သိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇ တိူဝ်ႉၺႃးၵူၼ်းမိူင်းတၢႆ 4 ၵေႃႉမၢတ်ႇၸဵပ်း 8 ၵေႃႉ ၽွင်းၼမ်ႉ ၼွင်းထူမ်ႈ ၼႂ်းၸႄႈဝဵင်းမၢၼ်ႈပဵင်း ၸိုင်ႈတႆးပွတ်းႁွင်ႇ

ၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး

ဝၼ်းထိ 12/8/2026

သိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇ တိူဝ်ႉၺႃးၵူၼ်းမိူင်းတၢႆ 4 ၵေႃႉမၢတ်ႇၸဵပ်း 8 ၵေႃႉ ၽွင်းၼမ်ႉ ၼွင်းထူမ်ႈ ၼႂ်းၸႄႈဝဵင်းမၢၼ်ႈပဵင်း ၸိုင်ႈတႆးပွတ်းႁွင်ႇ

ၼႂ်းဝူင်ႈလိုၼ်းသုတ်း လိူၼ်ၵျူႊလၢႆႊ 2026 ၼၼ်ႉ ယွၼ်ႉတၢင်းမိူင်းၶႄႇၵိုင်ႉၵၢင်ႉၶင်ႇၼမ်ႉၽၢႆၼမ်ႉမၢဝ်း (လူင်ၸဵင်ႊ) ၼႂ်းမိူင်းၶႄႇသေ ႁဵတ်းႁႂ်ႈၼမ်ႉလႆလူင်းလုပ်ႇထူမ်ႈၼႂ်းၸႄႈဝဵင်းမၢၼ်ႈပဵင်း ၸိုင်ႈတႆးပွတ်း ႁွင်ႇ ဢၼ်ယူႇပႃႈတႂ်ႈသိုၵ်းၶၢင် KIA ၵုမ်းၵမ်ဝႆႉ။ ၼမ်ႉဢၼ်လူၼ်ႉၾင်ႇၼမ်ႉမၢဝ်းလႄႈ ၼမ်ႉပေႃႈ လႆ လုပ်ႇထူမ်ႈ လၢႆလၢႆပွၵ်ႉၼႂ်းဝဵင်းမၢၼ်ႈပဵင်း တင်းလၢႆလၢႆဝၢၼ်ႈၸိူဝ်းယူႇႁိမ်းၸမ်။

ပဵၵ်ႉသမ်ႉၵူၼ်းဝၢၼ်ႈၵူၼ်းမိူင်းထူပ်းၺႃးၽေးၼမ်ႉထူမ်ႈယူႇသေတႃႉ သိုၵ်းမၢၼ်ႈယင်းဢဝ်ၶိူင်ႈမိၼ်မႃး ပွႆႇမၢၵ်ႇၼႂ်းၸႄႈဝဵင်းမၢၼ်ႈပဵင်းၼႂ်းဝၼ်းထိ 28/7/2026 လႄႈ 6/8/2026 ယူႇ။ လွင်ႈသိုၵ်းမၢၼ်ႈဢဝ် ၶိူင်ႈ မိၼ် မႃးပွႆႇမၢၵ်ႇၼၼ်ႉ တိူဝ်ႉၺႃးၵူၼ်းမိူင်းတၢႆ 4 ၵေႃႉ၊ မၢတ်ႇၸဵပ်း 8 ၵေႃႉလႄႈ တိူဝ်ႉၺႃး ႁိူၼ်းယေး ၵူၼ်းမိူင်းလု ၵွႆ ထႅင်ႈမွၵ်ႈ 20 လင် ႁူမ်ႈတင်းတိုၵ်းႁူင်းယႃလူင်ဝဵင်းမၢၼ်ႈပဵင်း 3 လင်။

ဝၼ်းထိ 28/7/2026 ၶၢဝ်းယၢမ်းမွၵ်ႈ 11 မူင်းၵၢင်ၼႂ် သိုၵ်းမၢၼ်ႈဢဝ်ၶိူင်ႈမိၼ် သႅၼ်း Y-12 မႃးပွႆႇမၢၵ်ႇ ၼိူဝ် ပွၵ်ႉ 2 လႄႈ ပွၵ်ႉ 3 ဝဵင်းမၢၼ်ႈပဵင်း။ မၢၵ်ႇလူင်းတိူဝ်ႉၺႃးၵူၼ်းမိူင်းတၢႆ 3 ၵေႃႉ၊ မၢတ်ႇၸဵပ်း 4 ၵေႃႉလႄႈ တိူဝ်ႉၺႃးႁိူၼ်းယေးၵူၼ်းမိူင်းလုၵွႆ တီႈဢေႇသုတ်း 10 လင်။

ဝၼ်းထိ 30/7/2026 ၶၢဝ်းယၢမ်း 4 မူင်းဝၢႆးဝၼ်း သိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇ တီႈဝၢၼ်ႈပႃႇႁႆႈ လႄႈပွၵ်ႉ 3 ၼႂ်းဝဵင်းမၢၼ်ႈပဵင်းသေ ႁဵတ်းႁႂ်ႈၵူၼ်းမိူင်းမၢတ်ႇၸဵပ်း 4 ၵေႃႉ ယဝ်ႉၸၢၵ်ႇမၢၵ်ႇတိူဝ်ႉၺႃး ႁိူၼ်းၵူၼ်းမိူင်းလုၵွႆထႅင်ႈ 5 လင်။

ဝၼ်းထိ 3/8/2026 ၶၢဝ်းယၢမ်းမွၵ်ႈ 11 မူင်းၵၢင်ၶမ်ႈ သိုၵ်းမၢၼ်ႈဢဝ်ၶိူင်ႈမိၼ်တိုၵ်း Jet fighter လမ်းၼိုင်ႈ ပွႆႇမၢၵ်ႇလူင်းၼႂ်းပွၵ်ႉ 2 ဝဵင်းမၢၼ်ႈပဵင်း၊ တိူဝ်ႉၺႃးၵူၼ်းၸၢႆးၵေႃႉၼိုင်ႈတၢႆ ၸၢၵ်ႇမၢၵ်ႇတိူဝ်ႉၺႃးႁိူၼ်း ၵူၼ်းမိူင်း လုၵွႆထႅင်ႈ 3 လင်။

ဝၼ်းထိ 6/8/2026 ၶၢဝ်းယၢမ်း 11 မူင်းၵၢင်ၶမ်ႈ သိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇလူင်းၸူးႁူင်းယႃလူင် ဝဵင်းမၢၼ်ႈပဵင်း ၼႂ်းပွၵ်ႉ 3 သေတိူဝ်ႉၺႃးတိုၵ်းႁူင်းယႃလူင်လုၵွႆႁၢဝ်ႉႁႅင်း 3 လင်။