ၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 4/2/2025
သိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇ တိူဝ်ႉၺႃးၵူၼ်းမိူင်းတၢႆ 15၊ မၢတ်ႇၸဵပ်း 32 ႁူမ်ႈတင်းၵူၼ်းပဵၼ် ဢၼ် တိုၵ်ႉယႃတူဝ်ယူႇတီႈႁူင်းယႃ ၼႂ်းၸႄႈဝဵင်းၼွင်ၶဵဝ်လႄႈၵျွၵ်းမႄးတီႈၸုမ်းလုၵ်ႉၽိုၼ်ႉၶဝ်ၵုမ်းၵမ်
ၼႂ်းၵႄႈဝၼ်းထိ 21-27/1/2025 ၼၼ်ႉသိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇတီႈဝဵင်းၼွင်ၶဵဝ်လႄႈၵျွၵ်းမႄး သေတိူဝ်ႉၺႃးၵူၼ်းမိူင်းတၢႆ 15 ၵေႃႉ၊ မၢတ်ႇၸဵပ်း 32 ၵေႃႉႁူမ်ႈတင်းၵူၼ်းပဵၼ်ၸိူဝ်းတိုၵ်ႉယႃတူဝ်ယူႇတီႈႁူင်း ယႃၵျွၵ်းမႄး၊ သိုၵ်းမၢၼ်ႈဢဝ်ၶိူင်ႈမိၼ်တိုၵ်းမႃးပွႆႇမၢၵ်ႇၼမ်ႉၼၵ်း 250 ပွင်ႊ။ ဝဵင်းၼွင်ၶဵဝ်လႄႈ ၵျွၵ်းမႄး ၼႆႉ ၸုမ်းလုၵ်ႉၽိုၼ်ႉၶဝ်ၶဝ်ႈယိုတ်းၵုမ်းၵမ်မႃးတင်ႈတႄႇ ၵၢင်ပီ 2024။
ဝၼ်းထိ 21/1/2025 ၶၢဝ်းယၢမ်း ၵၢင်ၼႂ်ၸဝ်ႉ 2:16 မူင်း သိုၵ်းမၢၼ်ႈဢဝ်ၶိူင်ႈမိၼ်တိုၵ်း Jet fighter မႃးပွႆႇမၢၵ်ႇ ၼမ်ႉၼၵ်း 300 ပွင်ႊသွင်လုၵ်ႈ တီႈလုမ်းဢုပ်ႉပိူင်ႇၵူႈလွင်ႈလွင်ႈဝဵင်းၼွင်ၶဵဝ်။ မၢၵ်ႇၼၼ်ႉတူၵ်းတႅၵ်ႇ တိူဝ်ႉ ၺႃး ၼၢင်းယိင်းၵေႃႉၼိုင်ႈဢႃယု 60 ပီ၊ ၼုမ်ႇယိင်းၵေႃႉၼိုင်ႈဢႃယု 17 ပီ လႄႈၵူၼ်းၸၢႆး ထႅင်ႈၵေႃႉၼိုင်ႈ သေ တိူဝ်ႉၺႃးလုမ်းဢုပ်ႉပိူင်ႇလႄႈႁူင်းပလိၵ်ႊ/ယႄး လုၵွႆ။ ယၢမ်း 2:26 မူင်းၵၢင်ဝၼ်း ဝၼ်းၼၼ်ႉ ၵူၺ်း ၼင်ႇၵဝ်ႇ သိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇလုၵ်ႈၼိုင်ႈ တီႈဝၢၼ်ႈၵုင်းလူင် (ၵူင်းၵျီးယႂႃႇမႃႉ) ဢၼ် ယူႇတၢင်း ၸဵင်ႇၸၢၼ်းဝၼ်းတူၵ်းဝဵင်းၼွင်ၶဵဝ် ႁၢင်ႇယၢၼ်မွၵ်ႈ 20 ၵီႊလူဝ်ႊမႄႊတိူဝ်ႊ တိူဝ်ႉၺႃးႁိူၼ်း ယေးသွင်လင် လုၵွႆ။
ဝၼ်းထိ 22/1/2025 ၶၢဝ်းယၢမ်း 11:30 ၵၢင်ၼႂ် သိုၵ်းမၢၼ်ႈဢဝ်ၶိူင်ႈမိၼ်တိုၵ်း Jet fighters မႃးပွႆႇမၢၵ်ႇ ၼမ်ႉ ၼၵ်း 500 ပွင်ႊ တီႈပွၵ်ႉၵၢတ်ႇ/သေးယတ်ႉၵွၵ်ႉ ဝဵင်းၼွင်ၶဵဝ် တိူဝ်ႉၺႃးႁၢၼ်ႉၼမ်ႉၼဵင်ႈဝၢၼ် ပႃရမီႇ လႄႈ ႁိူၼ်းသွင်လင်လုၵွႆ။ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်း 9 ၵေႃႉ ပႃးၸဵမ်ၸဝ်ႈၶွင်ႁၢၼ်ႉၼမ်ႉၼဵင်ႈ ဝၢၼ်၊ ၵူၼ်း ႁဵတ်းၵၢၼ်တီႈႁၢၼ်ႉၼမ်ႉၼဵင်ႈလႄႈၵူၼ်းၸိူဝ်းမႃးသိုဝ်ႉၵိၼ်ၼမ်ႉၼဵင်ႈ၊ ၵူၼ်းမိူင်းၸဵတ်းၵေႃႉ တႄႉတၢႆ ထင် တီႈသေ ထႅင်ႈသွင်ၵေႃႉၵႂႃႇတၢႆတီႈႁူင်းယႃ။ လိူဝ်ၼၼ်ႉၵူၼ်းမိူင်းဢၼ်မၢတ်ႇၸဵပ်းထႅင်ႈႁႃႈၵေႃႉ ၵေႃႈ လႆႈ ဢဝ်ၵႂႃႇသူင်ႇႁူင်းယႃ။
ဝၼ်းထိ 25/1/2025 ယၢမ်း 1:30 ၵၢင်ဝၼ်း သိုၵ်းမၢၼ်ႈဢဝ်ၶိူင်ႈမိၼ်တိုၵ်းမႃးပွႆႇမၢၵ်ႇၼမ်ႉၼၵ်း 250 ပွင်ႊ သွင်လုၵ်ႈတီႈႁူင်းယႃၵျွၵ်းမႄး တိူဝ်ႉၺႃးတိုၵ်းႁူင်းၵိူတ်ႇလုၵ်ႈဢွၼ်ႇလုၵွႆလႄႈၵူၼ်းမိူင်းတၢႆၸွမ်းထႅင်ႈ 3 ၵေႃႉ ပႃးတင်းမေႃယႃ CDM သွင်ၵေႃႉယဝ်ႉ တိူဝ်ႉၺႃးၵူၼ်းပဵၼ် ၸိူဝ်းမႃး ယႃတူဝ်ယူႇတီႈႁူင်းယႃ မၢတ်ႇၸဵပ်း တီႈဢႄႇသုတ်း 20 ၵေႃႉ ။ ၵူၼ်းမိူင်းၸိူဝ်းမၢတ်ႇၸဵပ်းႁၢဝ်ႉႁႅင်းၼၼ်ႉ သိုပ်ႇဢဝ်ၵႂႃႇယႃတူဝ်တီႈႁူင်းယႃ လႃႈ သဵဝ်ႈ လႄႈဝဵင်းလိူဝ်ႇ။
ဝၼ်းထိ 27/1/2025 ယၢမ်း 2:30 ၵၢင်ဝၼ်းသိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇတီႈႁူင်းႁေႃးၵၢင်ဝဵင်း ၵျွၵ်း မႄးလႄႈပွၵ်ႉ 2 ဝဵင်းၵျွၵ်းမႄး တိူဝ်ႉၺႃးႁိူၼ်းၵူၼ်းမိူင်းလုၵွႆ 5 လင်။ မၢၵ်ႇတိူဝ်ႉၺႃးၵူၼ်းၸၢႆး ဢႃယု 40 ၵေႃႉ ၼိုင်ႈတၢႆ ၵွၵ်းႁူဝ်ႁၢႆလၢႆဝႆႉ၊ ၼၢင်းယိင်းဢႃယု 40 လႄႈ 18 ထႅင်ႈသွင်ၵေႃႉမၢတ်ႇၸဵပ်း။
တင်ႈတႄႇၸဝ်ႉလိူၼ် ၸၼ်ႊၼႃႊဝႃႊရီႊ မႃးသိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇ ၸွမ်းပိုၼ်ႉတီႈဢၼ် ၸုမ်းလုၵ်ႉၽိုၼ်ႉၶဝ်ၵုမ်းၵမ်ဝႆႉၼႂ်းမိူင်းတႆးပွတ်းႁွင်ႇလႄႈ ဝဵင်းလိူဝ်ႇပွတ်းႁွင်ႇ။ ဝၼ်းထိ 1/1/2025 ယၢမ်း 11:00 ၵၢင်ၶိုၼ်းသိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇတီႈပွၵ်ႉ 3 ဝဵင်းသႅၼ်ဝီ တိူဝ်ႉၺႃးႁိူၼ်းယေးလုၵွႆလၢႆလၢႆ လင်။ ဝၼ်းထိ 8/1/2025 သိုၵ်းမၢၼ်ႈဢဝ်ၶိူင်ႈမိၼ် ပွႆႇမၢၵ်ႇတီႈဝဵင်းမိူင်းၵုတ်ႈ တိူဝ်ႉၺႃးႁိူၼ်းယေးလုၵွႆ 20 လင်ပၢႆ။
ၼႂ်းၶၢဝ်းယၢမ်းလဵဝ်ၵၼ်သိုၵ်းမၢၼ်ႈသိုပ်ႇပၼ်တၢမ်ႇၵူၼ်းဝၢၼ်ႈ ၼႂ်းၸႄႈဝဵင်းၼွင်ၶဵဝ်ၸိူဝ်းဢၼ်ၶဝ် ထၢင်ႇ ထိူမ်ဝႃႈ ၵမ်ႉထႅမ်ၸုမ်းလုၵ်ႉၽိုၼ်ႉ။ ဝၼ်းထိ 25/1/2025 သိုၵ်းမၢၼ်ႈဢဝ်ၾႆးၸုတ်ႇၽဝ်ႁိူၼ်းၵူၼ်းဝၢၼ်ႈ ဢုမ်ႇမႆႉတီး ဢၼ်မီးၼိူဝ်သဵၼ်ႈတၢင်း မူႇၸႄႈ-ဝဵင်းလိူဝ်ႇ တၢင်းၸဵင်ႇၸၢၼ်းဝၼ်းတူၵ်း ဝဵင်းၼွင်ၶဵဝ်သေ ပဵၼ်တီႈ ဢၼ်သိုၵ်းမၢၼ်ႈၶိုၼ်းယိုတ်းၵုမ်းၵမ် ၼႂ်းၸဝ်ႉလိူၼ်ၻီႊသိမ်ႊပိူဝ်ႊ 2024။ မိူဝ်ႈလၢႆလၢႆ လိူၼ်ပူၼ်ႉ မႃး သိုၵ်းမၢၼ်ႈယၢမ်ႈဢဝ် ၾႆးၸုတ်ႇၽဝ်ႁိူၼ်းၵူၼ်းဝၢၼ်ႈ ဢုမ်ႇမႆႉတီး ယဝ်ႉလႄႈပေႃးႁူမ်ႈၵၼ်တင်း မူတ်း ပႃးၸဵမ် ဢၼ်ၶိုၼ်းၸုတ်ႇၽဝ်ထႅင်ႈမိူဝ်ႈဝၼ်းထိ 29/12/2024 လႄႈ 19/1/2025 ၼၼ်ႉၸိုင်မီး 20 လင်ယဝ်ႉ။
| သၢႆမၢႆလွင်ႈၵူၼ်းမိူင်းလုတၢႆ၊ မၢတ်ႇၸဵပ်း၊ ႁိူၼ်းယေးလုၵွႆ ယွၼ်ႉသိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇလႄႈဢဝ်ၾႆးၽဝ်ႁိူၼ်း ၵူၼ်း ဝၢၼ်ႈၼႂ်းၸႄႈဝဵင်းၼွင်ၶဵဝ်တင်း ၸႄႈဝဵင်းၵျွၵ်းမႄး (29/12/2024 – 27/1/2025) | ||||||||
| ၶပ်ႉမၢႆ | ဝၼ်းထိ | ဝၢၼ်ႈ/ပွၵ်ႉ ၸႄႈဝဵင်း | လွင်ႈတၢင်း | ၵူၼ်းမိူင်းတၢႆ | ၵူၼ်းမိူင်းမၢတ်ႇၸဵပ်း | ၶူဝ်းႁိူၼ်း ယေးလုၵွႆ ဢၼ် ႁပ်ႉႁူႉ | ||
| ဢၼ်ႁူႉ | ႁူဝ် ၼပ်ႉ | ဢၼ်ႁူႉ | ႁူဝ် ၼပ်ႉ | |||||
| 1 | 29/12/2024 ထိုင် 26/1/2025 | ဝၢၼ်ႈဢုမ်ႇမႆႉတီး ၊ ၼွင်ၶဵဝ် | သိုၵ်းမၢၼ်ႈဢဝ် ၾႆး ၽဝ်ႁိူၼ်း ၵူၼ်း ဝၢၼ်ႈ 20 လင် | ႁိူၼ်း 20 ၺႃးၾႆးၽဝ် | ||||
| 2 | 21/1/2025 | ဝဵင်းၼွင်ၶဵဝ် | သိုၵ်းမၢၼ်ႈဢဝ် ၶိူင်ႈမိၼ် တိုၵ်း jet fighter ပွႆႇမၢၵ်ႇ ၼမ်ႉၼၵ်း 300 ပွင်ႊ သွင်လုၵ်ႈ ယၢမ်း 2:16 မူင်း ၵၢင်ဝၼ်း | ယိင်း 1 ဢႃယု 60 | 1 | ၼုမ်ႇယိင်း ဢႃယု 17 လႄႈၸၢႆး ဢႃယု 60 | 2 | တိုၵ်း လုမ်း ဢုပ်ႉ ပိူင်ႇ 1၊ တိုၵ်းႁူင်း ပလိၵ်ႊ/ယႄး 1 ႁိူၼ်း 5 လင်လုၵွႆ |
| 3 | 21/1/2025 | ဝၢၼ်ႈၵုင်းလူင်၊ ၼွင်ၶဵဝ် | သိုၵ်းမၢၼ်ႈဢဝ် ၶိူင်ႈမိၼ်ပွႆႇမၢၵ်ႇ ၼိုင်ႈလုၵ်ႈ ယၢမ်း 2:26 မူင်းၵၢင်ဝၼ်း | ႁိူၼ်း 2 လင် လုၵွႆ | ||||
| 4 | 22/1/2025 | ပွၵ်ႉၵၢတ်ႇ/သေး ဝဵင်းၼွင်ၶဵဝ် | သိုၵ်းမၢၼ်ႈဢဝ် ၶိူင်ႈမိၼ် jet fighters ပွႆႇမၢၵ်ႇ ၼမ်ႉၼၵ်း 500 ပွင်ႊ 2 လုၵ်ႈယၢမ်း 11:30 မူင်းၵၢင်ၼႂ် | ၸၢႆး 7 လႄႈယိင်း 2 | 9 | 5 | ႁိူၼ်း 2 လင် လႄႈႁၢၼ်ႉၶၢႆ ၼမ်ႉၼဵင်ႈ ဝၢၼ် 1 ဢၼ် လုၵွႆ | |
| 5 | 25/1/2025 | ႁူင်းယႃၵျွၵ်းမႄး၊ ဝဵင်းၵျွၵ်းမႄး | သိုၵ်းမၢၼ်ႈဢဝ် ၶိူင်ႈမိၼ်ပွႆႇမၢၵ်ႇ ယၢမ်း 1:30 မူင်း ၵၢင်ဝၼ်း | မေႃယႃ 2 လႄႈၵူၼ်း ပဵၼ် 1 | 3 | ၵူၼ်းပဵၼ် 20 ၵေႃႉ | 20 | တိုၵ်းသွင် ဢၼ်ၶွင် ႁူင်းယႃ လုၵွႆ |
| 6 | 27/1/2025 | ပွၵ်ႉ 2၊ ဝဵင်းၵျွၵ်းမႄး | သိုၵ်းမၢၼ်ႈဢဝ် ၶိူင်ႈမိၼ်ပွႆႇမၢၵ်ႇ 2 လုၵ်ႈ ယၢမ်း 2:15 မူင်း ၵၢင်ဝၼ်း | ၸၢႆး 1 ဢႃယု 40၊ ယိင်း 1 ဢႃယု 21 | 2 | ယိင်း 2 လႄႈ ၸၢႆး 3 | 5 | ႁိူၼ်း 10 လင်၊ ႁူင်း ႁေႃး 1 လႄႈ ႁူင်းသဝ်း 1 လင်လုၵွႆ |
| ႁူမ်ႈ | 15 | 32 | ႁိူၼ်း 39 လင်၊ ႁူင်းယႃ 1၊ ႁၢၼ်ႉၶၢႆ ၼမ်ႉၼဵင်ႈ ဝၢၼ် 1၊ တိုၵ်း လုမ်းဢုပ်ႉ ပိူင်ႇ 1 လႄႈ ႁူင်း ပလိၵ်ႊ /ယႄး 1 လင်လုၵွႆ | |||||
တွင်ႈထၢမ်
ၸၢႆးႁေႃသႅင် 66 94 728 6696 Signal (တႆး၊ ဢင်းၵိတ်း)
ယိင်းလႅင်းႁၢၼ် 1 825 425 4099 Signal (မၢၼ်ႈ)
Download PDF files: