ၽိုၼ်တၢမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 16/12/2025
သိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇလႄႈဢဝ်ၵွင်ႈလူင်ယိုဝ်း ၼႂ်းၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ တိူဝ်ႉၺႃးၵူၼ်းမိူင်းတၢႆ 12 ၵေႃႉ၊ မၢတ်ႇၸဵပ်း 9 ၵေႃႉ
ၼႂ်းၶၢဝ်းတၢင်းဝၼ်းထိ 6 လႄႈ 11/12/2025 ၼၼ်ႉသိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇသေ တိူဝ်ႉၺႃး ၵူၼ်းမိူင်းတၢႆ 12 ၵေႃႉ ယဝ်ႉမၢတ်ႇၸဵပ်း 9 ၵေႃႉ ၼႂ်းၸႄႈဝဵင်းမိူင်ႈမိတ်ႈ ၸိုင်ႈတႆႈပွတ်းႁွင်ႇ။
မိူဝ်ႈဝၼ်းထိ 6/12/2025 ၶၢဝ်းယၢမ်း 9 မူင်းၵၢင်ၼႂ် သိုၵ်းမၢၼ်ႈဢဝ်ၶိူင်ႈမိၼ် သႅၼ်း Y-12 မႃးပွႆႇမၢၵ်ႇတီႈ ဝၢၼ်ႈၼမ်ႉၶွႆႈ (မျိတ်ႉၸူင်ႇ) ဢၼ်မီးႁိမ်းၼမ်ႉမၢဝ်းတၢင်းၸဵင်ႇႁွင်ႇဝၼ်းတူၵ်း ႁၢင်ႇၵႆဝဵင်းမိူင်းမိတ်ႈ 20 ၵီႊ လူဝ်ႊမႄႊတိူဝ်ႊ။ ဝၢႆးၼၼ်ႉ ၶၢဝ်းယၢမ်း 9:20 ၵၢင်ၼႂ် ၽွင်းၵူၼ်းဝၢၼ်ႈတိုၵ်ႉဢွၼ်ၵၼ်တေႃႉဢဝ်ၵူၼ်းမၢတ်ႇ လႄႈၵူၼ်းတၢႆယွၼ်ႉမၢၵ်ႇသိုၵ်းမၢၼ်ႈပွႆႇယူႇၼၼ်ႉ သိုၵ်းမၢၼ်ႈၶိုၼ်းဢဝ်ၶိူင်ႈမိၼ်တိုၵ်း Jet fighter မႃးပွႆႇ မၢၵ်ႇထႅင်ႈၵမ်းၼိုင်ႈ။
ဢၼ်သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇသွင်ပွၵ်ႈၼႆႉ ႁဵတ်းႁႂ်ႈတိူဝ်ႉၺႃးၵူၼ်းမိူင်းတၢႆ 11 ၵေႃႉ ပႃးတင်းမႄႈ မၢၼ်း (မႄႈပႃးတွင်ႉ) ၵေႃႉၼိုင်ႈ၊ လုၵ်ႈဢွၼ်ႇ 2 ၵေႃႉယဝ်ႉ ၵူၼ်းမိူင်းမၢတ်ႇၸဵပ်းထႅင်ႈ 9 ၵေႃႉ။ ၵူၼ်းမိူင်း ၸိူဝ်းၺႃးတၢမ်ႇၶိူင်ႈမိၼ်ၼႆႉ ပဵၼ်ၵူၼ်းမိူင်းၵုတ်ႈလႄႈမိူင်းမိတ်ႈၸိူဝ်းပၢႆႈၽေးသိုၵ်း ယွၼ်ႉၵူဝ်သိုၵ်းမၢၼ်ႈ တေၶဝ်ႈဝဵင်း ၶိုၼ်းၼၼ်ႉယဝ်ႉ။
ပဵၵ်ႉသမ်ႉပဵၼ်ပၢင်တိုၵ်းႁၢဝ်ႉႁႅင်းၸွမ်းသဵၼ်ႈတၢင်းလူင်ၸႄႈဝဵင်းမိူင်းမိတ်ႈထိုင် ၸႄႈဝဵင်းတပဵၵ်ႉၵျိၼ်း ဝၢႆး သိုၵ်းမၢၼ်ႈၶိုၼ်းၵုမ်းၵမ်ဝဵင်းမိူင်းမိတ်ႈ ၼႂ်းဝူင်ႈလိုၼ်းသုတ်းလိူၼ် ၼူဝ်ႊဝႅမ်ႊပိူဝ်ႊ 2025 ယဝ်ႉသေတႃႉ ၸွမ်းဝၢၼ်ႈၼမ်ႉၶွႆႈ (မျိတ်ႉၸူင်ႇ) ဢၼ်သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇၼၼ်ႉတႄႉ ဢမ်ႇမီးပၢင်တိုၵ်း သိုၵ်း သိူဝ်သင်။
ထႅင်ႈၾၢႆႇၼိုင်ႈ၊ ၸွမ်းသၢႆၾင်ႇမႄႈၼမ်ႉမိတ်ႈၼႆႉ မီးမိူင်ၶုတ်းၶမ်း ဢၼ်ၸၢဝ်းၶႄႇၶဝ်မႃးၶုတ်း ပဵၼ်လၢႆလၢႆ ဢွင်ႈတီႈ၊ ႁၢင်ႇၵႆဝၢၼ်ႈၼမ်ႉၶွႆႈ တီႈဢၼ်သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇၼၼ်ႉ 3 ၵီႊလူဝ်ႊမႄႊတိူဝ်ႊ ၵူၺ်း။
ဝၢၼ်ႈၼမ်ႉၶွႆႈ (မိတ်ႉၸူင်ႇ) ၼႆႉယူႇတွၼ်ႈတၢင်းတႂ်ႈၽၢႆၼမ်ႉမၢဝ်းမၢႆ 3 ႁၢင်ႇၵၼ်မွၵ်ႈ 8 ၵီႊလူဝ်ႊမႄႊတိူဝ်ႊ။ ၶူင်းၵၢၼ်ၽၢႆၾႆးၾႃႉႁႅင်းၼမ်ႉ 671 မႄႊၵႃႊဝတ်ႊၼႆႉ ၶွမ်ႊပၼီႊ Electricite de France (EDF) ၶွင်မိူင်း ၾရင်ႊ သဵတ်ႊ လႆႈၵိုတ်းယင်ႉဝႆႉၼႂ်းလိူၼ်မျၢတ်ႉၶျ် 2021 ဝၢႆသိုၵ်းမၢၼ်ႈယိုတ်းဢႃႇၼႃႇ (ဢၢမ်းၼၢတ်ႈ) ၸိုင်ႈမိူင်း။ ၼႂ်းလိူၼ်ဢေႃးၵၢတ်ႊ 2023 သိုၵ်းမၢၼ်ႈသိုပ်ႇႁႃၽူႈတေမႃးသိုပ်ႇတေႃႇၶူင်းၵၢၼ်ၽၢႆ၊ ၵူၺ်းၵႃႈ ယင်းပႆႇပိုၼ် ၽၢဝ်ႇၸိုဝ်ႈ/သဵၼ်ႈမၢႆ ၽူႈတေမႃးသိုပ်ႇတေႃႇၵေႃႇသၢင်ႈၵႂႃႇ။
ဝၼ်းထိ 11/12/2025 ၵၢင်ၼႂ် သိုၵ်းမၢၼ်ႈလႄႈသိုၵ်းလုၵ်ႉၽိုၼ်ႉပဵၼ်ပၢင်တိုၵ်းၵၼ် ၼႂ်းၵႄႈသဵၼ်ႈတၢင်း လူင် မိူင်းမိတ်ႈ-တပဵၵ်ႉၵျိၼ်း။ ဝၼ်းၼၼ်ႉၶၢဝ်းယၢမ်းမွၵ်ႈ 11 မူင်းၵၢင်ၼႂ် သိုၵ်းမၢၼ်ႈဢဝ်တီႈယူႇ တီႈ ဝၢၼ်ႈမၢၵ်ႇၵႅင်း (မၵျီးပိၼ်ႇ) ဢၼ်မီးတၢင်းတူၵ်းဝဵင်းမိူင်းမိတ်ႈ ႁၢင်ႇၵႆၵၼ် 20 ၵီႊလူဝ်ႊမႄႊတိူဝ်ႊ ၼၼ်ႉ ဢဝ် ၵွင်ႈလူင်ၶဝ်ယိုဝ်းၵႂႃႇၼႃႈတၢင်းတူၵ်း၊ ၸၢၵ်ႇမၢၵ်ႇလူင်ၵႂႃႇတိူဝ်ႉၺႃး ၵူၼ်းဝၢၼ်ႈယိင်း ဢႃယု 40 ဢၼ်တိုၵ်ႉ လဵင်ႉဝူဝ်းၵႂၢႆးယူႇၼႂ်းတူင်ႈၼႃး ႁိမ်းဝၢၼ်ႈၼမ်ႉတူၵ်း (ယႄႇတၶုၼ်ႇ) ၼၼ်ႉလႆႈလုတၢႆၸွမ်း။
Download PDF Files:
