ၽိုၼ်တၢမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 6/10/2025
သိုၵ်းမၢၼ်ႈၶႃႈႁႅမ်တၢႆၵူၼ်းမိူင်းႁၢမ်းပၵ်းႁၢမ်းပိူင်လႄႈၵၼ်ႉၸၼ်ၼၢင်းယိင်း ၼႂ်းၸႄႈဝဵင်းၵျွၵ်းမႄး
Download PDF >> Thai | Shan | Burmese | English
ဝၼ်းထိ 24/9/2025 သိုၵ်းမၢၼ်ႈၶႃႈႁႅမ်တၢႆၵူၼ်းမိူင်းပၢႆႈၽေးသိုၵ်းသီႇၵေႃႉ ၸိူဝ်းပၢႆႈသေႃႉႁူမ်ႈယူႇ ၸွမ်း ထဵင် ႁႆႈၼႃး ဢၼ်ယူႇႁၢင်ႇၵႆဝဵင်းၵျွၵ်းမႄးမွၵ်ႈ 10 ၵီႊလူဝ်ႊမႄႊတိူဝ်ႊ ပႃးၸဵမ်ၵၼ်ႉၸၼ် ဢွၼ်ႇယိင်း ဢႃယု 16 ယဝ်ႉၶႃႈႁႅမ်တၢႆပႅတ်ႈ။ သိုၵ်းမၢၼ်ႈၸိူဝ်းၼႆႉ ပဵၼ်ၼႂ်းသၢႆသိုၵ်းမၢၼ်ႈၸိူဝ်းထႅမ်ဢဵၼ်ႁႅင်းတင်း ၼမ် မႃးပိုတ်ႇၼႃႈသိုၵ်းတႃႇယိုတ်းဢဝ်ၶိုၼ်းၵျွၵ်းမႄး ဢၼ်သိုၵ်းလွႆ တဢၢင်း TNLA ယိုတ်းၵုမ်းၵမ်ဝႆႉ၊ ပၢင်တိုၵ်းယႂ်ႇလူင်ၼႆႉႁဵတ်းႁႂ်ႈမီးၵူၼ်းမိူင်းပၢႆႈၽေးသိုၵ်း 10,000 ပၢႆတင်ႈတႄႇလိူၼ်ဢေႃးၵၢတ်ႊ 2025 မႃး။
ဝၼ်းၼၼ်ႉၶၢဝ်းယၢမ်းမွၵ်ႈ 10:30 မူင်းၶိုင်ႈတွၼ်ႈၵၢင်ၼႂ် သိုၵ်းမၢၼ်ႈဢဵၼ်ႁႅင်းမွၵ်ႈ 100 သွၵ်ႈတဝ်တၢင်း ဝၢၼ်ႈၼႃး ဢၢႆႈၶၢၼ်ႉ ယဝ်ႉသိုပ်ႇၵႂႃႇတၢင်းဝၢၼ်ႈ သၶၢၼ်းသႃႇ ၼႂ်း ၸႄႈ ဝဵင်းၵျွၵ်းမႄးသေ ႁူပ်ႉၺႃး ၵူၼ်းဝၢၼ်ႈၵေႃႉၼိုင်ႈ ၸွမ်းတၢင်း။ သိုၵ်းမၢၼ်ႈပေႃႉထုပ်ႉၸႅတ်ႈထၢမ်မၼ်း။ ၽွင်းမၼ်းၸၢႆးႁႃ တၢင်း ပၢႆႈယူႇၼၼ်ႉ သိုၵ်းမၢၼ်ႈ သွင်ၵေႃႉ လမ်းၸွမ်းတၢင်းလင်မၼ်း ၵႂႃႇၸူးသုမ်ႉထဵင်ႁႆႈၼႃး ဢၼ် မီးႁိမ်း ႁွမ်း ၼၼ်ႉ သေ ၵႂႃႇႁူပ်ႉၺႃးသႂ်ႇၸဝ်ႈၸၢင်း တူၼ်ၼိုင်ႈဢႃယုမွၵ်ႈ 30။ ၸဝ်ႈၸၢင်းၼၼ်ႉ ၵေႃႈႁၼ် သိုၵ်းမၢၼ်ႈၶဝ်ယဝ်ႉ ၵိုင်ႉၵၢင်ႉ တူၵ်းၸႂ်သေ ႁႃတၢင်း လႅၼ်ႈပၢႆႈၶဝ်ႈၵႂႃႇမႅမ်ႉ ၼႂ်းႁႆႈၼႃး။ သိုၵ်းမၢၼ်ႈၶဝ် ဢဝ် ၵွင်ႈယိုဝ်းသႂ်ႇၸဝ်ႈၸၢင်းၼၼ်ႉ တၢႆထင်တီႈ၊ မၢၵ်ႇၵွင်ႈတိူဝ်ႉၺႃးၼႃႈၽၢၵ်ႇႁိမ်းတႃၾၢႆႇ ၶႂႃမၼ်း ၸဝ်ႈ။ ၵူၼ်းလူင် ဝၢၼ်ႈ ႁၼ်မႅၼ်ႈပိူင်ပဵၼ်လွင်ႈၼႆႉ။
ဝၢႆးၼၼ်ႉသိုၵ်းမၢၼ်ႈၶဝ်ၶိုၼ်းၸႅတ်ႈထၢမ်ၵူၼ်းလူင်ဝၢၼ်ႈ ထၢမ်လွင်ႈၵူၼ်းၼႂ်းဝၢၼ်ႈၵႂႃႇတၢင်းလႂ်သဵင်ႈ၊ ၸွမ်းႁိမ်းႁွမ်းၼႆႉမီးၵႃႈႁိုဝ်?။ ၽွင်းမၼ်းတွပ်ႇဝႃႈ ၵူၼ်းဝၢၼ်ႈမွၵ်ႈၸဵတ်းၵေႃႉတႄႉယူႇၼႂ်းထဵင်ၼႃး ႁိမ်း ႁွမ်းၼႆႉ ၵူၺ်းၼႆၼၼ်ႉ သိုၵ်း မၢၼ်ႈ ၸႂ်ႉမၼ်းၵႂႃႇႁႃႁွင်ႉၶဝ်မႃး။ သိုၵ်းမၢၼ်ႈၶဝ်ၶီႇလူတ်ႉၶိူင်ႈ (သၢႆႇၵႄႇ) တၢမ်းၵႂႃႇၸွမ်းတၢင်းလင် မၼ်း ပႃးတင်း လူတ်ႉၶိူင်ႈ ၸဝ်ႈၸၢင်း ဢၼ်ၶဝ်ယိုဝ်းတၢႆ ၼၼ်ႉၵႂႃႇ။ ၽွင်းၶဝ် ၽႅဝ်ၵႂႃႇ တီႈသုမ်ႉထဵင် ၼႃး ၼၼ်ႉ ၵူၼ်းဝၢၼ်ႈသၢမ်ၵေႃႉႁႃတၢင်းပၢႆႈ ပႃးတင်းၵူၼ်းလူင်ဝၢၼ်ႈ ယဝ်ႉ၊ ၵူၺ်းၵႃႈ ၼႂ်းထဵင်သမ်ႉ ၵိုတ်းဝႆႉ ထႅင်ႈသၢမ်ၵေႃႉ- မႄႈ 1 ၵေႃႉ၊ လုၵ်ႈယိင်း ဢႃယု 16 ၼိုင်ႈၵေႃႉလႄႈ လုၵ်ႈ ၸၢႆးဢႃယု 12 ထႅင်ႈ 1 ၵေႃႉ။
ပိူင်ပဵၼ်လွင်ႈတၢင်းမၼ်းတီႈၼႂ်းသုမ်ႉထဵင်ႁႆႈၼႃးၼၼ်ႉတႄႉဢမ်ႇမီးၵူၼ်းႁူႉႁၼ် တၢမ်တႃ ၵမ်းသိုဝ်ႈ သေတႃႉ ၵူၺ်းၵႃႈ လၵ်းထၢၼ် (သၢၵ်ႈသေႇ) မၼ်းတိုၼ်းလၢတ်ႈၼႄၸႅင်ႈလႅင်းဝႃႈပဵၼ် သိုၵ်းမၢၼ်ႈ ၶဝ် ၵေႃႉ ၶႃႈတၢႆလႄႈၵၼ်ႉၸၼ်ပူၼ်ႉပႅၼ်တၢင်းၵႃႇမႃႉ ၼႆၵမ်းလဵဝ်ယဝ်ႉ။ ဢွၼ်ႇယိင်းဢႃယု 16 ၼၼ်ႉ ထူပ်းႁၼ်တူဝ်တၢႆ မၼ်းၼၢင်းၼႂ်းသုမ်ႉထဵင်ႁႆႈ၊ ပွႆႇပူၺ်၊ မီးႁွႆးၸဵပ်းတီႈၼႃႈၽၢၵ်ႇလႄႈ ၸွမ်းတူဝ် မၼ်း ၼၢင်းၸမ်ႉလိူတ်ႈ။ သိူဝ်ႈၶူဝ်းမၼ်းၼၢင်းၼၼ်ႉၵေႃႈ ထူပ်းႁၼ်ႁိမ်း သွင်ႇၾႆး၊ သိူဝ်ႈၶူဝ်းသိုၵ်းလႄႈ ၶိူင်ႈၵွင်ႈၵၢင်ႇ ၵေႃႈမီးႁိမ်းၶၢင်ႈ တူဝ်မၼ်းၼၢင်း။ ၸိူင်ႉႁိုဝ်ၵေႃႈတိုၼ်းယုမ်ႇယမ်လႆႈဝႃႈ ၵေႃႉပဵၼ်မႄႈ မၼ်းၼၢင်း တုၵ်းယွၼ်းတီႈသိုၵ်းမၢၼ်ႈၶဝ် ယႃႇပေႁဵတ်းသင်တီႈလုၵ်ႈယိင်းမၼ်းၼၢင်း ၵူၺ်းၵႃႈၺႃး သိုၵ်းမၢၼ်ႈ ယိုဝ်းတၢႆ ၵွပ်ႈဝႃႈမီးႁွႆႈမၢၵ်ႇ ၵွင်ႈတီႈတွင်ႉလႄႈႁူဝ်မၼ်းၼၢင်း။
ၵေႃႉပဵၼ်ပေႃႈ ဢၼ်ထူပ်းႁၼ်ၶၢပ်ႈတူဝ်တၢႆၶဝ်ထႅင်ႈၼႂ်ၼိုင်ႈၼၼ်ႉ လၢတ်ႈဝႃႈ “မိူဝ်ႈၶႃႈမႃးထိုင် ၶႃႈလႆႈ ႁၼ်မေးၼၢင်းၶႃႈ ၼွၼ်းတၢႆဝႆႉၼိူဝ်လိၼ် တင်းမၢၵ်ႇၵွင်ႈလုၵ်ႈၼိုင်ႈၶဝ်ႈဢူၵ်းမၼ်းၼၢင်း၊ လုၵ်ႈၸၢႆးၶႃႈ ၵေႃႈ ၼွၼ်းတၢႆဝႆႉႁိမ်းမၼ်းသေ တူဝ်ၵူဝ်ႈလိူတ်ႈမူတ်း။ သိူဝ်ႈၶူဝ်းလုၵ်ႈယိင်းၶႃႈၵေႃႈမၢၵ်ႇမိူဝ်ၵႂႃႇၼိူဝ် လိၼ်လႄႈ တီႈတူဝ်မၼ်းၵေႃႈဢမ်ႇမီးသင်၊ ပွႆႇပူၺ်ဝႆႉၸိူင်ႉၼၼ် ၼႂ်းသုမ်ႉထဵင်ႁႆႈ။ မၼ်းၼၢင်း ၺႃး ၵၼ်ႉၸၼ် သေၶႃႈတၢႆ။ လိူဝ်ၼၼ်ႉ ၶႃႈလႆႈႁၼ်သိူဝ်ႈၶူဝ်းသိုၵ်းမၢၼ်ႈ ၵွင်ႈလဝ်းၼိုင်ႈ မီးႁိမ်းမၼ်းၼၢင်း ” ၼႆယဝ်ႉ။
ၽွင်းယၢမ်းၼၼ်ႉ ၶိူင်ႈမိၼ်တိုၵ်းသိုၵ်းမၢၼ်ႈၵေႃႈမိၼ်ၽၢႆႈၶၢမ်ႈႁူဝ်ၵူၼ်းသေ မိူၼ်တင်းတဵၵ်းႁေႃႈလိုပ်ႈ ၵူၼ်းဝၢၼ်ႈၸိူဝ်းယူႇႁိမ်းၸမ် ႁႂ်ႈႁႃတၢင်းပၢႆႈ။ ဝၼ်းထိ 25/9/2025 ၶၢဝ်းယၢမ်းမွၵ်ႈ 11:30 ၵၢင်ဝၼ်း ၸမ် တဵင်ႈ ၵူၼ်းဝၢၼ်ႈလႄႈၸိူဝ်းပဵၼ်ၶိူဝ်းပီႈ ၶိူဝ်းၼွင်ႉ ၶဝ်ဢွၼ်ၵၼ်ၵႂႃႇတီႈထဵင်ႁႆႈၼႃးၼၼ်ႉသေ ဢဝ် ၶၢပ်ႈ တူဝ်တၢႆ ၸဝ်ႈၸၢင်းလႄႈၶဝ်မႄႈလုၵ်ႈၵႂႃႇၽင်ယူႇယဝ်ႉ။
ၵူၼ်းမိူင်းၸိူဝ်းၺႃးသိုၵ်းမၢၼ်ႈၶႃႈႁႅမ်တၢႆၼၼ်ႉပဵၼ် – ၸဝ်ႈၸၢင်းဢႃယုမွၵ်ႈ 30၊ ပႃႈလႅင်း ၵေႃႉပဵၼ်မေး လုင်းဢေႃး၊ လုၵ်ႈယိင်းၶဝ် ၼၢင်းတဵင်းသႃႇ ဢႃယု 16 လႄႈလုၵ်ႈၸၢႆးၶဝ် ၸၢႆးတၢၼ်းမွင်ႇ ဢႃယု 12 ပီ။
လုင်းဢေႃး ဢႃယု 48 ၵေႃႉပဵၼ်ၸဝ်ႈၽူဝ်လႄႈ ပေႃႈလၢတ်ႈၼႄဝႃႈ မၼ်းလႆႈၵႂႃႇပႂ်ႉယၢမ်း (ဝၼ်း) ယွၼ်ႉ တူၵ်းၼႃႈႁိူၼ်း တင်ႈတႄႇဝၼ်းထိ 16 ထိုင် 22/9/2025 တီႈဝၢၼ်ႈလွႆၶေႃ။ ထိုင်မႃးဝၼ်းထိ 24/9/2025 ၵူၼ်းဝၢၼ်ႈပွင်ႇၶၢဝ်ႇလၢတ်ႈၼႄမၼ်းဝႃႈ ၵူၼ်းႁိူၼ်းမၼ်းၺႃးၶႃႈတၢႆ။ တီႈတႄႉမၼ်းတေလႆႈပွၵ်ႈႁိူၼ်း ၶိုၼ်းဝၼ်းထိ 22/9/2025 ၵူၺ်းၵႃႈယွၼ်ႉတိုၵ်ႉမီးပၢင်တိုၵ်း သိုၵ်းမၢၼ်ႈၸွမ်းဢဝ်ၶိူင်ႈမိၼ်ပွႆႇယူႇ လႄႈ ၵူၼ်းဝၢၼ်ႈတၢင်ႇၵေႃႉ ပႆႇပဵၼ်မႃးပုတ်ႈသေ မၼ်းဢမ်ႇလႆႈပွၵ်ႈႁိူၼ်းၶိုၼ်း ၵမ်းလဵဝ်။ ဝၼ်းထိ 24/9/2025 ၶၢဝ်းယၢမ်း 3 မူင်းဝၢႆးဝၼ်း မၼ်းၶိုၼ်းပွၵ်ႈမိူဝ်း တီႈဝၢၼ်ႈၼႃးဢၢႆႈၶၢၼ်ႉ၊ ၵူၺ်းၵႃႈယွၼ်ႉ ၶိူင်ႈ မိၼ် Jet fighter သိုၵ်းမၢၼ်ႈလမ်းၼိုင်ႈသမ်ႉတိုၵ်ႉပွႆႇမၢၵ်ႇယူႇလႄႈ မၼ်းဢမ်ႇလႆႈၵႂႃႇ ၸူးၸႂ်းႁႆႈၼႃး မၼ်း ဝၼ်းၼၼ်ႉ။ ဝၼ်းထိ 25/9/2025 ၶၢဝ်းယၢမ်းမွၵ်ႈ 7:30 မူင်းၶိုင်ႈၵၢင်ၼႂ် မၼ်းၸၢႆးလႄႈ တင်းပီႈ ၼွင်ႉ ထႅင်ႈသွင်ၵေႃႉ ၸင်ႇၵႂႃႇတီႈႁႆႈၼႃးမၼ်း သေ လႆႈႁပ်ႉႁူႉႁၼ်ဝႃႈၼၢင်းမေးမၼ်း လႄႈလုၵ်ႈဢွၼ်ႇ မၼ်းတၢႆယဝ်ႉ။
ဝၢၼ်ႈၼႃးဢၢႆႈၶၢၼ်ႉၼႆႉ မီးလင်ႁိူၼ်းမွၵ်ႈ 150 သေႁူဝ်ၼပ်ႉၵူၼ်းဝၢၼ်ႈမီး 350 ပၢႆ။ ၽွင်းပဵၼ် လွင်ႈၼႆႉ ယူႇၼၼ်ႉ ၵူၼ်းဝၢၼ်ႈၵမ်ႈၼမ် ဢွၼ်ၵၼ်ပၢႆႈၽေးသိုၵ်းဝႆႉယဝ်ႉ ယွၼ်ႉဝႃႈ သိုၵ်းမၢၼ်ႈဢဝ်ၶိူင်ႈမိၼ် မႃးပွႆႇမၢၵ်ႇ။
သိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇလႄႈဢဝ်ၵွင်ႈလူင်ယိုဝ်းၼႂ်းၸႄႈဝဵင်းၵျွၵ်းမႄး
ဝၼ်းထိ 8/9/2025 ၶၢဝ်းယၢမ်း 3 မူင်းဝၢႆးဝၼ်း ၶိူင်ႈမိၼ်တိုၵ်း Jet fighter သိုၵ်းမၢၼ်ႈလမ်းၼိုင်ႈ မႃးပွႆႇ မၢၵ်ႇတီႈ ဝၢၼ်ႈတွင်သလိတ်ႉ ၸႄႈဝဵင်းၵျွၵ်းမႄး၊ တိူဝ်ႉၺႃးႁိူၼ်းယေးလၢႆလၢႆလင်လုၵွႆ။
ဝၼ်းထိ 9/9/2025 ၶၢဝ်းယၢမ်းၼႂ်းၵႄႈ 12:26 လႄႈ 12:30 မူင်းတဵင်ႈဝၼ်း ၶိူင်ႈမိၼ်တိုၵ်း Jet fighter သိုၵ်း မၢၼ်ႈ လမ်းၼိုင်ႈမႃးပွႆႇမၢၵ်ႇသွင်လုၵ်ႈတီႈ ဝၢၼ်ႈလွႆၶေႃ ဢၼ်မီးတၢင်းဢွၵ်ႇဝဵင်းၵျွၵ်းမႄး။ ၶၢဝ်းယၢမ်း 6:30 ၶိုင်ႈႁူဝ်ၶမ်ႈ ၶိူင်ႈမိၼ်တိုၵ်း Jet fighter သိုၵ်းမၢၼ်ႈလမ်းၼိုင်ႈ မႃးပွႆႇမၢၵ်ႇတီႈဝၢၼ်ႈ တွင်သလိတ်ႉ တိူဝ်ႉၺႃးႁိူၼ်းယေးလၢႆလၢႆလင်လုၵွႆ။
ဝၼ်းထိ 11/9/2025 သိုၵ်းမၢၼ်ႈႁွတ်ႈၽႅဝ်တီႈဝၢၼ်ႈၶၢႆးတူၼ်ႈႁုင်း။
ဝၼ်းထိ 12/9/2025 ၶၢဝ်းယၢမ်း 8 မူင်းၵၢင်ၼႂ် သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇ တီႈငဵမ်းၶျၢမ်းယေး ၵူင်း သေ ယၢမ်း 6 မူင်းႁူဝ်ၶမ်ႈသမ်ႉ သိုၵ်းမၢၼ်ႈဢဝ်ၵွင်ႈလူင်ယိုဝ်းသႂ်ႇတီႈဝၢၼ်ႈ သၶၢၼ်းသႃႇလႄႈ ဝၢၼ်ႈၶၢႆးတူၼ်ႈႁုင်း။ ၶၢဝ်းယၢမ်း 1 မူင်းၵၢင်ဝၼ်း ၶိူင်ႈမိၼ်တိုၵ်း Jet fighter လမ်းၼိုင်ႈမႃးပွႆႇမၢၵ်ႇတီႈ ဝၢၼ်ႈ တွင်သလိတ်ႉ တိူဝ်ႉၺႃးႁိူၼ်းယေးလၢႆလၢႆလင်လုၵွႆ။
ဝၼ်းထိ 13/9/2025 ယၢမ်းၵၢင်ၼႂ် သိုၵ်းမၢၼ်ႈယိုဝ်းၵွင်ႈလူင်ၸဵတ်းၵမ်းသေဢဝ်ၻရူၼ်ႊပွႆႇမၢၵ်ႇ ၼိူဝ် ဝၢၼ်ႈ ၵုင်းၵေႃႇလႄႈဝၢၼ်ႈၶၢႆးတူၼ်ႈႁုင်း၊ ယၢမ်းတၢမ်းၶမ်ႈသမ်ႉဢဝ်ၶိူင်ႈမိၼ်တိုၵ်း Jet fighter လမ်း ၼိုင်ႈ မႃးပွႆႇမၢၵ်ႇ တီႈဝၢၼ်ႈၼႃးဢၢႆႈၶၢၼ်ႉ၊ ပၢင်ႁႆးလႄႈၶၢႆးတူၼ်ႈႁုင်း။
ဝၼ်းထိ 16 လႄႈ 17/9/2025 သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇ တီႈဝၢၼ်ႈမၢၵ်ႇမၼ်ႉ ၵုင်းသႃႇ တိူဝ်ႉၺႃးဝတ်ႉ/ၵျွင်းလႄႈ ႁိူၼ်းၵူၼ်းဝၢၼ်ႈ 5 လင်လုၵွႆ။
ဝၼ်းထိ 18/9/2025 ၶၢဝ်းယၢမ်း 3 မူင်းဝၢႆးဝၼ်း သိုၵ်းမၢၼ်ႈယူႇတီႈၶူဝ်ႁူၺ်ႈၵိုတ်ႈသေ ဢဝ်ၵွင်ႈလူင်ယိုဝ်း ၸဵတ်းၵမ်းလႄႈ ဢဝ်ၻရူၼ်ႊပွႆႇမၢၵ်ႇ ၶဝ်ႈၼႂ်းဝၢၼ်ႈၼွင်ပဵတ်း တိူဝ်ႉၺႃး ႁိူၼ်းၵူၼ်းဝၢၼ်ႈလၢႆလၢႆ လင် လုၵွႆ။
ဝၼ်းထိ 20/9/2025 ၶၢဝ်းယၢမ်း 8 မူင်းၵၢင်ၼႂ် ၽွင်းပဵၼ်ပၢင်တိုၵ်းယူႇၼၼ်ႉ သိုၵ်းမၢၼ်ႈ ဢဝ်ၵွင်ႈလူင် ယိုဝ်းႁိမ်းဢိူင်ႇမိူင်းတၢင်ႈ။ ၶၢဝ်းယၢမ်း 11 မူင်းတွၼ်ႈၼႂ် သိုၵ်းမၢၼ်ႈဢဝ်ၵွင်ႈလူင်ယိုဝ်းၶဝ်ႈ ၼႂ်းဝၢၼ်ႈ ၼႃးဢၢႆႈၶၢၼ်ႉ။
ဝၼ်းထိ 22/9/2025 ၵၢင်ၶမ်ႈ သိုၵ်းမၢၼ်ႈ ယိုဝ်းၵွင်ႈလူင် ၶဝ်ႈၼႂ်းဝၢၼ်ႈသၶၢၼ်းသႃႇ၊ တိူဝ်ႉၺႃးၵူၼ်း ဝၢၼ်ႈ ၵေႃႉၼိုင်ႈမၢတ်ႇၸဵပ်း။
ဝၼ်းထိ 23/9/2025 ၶၢဝ်းယၢမ်းၼႂ်းၵႄႈ 10 မူင်းၵၢင်ၶမ်ႈလႄႈ 12 မူင်းတဵင်ႈၶိုၼ်း သိုၵ်းမၢၼ်ႈ ယိုဝ်းၵွင်ႈ လူင်ၶဝ်ႈၼႂ်းပွၵ်ႉဢၢင်းဢွၼ်ႇ ဢၼ်မီးႁိမ်းဝၢၼ်ႈၼမ်ႉႁူး၊ ငဵမ်းၶျၢမ်းယေးၵူင်း၊ ၼႃးဢၢႆႈၶၢၼ်ႉ၊ ဝၢၼ်ႈသ ၶၢၼ်း သႃႇလႄႈဝၢၼ်ႈလူင်ဝၢႆ။ ယၢမ်း 3 မူင်းဝၢႆးဝၼ်း ၵွင်ႈမၢၵ်ႇလူင်သိုၵ်းမၢၼ်ႈတိူဝ်ႉၺႃးၵူၼ်းဝၢၼ်ႈၸၢႆး ၵေႃႉၼိုင်ႈတၢႆ၊ ၼၢင်းယိင်းမၢတ်ႇၸဵပ်း 2 ၵေႃႉ၊ ႁိူၼ်းၵူၼ်းဝၢၼ်ႈလုၵွႆလၢႆလၢႆလင် ၼႂ်းဝၢၼ်ႈပၢင်ပဝ်း။ ယၢမ်း 4 ဝၢႆးဝၼ်း ၶိူင်ႈမိၼ်တိုၵ်းသိုၵ်းမၢၼ်ႈသႅၼ်း Y-12 jet fighter ဢဝ်မၢၵ်ႇၼမ်ႉၼၵ်း 250 ပွင်ႊ မႃးပွႆႇ ၼိူဝ်ဝၢၼ်ႈၼမ်ႉၸေႃႉ တိူဝ်ႉၺႃးႁိူၼ်းၵူၼ်းဝၢၼ်ႈလုၵွႆလၢႆလၢႆလင်။
ဝၼ်းထိ 24/9/2025 ယၢမ်း 7 မူင်းႁူဝ်ၶမ်ႈ မႃးပွႆႇမၢၵ်ႇၼမ်ႉၼၵ်း 250 ပွင်ႊ ၼိူဝ်ဝတ်ႉ/ၵျွင်းဝၢၼ်ႈပၢင်တီး၊ တိူဝ်ႉၺႃးတိုၵ်းဝတ်ႉ/ၵျွင်းလုၵွႆလၢႆလၢႆလင်။
ဝၼ်းထိ 25/9/2025 သိုၵ်းမၢၼ်ႈဢဝ် မၢၵ်ႇၵွင်ႈလူင်သႅၼ်း 60 ယိုဝ်းတီႈဝၢၼ်ႈသၶၢၼ်းသႃႇ လႄႈ လူင်ဝၢႆ တင်းၶိုၼ်းတင်းဝၼ်း၊ တိူဝ်ႉၺႃးႁိူၼ်းၵူၼ်းဝၢၼ်ႈလုၵွႆလၢႆလၢႆလင်။ ၶၢဝ်းယၢမ်း 11:30 တွၼ်ႈၼႂ်ၶိူင်ႈမိၼ် တိုၵ်း jet fighter သိုၵ်းမၢၼ်ႈ လမ်းၼိုင်ႈ မႃးပွႆႇမၢၵ်ႇ ၼိူဝ်ဝၢၼ်ႈသၶၢၼ်းသႃႇ။
ဝၼ်းထိ 26/9/2025 ၵၢင်ၼႂ်သိုၵ်းမၢၼ်ႈသွၵ်ႈတဝ်ၵႂႃႇတၢင်းဝၢၼ်ႈသၶၢၼ်းသႃႇ။ ဝၼ်းၼၼ်ႉၵၢင်ဝၼ်း သိုၵ်းမၢၼ်ႈ ဢဝ်မၢၵ်ႇၵွင်ႈလူင်ယိုဝ်း လႄႈၻရူၼ်ႊပွႆႇမၢၵ်ႇဝၢၼ်ႈပႃႇပူၵ်ႇ၊ တိူဝ်ႉၺႃးၵူၼ်းဝၢၼ်ႈၸၢႆး ဢႃ ယု 69 ၵေႃႉၼိုင်ႈတၢႆ၊ ႁိူၼ်းၵူၼ်းဝၢၼ်ႈလုၵွႆၸွမ်းလၢႆလၢႆလင်။
ဝၼ်းထိ 27/9/2025 ၶၢဝ်းယၢမ်း ၵၢင်ဝၼ်း ၶိူင်ႈမိၼ်တိုၵ်းသိုၵ်းမၢၼ်ႈသႅၼ်း Y-12 jet fighter သိုၵ်းမၢၼ်ႈ လမ်းၼိုင်ႈ မႃးပွႆႇမၢၵ်ႇ ၼိူဝ်ဝၢၼ်ႈၼမ်ႉၸေႃႉ၊ တိူဝ်ႉၺႃးဝတ်ႉ 1 လင်လႄႈႁိူၼ်းၵူၼ်းဝၢၼ်ႈ 5 လင်။ ၶၢဝ်းယၢမ်း 4 မူင်းဝၢႆးဝၼ်း သိုၵ်းမၢၼ်ႈဢဝ် ၶိူင်ႈမိၼ်တိုၵ်းသိုၵ်းမၢၼ်ႈသႅၼ်း Y-12 jet fighter ပွႆႇမၢၵ်ႇ ၼမ်ႉၼၵ်း 500 ပွင်ႊ သွင်လုၵ်ႈၼိူဝ်ဝၢၼ်ႈ ပၢင်သပေႇလႄႈဝတ်ႉ/ၵျွင်းၼႂ်းဢိူင်ႇပၢင်ၵွၼ် တိူဝ်ႉၺႃး ႁိူၼ်းၵူၼ်းဝၢၼ်ႈ 20 လင်လႄႈဝတ်ႉ/ၵျွင်းလုၵွႆ 1 လင်။
ဝၼ်းထိ 28/9/2025 ၶၢဝ်းယၢမ်း 3 မူင်းဝၢႆးဝၼ်း သိုၵ်းမၢၼ်ႈယိုဝ်းမၢၵ်ႇလူင် 30 လုၵ်ႈၶဝ်ႈၼႂ်းဝၢၼ်ႈလူင်ဝၢႆ၊ ႁဵတ်းႁႂ်ႈႁိူၼ်းၵူၼ်းဝၢၼ်ႈလၢႆလၢႆလင်ၾႆးမႆႈ။
ဝၼ်းထိ 29/9/2025 ၶၢဝ်းယၢမ်း 1:30 မူင်းၶိုင်ႈ ဝၢႆးဝၼ်း သိုၵ်းမၢၼ်ႈဢဝ်ၻရူၼ်ႊ မႃးပွႆႇမၢၵ်ႇ ၼိူဝ်ဝၢၼ်ႈ ၶူဝ်မုင်းသေ ႁဵတ်းႁႂ်ႈႁိူၼ်းၵူၼ်းဝၢၼ်ႈ လၢႆလၢႆလင်ၾႆးမႆႈ။
တွင်ႈထၢမ်
ၸၢႆးႁေႃသႅင် +66 94 728 6696 Signal (ၽႃသႃတႆး၊ ဢင်းၵိတ်း)
ယိင်းလႅင်းႁၢၼ် +66 99 289 6080 Signal (ၽႃသႃမၢၼ်ႈ)
ၸၢႆးႁၵ်ႉၸႅတ်ႈ +1 343 304 5332 Signal (ၽႃသႃတႆး၊ ဢင်းၵိတ်း)