သိုၵ်းမၢၼ်ႈယိုဝ်းပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆးတီႈလွႆလမ်ႇလွင်ႈ၊သူၼ်းၾႆးပၢင်တိုၵ်းလူင်သေ ၸၢင်ႈႁဵတ်းႁႂ်ႈၵူၼ်းမိူင်းႁၢမ်းႁိူၼ်းယေးတီႈယူႇ ၼႂ်းၸိုင်ႈတႆးတွၼ်ႈၵၢင်

ဝၼ်းထိ 08/09/2016

ၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆးမၢႆ 6/2016

သိုၵ်းမၢၼ်ႈယိုဝ်းပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆးတီႈလွႆလမ်ႇလွင်ႈ၊သူၼ်းၾႆးပၢင်တိုၵ်းလူင်သေ ၸၢင်ႈႁဵတ်းႁႂ်ႈၵူၼ်းမိူင်းႁၢမ်းႁိူၼ်းယေးတီႈယူႇ ၼႂ်းၸိုင်ႈတႆးတွၼ်ႈၵၢင်

ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆးသၢၼ်ၶတ်းလွင်ႈသိုၵ်းမၢၼ်ႈပိုတ်းယိုဝ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈ တႆးတီႈလွႆလမ်ႇလွင်ႈတႃႇၵၢၼ်သိုၵ်းဢၼ်ပဵၼ်တပ်ႉပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ၼႂ်း ၸႄႈဝဵင်းတၢင်ႉယၢၼ်း၊ႁဵတ်းႁႂ်ႈၵူၼ်းမိူင်းမွၵ်ႈ 100 လႆႈပိုၼ်ႉပွႆႇပႅတ်ႈႁိူၼ်းယေး၊သူၼ်းၾႆးႁႂ်ႈပၢင်တိုၵ်းမႂ်ႇၵိူတ်ႇ ၶိုၼ်ႈသေႁဵတ်းႁႂ်ႈၵူၼ်းမိူင်းလႆႈၼီပၢႆႈၼၼ်ႉယဝ်ႉ။

မိူဝ်ႈဝၼ်းထိ 28/08/2016 ၼၼ်ႉသိုၵ်းမၢၼ်ႈပိုတ်ႇၼႃႈသိုၵ်းတိုၵ်းယိုဝ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈ တႆးတီႈလွႆၸေးလွႆသုင်လုၵ်ႈၼိုင်ႈဢၼ်ယူႇၼႂ်းၼႃႈတီႈပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆးၵုမ်းၵမ်၊ၼႃႈ တီႈပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆးတီႈၼႆႈၼႆႉယူႇၼႂ်းတွၼ်ႈတၢင်းတူၵ်းၶူင်းသေၼႃႈတၢင်းဢွၵ်ႇသမ်ႉ ပဵၼ်ၼႃႈလိၼ်တပ်ႉသိုၵ်းမိူင်းဝၽွမ်ႉႁူမ်ႈ UWSA ၵုမ်းၵမ်လႄႈပဵၼ်ၼႂ်းၼႃႈတီႈဢၼ်လမ်ႇလွင်ႈ။လွင်ႈပိုတ်ႇၼႃႈ သိုၵ်းပိုတ်းယိုဝ်းတီႈလွႆၼႆႉမိူၼ်တင်းဝႃႈ တေလႆႈၵႅတ်ႇၶႄႁႄႉၵင်ႈၼႃႈတီႈသေမိူၼ်တင်းသိုၵ်းမၢၼ်ႈ တင်ႈၸႂ်သေႇ ယူင်းႁႂ်ႈပဵၼ်ပၢင်တိုၵ်းၵူၺ်း။

ပၢင်တိုၵ်းၼႆႉတိုၼ်းၽႅၼ်ဝႆႉဢွၼ်တၢင်းယဝ်ႉ။သိုၵ်းမၢၼ်ႈလၢတ်ႈတီႈၵူၼ်းဝၢၼ်ႈဢွၼ်ၼႃႈဝၼ်းဢၼ်တေပဵၼ် ပၢင်တိုၵ်းၼၼ်ႉဝႃႈသိုၵ်းမၢၼ်ႈတေၶိုၼ်ႈမိူဝ်းတူၺ်းၼိူဝ်လွႆၼႆယဝ်ႉ။မိူဝ်ႈဝၼ်းထိ 28/08/2016 ၶၢဝ်းယၢမ်း 04:15 ဝၢႆးဝၼ်းၼၼ်ႉသိုၵ်းမၢၼ်ႈၶမယတပ်ႉ 523 တၢင်ႉယၢၼ်း၊ၶလယတပ်ႉ 33 မိူင်းၵၢဝ်လႄႈပျီႇတုၸိတ်ႉဢဵၼ်ႁႅင်းမွၵ်ႈ75 ၶိုၼ်ႈၵႂႃႇၼိူဝ်လွႆဢၼ်ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆးပၵ်းဝႆႉၼၼ်ႉယဝ်ႉ။ၽွင်းၶဝ် တိုၵ်ႉၶိုၼ်ႈလွႆယူႇၼၼ်ႉသိုၵ်းမၢၼ်ႈၶမယတပ်ႉ 147 ဢၼ်ပၵ်းဝႆႉတၢင်းတႂ်ႈတိၼ်လွႆသမ်ႉဢဝ်မၢၵ်ႇလူင်မွၵ်ႈ 20 လုၵ်ႈယိုဝ်းၶိုၼ်ႈၸူးတပ်ႉပၢင်သဝ်းတပ်ႉသိုၵ်းၸိုင်ႈတႆးယူႇယဝ်ႉ။

ၶိုၼ်းၼၼ်ႉပဵၵ်ႉသမ်ႉသိုၵ်းမၢၼ်ႈလႆႈထုၵ်ႇတပ်ႉသိုၵ်းၸိုင်ႈတႆးလိုပ်ႈယိုဝ်းထွႆပွၵ်ႈၶိုၼ်းသေတၵူၼ်းဝၢၼ်ႈတႄႉ ဢွၼ်ၵၼ်ပၢႆႈၽေးယွၼ်ႉၵူဝ်မၢၵ်ႇလူင်ၼၼ်ႉယဝ်ႉ။ၵူၼ်းဝၢၼ်ႈၶူဝ်တုမ်းလႄႈႁိမ်းႁွမ်းဝၢၼ်ႈလွႆလႅမ်ၸိူဝ်းပဵၼ်တႆးလႄႈလီးသေႃးၵမ်ႈၼမ်ပဵၼ်ၵူၼ်းထဝ်ႈ၊ၼၢင်းယိင်းလႄႈလုၵ်ႈဢွၼ်ႇမွၵ်ႈ 100 လႆႈဢွၼ်ၵၼ်ပၢႆႈၽေးၵႂႃႇပိုင်ႈႁူမ်ႈၼႂ်းဝဵင်းမိူင်းၵၢဝ်ယူႇယဝ်ႉ။ၵူၼ်းဝၢၼ်ႈၸၢဝ်းလီးသေႃးတႄႉတင်ႈပၢင်သဝ်းၶဝ်ၸွမ်းသႅင်ႇၸွမ်းႁၢၼ်ႉၶၢႆၶူဝ်းၶွင်ပိူၼ်ႈဢၼ်မီးႁိမ်းႁွမ်းၵၢတ်ႇမိူင်းၵၢဝ်သေၸိူဝ်းပဵၼ်တႆးတႄႉပၢႆႈၵႂႃႇယူႇၸွမ်းပီႈၼွင်ႉၽႂ်မၼ်း။ၸိူဝ်း ၶဝ်ယင်ႉလိုဝ်ႈသဝ်းယူႇဝႆႉတႃႇၶၢဝ်းတၢင်းသွင်ဝၼ်းတေႃႇငဝ်းလၢႆးပၢင်တိုၵ်းပေႃးယဵၼ်ၶိုၼ်းၼၼ်ႉယဝ်ႉ။

မိူဝ်ႈလဵဝ်ၵူၼ်းမိူင်းလႆႈလွမ်ၵူဝ်လွင်ႈသိုၵ်းမၢၼ်ႈတေႁၢင်ႈႁႅၼ်းသိုၵ်းယႂ်ႇလူင်လေႃႇတိုၵ်းမိူၼ်မိူဝ်ႈၼႂ်းပီ 2013 ၼႂ်းပိုၼ်ႉတီႈၼႆႉယူႇ။ၽွင်းၼၼ်ႉသိုၵ်းမၢၼ်ႈၸႂ်ႉဢဵၼ်ႁႅင်းသိုၵ်းၼပ်ႉႁူဝ်ႁဵင်ၽိူမ်ႉထႅမ်ၽိုတ်ႉၶဝ်ႈၼႂ်းပိုၼ်ႉတီႈသေပူၼ်ႉပႅၼ်သုၼ်ႇလႆႈၵူၼ်းႁၢဝ်ႉႁႅင်း၊တဵၵ်းဢဝ်ၵူၼ်းမိူင်းႁဵတ်းႁူဝ်ႉၶႄတူဝ်ၶဝ်လႄႈဢဝ်မၢၵ်ႇလူင်ယိုဝ်းၶဝ်ႈၼႂ်းပိုၼ်ႉတီႈၵူၼ်းမိူင်းယူႇသဝ်းၸိူဝ်းၼႆႉသေႁဵတ်းႁႂ်ႈၵူၼ်းမိူင်း 2,000 ပၢႆၸိူဝ်းပဵၼ်ပီႈၼွင်ႉတဢၢင်း (ပလွင်ႈ/ လွႆ)၊တႆးလႄႈဝၸိူဝ်းၼႆႉလႆႈပၢႆႈၽေးသိုၵ်းသိူဝ်ၵႂႃႇပိုင်ႈႁူမ်ႈၼႂ်းဝဵင်းတၢင်ႉယၢၼ်းယူႇယဝ်ႉ။ (ၶဝ်ႈတူၺ်းလႆႈတီႈၼႆႈhttp://www.shanhumanrights.org/index.php?option=com_content&view=article&id=171:august-2009&catid=35:2009&Itemid=77). တင်ႈတႄႇၼၼ်ႉမႃးသိုၵ်းမၢၼ်ႈသိုပ်ႇၽိူမ်ႉထႅမ်ဢဵၼ်ႁႅင်း သိုၵ်းမၼ်း သိုပ်ႇၶႂၢၵ်ႈသိုၵ်းမၼ်းၶဝ်ႈၼႂ်းပိုၼ်ႉတီႈၸိူဝ်းၼႆႉ 1,000 ပၢႆသေတင်ႈတပ်ႉမႂ်ႇဝႆႉၸွမ်းတိၼ်လွႆၸေး 15 တပ်ႉလႄႈၼႂ်းပီၼႆႉမိူဝ်ႈၼႂ်းလိူၼ်ဢေႊပရိူဝ်ႊၼၼ်ႉၵေႃႈ သိုၵ်းမၢၼ်ႈၸိသင်ႇႁႂ်ႈပႃႇတီႇမႂ်ႇသုင်ၸိုင်ႈတႆး/တပ်ႉ သိုၵ်းၸိုင်ႈတႆး SSPP/SSA ထွၼ်တပ်ႉဢွၵ်ႇတီႈလွႆၼႆႉၼင်ႇၵဝ်ႇယဝ်ႉ။