ၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 17/7/2025
သိုၵ်းမၢၼ်ႈဢဝ် ၶိူင်ႈမိၼ်တိုၵ်းပွႆႇမၢၵ်ႇ တိူဝ်ႉၺႃးၵူၼ်းမိူင်းတၢႆ 13 ၵေႃႉ၊ မၢတ်ႇၸဵပ်း 31 ၵေႃႉ ၼႂ်းၼႃႈတီႈၸုမ်းသိုၵ်း လုၵ်ႉၽိုၼ်ႉၶဝ်ၵုမ်းၵမ် ၼႂ်းၸႄႈဝဵင်းသီႇပေႃႉ၊ မိူင်းၵုတ်ႈ၊ ၵျၵ်းမႄးလႄႈ ၼွင်ၶဵဝ်
ၼႂ်းၶၢဝ်းတၢင်းဝၼ်းထိ 4/7/2025 ထိုင် 14/7/2025 ၼႆႉသိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇတိူဝ်ႉၺႃးၵူၼ်းမိူင်းတၢႆ 13 ၵေႃႉ၊ မၢတ်ႇၸဵပ်း 31 ၵေႃႉသေ မၢၵ်ႇတိူဝ်ႉၺႃးတိုၵ်း/ႁိူၼ်းယေးၵူၼ်းမိူင်း 60 လင်ပၢႆ ပႃးၸဵမ်ႁူင်းယႃ လင်ၼိုင်ႈ လႄႈ ႁူင်းႁဵၼ်း သွင်လင်၊ ႁၢၼ်ႉၶၢႆၶူဝ်းၶွင် 5 လင်၊ ႁူင်းသဝ်း 1 လင်လႄႈႁူင်းလိုဝ်ႈသဝ်း 1 လင် ၼႂ်းၸႄႈဝဵင်းသီႇပေႃႉ၊ မိူင်းၵုတ်ႈ၊ ၵျွၵ်းမႄး လႄႈ ၼွင်ၶဵဝ် ဢၼ်ယူႇပႃႈတႂ်ႈသိုၵ်းတဢၢင်း/ပလွင်ႈ TNLA ၵုမ်း ၵမ် တင်ႈတႄႇပီ 2024 မႃး။
ဝၼ်းထိ 4/7/2025 ၶၢဝ်းယၢမ်း 10 မူင်းၵၢင်ၶမ်ႈ သိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇ 2 လုၵ်ႈၼိူဝ်ဝဵင်းသီႇပေႃႉ။ မၢၵ်ႇလုၵ်ႈ ၼိုင်ႈပွႆႇလူင်းတီႈႁူင်းယႃဝဵင်းသီႇပေႃႉ၊ ထႅင်ႈလုၵ်ႈၼိုင်ႈသမ်ႉပွႆႇလူင်းတီႈလုမ်းၾၢႆႇၽုၵ်ႇသွမ်ႈသေ တိူဝ်ႉၺႃး ႁိူၼ်း ယေး ၵူၼ်းမိူင်းလုၵွႆ 10 လင်ပၢႆ။
ဝၼ်းထိ 6/7/2025 ၶၢဝ်းယၢမ်း တဵင်ႈၶိုၼ်း ၶိူင်ႈမိၼ်တိုၵ်း (jet fighter) သိုၵ်းမၢၼ်ႈလမ်းၼိုင်ႈ ဢဝ်မၢၵ်ႇပွႆႇလူင်း တီႈပွၵ်ႉ ယႄႇဢူး ဝဵင်းၵျွၵ်းမႄး၊ တိူဝ်ႉၺႃးႁိူၼ်းယေးၵူၼ်းလုၵွႆလၢႆလၢႆလင်။
ဝၼ်းထိ 8/7/2025 ၶၢဝ်းယၢမ်း 9:10 ၵၢင်ၼႂ် ၶိူင်ႈမိၼ် တိုၵ်း (jet fighter) သိုၵ်းမၢၼ်ႈလမ်းၼိုင်ႈဢဝ်မၢၵ်ႇ ၼမ်ႉ ၼၵ်း 500 ပွင်ႊ သွင်လုၵ်ႈ မႃးပွႆႇၼိူဝ်ဝၢၼ်ႈ ၵွင်း ဢူးပႃႇ ဝဵင်းမိူင်းၵုတ်ႈ၊ တိူဝ်ႉၺႃးၵူၼ်းမိူင်းတၢႆ 3 ၵေႃႉ၊ မၢတ်ႇၸဵပ်း 5 ၵေႃႉ လႄႈႁိူၼ်းယေး ၵူၼ်းဝၢၼ်ႈ လုၵွႆ 10 လင်ပၢႆ၊ ႁူင်းႁဵၼ်းထႅင်ႈလင်။
ဝၼ်းထိ 8/7/2025 ၶၢဝ်းယၢမ်း 9:30 ၵၢင်ၼႂ် ၶိူင်ႈမိၼ် တိုၵ်း (jet fighter) သိုၵ်းမၢၼ်ႈလမ်းၼိုင်ႈ ဢဝ်မၢၵ်ႇ ၼမ်ႉၼၵ်း 500 ပွင်ႊသွင်လုၵ်ႈ မႃးပွႆႇၼိူဝ်ၵုင်း ငဵမ်း ၶျၢမ်းယေး ပွၵ်ႉ 1 ဝဵင်းၵျွၵ်းမႄး၊ တိူဝ်ႉၺႃးၵူၼ်းမိူင်းတၢႆ 1 ၵေႃႉ၊ မၢတ်ႇၸဵပ်း 4 ၵေႃႉလႄႈ ႁိူၼ်းယေး ၵူၼ်းမိူင်း လုၵွႆထႅင်ႈ 10 လင်။
ဝၼ်းထိ 8/7/2025 ၶိူင်ႈမိၼ်တိုၵ်း (jet fighter) သိုၵ်း မၢၼ်ႈ လမ်းၼိုင်ႈ ဢဝ်မၢၵ်ႇလုၵ်ႈၼိုင်ႈ မႃးပွႆႇၼိူဝ် ဝၢၼ်ႈ သူၺ်ႇပျီႇၺုၼ်ႉ ဢၼ်မီးတၢင်း ၸဵင်ႇၸၢၼ်း ဝၼ်း ဢွၵ်ႇ ဝဵင်းၼွင်ၶဵဝ် ႁၢင်ႇၵႆဝဵင်း 3 ၵီႊလူဝ်ႊ မႄႊ တိူဝ်ႊ တိူဝ်ႉၺႃးၵူၼ်းမိူင်းၸၢႆး ဢႃယု 50 ၵေႃႉ 1 တၢႆ။
ဝၼ်းထိ 9/7/2025 ၶၢဝ်းယၢမ်း 8 ၵၢင်ၶမ်ႈ ၶိူင်ႈမိၼ်တိုၵ်း (jet fighter) သိုၵ်းမၢၼ်ႈလမ်းၼိုင်ႈ ဢဝ်မၢၵ်ႇ ၼမ်ႉၼၵ်း 500 ပွင်ႊသွင်လုၵ်ႈ ၼိူဝ်ဝၢၼ်ႈပၢၼ်းမႃႉ ၸႄႈဝဵင်းမိူင်းၵုတ်ႈ တိူဝ်ႉၺႃးၵူၼ်းမိူင်းတၢႆ 5 ၵေႃႉ ပႃးတင်းလုၵ်ႈဢွၼ်ႇ 3 ၵေႃႉ၊ လုၵ်ႈဢွၼ်ႇၸၢႆးမၢတ်ႇၸဵပ်း 2 ၵေႃႉလႄႈဢွၼ်ႇယိင်းမၢတ်ႇၸဵပ်း 6 ၵေႃႉ၊ ႁိူၼ်းယေး ၵူၼ်းဝၢၼ်ႈလုၵွႆ လၢႆလၢႆလင်။
ဝၼ်းထိ 11/7/2025 ၶၢဝ်းယၢမ်း 3 ၵၢင်ၼႂ်ၸဝ်ႉ ၶိူင်ႈမိၼ်တိုၵ်း (jet fighter) သိုၵ်းမၢၼ်ႈလမ်းၼိုင်ႈ ဢဝ်မၢၵ်ႇ ၼမ်ႉၼၵ်း 500 ပွင်ႊသၢမ်လုၵ်ႈ ၼိူဝ်ဝဵင်းၵျွၵ်းမႄး။ လုၵ်ႈၼိုင်ႈပွႆႇတီႈလုမ်းယႄး/ပလိၵ်ႊ တိူဝ်ႉၺႃးႁိူၼ်း ၵူၼ်းမိူင်း 3 လင်၊ ထႅင်ႈ လုၵ်ႈၼိုင်ႈပွႆႇတီႈႁူင်းသဝ်းၵေႃႉလီ တိူဝ်ႉၺႃးၵူၼ်းမိူင်းတၢႆ 1 ၵေႃႉ၊ မၢတ်ႇၸဵပ်း 3 ၵေႃႉယဝ်ႉ ထႅင်ႈလုၵ်ႈၼိုင်ႈသမ်ႉ ပွႆႇ လူင်းၼႂ်းထိူၼ်ႇဢၼ်ၸမ်ဝဵင်း။
ဝၼ်းထိ 11/7/2025 ၶၢဝ်းယၢမ်း 3 မူင်းဝၢႆးဝၼ်း ၶိူင်ႈမိၼ်တိုၵ်း (jet fighter) သိုၵ်းမၢၼ်ႈလမ်းၼိုင်ႈဢဝ်မၢၵ်ႇ ၼမ်ႉၼၵ်း 250 ပွင်ႊသွင်လုၵ်ႈ ပွႆႇလူင်းၼိူဝ်ပွၵ်ႉၵၢတ်ႇ ဝဵင်းၼွင်ၶဵဝ် ႁဵတ်းႁႂ်ႈၵူၼ်းႁိူၼ်းၵူၼ်းမိူင်းလုၵွႆ 6 လင် ယဝ်ႉဢဝ် မၢၵ်ႇၼမ်ႉ ၼၵ်း 250 ပွင်ႊသွင်လုၵ်ႈ ပွႆႇလူင်းၼိူဝ်ဝၢၼ်ႈၵျွၵ်ႉၵျၢၼ်ႉ ဢၼ်ႁၢင်ႇၵႆဝဵင်း 5 ၵီႊလူဝ်ႊမႄႊတိူဝ်ႊ။
ဝၼ်းထိ 13/7/2025 ၶၢဝ်းယၢမ်း 6 မူင်းၵၢင်ၼႂ် ၶိူင်ႈမိၼ်တိုၵ်း (jet fighter) သိုၵ်းမၢၼ်ႈလမ်းၼိုင်ႈဢဝ်မၢၵ်ႇပွႆႇ တၢင်း ၸဵင်ႇတူၵ်းဝဵင်းၵျွၵ်းမႄး 6 လုၵ်ႈ။ ၼႂ်းၼၼ်ႉ 3 လုၵ်ႈပွႆႇလူင်းတီႈဝၢၼ်ႈမၢၵ်ႇလၢင်း၊ ထႅင်ႈ 2 လုၵ်ႈပွႆႇလူင်းတီႈႁူင်း ၸၼ်ႉ ၵၢင် (ဢ.မ.ၵ 13) ၼႂ်းၵႄႈမၢၼ်ႈၼႃးလႄႈဝၢၼ်ႈၵျွၵ်ႉတွင်း ယဝ်ႉထႅင်ႈလုၵ်ႈၼိုင်ႈသမ်ႉပွႆႇလူင်းၼိူဝ်သဵၼ်ႈတၢင်း ဝတ်ႉ/ ၵျွင်းဝႃႇသူဝ်ႇ။ ၸၢၵ်ႇမၢၵ်ႇတိူဝ်ႉၺႃးၼၢင်းယိင်းၵေႃႉၼိုင်ႈမၢတ်ႇၸဵပ်းလႄႈ တိူဝ်ႉၺႃးႁူင်းႁဵၼ်းတင်းႁိူၼ်းၵူၼ်း မိူင်း ထႅင်ႈၸဵတ်းလင်လုၵွႆပႃး။
ဝၼ်းထိ 13/7/2025 ၶၢဝ်းယၢမ်း 10:30 မူင်းၵၢင်ၶမ်ႈ ၶိူင်ႈမိၼ်တိုၵ်း (jet fighter) သိုၵ်းမၢၼ်ႈလမ်းၼိုင်ႈဢဝ်မၢၵ်ႇ ၼမ်ႉၼၵ်း 500 ပွင်ႊ ၼိုင်ႈလုၵ်ႈ ပွႆႇတီႈဝၢၼ်ႈၵလႃး (ၵေႃႇလၶႃး) ႁိမ်းဝၢၼ်ႈ ပၢၼ်းမႃႉထဵၵ်ႉ ဢၼ်ပဵၼ်ပွတ်းဢွၼ်ႇ တွၼ်ႈၼိုင်ႈဝဵင်းမိူင်းၵုတ်ႈ၊ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်းမၢတ်ႇၸဵပ်း 8 ၵေႃႉ ( ၸၢႆး 4 ၵေႃႉ ယိင်း 4 ၵေႃႉ-ႁူမ်ႈတင်း လုၵ်ႈဢွၼ်ႇသၢမ်ၵေႃႉ) သေတိူဝ်ႉၺႃးႁိူၼ်းၵူၼ်းမိူင်းလုၵွႆ 7 လင်။
ဝၼ်းထိ 14/7/2025 ၶၢဝ်းယၢမ်း 6 မူင်းႁူဝ်ၶမ်ႈ ၶိူင်ႈမိၼ် သိုၵ်းမၢၼ်ႈလမ်းၼိုင်ႈဢဝ်မၢၵ်ႇ သွင်လုၵ်ႈပွႆႇတီႈပွၵ်ႉၸၢၼ်း ဝဵင်းသီႇပေႃႉ။ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်းတၢႆသွင်ၵေႃႉ၊ မၢတ်ႇၸဵပ်းထႅင်ႈသွင်ၵေႃႉလႄႈ ႁိူၼ်းယေးလုၵွႆႁႃႈလင်၊ ႁၢၼ်ႉၶၢႆၶူဝ်းႁႃႈလင် တင်းႁူင်းသဝ်းလင်ၼိုင်ႈ။
ၽွင်းၼင်ႇၼၼ် သိုၵ်းမၢၼ်ႈဢၼ်ထူဝ်းသိုၵ်းၶဝ်ႈမႃးၼႂ်းၵႄႈပၢင်ႇဢူႈလူင်လႄႈ ၼွင်ၶဵဝ်ၸိူဝ်းၼၼ်ႉ ၶဝ်လၵ်ႉသွၵ်ႈ တဝ်ဢဝ်လၢႆၶူဝ်းၶွင်ၵူၼ်းဝၢၼ်ႈၸိူင်ႉငိူင်ႉပၢႆႈၽေးသိုၵ်းသိူဝ်။ မိူဝ်ႈၼႂ်းဝူင်ႈလိုၼ်းသုတ်းလိူၼ်မေႇ ၼၼ်ႉၵေႃႈ သိုၵ်းမၢၼ်ႈၶလယ 12 ႁႅင်းၵူၼ်း 300 ပၢႆၶဝ်ႈယႃႉသွၵ်ႈတဝ်ဢဝ်ၶူဝ်းၶွင်ၵူၼ်းဝၢၼ်ႈမွၵ်ႈ 60 လင်ဝၢၼ်ႈ မၢၼ်ႈၽုၺ်း (ပၢၼ်ႉပူၺ်း) လႄႈၼႂ်းဝၢၼ်ႈၵမ်ႉၵေႃႇထႅင်ႈ 40 လင်။ ဝၢၼ်ႈဢၼ်ယူႇၸဵင်ႇၸၢၼ်းဝၼ်းတူၵ်း ဝဵင်းၼွင်ၶဵဝ် ႁၢင်ႇၵႆ 20 ၵီႊလူဝ်ႊမႄႊတိူဝ်ႊ။ သိုၵ်းမၢၼ်ႈယႃႉၽၵ်းတူလူင်လႄႈၽၵ်းတူပွင်ႇၵွႆသေၶဝ်ႈသွၵ်ႈတဝ် ဢဝ်ၶူဝ်းၶွင်ၵူၼ်းဝၢၼ်ႈ ၸိူဝ်းပဵၼ်ၶဝ်ႈ၊ ၼမ်ႉမၼ်းၵိၼ်လႄႈၽႃႈဝႆ ၶူဝ်းၼွၼ်း ဢိၵ်ႇတင်း TV လႄႈၶိူင်ႈၸၢၵ်ႈ ၸိူဝ်းၼႆႉ။ ၶူဝ်းၶွင်ၵူၼ်းဝၢၼ်ႈ ဢၼ်သိုၵ်းမၢၼ်ႈသွၵ်ႈတဝ်ဢဝ်ၼၼ်ႉ ၶဝ်တေႃႉမိူဝ်းၵႂႃႇတၢင်းပၢင်ႇဢူႈလူင်။
တွင်ႈထၢမ်
ၸၢႆးႁေႃသႅင် +66 94 728 6696 Signal (တႆး, ဢင်းၵိတ်း)
ယိင်းလႅင်းႁၢၼ် +1 825 425 4099 Signal (မၢၼ်ႈ)
Download PDF files: