ၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 7/8/2025
သိုၵ်းမၢၼ်ႈဢဝ်ၶိူင်ႈမိၼ်တိုၵ်းလႄႈၵွင်ႈလူင်ယိုဝ်း ၼႂ်းၸႄႈဝဵင်းသီႇပေႃႉ၊ မိူင်းၵုတ်ႈ၊ ၵျွၵ်းမႄး၊ ၼွင်ၶဵဝ်၊ ၵူတ်ႉၶၢႆၸွမ်းသၢႆတေႃႈၵျႅတ်ႊ၊ ၼမ်ႉမၼ်းၶႄႇ တိူဝ်ႉၺႃးၵူၼ်းမိူင်းတၢႆ 35 ၵေႃႉ၊ မၢတ်ႇၸဵပ်း 55 ၵေႃႉ
ၼႂ်းၵႄႈဝၼ်းထိ 15/7/2025 လႄႈဝၼ်းထိ 4/8/2025 ပူၼ်ႉမႃးၼႆႉသိုၵ်းမၢၼ်ႈဢဝ်ၶိူင်ႈမိၼ်တိုၵ်းလႄႈၵွင်ႈ လူင်ယိုဝ်းသေ တိူဝ်ႉၺႃၵူၼ်းမိူင်းတၢႆ 35 ၵေႃႉ၊ မၢတ်ႇၸဵပ်း 55 ၵေႃႉ၊ တိုၵ်း/ႁိူၼ်းယေးလုၵွႆ 60 လင်ပၢႆ-ပႃး ၸဵမ်ႁူင်းသဝ်း 3 လင်၊ ဝတ်ႉ/ၵျွင်း 2 လင်၊ ႁူင်းႁဵၼ်း 2 လင် လႄႈႁွင်ႈပၼ်ယႃ 1 လင် ၼႂ်းပိုၼ်ႉတီႈ ၸႄႈ ဝဵင်း သီႇပေႃႉ၊ မိူင်းၵုတ်ႈ၊ ၵျွၵ်းမႄး၊ ၼွင်ၶဵဝ်လႄႈၵူတ်ႉၶၢႆ ဢၼ်ယူႇပႃႈတႂ်ႈသိုၵ်းလွႆ/တဢၢင်း (TNLA) တင်းသိုၵ်း ၵဝ်ႈၵၢင်ႉ (MNDAA) ၶဝ်ၵုမ်းၵမ် တင်ႈတႄႇပီ 2024 မႃး။
ဢၼ်သိုၵ်းမၢၼ်ႈဢဝ်ၶိူင်ႈမိၼ်တင်းၵွင်ႈလူင်ယိုဝ်း ၼႂ်းၸႄႈဝဵင်းၵျွၵ်းမႄးလႄႈသီႇပေႃႉၼၼ်ႉ ပဵၼ်ၼႂ်း ပိုၼ်ႉ တီႈ ဢၼ်မီးၽေးၶဵၼ်ႁၢႆႉႁႅင်းတႄႉ ၵွပ်ႈဝႃႈမၼ်းၸမ်တေႃႈၵျႅတ်ႊ လႄႈၼမ်ႉမၼ်းၶႄႇ သေၸၢင်ႈ ႁဵတ်းႁႂ်ႈ တေႃႈၼမ်ႉမၼ်းတင်းတေႃႈၵျႅတ်ႊတႅၵ်ႇ ၼၼ်ႉယဝ်ႉ။ ၼႂ်းသွင်ၸႄႈဝဵင်းၼႆႉ မၢၵ်ႇလူင်သိုၵ်းမၢၼ်ႈ တႅၵ်ႇ ၸမ်ဢွင်ႈၵုမ်းၵမ်တေႃႈၼမ်ႉမၼ်း တီႈဢၼ်မီးၼိူဝ်လိၼ် လႄႈၸၢင်ႈႁဵတ်းတႅၵ်ႇ လုၵ်ႉပဵၼ်ၾႆး ၼၼ်ႉယဝ်ႉ။
