ၽိုၼ်တၢမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 16/10/2025
သိုၵ်းမၢၼ်ႈဢဝ်ၾႆးၸုတ်ႇႁိူၼ်းလႄႈတိမတ်ႉၵူၼ်းဝၢၼ်ႈ ၼႂ်းၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း
ၼႂ်းဝူင်ႈလိုၼ်းသုတ်းလိူၼ်ဢေႃးၵၢတ်ႊထိုင်ႁၢင်လိူၼ်သႅမ်ႊထႅမ်ႊပိူဝ်ႊ 2025 ၼၼ်ႉသိုၵ်းမၢၼ်ႈ ဢဝ်ၾႆး ၸုတ်ႇ ႁိူၼ်းၵူၼ်းဝၢၼ်ႈ 60 လင်၊ ယွင်/ယႄးၶဝ်ႈ 90 လင်၊ ပၢင်သဝ်းၵူၼ်းပၢႆႈၽေးသိုၵ်း 1 ပၢင် လႄႈ သုမ်ႉ ထဵင် ႁႆႈၼႃး လၢႆလၢႆလင် ၼႂ်းၸႄႈဝဵင်းယႂႃႇငၢၼ်ႇ။ ဢၼ်သိုၵ်းမၢၼ်ႈဢဝ်ၾႆးၸုတ်ႇၽဝ် ယွင်ၶဝ်ႈ ၼၼ်ႉ ႁဵတ်းႁႂ်ႈလုသုမ်းၼပ်ႉပဵၼ်ငိုၼ်း 150 လၢၼ်ႉၵျၢပ်ႈ။ ၼွၵ်ႈသေၼၼ်ႉ သိုၵ်းမၢၼ်ႈယင်း တိမတ်ႉ ၵူၼ်းဝၢၼ်ႈ ထႅင်ႈ 5 ၵေႃႉ ပႃးတင်းဢွၼ်ႇယိင်းဢႃယု 8 ၶူပ်ႇ ၵေႃႉၼိုင်ႈ။
မိူဝ်ႈႁၢင်လိူၼ်ၵျူႊလၢႆႊ 2025 ၼၼ်ႉ သိုၵ်းမၢၼ်ႈတပ်ႉၸုမ်းလူင် 55 ဢၼ်ပၵ်းတပ်ႉတီႈ ၵၢတ်ႇလေႃႉ ဢဵၼ် ႁႅင်းၵူၼ်း 500 တင်းသိုၵ်းမၢၼ်ႈတပ်ႉၸုမ်းလူင် 99 ဢၼ်ပၵ်းတီႈမိတ်ႉထီႉလႃႇ ဢွၵ်ႇၽဵဝ်ႈလၢင်ႉ ပိုၼ်ႉတီႈ ၼႆသေ လႆႈပဵၼ်ပၢင်တိုၵ်းၵၼ်တင်းၸုမ်းၵႅတ်ႇၶႄၵူၼ်းမိူင်း PDF ၸိူဝ်းတူင်ႉၼိုင်ၸွမ်းသၢႆပိုၼ်ႉ တီႈလႅၼ် လိၼ် ယႂႃႇငၢၼ်ႇ-မိတ်ႉထီႉလႃႇ တၢင်းတူၵ်းၸႄႈဝဵင်းယႂႃႇငၢၼ်ႇ။ သွင်ၾၢႆႇလႆႈပဵၼ်ပၢင်တိုၵ်းၵၼ် တင်ႈတႄႇ ႁၢင်လိူၼ်ၵျူႊလၢႆႊ ထိုင်ဝူင်ႈထူၼ်ႈသွင် လိူၼ်ဢေႃးၵၢတ်ႊ။
ဝၼ်းထိ 18/8/2025 ၶၢဝ်းယၢမ်းၵၢင်ဝၼ်း သိုၵ်းမၢၼ်ႈဢဝ်ၶိူင်ႈမိၼ်မႅင်းမီႈ (Helicopter) သေ ၵႂႃႇပွႆႇမၢၵ်ႇ ၼိူဝ်ဝၢၼ်ႈၵျွၵ်ႉတေႃးယဝ်ႉဢဝ်မၢၵ်ႇထႅင်ႈလုၵ်ႈၼိုင်ႈၵႂႃႇပွႆႇၼိူဝ်ဝၢၼ်ႈၺွင်ႇပိၼ်ႇသႃႇ ႁဵတ်းႁႂ်ႈ တိူဝ်ႉၺႃး ႁိူၼ်း ၵူၼ်းဝၢၼ်ႈလုၵွႆလၢႆလၢႆလင်။ ဝၢႆးၼၼ်ႉ မိူဝ်ႈဝၼ်းထိ 19-21/8/2025 သိုၵ်းမၢၼ်ႈဢၼ်ယူႇတီႈဝၢၼ်ႈ ပျီႇ ၺွင်ႇ ၸႄႈဝဵင်းတႃႇသီႇ တိူင်းဝဵင်းတႃႈလိူဝ်ႇ ဢဝ်မၢၵ်ႇလူင်သႅၼ်း 155mm howitzers ယိုဝ်းၶဝ်ႈ ၼႂ်းထိူၼ်ႇ ၶိူဝ်းလႄႈႁူၺ်ႈလွႆ ၸွမ်းၵူၼ်းဝၢၼ်ႈၵျွၵ်ႉတေႃးလႄႈ ၺွင်ႇပိၼ်ႇသႃႇ ပၢႆႈၽေးသိုၵ်းယူႇသဝ်းဝႆႉ ၸိူဝ်းၼၼ်ႉ။ ဝၼ်းထိ 21/8/2025 သိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇသၢမ်လုၵ်ႈ ၼိူဝ်ဝၢၼ်ႈၵျွၵ်ႉတေႃးလႄႈ ၺွင်ႇပိၼ်ႇသႃႇ။
ဝၼ်းထိ 23/8/2025 သိုၵ်းမၢၼ်ႈဢဵၼ်ႁႅင်းမွၵ်ႈ 80 သၢႆၼိုင်ႈႁွတ်ႈထိုင်ဝၢၼ်ႈၵျွၵ်ႉတေႃးသေ တႄႇသွၵ်ႈတဝ် ယႃႉဢဝ်ၶူဝ်းၶွင်ၵူၼ်းဝၢၼ်ႈလႄႈႁႅမ်ၵိၼ်သတ်းလဵင်ႉၶွင်ၵူၼ်းဝၢၼ်ႈ ပႃးတင်း ဝူဝ်းလႄႈၵႂၢႆး။ မိူဝ်ႈၶၢဝ်း ယၢမ်း မွၵ်ႈ 7 မူင်းႁူဝ်ၶမ်ႈ ဝၼ်းထိ 25/8/2025 သိုၵ်းမၢၼ်ႈၸိူဝ်းၼၼ်ႉဢဝ်ၾႆးၸုတ်ႇႁိူၼ်း ၵူၼ်းဝၢၼ်ႈသေ ထႅင်ႈ ၼႂ်ၼိုင်ႈမႃးၶဝ်ၸင်ႇဢွၵ်ႇဝၢၼ်ႈၵႂႃႇ။ သိုၵ်းမၢၼ်ႈဢဝ်ၾႆးၸုတ်ႇႁိူၼ်းတင်းမူတ်း 37 လင်။
ၽွင်းဝူင်ႈထူၼ်ႈၼိုင်ႈလိူၼ်သႅမ်ႊထႅမ်ႊပိူဝ်ႊ သိုၵ်းမၢၼ်ႈမွၵ်ႈ 100 ပႃးတင်းသိုၵ်းမၢၼ်ႈတပ်ႉၸုမ်းလူင် 55 လႄႈပျီႇတုၸိတ်ႉ ဢွၵ်ႇသွၵ်ႈတဝ်ၼႂ်းထိူၼ်ႇ ၸွမ်းၸိူဝ်းဢၼ်ၵူၼ်းဝၢၼ်ႈ မိၼ်းပလွင်ႇၶဝ် ပၢႆႈၽေး ယူႇ သဝ်း။ ၵူၼ်းဝၢၼ်ႈၸိူဝ်းယူႇၸွမ်းသုမ်ႉသွင်းၼႂ်းထိူၼ်ႇဝႆႉၼၼ်ႉ ပဵၼ်ၸိူဝ်းဢၼ်ႁိူၼ်းယႄးၶဝ်ၺႃးသိုၵ်း မၢၼ်ႈဢဝ်ၾႆးၸုတ်ႇပႅတ်ႈၸဵမ်မိူဝ်ႈလိူၼ်ၻီႊသိမ်ႇပိူဝ်ႊ 2024 ၼၼ်ႉသေ ၶိုၼ်းလႆႈဢွၼ်ၵၼ်ႁႃတၢင်း ပၢႆႈ ထႅင်ႈ ၸိူဝ်းၼၼ်ႉယဝ်ႉ။ သိုၵ်းမၢၼ်ႈၸိူဝ်းဢွၵ်ႇသွၵ်ႈတဝ်ထိူၼ်ႇၼၼ်ႉ ဢဝ်ၾႆးၵႂႃႇၸုတ်ႇၽဝ်ပႅတ်ႈသုမ်ႉ ပၢင်သဝ်းၵူၼ်းပၢႆႈၽေး ၵူၼ်းဝၢၼ်ႈမိၼ်းပလွင်ႇ။
ဝၼ်းထိ 13/9/2025 သိုၵ်းမၢၼ်ႈ တပ်ႉၸုမ်းလူင် 99 ဢဵၼ်ႁႅင်းမွၵ်ႈ 120 ၶိုၼ်းၶဝ်ႈဝၢၼ်ႈ ၵျွၵ်ႉတေႃးထႅင်ႈသေ ဢဝ်ၾႆးၸုတ်ႇပႅတ်ႈသုမ်ႉထဵင် ႁႆႈၼႃး ၸိူဝ်းမီးတၢင်းၼွၵ်ႈဝၢၼ်ႈၸိူဝ်းၼၼ်ႉ။ ဝၼ်းထိ 14 လႄႈ 15/9/2025 သိုၵ်းမၢၼ်ႈသိုပ်ႇဢဝ်ၾႆးၸုတ်ႇၽဝ်ႁိူၼ်းၵူၼ်းဝၢၼ်ႈထႅင်ႈ 23 လင် ၼႂ်းဝၢၼ်ႈၵျွၵ်ႉ တေႃႇလႄႈၸုတ်ႇၽဝ် ပႃးယွင်ၶဝ်ႈ 90 လင် ၶၼ်ငိုၼ်းမႅၼ်ႈမွၵ်ႈ 150 လၢၼ်ႉၵျၢပ်ႈ။
ဝၼ်းထိ 15/9/225 သိုၵ်းမၢၼ်ႈၸုမ်းၵဝ်ႇ ၵူၺ်းၼင်ႇၵဝ်ႇ ၶဝ်ႈၵႂႃႇသွၵ်ႈတဝ်ၼႂ်းထိူၼ်ႇၶိူဝ်း ႁူၺ်ႈလွႆ ႁိမ်း ဝၢၼ်ႈၵျွၵ်ႉတေႃး။ ၶဝ်ၵႂႃႇႁၼ်မႅၼ်ႈထမ်ႈဢၼ်ၵူၼ်းဝၢၼ်ႈ ၵႂႃႇပိုင်ႈဢိင်ယူႇသဝ်းဝႆႉၼၼ်ႉသေ တိမတ်ႉ ၵူၼ်းဝၢၼ်ႈ 6 ၵေႃႉ- ဢူးမွင်ႇမျိၼ်ႉ (ဢႃယု 54)၊ တေႃႇတိၼ်ႇမူဝ်းလၢႆႇ (ဢႃယု 35) လႄႈ မႃႉပုၺ်ႉပုၺ်ႉ (ဢႃယု 8 ၶူပ်ႇ) ပဵၼ်ၵူၼ်းဝၢၼ်ႈၽူဝ်းတႃႇၼၢႆႇ ၸႄႈဝဵင်းတႃႇသီႇ လႄႈၵူၼ်းဝၢၼ်ႈ ၵျွၵ်ႉတေႃး ဢူးတၢၼ်းလၢႆႇ (ဢႃယု 53)၊ လႄႈတေႃႇၶိၼ်ႇၺူဝ်းမျိၼ်ႉ (ဢႃယု 51)။ ၸိူဝ်းၶဝ်ၺႃး သိုၵ်းမၢၼ်ႈ ဢဝ်ၵႂႃႇတီႈမိတ်ႉထီႉလႃႇ။
ဝၼ်းထိ 24/9/2025 ယွၼ်ႉၾူၼ်လူင်တူၵ်းႁႅင်းသေ ႁဵတ်းႁႂ်ႈလိၼ်ၵူၼ်ႇပင်း တီႈပၢင်သဝ်းၵူၼ်းပၢႆႈၽေး ၼႂ်း ထိူၼ်ႇ တီႈဢၼ်ၵူၼ်းဝၢၼ်ႈၺွင်ႇပိၼ်ႇသႃႇ လႄႈၵျွၵ်ႉတေႃးၶဝ်ယူႇသဝ်း။ ၵူၼ်းဝၢၼ်ႈသိပ်းၵေႃႉ တင်း လုၵ်ႈ ဢွၼ်ႇ သၢမ်ၵေႃႉ လႆႈတၢႆၵႂႃႇၸွမ်း။ မိူဝ်ႈဝူင်ႈလိုၼ်းသုတ်းၼႂ်းလိူၼ်သႅမ်ႊထႅမ်ႊပိူဝ်ႊ ၼၼ်ႉ သိုၵ်းမၢၼ်ႈယႃႉ ၵွႆ ပႅတ်ႈဢွင်ႈတီႈပၢင်သဝ်းၵူၼ်းပၢႆႈၽေးၵူၼ်းဝၢၼ်ႈၵျွၵ်ႉတေႃးထႅင်ႈ ႁႃႈတီႈ။
ယၢမ်းလဵဝ် သိုၵ်းမၢၼ်ႈသိုပ်ႇယူႇဝႆႉၸွမ်းၼႂ်းဝၢၼ်ႈၵျွၵ်ႉတေႃးလႄႈၺွင်ႇပိၼ်ႇသႃႇ။ ၵူၼ်းပၢႆႈၽေးမွၵ်ႈ 500 ၵေႃႉဢမ်ႇႁတ်းပွၵ်ႈႁိူၼ်းယွၼ်ႉၵူဝ်သိုၵ်းမၢၼ်ႈသေသိုပ်ႇယူႇဝႆႉၸွမ်းၼႂ်းထိူၼ်ႇ။ ၸိူဝ်းၶဝ်လူဝ်ႇၶဝ်ႈ ၼမ်ႉ တၢင်းၵိၼ် လွင်ႈၵမ်ႉၸွႆႈတေႉတေႉ။
တွင်ႈထၢမ်
ၸၢႆးႁေႃသႅင် +66 94 728 6696 Signal (ၽႃသႃတႆး၊ ဢင်းၵိတ်း)
ယိင်းလႅင်းႁၢၼ် +66 99 289 6080 Signal (ၽႃသႃမၢၼ်ႈ)
ၸၢႆးႁၵ်ႉၸႅတ်ႈ +1 343 304 5332 Signal (ၽႃသႃတႆး၊ ဢင်းၵိတ်း)
Download PDF files: