ၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 21/3/2025
သိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇ ဢဝ်ၵွင်ႈလူင်ယိုဝ်း တိူဝ်ႉၺႃးသင်ႇၶႃႇၸဝ်ႈ 5 တူၼ်/ပႃးလွၼ်ႇ၊ မၢတ်ႇ ၸဵပ်း 14 ႁူမ်ႈတင်းၵူၼ်းမိူင်း လုတၢႆမၢတ်ႇၸဵပ်း 36 ၵေႃႉၼႂ်းၸႄႈဝဵင်းၼွင်ၶဵဝ်
ၽွင်းဝၼ်းထိ 8-17/3/2025 ၼၼ်ႉသိုၵ်းမၢၼ်ႈဢဝ်ၶိူင်ႈမိၼ်တိုၵ်း၊ ဢဝ်ၻရူၼ်ႊပွႆႇမၢၵ်ႇ ဢဝ်ၵွင်ႈလူင် ယိုဝ်း လႄႈ ႁဵတ်းႁႂ်ႈၵူၼ်းမိူင်းလုတၢႆ 14 ၵေႃႉ၊ မၢတ်ႇၸဵပ်း 22 ၼႂ်းၸႄႈဝဵင်းၼွင်ၶဵဝ် ဢၼ်သိုၵ်းလွႆ/တဢၢင်း TNLA ၵုမ်းၵမ်။ ၵူၼ်းမိူင်းဢၼ်လုတၢႆမၢတ်ႇၸဵပ်းၼၼ်ႉ ၵမ်ႈၼမ် ပဵၼ်သင်ၶႃႇ ၸဝ်ႈသၢင်ႇဢွၼ်ႇ ယွၼ်ႉသိုၵ်း မၢၼ်ႈ တင်ႈၸႂ်ဢဝ်ၶိူင်ႈမိၼ်ပွႆႇမၢၵ်ႇသႂ်ႇဝတ်ႉ/ၵျွင်းတိူၵ်ႈသွၼ်လိၵ်ႈၼႂ်းဝဵင်း။
ဝၼ်းထိ 8/3/2025 ၶၢဝ်းယၢမ်း 7 မူင်းႁူဝ်ၶမ်ႈသိုၵ်းမၢၼ်ႈဢဝ်ၵွင်ႈလူင်ယိုဝ်းၶဝ်ႈၵႂႃႇၼႂ်း ဝၢၼ်ႈၼႃးၵျွင်းၶမ်း သေ တိူဝ်ႉၺႃးလုၵ်ႈဢွၼ်ႇၵေႃႉၼိုင်ႈမၢတ်ႇၸဵပ်းလႄႈႁိူၼ်းလုၵွႆၼိုင်ႈလင်။ ၵူၼ်းဝၢၼ်ႈ တူၵ်းၸႂ်ယွၼ်ႉ မၢၵ်ႇ လူင်သေဢွၼ်ၵၼ်ပၢႆႈၽေးၵႂႃႇတၢင်ႇဝၢၼ်ႈ။
ဝၼ်းထိ 14/3/2025 ၶၢဝ်းယၢမ်း 10 မူင်းၵၢင်ၼႂ် သိုၵ်းမၢၼ်ႈဢဝ်ၻရူၼ်ႊပွႆႇမၢၵ်ႇၸွမ်းသူၼ်ဢွႆႈ ႁိမ်းဝၢၼ်ႈ ယႃႇပိၼ်ႇ ၼႂ်းဢိူင်ႇၼွင်တေႃႇသေ တိူဝ်ႉၺႃးၼၢင်းယိင်းၼုမ်ႇသၢမ်ၵေႃႉတၢႆ၊ ၵူၼ်းဝၢၼ်ႈမၢတ်ႇၸဵပ်းထႅင်ႈ ႁႃႈၵေႃႉ (ၸၢႆး 2 ယိင်း 3) ၽွင်းတိုၵ်ႉတႅပ်းဢွႆႈ။ ဝၢၼ်ႈယႃႇပိၼ်ႇၼႆႉပဵၼ်ဝၢၼ်ႈထၼု ဢၼ်ပိုင်ႈဢိင်သူၼ် ဢွႆႈ သေ ႁဵတ်းၵၢၼ်ႁႃၵိၼ်လဵင်ႉတွင်ႉ။
ဝၼ်းထိ 16/3/2025 ၶၢဝ်းယၢမ်း 5:30 ႁူဝ်ၶမ်ႈ သိုၵ်းမၢၼ်ႈဢဝ်ၶိူင်ႈမိၼ် Jet fighter မႃးပွႆႇမၢၵ်ႇၼမ်ႉၼၵ်း 250 ပွင်ႊ သီႇလုၵ်ႈယဝ်ႉဢဝ်ၵွင်ႈၸၢၵ်ႈယိုဝ်းသႂ်ႇဝတ်ႉ/ၵျွင်းတိူၵ်ႈသွၼ်လိၵ်ႈ သဵင်ႇရတၼႃႇ ဢၼ်မီးတၢင်း ၸဵင်ႇ ဢွၵ်ႇ ဝဵင်းၼွင်ၶဵဝ်။ လွင်ႈၼၼ်ႉႁဵတ်းႁႂ်ႈၵူၼ်းမိူင်း 11 ၵေႃႉ (ၸဝ်ႈၸၢင်း 2 တူၼ်၊ ၸဝ်ႈသၢင်ႇ 5 တူၼ်၊ ၵူၼ်းၸၢႆး 2 ၵေႃႉလႄႈၼၢင်းယိင်း 2 ၵေႃႉ) လုလွၼ်ႇ/တၢႆသေ မၢတ်ႇၸဵပ်းထႅင်ႈ 18 ၵေႃႉ (ၸဝ်ႈသၢင်ႇ 14 တူၼ်၊ ၼၢင်းယိင်း 3 ၵေႃႉလႄႈၵူၼ်းၸၢႆး 1 ၵေႃႉ)။ မၢင်ၵေႃႉတၢႆထင်တီႈယွၼ်ႉမၢၵ်ႇၵမ်းလဵဝ်၊ ၵူၺ်းၵႃႈ ၸဝ်ႈ သၢင်ႇ 4 တူၼ်ၺႃးမၢၵ်ႇၵွင်ႈၸၢၵ်ႈ ၽွင်းတိုၵ်ႉႁႃတၢင်းပၢႆႈသေလႆႈလုလွၼ်ႇၵႂႃႇ။ ၵွပ်ႈတိုၵ်ႉပဵၼ်ယၢမ်း ဝၢႆး ဝၼ်းတိုၵ်ႉလႅင်းယူႇလႄႈ ဢၼ်ၸဝ်ႈသၢင်ႇၶဝ်ၼုင်ႈသၢင်ႇၵၢၼ်းလႅင်သီၵမ်ႇၼၼ်ႉ သိုၵ်းမၢၼ်ႈဢၼ် ယူႇ ၼိူဝ်ၶိူင်ႈမိၼ်လႅပ်ႈႁၼ်ၸႅင်ႈယူႇ လွင်ႈၼႆႉယွၼ်ႉၶဝ်တိုၼ်းတင်ႈၸႂ်ယိုဝ်းသႂ်ႇ ၼၼ်ႉယဝ်ႉ။ ၸဝ်ႈသၢင်ႇ ဢၼ်မၢတ်ႇၸဵပ်းႁၢဝ်ႉႁႅင်းတူၼ်ၼိုင်ႈလႆႈလွၼ်ႇၵႂႃႇတီႈႁူင်းယႃ မိူဝ်ႈဝၼ်းထိ 17/3/2025။
မၢၵ်ႇသိုၵ်းမၢၼ်ႈၼၼ်ႉတိူဝ်ႉၺႃးတိုၵ်းဝတ်ႉ/ၵျွင်းသွၼ်လိၵ်ႈသီႇလင်လုၵွႆပႃးတင်းႁူင်းထမ်ႇမႃႇရူင်ႇ၊ ႁူင်း ၸဝ်ႈၸၢင်းၶဝ်ယူႇသဝ်းလႄႈ ႁူင်းၸဝ်ႈသၢင်ႇၶဝ်ယူႇသဝ်း။ လူတ်ႉ/ၵႃးသၢမ်လမ်းလႄႈႁိူၼ်းၵူၼ်းမိူင်းဢၼ် ယူႇႁိမ်းၸမ်ၵေႃႈလုၵွႆပႃးထႅင်ႈ။ တီႈတိူၵ်ႈသွၼ်လိၵ်ႈၼႆႉ မီးၸဝ်ႈၸၢင်း 5 တူၼ်လႄႈၸဝ်ႈသၢင်ႇ 60 တူၼ် (ဢႃယု 5-16 ၶူပ်ႇ) သေ မီးပႃးၵူၼ်းမိူင်းၼႂ်းဝဵင်းၼွင်ၶဵဝ် ဢၼ်ပၢႆႈၽေးမႃးမီးတီႈဝတ်ႉ/ၵျွင်း 200 ပၢႆ ၸိူဝ်းၶဝ် မႃးၼွၼ်းတီႈဝတ်ႉယၢမ်းၵၢင်ၶိုၼ်းပိူဝ်ႈတႃႇလွင်ႈႁူမ်ႇလူမ်ႈ။ တီႈဝတ်ႉ/ၵျွင်းၼႆႉ ဢမ်ႇမီးၸုမ်းယိပ်းၵွင်ႈၵၢင်ႇ ၸုမ်းလႂ်ယူႇ။
ဝၼ်းထိ 17/3/2025 ယၢမ်း 11.45 ၵၢင်ၼႂ် ၶိူင်ႈမိၼ်တိုၵ်းသိုၵ်းမၢၼ်ႈမႃးပွႆႇမၢၵ်ႇသွင်လုၵ်ႈလႄႈဢဝ်ၵွင်ႈ ၸၢၵ်ႈယိုဝ်း ၶဝ်ႈတီႈဝၢၼ်ႈၵျွၵ်ႉၵျၢၼ်ႉ ဢၼ်ယူႇတၢင်းတူၵ်း ႁၢင်ႇၵႆဝဵင်းၼွင်ၶဵဝ် 5 ၵီႊလူဝ်ႊမႄႊတိူဝ်ႊ။ မၢၵ်ႇတူၵ်းၸမ်တေႃႈၵႅတ်ႊၼမ်ႉမၼ်းၶႄႇ ယၢၼ်ၵၼ် မွၵ်ႈ 700 မႄႊတိူဝ်ႊၵူၺ်း။ ႁိူၼ်းၵူၼ်းဝၢၼ်ႈလၢႆလၢႆလင်လုၵွႆၸွမ်း။
တွင်ႈထၢမ်
ၸၢႆးႁေႃသႅင် 66 94 728 6696 Signal (တႆး, ဢင်းၵိတ်း)
ယိင်းလႅင်းႁၢၼ် 1 825 425 4099 Signal (မၢၼ်ႈ)
Download PDF files >>>