ဢၼ်ပဵၼ်ပၢင်တိုၵ်း ႁိမ်းတေႃႈၼမ်ႉမၼ်း လႄႈၵျႅတ်ႊ ၼႂ်းၵျွၵ်းမႄး ပဵၼ် သိုၵ်း မၢၼ်ႈတပ်ႉ ဢၼ်ယူႇ တီႈၶူဝ် ႁူၺ်ႈ ၵိုတ်ႈ။ ၶဝ်ဢဝ်မၢၵ်ႇလူင်ယိုဝ်း လႄႈ ဢဝ်ၻရူၼ်ႊ ပွႆႇမၢၵ်ႇလူင်း ၼႃႈ တၢင်း ဢွၵ်ႇၸွမ်းႁိမ်း ႁွမ်းဢွင်ႈ ၵုမ်း ၵမ် တေႃႈၼမ်ႉမၼ်းလႄႈၵျႅတ်ႊ။ ၼႂ်း ၵႄႈ ဝၼ်းထိ 25/7/2025 လႄႈ 31/7/2025 ၼၼ်ႉ သိုၵ်းမၢၼ်ႈ ဢဝ်မၢၵ်ႇလူင် 17 လုၵ်ႈယိုဝ်းလႄႈ ဢဝ်ၻရူၼ်ႊ ပွႆႇမၢၵ်ႇ 3 လုၵ်ႈသေမၢၵ်ႇတူၵ်း ၼႂ်း ဝၢၼ်ႈပၢင် ပဝ်း၊ ပၢင်ႇတိုင် လႄႈ ၼွင် ပိင်လူင် တိူဝ်ႉၺႃးၵူၼ်း ဝၢၼ်ႈ တၢႆ 5 ၵေႃႉ ပႃးတင်းၸဝ်ႈ သၢင်ႇ တူၼ်/ပႃး 1 သေ တိူဝ်ႉၺႃး ၸဝ်ႈသၢင်ႇထႅင်ႈ 5 တူၼ်/ပႃး မၢတ်ႇၸဵပ်း၊ တိုၵ်း ၼႂ်းဝတ်ႉ/ၵျွင်း လုၵွႆ 2 လင် ပႃးတင်းတီႈ ဢၼ် ၵူၼ်း ပၢႆႈၽေးၶဝ် မႃးပိုင်ႈ ႁူမ်ႈဝႆႉ ၸူဝ်ႈၶၢဝ်းၼၼ်ႉယဝ်ႉ။
ၼႂ်းၸႄႈဝဵင်းသီႇပေႃႉသမ်ႉ သိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇၼမ်ႉၼၵ်း 500 ပွင်ႊလႄႈ 250 ပွင်ႊလူင်း ႁိမ်းတေႃႈၼမ်ႉမၼ်းလႄႈၵျႅတ်ႊ ဢၼ်မီးတၢင်းၸဵင်ႇႁွင်ႇဝဵင်း မိူဝ်ႈဝၼ်းထိ 19/7/2025 လႄႈ 3/8/2025။ မၢၵ်ႇ လုၵ်ႈၼိုင်ႈပွႆႇလူင်းတီႈဝၢၼ်ႈမႂ်ႇ ဢၼ်ၸဵင်ႇဝၢၼ်ႈယူႇတၢင်းဢွၵ်ႇသေ ႁၢင်ႇၵႆတေႃႈၼမ်ႉမၼ်း လႄႈ ၵျႅတ်ႊ 100 ၵီႊလူဝ်ႊမႄႊတိူဝ်ႊ ၵူၺ်း။
ႁူဝ်ယွႆႈလွင်ႈသိုၵ်းမၢၼ်ႈ ပိုတ်ႇပၢင်တိုၵ်း
ဝၼ်းထိ 15/7/2025 ၶၢဝ်းယၢမ်း 1 မူင်းဝၢႆးဝၼ်း သိုၵ်းမၢၼ်ႈဢဝ်ၶိူင်ႈမိၼ်တိုၵ်း Jet fighter လမ်းၼိုင်ႈပွႆႇမၢၵ်ႇ လူင်းၼိူဝ်မိူင်းငေႃႉ ဢၼ်မီးတၢင်းၸဵင်ႇႁွင်ႇၸႄႈဝဵင်းၵျွၵ်းမႄး၊ မၢၵ်ႇတိူဝ်ႉၺႃးၶူဝ်လူင်ဢၼ်မီးႁိမ်းဝဵင်း။
