ၽိုၼ်တၢမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 20/5/2025
ၵူၼ်းဝၢၼ်ႈထဝ်ႈၸၢႆးၵေႃႉၼိုင်ႈၺႃးသိုၵ်းမၢၼ်ႈလႄႈသိုၵ်းပဢူဝ်း PNO ပၢတ်ႇၶေႃးတၢႆ၊ ဢဝ်ၾႆးၸုတ်ႇ ၽဝ်ႁိူၼ်းၵူၼ်းဝၢၼ်ႈ 40 ပၢႆ ၼႂ်းၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း
ၼႂ်းလိူၼ်မေႊ ဝူင်ႈထူၼ်ႈသွင် 2025 ၵူၼ်း ဝၢၼ်ႈထဝ်ႈၸၢႆးၵေႃႉၼိုင်ႈ ၺႃးသိုၵ်းမၢၼ်ႈလႄႈၸုမ်းသိုၵ်းပဢူဝ်း Pa-o National Organization (PNO) ပၢတ်ႇၶေႃးတၢႆယဝ်ႉ ဢဝ်ၾႆးၸုတ်ႇၽဝ် ႁိူၼ်းၵူၼ်းဝၢၼ်ႈ 40 လင်ပၢႆ ၼႂ်းဝၢၼ်ႈၸၢင်ႈၸွႆႉ ဢၼ်မီးၼႂ်းၸႄႈဝဵင်းယွင်ႁူၺ်ႈ ပွတ်းၸၢၼ်း ၽွင်းၶဝ်ဢွၵ်ႇၼႃႈသိုၵ်းၼႂ်းပိုၼ်ႉတီႈ။ လိူဝ်ၼၼ်ႉသိုၵ်းမၢၼ်ႈ ဢဝ်ၶိူင်ႈ မိၼ် ပွႆႇမၢၵ်ႇၸမ်ဝၢၼ်ႈ တိူဝ်ႉၺႃးဝတ်ႉ/ ၵျွင်း လႄႈႁိူၼ်း ၵူၼ်းဝၢၼ်ႈ သၢမ်လင်လုၵွႆ။
တင်ႈတႄႇဝၼ်းထိ 6/5/2025 မႃးသိုၵ်းမၢၼ်ႈလႄႈသိုၵ်းပဢူဝ်း PNO ႁူမ်ႈၵၼ် ႁႅင်းသိုၵ်း 200 ပၢႆထူဝ်း သိုၵ်းၶဝ်ႈၵႂႃႇ တၢင်း ၸႄႈ ဝဵင်းယွင်ႁူၺ်ႈ ပွတ်းၸၢၼ်း လႄႈ ၸႄႈဝဵင်းသီသႅင် ပိုၼ်ႉတီႈဢၼ် ၸုမ်းၵႅတ်ႇၶႄ ၵူၼ်းမိူင်း PDF ၶဝ်တူင်ႉၼိုင် ၸွမ်းႁိမ်း ႁွမ်းလႅၼ်လိၼ်ၸႄႈ ဝဵင်းၽၢႆ ၶုၼ်။ လွင်ႈၼၼ်ႉ ႁဵတ်းႁႂ်ႈမီးပၢင် တိုၵ်း ႁၢဝ်ႉႁႅင်း။
ဝၼ်းထိ 9/5/2025 ယၢမ်းၵၢင်ၼႂ်ၸဝ်ႉ သိုၵ်းမၢၼ်ႈလႄႈသိုၵ်းပဢူဝ်း PNO ႁွတ်ႈၽႅဝ်ၵႂႃႇတီႈဝၢၼ်ႈၸၢင်ႈၸွႆႉ သေဢဝ်ၾႆးၸုတ်ႇႁိူၼ်းၵူၼ်းဝၢၼ်ႈ 20 လင်ပၢႆ။ ဝၼ်းၼၼ်ႉဝၢႆးဝၼ်း သိုၵ်းမၢၼ်ႈၵႂႃႇတိမတ်ႉ လုင်းၸိင်း ဢႃယု 54 ဢၼ်ပႂ်ႉသူၼ်ႁႆႈယူႇၼႂ်းသူၼ် ၼွၵ်ႈဝၢၼ်ႈၸၢင်ႈၸွႆႉ ၼၼ်ႉသေဢဝ်မိတ်ႈပၢတ်ႇၶေႃးတၢႆ၊ ၸုမ်းသိုၵ်းမၢၼ်ႈၶဝ်ဢဝ်ငိုၼ်း 9,700,000 ၵျၢပ်ႈၵႂႃႇထႅင်ႈ။
ဝၼ်းထိ 10/5/2025 ယၢမ်းၵၢင်ဝၼ်း သိုၵ်းမၢၼ်ႈလႄႈသိုၵ်းပဢူဝ်း PNO ဢဝ်ၾႆးၸုတ်ႇႁိူၼ်းၵူၼ်းဝၢၼ်ႈ ၸၢင်ႈၸွႆႉထႅင်ႈ 10 လင်ပၢႆ။
ဝၢၼ်ႈၸၢင်ႈၸွႆႉၼႆႉ မီးတၢင်းၸၢၼ်းဝဵင်းယွင်ႁူၺ်ႈ ႁၢင်ႇၵႆ 66 ၵီႊလူဝ်ႊမႄႊတိူဝ်ႊ။ မိူဝ်ႈၼႂ်းလိူၼ် ၸၼ်ႊ ၼႃႊဝႃႊရီႊ 2024 ပူၼ်ႉမႃးၼၼ်ႉၵေႃႈ သိုၵ်းမၢၼ်ႈလႄႈသိုပ်းပဢူဝ်း PNO ၶဝ်ႈၵႂႃႇၼႂ်းဝၢၼ်ႈသေ ၵႂႃႇသွၵ်ႈတဝ်ဢဝ်ၶူဝ်းႁိူၼ်းၵူၼ်းဝၢၼ်ႈယဝ်ႉ ႁဵတ်းႁႂ်ႈၵူၼ်းဝၢၼ်ႈတူၵ်းၸႂ်ၵူဝ်ႁႄဢွၼ်ၵၼ်တိုၼ်ႇပၢႆႈ။ တင်ႈတႄႇ ၼၼ်ႉမႃး ၼႂ်းဝၢၼ်ႈဢမ်ႇပေႃးမီးၽႂ်ႁတ်းယူႇ ၵူၺ်းမီးၵူၼ်းဝၢၼ်ႈၵမ်ႈၽွင်ႈ လွမ်ၵႂႃႇၸႂ်းႁႆႈၼႃး ဢၼ်မီး ႁိမ်းၸမ်ၼၼ်ႉၵူၺ်း။
ဝၼ်းထိ 12/5/2025 ၶၢဝ်းယၢမ်း 11 ၸမ်တဵင်ႈၶိုၼ်း သိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇတီႈဝၢၼ်ႈလိၼ်ပူၵ်ႇတႅၵ်ႇ ဢိူင်ႇလွႆလမ် ဢၼ်မီးတၢင်းၸဵင်ႇၸၢၼ်းဝၼ်းတူၵ်းဝၢၼ်ႈၸၢင်ႈၸွႆႉ ႁၢင်ႇၵႆၵၼ် 9 ၵီႊလူဝ်ႊမႄႊတိူဝ်ႊသေ တိူဝ်ႉၺႃးဝတ်ႉ/ၵျွင်းလိၼ်ပူၵ်ႇတႅၵ်ႇလုၵွႆ။
ဝၼ်းထိ 13/5/2025 မွၵ်ႈၶၢဝ်းယၢမ်း 5 မူင်းႁူဝ်ၶမ်ႈ သိုၵ်းမၢၼ်ႈဢဝ်ၶိူင်ႈမိၼ်ပွႆႇတီႈဝၢၼ်ႈၸၢင်ႈလဵၵ်း (ႁၢင်ႇၵႆ ဝၢၼ်ႈၸၢင်ႈၸွႆႉ 4.68 ၵီႊလူဝ်ႊမႄႊတိူဝ်ႊ) လႄႈဝၢၼ်ႈၼႃးၵုင်း (ႁၢင်ႇၵႆ ဝၢၼ်ႈၸၢင်ႈၸွႆႉ 7.6 ၵီႊလူဝ်ႊမႄႊ တိူဝ်ႊ) သေ ႁဵတ်းႁႂ်ႈႁိူၼ်းၵူၼ်းဝၢၼ်ႈတီႈဢေႇသုတ်း 3 လင်လုၵွႆ။
ဝၢႆးၼၼ်ႉ ဝၼ်းထိ 13/5/2025 ၶၢဝ်းယၢမ်း 9:45 ၵၢင်ၶိုၼ်း သိုၵ်းမၢၼ်ႈလႄႈသိုၵ်းပဢူဝ်း PNO ဢဝ်ၾႆးၸုတ်ႇ ႁိူၼ်းၵူၼ်းဝၢၼ်ႈၸၢင်ႈၸွႆႉ 10 လင်။ ဝၢၼ်ႈၸၢင်ႈၸွႆႉ မီးလင်ႁိူၼ်းၵူၼ်းယူႇသဝ်း 80 ပၢႆ။
တွင်ႈထၢမ်
ၸၢႆးႁေႃသႅင် +66 94 728 6696 Signal (တႆး, ဢင်းၵိတ်း)
ယိင်းလႅင်းႁၢၼ် +1 825 425 4099 Signal (မၢၼ်ႈ)
Download PDF files: