵုမ်းၶင်ဝႆႉတီႈၼႂ်းၶွၵ်ႈႁူဝ်ပူင်းလႄႈလႆႈၶဝ်ႈလုမ်းတြႃးလၢႆလၢႆပွၵ်ႈသေၸၼ်ၶၢဝ်းယၢမ်းထိုင်ႁူၵ်းလိူၼ်ပၢႆၵွပ်ႈဝႃႈၽူႈမၢပ်ႇၼႄးတၢင်းၽိတ်း (သိုၵ်းမၢၼ်ႈ) ဢမ်ႇၶဝ်ႈႁူမ်ႈၸွမ်းၼႄလၵ်းထၢၼ် (သၢၵ်ႈသေႇ) လႆႈတႅတ်ႈတေႃးဢမ်ႇၼၼ်ဢမ်ႇတွပ်ႇလၢတ်ႈသင်ၼႂ်းလုမ်းတြႃး။
မိူဝ်ႈဝၼ်းထိ 26/02/2018 ၼၼ်ႉပီႈၼွင်ႉၵူၼ်းဝၢၼ်ႈၸိူဝ်းၺႃးတိမတ်ႉၵုမ်းၶင်ဝႆႉၼႂ်းၶွၵ်ႈလႄႈၽူႈၵွၼ်းဢိူင်ႇ (ဢုၵ်ႉၵထ) ႁွတ်ႈၽႅဝ်ၵႂႃႇတီႈၶွၵ်ႈႁူဝ်ပူင်းမိူဝ်ႈၶၢဝ်းယၢမ်း 8 ၵၢင်ၼႂ်သေၽူႈၵႄႈတၢင် (lawyer) ၶဝ်လၢတ်ႈဝႃႈတေပူတ်းထွၼ်ပႅတ်ႈၶေႃႈၼႄး/ၶေႃႈႁႃတင်းမူတ်းယဝ်ႉၼႆ။ၵူၺ်းၵႃႈသမ်ႉၵိုင်ႉၵၢင်ႉပၼ်တၢမ်ႇၶွၵ်ႈသေဢဝ်လၢႆႈသူင်ႇၸူးၶွၵ်ႈတွင်ႇလေးလူင်းတီႈၸႄႈဝဵင်းယွင်ႁူၺ်ႈ (ၺွင်ႇသူၺ်ႇ) လႄႈႁဵတ်းႁႂ်ႈပီႈၼွင်ႉၸိူဝ်ႉၶိူဝ်းၶဝ်ၽိုၵ်ႉၽၢၵ်ႉတူၵ်းၸႂ်ၸွမ်းတႄႉ။ၽွင်းဢဝ်တူဝ်ၶဝ်ၵႂႃႇၼၼ်ႉၵေႃႈပီႈၼွင်ႉၸိူဝ်ႉၶိူဝ်းၶဝ်ဢမ်ႇတၼ်းလႆႈႁၼ်။
ၵူၼ်းဝၢၼ်ႈၸိူဝ်းၼႆႉၺႃးၶေႃႈၼႄး/ၶေႃႈႁႃၶေႃႈ 67 ပၵ်းပိူင်လွင်ႈၵပ်းသိုပ်ႇသၢၼ် (ယွၼ်ႉမီးၸၢၵ်ႈလၢတ်ႈ)၊ပၵ်းပိူင်မၢႆ 3/3 လႄႈ 5/4 ပီ1956 ပၵ်းပိူင်ၾၢႆႇႁူမ်ႇလူမ်ႈမိူင်းႁူမ်ႈတုမ်- ၵၢၼ်ပိုတ်ႇၼႃႈသိုၵ်းၶိုၵ်ႉတွၼ်း (ယွၼ်ႉမီးၼႂ်းပိုၼ်ႉတီႈသိုၵ်းသိူဝ်ဢၼ်ဢမ်ႇလႆႈၶႂၢင်ႉ) လႄႈပၵ်းပိူင်ၶေႃႈ 12 ပၵ်းပိူင်ၵွင်ႈၵၢင်ႇ (ယွၼ်ႉမီး ၵွင်ႈ ဢၼ်ထၢင်ႇထိူမ်သေလွင်ႈလွင်ႈ) လႄႈၶေႃႈ 8 ပၵ်းပိူင်ၾၢႆႇတေႃႉသူင်ႇ(ယွၼ်ႉမီးရူတ်ႉ/ၵႃးဢမ်ႇပဵၼ်တၢင်းၵၢၼ်ဢမ်ႇမီးၶွၼ်ႇ) ၸိူဝ်းၼႆႉ။
| မၢႆၶပ်ႉ | ၸိုဝ်ႈၵူၼ်းဝၢၼ်ႈ | ဢႃယု | ဝၢၼ်ႈတီႈၺႃး | တပ်ႉၵွင်သိုၵ်းမၢၼ်ႈဢၼ်တိမတ်ႉၵူၼ်းဝၢၼ်ႈ | ၶေႃႈၼႄး/ၶေႃႈႁႃဢၼ်ၼႄးသႂ်ႇၵူၼ်းဝၢၼ်ႈ | တၢမ်ႇၶွၵ်ႈ |
| 1 | ၸၢႆးၵူဝ်ႇ | 37 | ဝၢၼ်ႈၼမ်ႉၶူၵ်ႉ | ၶလရ 225 လႄႈ ၶလရ 249 | ပၵ်းပိူင်လွင်ႈၵပ်းသိုပ်ႇသၢၼ် – 1 ပီ
ပၵ်းပိူင်ၾၢႆႇႁူမ်ႇလူမ်ႈ -3 ပီ |
4 ပီ |
| 2 | ၸၢႆးလႃႉထုၼ်း | 24 | ဝၢၼ်ႈၶူဝ်တွင်း | ၶမရ 424 | ပၵ်းပိူင်လွင်ႈၵပ်းသိုပ်ႇသၢၼ် – 1 ပီ
ပၵ်းပိူင်ၾၢႆႇႁူမ်ႇလူမ်ႈ -3 ပီ |
4 ပီ |
| 3 | လုင်းဢေႃးၼ | 40 | ဝၢၼ်ႈၼမ်ႉၶူၵ်ႉ | ၶလရ 225 လႄႈ ၶလရ 249 | ပၵ်းပိူင်ၵွင်ႈၵၢင်ႇ | 7 ပီ |
| 4 | ၸၢႆးၸိင်ႇတႃႇ | 28 | ဝၢၼ်ႈၼမ်ႉၶူၵ်ႉ | ၶလရ 225 လႄႈ ၶလရ 249 | ပၵ်းပိူင်ၵွင်ႈၵၢင်ႇ | 7 ပီ |
| 5 | ၸၢႆးၸၢမ်ႇ | 29 | ဝၢၼ်ႈၶူၵ်ႉလဝ်း | ၶမရ 424 | ပၵ်းပိူင်ၵွင်ႈၵၢင်ႇ | 7 ပီ |
| 6 | ၸၢႆးၶုၼ် | 30 | ဝၢၼ်ႈမၢၵ်ႇလၢင်း | ၶလရ 249 | ပၵ်းပိူင်ၵွင်ႈၵၢင်ႇ | 7 ပီ |
| 7 | ၸၢႆးပၼ်ႇတ | 30 | ဝၢၼ်ႈၶူၵ်ႉလဝ်း | ၶမရ 424 | ပၵ်းပိူင်လွင်ႈၵပ်းသိုပ်ႇသၢၼ် – 1 ပီ
ပၵ်းပိူင်ၵွင်ႈၵၢင်ႇ – 7 |
8 ပီ |
| 8 | လုင်းသၢင်ႇၸၢႆး | 47 | ဝၢၼ်ႈၵုၼ်ၵုင်း | ၶလရ 249 | ပၵ်းပိူင်ၾၢႆႇတေႃႉသူင်ႇ -3 ပီ
ပၵ်းပိူင်ၵွင်ႈၵၢင်ႇ – 7 |
10 ပီ |
ဢွၼ်ႇၸၢႆးဢႃယုပီၸၢႆးဝိၼ်းၵေႃႈၺႃးတိမတ်ႉၶၢဝ်းယၢမ်းလဵဝ်ၵၼ်တင်းၵူၼ်းဝၢၼ်ႈယွၼ်ႉမီးၸၢၵ်ႈလၢတ်ႈၼႆသေၺႃးၵုမ်းၶင်ဝႆႉၼိုင်ႈလိူၼ်ၼၼ်ႉၵေႃႈၺႃးၶေႃႈၼႄး/ၶေႃႈႁႃယူႇၵူၺ်းၵႃႈပႆႇလႆႈပၼ်တၢမ်ႇ။
ပီႈၼွင်ႉၸိူဝ်ႉၶိူဝ်းၵူၼ်းဝၢၼ်ႈၸိူဝ်းၺႃးတိမတ်ႉပၼ်တၢမ်ႇၶွၵ်ႈၸိူဝ်းၼႆႉႁႃတၢင်းတၢင်ႇလိူင်ႈၼႂ်းႁူဝ်ပူင်းသၢၼ်ၶတ်းလွင်ႈတႅပ်းတတ်းတြႃးလုမ်းတြႃးၼႆႉယူႇ။
လွင်ႈပၼ်တၢမ်ႇၵူၼ်းဝၢၼ်ႈဢမ်ႇမီးတၢင်းၽိတ်းသင်ၸိူဝ်းၼႆႉပဵၼ်လွင်ႈပိုတ်ႇၼႄဝႃႈၼႂ်းမိူင်းႁူမ်ႈတုမ်မၢၼ်ႈဢမ်ႇမီးတြႃးလွင်ႈၽဵင်ႇပဵင်းၼၼ်ႉယဝ်ႉ။သိုၵ်းမၢၼ်ႈတိုၼ်းၶိုၼ်ႈၶၼ်တဵၵ်းတဵင်ပၼ်တၢမ်ႇၶွၵ်ႈႁၢႆႉၵျၢမ်းတႃႇလွၵ်ႇငိုတ်ႈၵူၼ်းဝၢၼ်ႈၸၢဝ်းတႆးၵူဝ်သေလွၵ်ႇငိုတ်ႈပႃးၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ယႃႇႁႂ်ႈတုမ်ႉတွပ်ႇသၢၼ်ၶတ်းလွင်ႈသိုၵ်းမၢၼ်ႈသိုပ်ႇၶႂၢၵ်ႈၼႃႈသိုၵ်းလႄႈလွင်ႈသေႇယူင်းပူင်းယႃႉႁႂ်ႈပဵၼ်ပၢင်တိုၵ်းၶဝ်ၼၼ်ႉယဝ်ႉ။ၼႂ်းလၢႆလိူၼ်ပူၼ်ႉမႃးၼႆႉပဵၵ်ႉသမ်ႉ RCSS/SSA ပဵၼ်ၸုမ်းလူင်းလၢႆးမိုဝ်းၵိုတ်းတိုၵ်းတူဝ်ႈမိူင်း NCA ၼႆသေတႃႉသိုၵ်းမၢၼ်ႈထႅမ်ႁႅင်းသိုၵ်းၶဝ်ႈၼႂ်းပိုၼ်ႉတီႈတင်းၼမ်။
ၸၢႆးႁေႃသႅင်ၽူႈၶၢၼ်ပၢၵ်ႇၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆးလၢတ်ႈဝႃႈ “ၼႂ်းၶၵ်ႉၵၢၼ်လွင်ႈငမ်းယဵၼ်ၼႆႉၵူၼ်းမိူင်းဢမ်ႇမီးလွင်ႈႁူမ်ႇလူမ်ႈသင်”ၼႆ။ “ၵူၼ်းဝၢၼ်ႈလႆႈထုၵ်ႇပဵၼ်ယိူဝ်ႇသိုၵ်းမၢၼ်ႈပိူဝ်ႈတႃႇဢဝ်မိပ်ႇငႅၼ်းၸုမ်းမႅၵ်ႇၵွင်ႈၵၢင်ႇႁႂ်ႈယွမ်းယူႇပႃႈတႂ်ႈၶဝ်ၼၼ်ႉယဝ်ႉ” ဝႃႈၼႆ။
ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆးတိုၵ်းသူၼ်းထိုင်ၸုမ်းၵမ်ႉထႅမ်လွင်ႈငမ်းယဵၼ်ၼႂ်းမိူင်းႁူမ်ႈတုမ်မၢၼ်ႈႁႂ်ႈဢဝ်လွင်ႈပၼ်တၢမ်ႇၵူၼ်းဝၢၼ်ႈၼႂ်းထုင်ႉႁူဝ်ပူင်းဢမ်ႇၽဵင်ႇပဵင်းပဵၼ်ထမ်း/တြႃးၸိူဝ်းၼႆႉဢွၵ်ႇလၢတ်ႈၼႄၵူၼ်းမိူင်းတူဝ်ႈလုမ်ႈၾႃႉသေတုၵ်းယွၼ်းႁႂ်ႈပွႆႇပၼ်ၵူၼ်းဝၢၼ်ႈဝႆးဝႆးလူၺ်ႈဢမ်ႇမီးၶေႃႈၼွင်ႇမတ်ႉသင်ၼၼ်ႉယဝ်ႉ။
ႁူဝ်ယွႆႈလွင်ႈတိမတ်ႉၵူၼ်းဝၢၼ်ႈၼၼ်ႉၶဝ်ႈတူၺ်းလႆႈတီႈၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆးတၢမ်ၼင်ႇပႃႈတႂ်ႈၼႆႉလႆႈယူႇၶႃႈ
သိုၵ်းမၢၼ်ႈသိုပ်ႇပေႃႉထုပ်ႉ၊ၶႃႈႁႅမ်၊တိၺွပ်းၵူၼ်းမိူင်း
တုၵ်းယွၼ်းႁႂ်ႈပူတ်းထွၼ်ၶေႃႈမၢပ်ႇၽၢမ်းႁႃလိူင်ႈၵူၼ်းဝၢၼ်ႈ
ၵပ်းသိုပ်ႇတွင်ႈထၢမ်
ၸၢႆးႁေႃသႅင် +66: 62- 941-9600 (တႆး၊ဢင်းၵိတ်း)
ၸၢႆးယွတ်ႈလိုၼ်း +66: 97- 143-1530 (တႆး၊မၢၼ်ႈ)
ၸၢႆးသႅင်တႆး +66: 94- 728-6696 (တႆး၊မၢၼ်ႈ)
PDF files: >>>