သိုၵ်းမၢၼ်ႈၸႂ်ႉႁိူဝ်းမိၼ်ယိုဝ်းတၢင်းၵၢင်ႁၢဝ်တိူဝ်ႉၺႃးၵူၼ်းမိူင်းတၢႆသၢမ်ၵေႃႉ၊ မၢတ်ႇၸဵပ်းၸဵတ်းၵေႃႉၼႂ်းၸႄႈဝဵင်း ၵျွၵ်းမႄးၸိုင်ႈတႆးပွတ်းႁွင်ႇ

သိုၵ်းမၢၼ်ႈၸႂ်ႉႁိူဝ်းမိၼ်ယိုဝ်းတၢင်းၵၢင်ႁၢဝ်တိူဝ်ႉၺႃးၵူၼ်းမိူင်းတၢႆသၢမ်ၵေႃႉ၊မၢတ်ႇၸဵပ်းၸဵတ်းၵေႃႉၼႂ်းၸႄႈဝဵင်း ၵျွၵ်းမႄးၸိုင်ႈတႆးပွတ်းႁွင်ႇ

ၽိုၼ်တၢမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး မၢႆ 01/2017

ဝၼ်းထိ 16/01/2017

သိုၵ်းမၢၼ်ႈဢဝ်ဢဝ်ၶိူင်ႈမိၼ်ၵျႅတ်ႊသွင်လမ်းပွႆႇမၢၵ်ႇလူင်းၵူႈႁူးၵူႈတၢင်းတီႈဝၢၼ်ႈပၢင်မၢၵ်ႇမိုဝ်းၸႄႈဝဵင်း ၵျွၵ်းမႄးၸိုင်ႈတႆးပွတ်းႁွင်ႇမိူဝ်ႈဝၼ်းထိ 26/12/2016 သေၵူၼ်းမိူင်းသၢမ်ၵေႃႉလႆႈတၢႆ၊ၸဵတ်းၵေႃႉမၢတ်ႇ ၸဵပ်းပႃးတင်းၼၢင်း ယိင်းသွင်ၵေႃႉလႄႈ ဢွၼ်ႇၸၢႆးႁႃႈၶူပ်ႇၵေႃႉၼိုင်ႈ။

ၼႂ်းဝၼ်းၼၼ်ႉမွၵ်ႈ 8:00 မူင်းၵၢင်ၼႂ်သိုၵ်းမၢၼ်ႈၶမယ 506 ဢၼ်ယူႇတီႈဝၢၼ်ႈယွင်ပၢင်လဢဝ် ၵွင်ႈလူင် ယိုဝ်းသႂ်ႇၸွမ်း တီႈလွႆယဵၼ်တီႈဢၼ်မီးတပ်ႉသိုၵ်းတဢၢင်း (ပလွင်ႈ) ယူႇဝႆႉႁၢင်ႇၵႆဝၢၼ်ႈပၢင်မၢၵ်ႇမိုဝ်းမွၵ်ႈၼိုင်ႈလၵ်း။သိုၵ်းမၢၼ်ႈၸႂ်ႉ ၵွင်ႈလူင်ၶဝ်ယိုဝ်းတေႃႇထိုင် 6:30 ႁူဝ်ၶမ်ႈ။

ၼႂ်းဝၢၼ်ႈပၢင်မၢၵ်ႇမိုဝ်းၼႆႉမီးလင်ႁိူၼ်းၵူၼ်းမိူင်းယူႇသဝ်းမွၵ်ႈ 100 သေမီးႁူဝ်ၵူၼ်း 300 ပၢၵ်ႇပၢႆ။ၽွင်းတႄႇ ၵိူတ်ႇပဵၼ် ပၢင်တိုၵ်းၼၼ်ႉၵူၼ်းဝၢၼ်ႈဢွၼ်ၵၼ်ၵူဝ်ႁႄသေၼီပၢႆႈၽေးၵႂႃႇပိုင်ႈႁူမ်ႈယူႇဝႆႉတီႈႁိူၼ်းလုင်းလုင်း ၸိၵ်ႉတ။ႁိူၼ်းလုင်း ၼႆႉၵႂၢင်ႈယႂ်ႇလိူဝ်ပိူၼ်ႈလႄႈၵူၼ်းဝၢၼ်ႈဢွၼ်ၵၼ်ဝူၼ်ႉဝႃႈတေႁူမ်ႇလူမ်ႈလွတ်ႈၽေးၼႆ ၵၼ်ယဝ်ႉ။

ၵူၺ်းၵႃႈၽွင်းၶၢဝ်းယၢမ်း 4:05 ဝၢႆးဝၼ်းၼၼ်ႉ ၵျႅတ်ႊ ႁိူဝ်းမိၼ်တိုၵ်းသိုၵ်းမၢၼ်ႈသွင်လမ်းလုၵ်ႉ တၢင်းလႃႈ သဵဝ်ႈၶိုၼ်ႈမႃးပွႆႇမၢၵ်ႇသႂ်ႇၸွမ်းလွႆယဵၼ်လႄႈၼႂ်းဝၢၼ်ႈပၢင်မၢၵ်ႇမိုဝ်း။

မၢၵ်ႇလုၵ်ႈၼိုင်ႈတူၵ်းသႂ်ႇ ႁိူၼ်းလုင်းလုင်းၸိၵ်ႉတသေ တိူဝ်ႉၺႃးသႂ်ႇၵူၼ်းဝၢၼ်ႈ ၸၢႆးသၢမ်ၵေႃႉ တၢႆထင်တီႈ ပႃးၸဵမ် လုင်းလုင်းၸိၵ်ႉတ လႄႈတိူဝ်ႉၺႃးပႃးၼၢင်းယိင်းသွင်ၵေႃႉ၊ ဢွၼ်ႇၸႆၢး ဢႃယု 5 ၶူပ်ႇ ၼိုင်ႈၵေႃႉ လႄႈ ၵူၼ်းၸၢႆးထႅင်ႈ ၵေႃႉၼိုင်ႈမၢတ်ႇၸဵပ်းႁၢဝ်ႉႁႅင်း။ ဝူဝ်းၵူၼ်းဝၢၼ်ႈသွင်တူဝ် တူဝ်ၼိုင်ႈၵေႃႈတၢႆထင်တီႈ တူဝ်ၼိုင်ႈမၢတ်ႇၸဵပ်း။

မၢၵ်ႇသၢမ်လုၵ်ႈတူၵ်းႁိမ်းႁွမ်း ၵျွင်းမုၼ်ၸဝ်ႈသေတိူဝ်ႉၺႃးသင်ၶၸဝ်ႈသီႇတူၼ် ၸိူဝ်းတိုၵ်ႉပၢႆႈ သေႃႉႁူမ်ႈ တႂ်ႈ ဝတ်ႉ/ၵျွင်း။ လိူဝ်ၼၼ်ႉတူၵ်းသႂ်ႇႁိူၼ်းၵူၼ်းၼႂ်းဝၢၼ်ႈမွၵ်ႈ 16 လင်လႆႈလုၵွႆယွၼ်ႉမၢၵ်ႇ။

ဝၢႆးဢဝ်မၢၵ်ႇပွႆႇသႂ်ႇယဝ်ႉသိုၵ်းမၢၼ်ႈၶဝ်ႈမိူဝ်းၼႂ်းဝၢၼ်ႈပၢင်မၢၵ်ႇမိုဝ်းသေ ပၵ်းပၢင်သဝ်းၶဝ်ယူႇဝႆႉၼႂ်းဝၢၼ်ႈ။ သိုၵ်း မၢၼ်ႈ ၸိသင်ႇ ႁႂ်ႈဢဝ်တူဝ်တၢႆၵူၼ်းဝၢၼ်ႈသၢမ်ၵေႃႉၼၼ်ႉ ၵႂႃႇၾင်ပႅတ်ႈ တီႈပႃႇႁဵဝ်ႈတီႈပၢင်လၢင်းမိူဝ်ႈယၢမ်း 7:30 ၵၢင်ၶိုၼ်း။ မိူဝ်ႈဢဝ်တူဝ်တၢႆၵူၼ်းဝၢၼ်ႈၵႂႃႇၾင်ၼၼ်ႉ သိုၵ်းမၢၼ်ႈၵႂႃႇၸွမ်းၵမ်ႈၽွင်ႈ မီးၵူၼ်းဝၢၼ်ႈ ၽူႈၸၢႆး 5 ၵေႃႉၼၢင်းယိင်း ၼိုင်ႈ ၵေႃႉ။ သိုၵ်းမၢၼ်ႈတိုၼ်းဢမ်ႇပၼ်ၵူၼ်းဝၢၼ်ႈ ၸတ်းပၢင်ၸႃႉ တၢမ်ႁိတ်ႈ ႁွႆႈၾိင်ႈထုင်းသင်။ တူဝ်တၢႆၵူၼ်းဝၢၼ်ႈ ၼၼ်ႉဢမ်ႇသႂ်ႇၵွမ်ႇသင်ၵဵၼ်သႂ်ႇသၢတ်ႇသေၾင်ၸိူင်ႉၼၼ်ၵူၺ်း။