ဝၼ်းထိ 19/7/2025 ၶၢဝ်းယၢမ်း 11: 45 ၸမ်တဵင်ႈၶိုၼ်း သိုၵ်းမၢၼ်ႈဢဝ်ၶိူင်ႈမိၼ်တိုၵ်း Jet fighter လမ်း ၼိုင်ႈ ပွႆႇမၢၵ်ႇၼိူဝ်ဝဵင်းသီႇပေႃႉ။ မၢၵ်ႇလူင်လုၵ်ႈၼိုင်ႈတူၵ်းတီႈၶွၵ်ႈဝဵင်းသီႇပေႃႉဢၼ်မီးၼႂ်း ပွၵ်ႉၸၢတ်ႈၸု၊ ထႅင်ႈ လုၵ်ႈ ၼိုင်ႈတူၵ်းတီႈသူၼ်မွၵ်ႇပွၵ်ႉၸၢတ်ႈၸုယဝ်ႉထႅင်ႈလုၵ်ႈၼိုင်ႈသမ်ႉသိုၵ်းမၢၼ်ႈ ပွႆႇတူၵ်းတီႈႁူင်း ႁဵၼ်း မၢႆ 1 ၸၼ်ႉဢွၼ် ဢၼ်မီးၼႂ်းပွၵ်ႉ ၸၢင်ႈၶမ်းၸၢၼ်း။ ႁူင်းႁဵၼ်းလႄႈႁိူၼ်းၵူၼ်းမိူင်းထႅင်ႈသၢမ်လင် လုၵွႆ ၸွမ်း။
ဝၼ်းထိ 20/7/2025 ၶၢဝ်းယၢမ်း 3 မူင်းဝၢႆးဝၼ်း သိုၵ်းမၢၼ်ႈဢၼ်မီးတီႈတပ်ႉႁူၺ်ႈၵိုတ်ႈ ဢဝ်ၵွင်ႈမၢၵ်ႇလူင် ယိုဝ်း 7 လုၵ်ႈလႄႈယူႇတီႈၶူဝ်ႁူၺ်ႈၵိုတ်ႈသေဢဝ်ၻရူၼ်ႊ ပွႆႇၶဝ်ႈၼႂ်းဝၢၼ်ႈၼွင်ပဵတ်း ၼႂ်းၸႄႈဝဵင်းၼွင်ၶဵဝ် တိူဝ်ႉၺႃးၵူၼ်းဝၢၼ်ႈတၢႆ 2 ၵေႃႉ– မႃႉၶၢႆႇ (ၵေႃႉပဵၼ်မႄႈ ဢႃယု 35) လႄႈလုၵ်ႈယိင်းမၼ်းၼၢင်း (ၼၢင်း သူၺ်ႇ ၸိၼ်ႇလိၼ်း ဢႃယု 9 ၶူပ်ႇ) ယဝ်ႉတိူဝ်ႉၺႃးႁိူၼ်းယေးလုၵွႆလၢႆလၢႆလင်။
ဝၼ်းထိ 20/7/2025 ၶၢဝ်းယၢမ်း 1 မူင်းၵၢင်ၼႂ်ၸဝ်ႉၸဝ်ႉ သိုၵ်းမၢၼ်ႈဢဝ်ၶိူင်ႈမိၼ်တိုၵ်း Jet fighter လမ်း ၼိုင်ႈ ပွႆႇမၢၵ်ႇၼမ်ႉၼၵ်း 500 ပွင်ႊၼိူဝ်ဝၢၼ်ႈတူင်ႈၸၢင်ႉ ဢၼ်မီးတၢင်းၸဵင်ႇႁွင်ႇ ဝဵင်းသီႇပေႃႉ၊ မၢၵ်ႇတိူဝ်ႉ ၺႃးႁိူၼ်းယေးၵူၼ်းဝၢၼ်ႈလၢႆလၢႆလင်။
ဝၼ်းထိ 23/7/2025 ၶၢဝ်းယၢမ်း ဝၢႆးဝၼ်း သိုၵ်းမၢၼ်ႈဢဝ်ၶိူင်ႈမိၼ်တိုၵ်း Jet fighter လမ်းၼိုင်ႈပွႆႇမၢၵ်ႇၼမ်ႉ ၼၵ်း 250 ပွင်ႊ ၼိူဝ်တပ်ႉၵဝ်ႇ ၶလယ မၢၼ်ႈ ဢၼ်မီးတၢင်းႁွင်ႇဝဵင်းသီႇပေႃႉ၊ မၢၵ်ႇတိူဝ်ႉၺႃးႁွင်ႈပၢင်ၵုမ် ၼႂ်းတပ်ႉၶဝ်လုၵွႆ။
ဝၼ်းထိ 25/7/2025 ၶၢဝ်းယၢမ်း 12 မူင်းဝၢႆးဝၼ်း သိုၵ်းမၢၼ်ႈ ဢၼ်မီးတီႈတပ်ႉႁူၺ်ႈၵိုတ်ႈ ဢဝ်ၻရူၼ်ႊ ပွႆႇ မၢၵ်ႇလူင်းၼိူဝ်ဝၢၼ်ႈပၢင်ပဝ်း ၼႂ်းၸႄႈဝဵင်းၵျွၵ်းမႄး။ မၢၵ်ႇၻရူၼ်ႊ 3 လုၵ်ႈတိူဝ်ႉၺႃး ၵူၼ်းဝၢၼ်ႈၸၢႆးၵေႃႉ 1 တၢႆ ၵူၼ်းဝၢၼ်ႈထႅင်ႈ 2 ၵေႃႉမၢတ်ႇၸဵပ်း ႁိူၼ်းယေးလုၵွႆ 5 လင်။
ဝၼ်းထိ 26/7/2025 ၶၢဝ်းယၢမ်း ၼႂ်းၵႄႈၵၢင်ဝၼ်းထိုင် ဝၢႆႇ 3 မူင်း သိုၵ်းမၢၼ်ႈဢၼ်ယူႇတီႈတပ်ႉႁူၺ်ႈၵိုတ်ႈ ၼႂ်းၸႄႈဝဵင်းၼွင်ၶဵဝ် ဢဝ်မၢၵ်ႇလူင်ၶဝ် ယိုဝ်းၶဝ်ႈၼႂ်းဝၢၼ်ႈၼွင်ပိင်လူင် ၸႄႈဝဵင်းၵျွၵ်းမႄး။ မၢၵ်ႇလူင် 3 လုၵ်ႈတူၵ်း ၼႂ်းပွၵ်ႉ 3 တိူဝ်ႉၺႃးၼၢင်းယိင်းၵူၼ်းၶၢႆၼိူဝ်ႉ ၼႂ်းၵၢတ်ႇ တၢႆ 1 ၵေႃႉ။ မၢၵ်ႇလူင်လုၵ်ႈ 1 တူၵ်းၼႂ်း ပွၵ်ႉ 1၊ မၢၵ်ႇလူင် 3 လုၵ်ႈတူၵ်းၼႂ်းပွၵ်ႉ 2 လႄႈထႅင်ႈလုၵ်ႈၼိုင်ႈတူၵ်းၼိူဝ်သဵၼ်ႈတၢင်းလူတ်ႉၾႆး/လဵၼ်း ၼႂ်းပွၵ်ႉ 4၊ တိူဝ်ႉၺႃးႁိူၼ်းမိူင်းလုၵွႆလၢႆလၢႆလင်။
ဝၼ်းထိ 26/7/2025 ၶၢဝ်းယၢမ်း 5 မူင်းႁူဝ်ၶမ်ႈ သိုၵ်းမၢၼ်ႈဢဝ်ၶိူင်ႈမိၼ်တိုၵ်း Jet fighter လမ်းၼိုင်ႈပွႆႇ မၢၵ်ႇ လူင်းၼႂ်းပွၵ်ႉ ၵျၢတ်ႉပျီႉ ဝဵင်းမိူင်းၵုတ်ႈ၊ တိူဝ်ႉၺႃးၼၢင်းယိင်းၵေႃႉၼိုင်ႈတၢႆ၊ မၢတ်ႇၸဵပ်းထႅင်ႈ 5 ၵေႃႉ၊ ႁိူၼ်း ယေး လုၵွႆလၢႆလၢႆလင်။
ဝၼ်းထိ 29/7/2025 ၶၢဝ်းယၢမ်း 9 မူင်းလႄႈ 10 မူင်းၵၢင်ၼႂ်သိုၵ်းမၢၼ်ႈဢဝ်ၶိူင်ႈမိၼ်တိုၵ်း Jet fighter မႃး ပွႆႇမၢၵ်ႇၼမ်ႉၼၵ်း 500 ပွင်ႊ 3 လုၵ်ႈတင်း 250 ပွင်ႊ 2 လုၵ်ႈ တီႈႁူင်းသဝ်း QR လႄႈ ပွၵ်ႉမိၼ်းတႃႈတႃး ဢၼ်မီးတၢင်းၸဵင်ႇဢွၵ်ႇ ဝဵင်းမိူင်းၵုတ်ႈ တိူဝ်ႉၺႃးၵူၼ်းမိူင်းတၢႆ 4 ၵေႃႉ၊ မၢတ်ႇၸဵပ်း 9 ၵေႃႉ ယဝ်ႉတိူဝ်ႉ ၺႃး ႁိူၼ်းယေးၵူၼ်းမိူင်းလုၵွႆ 18 လင်။
ဝၼ်းထိ 29/7/2025 ၶၢဝ်းယၢမ်း 5 မူင်းႁူဝ်ၶမ်ႈ သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇၼမ်ႉၼၵ်း 250 ပွင်ႊ လုၵ်ႈ 1 ၼိူဝ်ပွၵ်ႉ ၵၢၼ်ႇၼီႇ ဝဵင်းမိူင်းလူင် ဢၼ်မီးတၢင်းၸဵင်ႇႁွင်ႇၸႄႈဝဵင်းၵျွၵ်းမႄး ႁဵတ်းႁႂ်ႈတိူဝ်ႉၺႃး ၵူၼ်း မိူင်းၸၢႆးၵေႃႉ 1 တၢႆ၊ ႁိူၼ်းယေးလုၵွႆလၢႆလၢႆလင်။ မိူဝ်ႈၶၢဝ်းယၢမ်း 5:30 ႁူဝ်ၶမ်ႈၶိူင်ႈမိၼ်တိုၵ်း Jet fighter သိုၵ်းမၢၼ်ႈလမ်းၼိုင်ႈမႃးပွႆႇမၢၵ်ႇၼမ်ႉၼၵ်း 250 ပွင်ႊတီႈၵုင်းပႃႇလူင် ဝဵင်းၵျွၵ်းမႄး တိူဝ်ႉၺႃးၵူၼ်း မိူင်းတၢႆ 1 ၵေႃႉ မၢတ်ႇၸဵပ်းထႅင်ႈ 5 ၵေႃႉ။
ဝၼ်းထိ 30/7/2025 ၶၢဝ်းယၢမ်း 1 မူင်းၵၢင်ၼႂ်ၸဝ်ႉၸဝ်ႉ သိုၵ်းမၢၼ်ႈဢဝ်ၶိူင်ႈမိၼ်တိုၵ်း Jet fighter လမ်း ၼိုင်ႈ မႃးပွႆႇမၢၵ်ႇၼမ်ႉၼၵ်း 250 ပွင်ႊ 2 လုၵ်ႈၼိူဝ်ပွၵ်ႉ 2 ၼႂ်းဝဵင်းၵူတ်ႉၶၢႆ တိူဝ်ႉၺႃးႁိူၼ်းၵူၼ်းမိူင်း 2 လင် လႄႈ ႁူင်းသဝ်း ယႃႇၸုတိတ်ႉ လုၵွႆ၊ ၵူၼ်းမိူင်းလုတၢႆ 7 ၵေႃႉ (လုၵ်ႈဢွၼ်ႇ 1 ၵေႃႉ၊ ၵူၼ်းလူင်ၸၢႆး 4 ၵေႃႉ၊ ၼၢင်းယိင်း 2 ၵေႃႉ) လႄႈမၢတ်ႇၸဵပ်းထႅင်ႈ 13 ၵေႃႉ။
ဝၼ်းထိ 30/7/2025 ၶၢဝ်းယၢမ်း 2:30 ဝၢႆးဝၼ်း သိုၵ်းမၢၼ်ႈဢၼ်ယူႇတီႈတပ်ႉၶူဝ်ႁူၺ်ႈၵိုတ်ႈ ၼႂ်းၸႄႈဝဵင်း ၼွင်ၶဵဝ် ဢၼ်မၢၵ်ႇလူင်ယိုဝ်းၶဝ်ႈၼႂ်းဝၢၼ်ႈၼွင်ပွင်ပိင်လူင် ဢၼ်မီးၼႂ်းၸႄႈဝဵင်းၵျွၵ်းမႄး 9 လုၵ်ႈ။ မၢၵ်ႇ လူင်ၼၼ်ႉ တူၵ်းတႅၵ်ႇသႂ်ႇဝတ်ႉ/ၵျွင်း (လင်ဢၼ်ၵူၼ်းပၢႆႈၽေးၶဝ်မႃးပိုင်ႈႁူမ်ႈၸူဝ်ႈၶၢဝ်း) လႄႈ ႁိူၼ်းယေး ၵူၼ်းဝၢၼ်ႈလၢႆလၢႆလုၵွႆ၊ ၸဝ်ႈသၢင်ႇတူၼ်/ပႃး 1 လုလွၼ်ႇယဝ်ႉ တိူဝ်ႉၺႃးၸဝ်ႈသၢင်ႇ မၢတ်ႇၸဵပ်းထႅင်ႈ 5 တူၼ်/ပႃး။
ဝၼ်းထိ 30/7/2025 သိုၵ်းမၢၼ်ႈလႄႈသိုၵ်းပလွင်ႈ/တဢၢင်း ပဵၼ်ပၢင်တိုၵ်းၵၼ်တီႈဝၢၼ်ႈႁူဝ်ၶူဝ်ၼႂ်းၸႄႈ ဝဵင်းၵျွၵ်းမႄး။ ၶိူင်ႈမိၼ်တိုၵ်း Jet fighter သိုၵ်းမၢၼ်ႈလမ်းၼိုင်ႈ မႃးပွႆႇမၢၵ်ႇသွင်လုၵ်ႈ၊ သိုၵ်းမၢၼ်ႈဢဝ် မၢၵ်ႇ လူင်ယိုဝ်း 10 လုၵ်ႈလႄႈဢဝ်ၻရူၼ်ႊပွႆႇမၢၵ်ႇ 2 လုၵ်ႈ တီႈဝၢၼ်ႈႁူဝ်ၶူဝ်၊ တိူဝ်ႉၺႃးၵူၼ်းဝၢၼ်ႈ ၼၢင်းယိင်း ၵေႃႉ 1 တၢႆယဝ်ႉ ႁိူၼ်းယေးလုၵွႆ 2 လင်။
ဝၼ်းထိ 31/7/2025 ၶၢဝ်းယၢမ်း 9 မူင်းၵၢင်ၼႂ် သိုၵ်းမၢၼ်ႈၼွင်ၶဵဝ် ဢဝ်မၢၵ်ႇလူင်ယိုဝ်းၶဝ်ႈၼႂ်းဝၢၼ်ႈ ပၢင်ႇ တိုင် ဢိူင်ႇၼွင်ပိင် ၸႄႈဝဵင်းၵျွၵ်းမႄး။ မၢၵ်ႇလူင်တိူဝ်ႉၺႃးဝတ်ႉ/ၵျွင်းၶႃး/ပၢင်တိုင် လုၵွႆ၊ ၵၢမ်ႇလီလႄႈ ဢမ်ႇ မီး ၵူၼ်းမၢတ်ႇၸဵပ်းၸွမ်း။
ဝၼ်းထိ 31/7/2025 ၶၢဝ်းယၢမ်း 9 မူင်းၵၢင်ၼႂ် ၶိူင်ႈမိၼ်တိုၵ်း Jet fighter သိုၵ်းမၢၼ်ႈလမ်းၼိုင်ႈ မႃးပွႆႇမၢၵ်ႇ ၼမ်ႉၼၵ်း 250 ပွင်ႊသွင်လုၵ်ႈ တီႈဝၢၼ်ႈ တူဝ်းပိၼ်ႇ ၼႂ်းၸႄႈဝဵင်းၼွင်ၶဵဝ်၊ တိူဝ်ႉၺႃးၼၢင်း ၵေႃႉ 1 ဢႃယု 32 တၢႆ၊ ၵူၼ်းၸၢႆး ဢႃယု 42 ၵေႃႉ 1 တင်းၼၢင်းယိင်း ဢႃယု 68 ၵေႃႉ 1 မၢတ်ႇၸဵပ်း ယဝ်ႉႁိူၼ်းယေးၵူၼ်း ဝၢၼ်ႈ 8 လင် တင်းလူတ်ႉ/ၵႃး 1 လမ်းလုၵွႆၸွမ်း။
ဝၼ်းထိ 2/8/2025 ၶၢဝ်းယၢမ်း 8:30 ၵၢင်ၼႂ် ၶိူင်ႈမိၼ်တိုၵ်း Jet fighter သိုၵ်းမၢၼ်ႈလမ်းၼိုင်ႈဢဝ်မၢၵ်ႇၼမ်ႉ ၼၵ်း 500 ပွင်ႊ 2 လုၵ်ႈမႃးပွႆႇၼိူဝ်ပွၵ်ႉ ဢွင်ႇသုၶ လႄႈဝၢၼ်ႈၵွင်းဢုပႃႇ ဝဵင်းမိူင်းၵုတ်ႈ၊ တိူဝ်ႉၺႃးၵူၼ်းမိူင်း တၢႆ 12 ၵေႃႉ ပႃးတင်းသင်ၶႃၸဝ်ႈ 1 တူၼ်၊ ၵူၼ်းမိူင်းမၢတ်ႇၸဵပ်း 13 ၵေႃႉ၊ ႁိူၼ်းယေးလုၵွႆ 10 လင်၊ လူတ်ႉ/ ၵႃး 3 လမ်းလႄႈ လူတ်ႉၶိူင်ႈ (သႆႊၶိူဝ်ႊ) 3 လမ်း။
ဝၼ်းထိ 3/8/2025 ၶၢဝ်းယၢမ်း 3 မူင်းဝၢႆးဝၼ်း သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇ 4 လုၵ်ႈတၢင်းသၢပ်ႇ ၸဵင်ႇ ႁွင်ႇၼွၵ်ႈဝဵင်းသီႇပေႃႉ။ မၢၵ်ႇ 3 လုၵ်ႈတူၵ်းၼိူဝ်တပ်ႉၵဝ်ႇ ၶလယ 23 မၢၼ်ႈ ႁိမ်းဝၢၼ်ႈတူင်ႈၸၢင်ႉ လႄႈ ထႅင်ႈလုၵ်ႈ 1 ပွႆႇၼိူဝ်ဝၢၼ်ႈမႂ်ႇ၊ တိူဝ်ႉၺႃးတိုၵ်းလၢႆလၢႆဢၼ်လုၵွႆ။
ဝၼ်းထိ 4/8/2025 ၶၢဝ်းယၢမ်း 10:30 ၵၢင်ၼႂ် ၶိူင်ႈမိၼ်တိုၵ်း Jet fighter သိုၵ်းမၢၼ်ႈလမ်းၼိုင်ႈဢဝ်မၢၵ်ႇ ၼမ်ႉၼၵ်း 500 ပွင်ႊ 2 လုၵ်ႈမႃးပွႆႇၼိူဝ်ပွၵ်ႉ 6 ဝဵင်းၵျွၵ်းမႄး ႁိမ်းတႃႈလူတ်ႉၾႆး/လဵၼ်း၊ တိူဝ်ႉၺႃး ၵူၼ်းမိူင်း မၢတ်ႇၸဵပ်း 3 ၵေႃႉ၊ ႁူင်းႁဵၼ်းလင် 1၊ ႁွင်ႈပၼ်ယႃလင် 1 လႄႈႁိူၼ်းၵူၼ်းမိူင်း 10 လင်လုၵွႆ။
ယၢမ်းလဵဝ် ၵူၼ်းမိူင်းပၢႆႈၽေးမႂ်ႇ 10,000 ပၢႆ ၼႂ်းၸႄႈဝဵင်းၼွင်ၶဵဝ်လႄႈၵျွၵ်းမႄး ဢွၼ်ၵၼ်ပၢႆႈၽေး ယူႇဝႆႉ ၸွမ်း ပိုၼ်ႉတီႈႁိမ်းႁွမ်းသေ ႁူပ်ႉတၢင်းယၢပ်ႇၽိုတ်ႇၶဝ်ႈၼမ်ႉတၢင်းၵိၼ် တေႉတေႉ။
တွင်ႈထၢမ်
ၸၢႆးႁေႃသႅင် +66 94 728 6696 Signal (တႆး, ဢင်းၵိတ်း)
ယိင်းလႅင်းႁၢၼ် +1 825 425 4099 Signal (မၢၼ်ႈ)
Download PDF files: