ၽိုၼ်တၢမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 2/7/2025
သိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇလႄႈဢဝ်ၵွင်ႈယိုဝ်း တိူဝ်ႉၺႃးၵူၼ်းမိူင်းတၢႆ 8 ၵေႃႉ၊ မၢတ်ႇၸဵပ်း 29 ၵေႃႉ ၼႂ်းဝဵင်းၵျွၵ်းမႄး၊ မိူင်းၵုတ်ႈလႄႈ ၼွင်ၶဵဝ် ပိုၼ်ႉတီႈၸုမ်းလုၵ်ႉၽိုၼ်ႉၵုမ်းၵမ်
ၼႂ်းၵႄႈဝၼ်းထိ 24/6/2025 ထိုင် 1/7/2025 ၼၼ်ႉသိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇလႄႈ ဢဝ်ၵွင်ႈလူင်ယိုဝ်းသေ တိူဝ်ႉၺႃးၵူၼ်းမိူင်းတၢႆ 8 ၵေႃႉ၊ မၢတ်ႇၸဵပ်း 29 ၵေႃႉ၊ တိူဝ်ႉပႃးႁိူၼ်း/တိုၵ်း 50 လင်ပၢႆ- ပႃးၸဵမ် ဝတ်ႉ/ ၵျွင်း 7 လင်၊ ၵျွင်းမူႇလသိမ်ႇၼိုင်ႈလင် ၼႂ်းဝဵင်းၵျွၵ်းမႄး၊ မိူင်းၵုတ်ႈလႄႈၼွင်ၶဵဝ် ဢၼ်သိုၵ်းပလွင်ႈ/ တဢၢင်း TNLA ၶဝ်ၵုမ်းၵမ် တင်ႈတႄႇၵၢင်ပီ 2024 မႃး။
ဝၼ်းထိ 24/6/2025 ၶၢဝ်းယၢမ်း 5 မူင်းႁူဝ်ၶမ်ႈ သိုၵ်းမၢၼ်ႈဢဝ်ၶိူင်ႈမိၼ်တိုၵ်း (jet fighter) ပွႆႇမၢၵ်ႇၼမ်ႉၼၵ်း 500 ပွင်ႊ သွင်လုၵ်ႈၼိူဝ်ပွၵ်ႉ 3 လႄႈပွၵ်ႉ 7 ဝဵင်းၵျွၵ်းမႄး၊ ႁဵတ်းႁႂ်ႈၵူၼ်းမိူင်း တၢႆ 4 ၵေႃႉ၊ မၢတ်ႇၸဵပ်း 14၊ ၸၢၵ်ႇမၢၵ်ႇတိူဝ်ႉ ၺႃးတိုၵ်း 10 လင် ပႃးၸဵမ်ႁၢၼ်ႉၶၢႆၶဝ်ႈၽၵ်း 1 လင်၊ ၵျွင်းမူႇသလိမ်ႇ 1 လင် လႄႈ ဝတ်ႉ/ၵျွင်း မုၼ်ၸဝ်ႈ 1 လင်။ ၵူၼ်းမိူင်းဢၼ်လုတၢႆ သီႇ ၵေႃႉၼၼ်ႉ ပဵၼ် ထဝ်ႈယိင်း 3 ၵေႃႉ လႄႈ ဢွၼ်ႇၸၢႆး 1 ၵေႃႉ၊ ၽွင်းမၢၵ်ႇမႃးတူၵ်းတႅၵ်ႇသႂ်ႇၼၼ်ႉ ၸိူဝ်းၶဝ်တိုၵ်ႉ ယူႇၼႂ်းႁၢၼ်ႉၶၢႆၶဝ်ႈၽၵ်း ၸၼ်ႇပျႃႉသေ လႆႈလုတၢႆၵမ်းသိုဝ်ႈ။ ၸိူဝ်းၼၼ်ႉပဵၼ် တေႃႇလႃႉယီႇ (ဢႃယု 60)၊ တေႃႇလႃႉလႃႉထေႃႇ (ဢႃယု 53)၊ တေႃႇလႃႉတိၼ်ႇ (ဢႃယု 55) လႄႈမွင်ႇတီႇႁႃႉၼၢႆႇ (ဢႃယု 22)။ ၶၢပ်ႈတူဝ်တၢႆ ၶဝ်ၼၼ်ႉ ဢဝ်ၵႂႃႇၽဝ်/ၾင်တီႈ ပႃႇႁဵဝ်ႈ ဝဵင်းၵျွၵ်းမႄး ၼႂ်းဝၼ်းထိ 25/6/2025။
ၼႂ်းၵူၼ်းမိူင်း 14 ၵေႃႉဢၼ်မၢတ်ႇၸဵပ်းၼႂ်းၵျွၵ်းမႄးမိူဝ်ႈဝၼ်းထိ 24/6/2025 ၼၼ်ႉပႃးၼၢင်းယိင်း 7 ၵေႃႉ- ပဵၼ်တေႃႇၶိၼ်ႇယီႇ (ဢႃယု 60)၊ တေႃႇလႃႉလႃႉတဵင်း (ဢႃယု 55)၊ တေႃႇလႃႉလႃႉယီႇ (ဢႃယု 52)၊ ၽဵဝ်းဝူၺ်ႇ ဝူၺ်ႇၵျေႃႇ (ဢႃယု 33)၊ ဢေးသၼ်ႇမူဝ်း (ဢႃယု 25)၊ ပွၵ်းပေႇ (ဢႃယု 55) လႄႈမႃႉသျုၼ်းလႄႉယီႇ (ဢႃယု 17)။ လိူဝ်ၼၼ်ႉပဵၼ်ၵူၼ်းၸၢႆးသၢမ်ၵေႃႉ- ဢူးလႃႉထေး (ဢႃယု 63)၊ ဢူးဢွင်ႇထုၼ်း (ဢႃယု 55) လႄႈမွင်ႇ ၵျေႃႇၸေႃးႁဵင်း (ဢႃယု 19)၊ ထႅင်ႈၵေႃႉၼိုင်ႈသမ်ႉ ပဵၼ် ဢွၼ်ႇလႅင်ဢႃယု 5 ၶူပ်ႇ ပဵၼ်ၸၢႆးၸေႃးၸေႃး။ ႁူဝ် ယွႆႈ ၵူၼ်းလုတၢႆ/မၢတ်ႇၸဵပ်းထႅင်ႈသၢမ်ၵေႃႉ တႄႉပႆႇလႆႈႁပ်ႉႁူႉ။ ၵူၼ်းၸိူဝ်းမၢတ်ႇၸိူဝ်းၼၼ်ႉ ဢဝ်သူင်ႇၵႂႃႇ တီႈႁူင်းယႃၵျွၵ်းမႄး ပိူဝ်ႈတႃႇ ယူတ်းယႃယူႇယဝ်ႉ။
ဢွၼ်တၢင်းၼၼ်ႉ သိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇလိုၼ်းသုတ်းပဵၼ်မိူဝ်ႈဝၼ်းထိ 5/5/2025 ၽွင်းၼၼ်ႉ သိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇသွင်လုၵ်ႈ ၵူၺ်းၵႃႈဢမ်ႇတိူဝ်ႉၺႃးၵူၼ်းမိူင်း။
ဝၼ်းထိ 25/6/2025 ၶၢဝ်းယၢမ်း 11 မူင်းၵၢင်ၶမ်ႈ သိုၵ်းမၢၼ်ႈဢဝ်ၶိူင်ႈမိၼ်တိုၵ်း (jet fighter) လမ်းၼိုင်ႈ ပွႆႇမၢၵ်ႇၼမ်ႉၼၵ်း 300 ပွင်ႊ ၼိူဝ်ဝတ်ႉ/ၵျွင်းဢူင်းၵၢႆး ဢၼ်မီးၼႂ်းဝဵင်းမိူင်းၵုတ်ႈ၊ ၸၢၵ်ႇမၢၵ်ႇ တိူဝ်ႉၺႃးၵူၼ်းမိူင်းမၢတ်ႇၸဵပ်း 4 ၵေႃႉသေ တိူဝ်ႉၺႃးဝတ်ႉ/ၵျွင်းဢူင်းၵၢႆးလုၵွႆ၊ ႁိူၼ်းၵူၼ်းမိူင်း ၵေႃႈလုၵွႆပႃးႁႃႈလင်။
ဝၼ်းထိ 25/6/2025 ၶၢဝ်းယၢမ်း 10 မူင်းၵၢင်ၶမ်ႈ သိုၵ်းမၢၼ်ႈယူႇတီႈဝၢၼ်ႈ ၵၢၼ်းၵျီႇသေ ဢဝ်ၵွင်ႈလူင်ယိုဝ်းၶဝ်ႈၵႂႃႇၼႂ်းပွၵ်ႉၵၢတ်ႇ/ၸေး ဝဵင်းၼွင်ၶဵဝ်ပႅတ်ႇလုၵ်ႈ။ မၢၵ်ႇတိူဝ်ႉၺႃးႁိူၼ်းၵူၼ်းမိူင်း ၼႂ်းပွၵ်ႉၵၢတ်ႇ သွင်လင်လုၵွႆ။
ဝၼ်းထိ 26/6/2025 ၶၢဝ်းယၢမ်း 8 မူင်းၵၢင်ၼႂ် သိုၵ်းမၢၼ်ႈဢဝ်ၵွင်ႈလူင်ယိုဝ်းတၢင်းၵႆ ယိုဝ်းၶဝ်ႈၼႂ်း ပွၵ်ႉၵၢတ်ႇထႅင်ႈ 4 လုၵ်ႈသေ ႁဵတ်းႁႂ်ႈၵူၼ်းၸၢႆးမၢတ်ႇၸဵပ်းၵေႃႉၼိုင်ႈလႄႈ တိူဝ်ႉၺႃးႁိူၼ်းလုၵွႆ ၼိုင်ႈလင်။
မိူဝ်ႈဝၼ်းထိ 27/6/2025 ယၢမ်းၵၢင်ၼႂ်ၸဝ်ႉၸဝ်ႉ ၸမ်ထိုင် 1 မူင်းၵၢင်ၼႂ်ထႅင်ႈ 10-20 ၼႃးထီး (မိၼိတ်ႉ) ၼၼ်ႉသိုၵ်းမၢၼ်ႈဢဝ်ၶိူင်ႈမိၼ်တိုၵ်း (jet fighter) လမ်းၼိုင်ႈမႃးပွႆႇမၢၵ်ႇၼမ်ႉၼၵ်း 500 ပွင်ႊ သွင်လုၵ်ႈ ၼိူဝ်ပွၵ်ႉ 7 ဝဵင်းၵျွၵ်းမႄး ႁိမ်းႁူင်းပွႆႇႁႅင်းၾႆးၾႃႉ (EPC) ဢၼ်ယူႇပႃႈတႂ်ႈ ႁွင်ႈၵၢၼ် လူင်ၾၢႆႇႁႅင်းၾႆးၾႃႉ (MOEP) တိူဝ်ႉၺႃးၼၢင်းယိင်းၵေႃႉၼိုင်ႈၸိုဝ်ႈႁွင်ႉ မႃႉမူဝ်းၼွင်း (ဢႃယု 50) တၢႆလႄႈ ၽဵဝ်းတၢၼ်းၵျေႃႇ (ဢႃယု 19) တင်းၸေႃးထူးလိၼ်း (ဢႃယု 17) မၢတ်ႇၸဵပ်းထႅင်ႈ။ ဢွင်ႈၾၢႆႇၵေႃႇသၢင်ႈ လႄႈႁိူၼ်းၵူၼ်း မိူင်း 2 လင်လုၵွႆပႃးထႅင်ႈ။
ဝၼ်းထိ 29/6/2025 ယၢမ်းဝၢႆးဝၼ်း 2:30 သိုၵ်းမၢၼ်ႈဢဝ်ၶိူင်ႈမိၼ်တိုၵ်း (jet fighter) မႃးပွႆႇမၢၵ်ႇၼမ်ႉၼၵ်း 500 ပွင်ႊ သွင်လုၵ်ႈ ၼိူဝ်ပွၵ်ႉ 1 ဝဵင်းၵျွင်းမႄးႁဵတ်းႁႂ်ႈၵူၼ်းမိူင်း ၸၢႆးသွင်ၵေႃႉလႄႈယိင်းသၢမ်ၵေႃႉ မၢတ်ႇၸဵပ်း၊ ၸၢၵ်ႇမၢၵ်ႇတိူဝ်ႉၺႃးဝတ်ႉ/ ၵျွင်း လင်ၼိုင်ႈလႄႈႁူင်းႁဵၼ်းဝတ်ႉ/ၵျွင်း ၼိုင်ႈလင်၊ ႁိူၼ်းၵူၼ်းမိူင်း ၵေႃႈလုၵွႆပႃးထႅင်ႈသိပ်းႁႃႈလင်။ ၽွင်းၶၢဝ်းယၢမ်း 8:30-9:00 ၵၢင်ၶမ်ႈ ၼၼ်ႉသိုၵ်းမၢၼ်ႈဢဝ်ၶိူင်ႈမိၼ်တိုၵ်း (jet fighter) မႃးပွႆႇမၢၵ်ႇၼမ်ႉၼၵ်း 500 ပွင်ႊသွင်လုၵ်ႈလႄႈမၢၵ်ႇၽူင်ႉ (Cluster bomb) ၼိုင်ႈလုၵ်ႈ ၼိူဝ်ပွၵ်ႉ 7 ဝဵင်းၵျွၵ်းမႄး၊ ႁဵတ်းႁႂ်ႈႁိူၼ်းယေးၵူၼ်းမိူင်းလုၵွႆ 4 လင် လႄႈဝတ်ႉ/ၵျွင်းထႅင်ႈ 1 လင်။
ဝၼ်းထိ 29/6/2025 ယၢမ်း 10 မူင်းၵၢင်ၶိုၼ်း သိုၵ်းမၢၼ်ႈဢဝ်ၶိူင်ႈမိၼ်တိုၵ်း (jet fighter) လမ်းၼိုင်ႈ ပွႆႇမၢၵ်ႇ ၼမ်ႉၼၵ်း 500 ပွင်ႊ သွင်လုၵ်ႈၼိူဝ်ပွၵ်ႉၵၢတ်ႇ ဝဵင်းၼွင်ၶဵဝ်၊ ႁဵတ်းႁႂ်ႈႁိူၼ်းယေး ၵူၼ်းမိူင်းလုၵွႆလၢႆလၢႆလင်။ ဝၢႆးသိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇယဝ်ႉ ယၢမ်း 11 ၵၢင်ၶမ်ႈ သိုၵ်းမၢၼ်ႈၼႂ်းၼွင်ၶဵဝ် ဢဝ်ၵွင်ႈလူင်ယိုဝ်း သႂ်ႇၼႂ်းဝဵင်းထႅင်ႈ လၢႆလၢႆလုၵ်ႈ။
ဝၼ်းထိ 1/7/2025 ၶၢဝ်းယၢမ်း 3 မူင်းဝၢႆးဝၼ်း သိုၵ်းမၢၼ်ႈဢဝ်ၶိူင်ႈမိၼ်တိုၵ်း (jet fighter) လမ်းၼိုင်ႈသီႇပွၵ်ႈ ပွႆႇမၢၵ်ႇ 11 လုၵ်ႈ တီႈဝၢၼ်ႈသၢမ်သိူဝ် ဢၼ်ယူႇတၢင်းတူၵ်းဝဵင်းၼွင်ၶဵဝ် ႁၢင်ႇၵႆဝဵင်း 18 ၵီႊလူဝ်ႊမႄႊတိူဝ်ႊ၊ တိူဝ်ႉၺႃးၵူၼ်းမိူင်းၸၢႆး တၢႆ 3 ၵေႃႉ၊ ၵူၼ်းဝၢၼ်ႈၸၢႆးမၢတ်ႇၸဵပ်းထႅင်ႈ 1 ၵေႃႉလႄႈ ဝတ်ႉ/ၵျွင်း 2 လင်၊ ႁိူၼ်းၵူၼ်းဝၢၼ်ႈ 2 လင်လုၵွႆၸွမ်း။
ၼႂ်းလိူၼ်ၵျုၼ်ႊပူၼ်ႉမႃးၼႆႉ ပၢင်တိုၵ်းၼႂ်းၵႄႈသိုၵ်းမၢၼ်ႈလႄႈသိုၵ်းလုၵ်ႉၽိုၼ်ႉ ၵႅတ်ႇၶႄၵူၼ်း မိူင်းဝဵင်း လိူဝ်ႇ Mandalay People’s Defense Force (MDY-PDF) ႁူမ်ႈတင်းသိုၵ်းတဢၢင်း/ပလွင်ႈ ပိုတ်းယိုဝ်းၵၼ် ၸွမ်း သၢႆသဵၼ်ႈတၢင်း ပၢင်ႇဢူႈလူင်-မိူင်းၵုတ်ႈ ၼႂ်းၸႄႈဝဵင်းၼွင်ၶဵဝ် ၶႂ်ႈဝႃႈပဵၼ် ၵူႈဝၼ်း။
တွင်ႈထၢမ်
ၸၢႆးႁေႃသႅင် +66 94 728 6696 Signal (တႆး၊ ဢင်းၵိတ်း)
ယိင်းလႅင်းႁၢၼ် +1 825 425 4099 Signal (မၢၼ်ႈ)
Download PDF >>>