ၵူၼ်းၸိူဝ်းဝၢတ်ႇၸဵပ်းၸိူဝ်းၼၼ်ႉ ၸဝ်ႈၸၢင်းၶဝ်ၵပ်းၽူင်းႁႃၸုမ်းၼမ်ႉၶူင်းၼႂ်းဝဵင်းႁႂ်ႈမႃးႁပ်ႉၵႂႃႇ ယူတ်းယႃ တီႈၼႂ်းဝဵင်း ၼႆလႄႈယၢမ်း 7:30 တၢမ်းၶမ်ႈၸုမ်းၼမ်ႉၶူင်းႁပ်ႉမိူဝ်းထိုင်တီႈ ႁူင်းယႃလႃႈသဵဝ်ႈၶၢဝ်းယၢမ်း 11:30 ၵၢင်ဝၼ်းထႅင်ႈ ဝၼ်းၼိုင်ႈယူႇယဝ်ႉ။ ၼၢင်းၶိၼ်ႇတၢၼ်းၼု ဢႃယု 35 ဢၼ်လႆႈမၢတ်ႇၸဵပ်း ၵေႃႉၼိုင်ႈ ၼၼ်ႉၵေႃႈၽူဝ်မၼ်းၼၢင်း ၸၢႆး ဢၢႆႈဝုၼ်း လႄႈပေႃႈၾၢႆႇၽူဝ်မၼ်းၼၢင်း လုင်းလုင်းၸိၵ်ႉတ ၺႃးမၢၵ်ႇဢၼ် ႁိူဝ်းမိၼ်သိုၵ်းမၢၼ်ႈပွႆႇလူင်း ၼၼ်ႉတူၵ်း တႅၵ်ႇသႂ်ႇသေလႆႈလုတၢႆ။ မၼ်းၼၢင်းမီးလုၵ်ႈလၢင်း ႁူၵ်းၵေႃႉ လႄႈ တိုၵ်ႉ ပႃးတွင်ႉဝႆႉထႅင်ႈပႅတ်ႇလိူၼ်။ မၼ်းၼၢင်းၺႃး ၸၢၵ်ႇမၢၵ်ႇႁၢဝ်ႉႁႅင်း သေလႆႈတႅပ်းၶႃၾၢႆႇၶႂႃပႅတ်ႈ မိူဝ်ႈဝၼ်း ထိ 06/01/2017 ၼၼ်ႉယူႇယဝ်ႉ။

ဝၢႆးသိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇယဝ်ႉၵူၼ်းဝၢၼ်ႈ 200 ပၢၵ်ႇပၢႆလႆႈဢွၼ်ၵၼ်ပၢႆႈၽေးသိုၵ်းၵႂႃႇပိုင်ႈႁူမ်ႈၼႂ်းဝဵင်း ၵျွၵ်းမႄးတီႈဝတ်ႉ/ၵျွင်းၼမ်ႉၸဵတ်းလိၼ်း။ၼႂ်းဝူင်ႈလိုၼ်းသုတ်းလိူၼ်ၵျႅၼ်ႊၼႃႊဝႃႊရီႊၼႆႉၵူၼ်း ဝၢၼ်ႈ ၵမ်ႈၼမ်ၶိုၼ်း ဢွၼ် ၵၼ်ပွၵ်ႈၶိုၼ်းဝၢၼ်ႈႁိူၼ်းၽႂ်မၼ်းယဝ်ႉ။ၵူၺ်းၵႃႈသိုၵ်းမၢၼ်ႈၶမယ 506 ၼၼ်ႉ တႄႉတိုၵ်ႉသိုပ်ႇပၵ်းယူႇဝႆႉၼႂ်း ဝၢၼ်ႈသေသိုၵ်းမၢၼ်ႈတပ်ႉ 501 လႄႈ 502 ၸိူဝ်းၼႆႉၶိုၼ်းသိုပ်ႇ ထႅမ်ဢဵၼ်ႁႅင်း ၶဝ်ႈဢဝ်တီႈယူႇၼႂ်းပိုၼ်ႉတီႈၼႆႉထႅင်ႈ ယူႇယဝ်ႉ။