ၽိုၼ်တၢမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 28/11/225
လုၵ်ႈႁဵၼ်းၸၼ်ႉၸွမ် ၺႃးတဵၵ်းတဵင်ႁႂ်ႈတွတ်ႈၶႅပ်းၵၢင်ၸႂ် လိူၵ်ႈတင်ႈလူင်ႈၼႃႈ ၼႂ်းမိူင်းတႆးပွတ်း ၸၢၼ်း လႄႈပွတ်းဢွၵ်ႇ
Download PDF >>> Shan | Burmese | English | Thai
ၼႂ်းဝူင်ႈထူၼ်ႈသၢမ်လိူၼ် ၼူဝ်ႊဝႅမ်ႊပိူဝ်ႊ 2025 ပူၼ်ႉမႃးၼႆႉ ၸဝ်ႈၼႃႈတီႈသိုၵ်းမၢၼ်ႈၼႂ်းၸႄႈ ဝဵင်းပင်းတလႃႉ၊ ၼမ်ႉၸၢင် လႄႈၵုၼ်ႁဵင် ၸိုင်ႈတႆးပွတ်းၸၢၼ်း တင်းၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ တဵၵ်းၸႂ်ႉလုၵ်ႈႁဵၼ်း 250 ၵေႃႉပၢႆ တွတ်ႈၶႅပ်းၵၢင်ၸႂ်လူင်ႈၼႃႈ တႃႇပၢင်လိူၵ်ႈတင်ႈ ဢၼ်ႁၢင်ႈႁႅၼ်းဝႆႉၼႂ်းဝူင်ႈလိုၼ်းသုတ်းၼႂ်းလိူၼ်ၻီႊသိမ်ႊပိူဝ်ႊ။
သိုၵ်းမၢၼ်ႈႁၢင်ႈႁႅၼ်းတႃႇပၢင်လိူၵ်ႈတင်ႈၵမ်းႁႅၵ်ႈ ၼႂ်းဝၼ်းထိ 28/12/2025 သေၵမ်းသွင်သမ်ႉၼႂ်း ဝၼ်းထိ 11/1/2026။ လုၵ်ႈႁဵၼ်းၸိူဝ်းတေလႆႈႁဵၼ်းလိၵ်ႈၼွၵ်ႈၶဵတ်ႇလိူၵ်ႈတင်ႈၸဝ်ႈၵဝ်ႇၼႂ်းဝၼ်း လိူၵ်ႈတင်ႈၼၼ်ႉၺႃးတဵၵ်းၸႂ်ႉႁႂ်ႈတွတ်ႈၶႅပ်းၵၢင်ၸႂ်လူင်ႈၼႃႈ။
လုၵ်ႈႁဵၼ်းၵမ်ႈၼမ်ၸိူဝ်းၺႃးတဵၵ်းတဵင်ပဵၼ်လုၵ်ႈႁဵၼ်းၸၼ်ႉၸွမ်ပီၼိုင်ႈ။ တႃႇလုၵ်ႈႁဵၼ်းၸၼ်ႉပီၼိုင်ႈ တေလႆႈတၢင်ႇယိုၼ်ႈၶဝ်ႈႁဵၼ်းၸၼ်ႉၸွမ်ပီၼႆႉ ဢၼ်တေပိုတ်ႇၼႂ်းလိူၼ်ၻီႊသိမ်ႊပိူဝ်ႊ ၼၼ်ႉတေလႆႈ မီးလိၵ်ႈၵမ်ႉထႅမ် တီႈၼႂ်းပွၵ်ႉဢမ်ႇၼၼ်တီႈပူႇၵႄႇၼႂ်းဝၢၼ်ႈဝႃႈ “ပဵၼ်လုၵ်ႈ ႁဵၼ်းလီ”ၼႆ။ ၼွၵ်ႈသေၼၼ်ႉ လုၵ်ႈႁဵၼ်းၸိူဝ်းတိုၵ်ႉၶိုၼ်ႈႁဵၼ်း တီႈၸၼ်ႉၸွမ် (ၸိူင်ႉၼင်ႇ လုၵ်ႈႁဵၼ်းပၢႆးပၺ်ႇၺႃႇလႄႈပၢႆးယႃႈယႃ) တိုၼ်းတေလႆႈဢဝ်လိၵ်ႈၵမ်ႉထႅမ်တီႈႁူင်း ၸဝ်ႈၼႃႈတီႈ/ ယႄးဝႃႈ ပဵၼ်ၵူၼ်း ဢမ်ႇမီးတၢင်းၽိတ်းသင် ၼႆၼၼ်ႉပႃး။ လုၵ်ႈႁဵၼ်းၸိူဝ်းတိုၵ်ႉႁဵၼ်း ၸၼ်ႉၸွမ်ထၢၼ်ႈသုင်ဝႆႉ ၸိူဝ်းၼၼ်ႉၵေႃႈ လူဝ်ႇလိၵ်ႈၵမ်ႉထႅမ် ၸွမ်းဢွင်ႈတီႈယူႇသဝ်း။ ၸဝ်ႈၼႃႈတီႈ ၸိူဝ်းၵဵဝ်ႇၶွင်ႈၶဝ် ဢမ်ႇယွမ်းဢွၵ်ႇပၼ်လိၵ်ႈၵမ်ႉထႅမ် သင်ဝႃႈပႆႇမီးလၵ်းထၢၼ် တွတ်ႈၶႅပ်း ၵၢင်ၸႂ် လိူၵ်ႈတင်ႈလူင်ႈၼႃႈယဝ်ႉ။
ၸႄႈဝဵင်းၵုၼ်ႁဵင် ၸဝ်ႈၼႃႈတီႈပွၵ်ႉ၊ ပူႇၵႄႇ၊ ၽူႈၵုမ်းသိပ်းႁူဝ်ႁိူၼ်း လႄႈ ၽူႈၵုမ်းပၢၵ်ႇႁူဝ်ႁိူၼ်း ၶဝ်လူင်းပိုၼ်ႉတီႈၸွမ်းတွႆႇၽၵ်းတူႁိူၼ်း မိူဝ်ႈဝူင်ႈထူၼ်ႈၼိုင်ႈ လိူၼ်ၼူဝ်ႊဝႅမ်ႊပိူဝ်ႊ သေႁႃၵဵပ်းသၢႆမၢႆ လုၵ်ႈႁဵၼ်းယဝ်ႉလၢတ်ႈဝႃႈ တေလႆႈတွတ်ႈၶႅပ်းၵၢင်ၸႂ်လူင်ႈၼႃႈ ဝၼ်းထိ 17-18/11/2025။ ၼႂ်းၶၢဝ်းတၢင်းၼၼ်ႉ လုၵ်ႈႁဵၼ်းၸၼ်ႉၸွမ် 36 ၵေႃႉလႆႈတွတ်ႈၶႅပ်းၵၢင်ၸႂ် လူင်ႈၼႃႈ တီႈႁူင်းတွတ်ႈၶႅပ်းၵၢင်ၸႂ် သွင်တီႈ ၼႂ်းၸႄႈဝဵင်းၵုၼ်ႁဵင်။
ၸႄႈဝဵင်းၼမ်ႉၸၢင် ၼႂ်းၶၢဝ်းတၢင်းဝၼ်းထိ 17 လႄႈ 20 /11/2025 လုၵ်ႈႁဵၼ်းၸၼ်ႉၸွမ် 79 ၵေႃႉလႆႈတွတ်ႈၶႅပ်းၵၢင်ၸႂ်လူင်ႈၼႃႈ တီႈလုမ်းၾၢႆႇလိူၵ်ႈတင်ႈ ၼႂ်းပွၵ်ႉလႄႈဝၢၼ်ႈ။
လုၵ်ႈႁဵၼ်းၸၼ်ႉၸွမ် ဢၼ်ယူႇၼမ်ႉၸၢင်တေၵႂႃႇၶိုၼ်ႈၸၼ်ႉၸွမ် ၼႂ်းဝဵင်းတႃႈလိူဝ်ႇ သပ်းလႅင်းၼႄဝႃႈ “ၶႃႈဢမ်ႇလႆႈ ၶဝ်ႈသွပ်ႇလိၵ်ႈတႃႇၶဝ်ႈၸၼ်ႉၸွမ်မႃးသၢမ်ပီယဝ်ႉ ၸင်ႇႁႃလႆႈၶဝ်ႈသွပ်ႇ ပီ ၵၢႆၵူၺ်း ဢႃယုၶႃႈတႄႉပူၼ်ႉ 18 ပီယဝ်ႉ။ မိူဝ်ႈၶႃႈၵႂႃႇလုမ်းပွၵ်ႉ တႃႇယွၼ်းလိၵ်ႈၵမ်ႉထႅမ်ၶဝ်ႈ ၸၼ်ႉ ၸွမ်ၼၼ်ႉ ၶဝ်လၢတ်ႈၶႃႈဝႃႈ ပေႃးတွတ်ႈၶႅပ်းၵၢင်ၸႂ်ယဝ်ႉၸင်ႇမႃးလႄႈၼႆ။ ၶဝ်လၢတ်ႈဝႃႈ တေလႆႈ ၵႂႃႇ တွတ်ႈၶႅပ်းၼႂ်းၵႄႈဝၼ်းထိ 17 ထိုင် 21/11/2025။ ၵွပ်ႈၼၼ် ပဵၵ်ႉသမ်ႉဝႃႈၶႃႈဢမ်ႇသူၼ်ၸႂ် လွင်ႈ တွတ်ႈၶႅပ်းၵၢင်ၸႂ်ၵေႃႈယဝ်ႉ ၶႃႈတိုၼ်းၺႃးတဵၵ်းၸႂ်ႉႁႂ်ႈၵႂႃႇတွတ်ႈၶႅပ်းၵၢင်ၸႂ် ၼၼ်ႉယဝ်ႉ” ဝႃႈၼႆ။
ၸိူင်ႉၼၼ်ၼင်ႇၵဝ်ႇ မိူဝ်ႈဝၼ်းထိ 17/11/2025 ၼၼ်ႉ လုၵ်ႈႁဵၼ်းၸၼ်ႉၸွမ် 94 ၵေႃႉ ၺႃးတဵၵ်းၸႂ်ႉႁႂ်ႈ ၵႂႃႇတွတ်ႈၶႅပ်းၵၢင်ၸႂ် တီႈလုမ်းဢုပ်ႉပိူင်ႇၵူႈလွင်ႈလွင်ႈဢၼ်မီးၼႂ်းၸႄႈဝဵင်း ပင်းတလႃႉ ပိုၼ်ႉတီႈထၼု ၽွင်းငမ်းတူဝ်ၵဝ်ႇ ၼႂ်းၸိုင်ႈတႆးပွတ်းၸၢၼ်း။
ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ လုၵ်ႈႁဵၼ်းၸၼ်ႉၸွမ် 47 ၵေႃႉလႆႈတွတ်ႈၶႅပ်းၵၢင်ၸႂ် မိူဝ်ႈဝၼ်းထိ 18 လႄႈ 19 တီႈလုမ်းၶွမ်ႊမသိၼ်ႊလိူၵ်ႈတင်ႈ ဢၼ်မီးၼႂ်း 6 ပွၵ်ႉ/ဝၢၼ်ႈ ပိူဝ်ႈတႃႇ လႆႈလိၵ်ႈၵမ်ႉထႅမ်။ လုၵ်ႈႁဵၼ်းၵေႃႉၼိုင်ႈဢၼ်ၺႃးတဵၵ်းၸႂ်ႉႁႂ်ႈတွတ်ႈၶႅပ်းၵၢင်ၸႂ်ၼၼ်ႉလၢတ်ႈဝႃႈ လုၵ်ႈႁဵၼ်း ၵမ်ႈၼမ် တွတ်ႈၶႅပ်းၵၢင်ၸႂ်သၢၼ်ၶတ်း ၼႆယဝ်ႉ။
ၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း ၸဝ်ႈၼႃႈတီႈၽူႈၵွၼ်းပွၵ်ႉ/ဝၢၼ်ႈၶဝ်ၵဵပ်းၶေႃႈမုၼ်း လုၵ်ႈႁဵၼ်းၸၼ်ႉၸွမ် ၼႂ်းၶၢဝ်းတၢင်းဝၼ်းထိ 12 လႄႈ 15/11/2025 သေလၢတ်ႈဝႃႈတေလႆႈတွတ်ႈ ၶႅပ်းၵၢင်ၸႂ်။ ၵူၺ်းၵႃႈ ၶၢဝ်းယၢမ်းၼၼ်ႉ ၶဝ်ယင်းပႆႇလႆႈႁပ်ႉႁူႉဝႃႈတေလႆႈၵႂႃႇတွတ်ႈၶႅပ်းၵၢင်ၸႂ်။ ယိင်းၸၼ်ႉၸွမ်ၵေႃႉၼိုင်ႈလၢတ်ႈဝႃႈ ၽွင်းလုၵ်ႈႁဵၼ်းၶဝ်ၵႂႃႇယွၼ်းလိၵ်ႈၵမ်ႉထႅမ် တႃႇၶဝ်ႈႁဵၼ်း ၸၼ်ႉၸွမ်ၼၼ်ႉ ၸဝ်ႈၼႃႈတီႈၶဝ်ဝႃႈ ပေႃးတွတ်ႈၶႅပ်းၵၢင်ၸႂ်ယဝ်ႉၵွၼ်ႇ ၸင်ႇၸၢင်ႈဢွၵ်ႇပၼ် ၼႆယဝ်ႉ။
လွင်ႈတဵၵ်းတဵင်ႁႂ်ႈၵူၼ်းမိူင်းတွတ်ႈၶႅပ်းၵၢင်ၸႂ်ၸိူင်ႉၼႆ သၢၼ်ၶတ်းၵၼ်တင်းၵၢင်ၸႂ်ၵူၼ်းမိူင်းသေ ပၢင်လိူၵ်ႈတင်ႈသိုၵ်းမၢၼ်ႈၼၼ်ႉ တိုၼ်းဝႃႈဢမ်ႇလွတ်ႈလႅဝ်း၊ ဢမ်ႇပဵၼ်ထမ်း (တြႃး)/ဢမ်ႇၽဵင်ႇ ပဵင်းလႄႈ ဢမ်ႇၸႂ်ႈလၢႆးတီႊမူဝ်ႊၶရေႊသီႊ။
