ၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆးမၢႆ 7/2016
ဝၼ်းထိ 12/10/2016
သိုၵ်းမၢၼ်ႈသူၼ်းသေႇပၢင်တိုၵ်းၸွမ်းၸုမ်းသိုၵ်းတႆးလူင်းလၢႆးမိုဝ်း NCA၊ ယိုဝ်းမၢၵ်ႇလူင်ၶဝ်ႈၼႂ်းပိုၼ်ႉတီႈၵူၼ်းမိူင်း ယူႇ သဝ်းလႄႈႁဵတ်းႁႂ်ႈၵူၼ်းမိူင်းမွၵ်ႈ 2,000 ၼႂ်းမိူင်းၵိုင်လႆႈပိုၼ်ႉပွႆႇပႅတ်ႈႁိူၼ်းယေး
ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆးႁဝ်းၶႃႈသၢၼ်ၶတ်းလွင်ႈသိုၵ်းမၢၼ်ႈသူၼ်းသေႇႁႂ်ႈပဵၼ်ပၢင်တိုၵ်းၸွမ်းၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႂ်းၸႄႈဝဵင်းမိူင်းၵိုင်ၸိုင်ႈတႆးပွတ်းၸၢၼ်းႁူမ်ႈဝႃႈၶွင်ႇသီႇဢဝ် ၶိုၼ်းၸိုင်ႈတႆး/တပ်ႉသိုၵ်း ၸိုင်ႈတႆးၼႆႉလူင်းလႆၢးမိုဝ်းၵိုတ်းယိုဝ်းပတ်းပိုၼ်ႉတူဝ်ႈမိူင်း (NCA) ဝႆႉယဝ်ႉသေတၵေႃႈယဝ်ႉ။ ပၢင်တိုၵ်းၼႆႉသိုၵ်းမၢၼ်ႈဢဝ်ၵွင်ႈ လူင်ယိုဝ်းၶဝ်ႈၼႂ်းပိုၼ်ႉတီႈဢၼ်ၵူၼ်းမိူင်းယူႇသဝ်း လႄႈ ႁဵတ်းႁႂ်ႈ ၵူၼ်းမိူင်းမွၵ်ႈ 2,000 လႆႈပိုၼ်ႉပွႆႇပႅတ်ႈႁိူၼ်းယေးသေပၢႆႈၽေး သိုၵ်းသိူဝ်တင်ႈတႄႇယၢင်ႈၶဝ်ႈၼႂ်းလိူၼ်ဢွၵ်ႊထူဝ်ႊပိူဝ်ႊ 2016 ၼႆႉမႃး။
မိူဝ်ႈဝၼ်းထိ 01/10/2016 ၼၼ်ႉသိုၵ်းမၢၼ်ႈၶလယ 292 ၼွင်ဝူဝ်းၸႄႈဝဵင်းလွၵ်ႈၸွၵ်ႇမွၵ်ႈ40 ဢမ်ႇပွင်ႇၶၢဝ်ႇမွၵ်ႇလၢတ်ႈၵူၼ်း ဝၢၼ်ႈပၢင်ပွႆးဢၼ်ယူႇတၢင်းႁွင်ႇလႄႈႁၢင်ႇၵႆဝဵင်းမိူင်းၵိုင်မွၵ်ႈ 25 လၵ်းၼၼ်ႉသင်သေၵႂႃႇပွႆႇၵူၼ်း 24 ၵေႃႉဢၼ်ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆးတိၺွပ်းၵုမ်းၶင်ဝႆႉၸိူဝ်းၵဵဝ်ႇၶွင်ႈ၊တိတ်းၸပ်းယႃႈ မဝ်းၵမ်လႄႈမူၼ်ႉမႄးတူဝ်ၸႂ်ပၼ်ၸိူဝ်းၼၼ်ႉ။ ၽွင်းသိုၵ်းမၢၼ်ႈပူၼ်ႉပႅၼ်ၶဝ်ႈၸွမ်းႁိမ်းႁွမ်းတပ်ႉပၢင်သဝ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၼၼ်ႉ သွင်ၾၢႆႇလႆႈပဵၼ်ပၢင်တိုၵ်းၵၼ်တင်ႈတႄႇ ၶၢဝ်းယၢမ်း 4:00 ထိုင် 7:00 ႁူဝ်ၶမ်ႈၸွပ်ႉႁွမ်ႉ။
ဝႆၢးၼၼ်ႉထႅင်ႈဝၼ်းၼိုင်ႈသိုၵ်းမၢၼ်ႈၼႃးပွႆးၸႄႈဝဵင်းလၢႆးၶႃႈဢဵၼ်ႁႅင်းမွၵ်ႈ 200 ထႅမ်ႁႅင်းသိုၵ်းၶဝ်ႈ ၼႂ်းပိုၼ်ႉ တီႈၼၼ်ႉထႅင်ႈသေ လႆႈပဵၼ်ပၢင်တိုၵ်းၵၼ်ၸွမ်းတပ်ႉသိုၵ်းၸိုင်ႈတႆး RCSS/SSA တီႈႁိမ်းဝၢၼ်ႈ ၵုင်းသႃႇ ဢၼ်ယူႇတၢင်းၸဵင်ႇႁွင်ႇဝၼ်းဢွၵ်ႇပၢင်ပွႆး ႁၢင်ႇ ၵၼ်မွၵ်ႈၼိုင်ႈလၵ်း။ၶိူင်ႈမိၼ်တိုၵ်း(ႁိူဝ်းမိၼ်မႅင်းမီႈ) သိုၵ်းမၢၼ်ႈသွင်လမ်း ၵေႃႈမိၼ်ပၼ်ႇလဵပ်ႈၼိူဝ်ပိုၼ်ႉတီႈၼႆႈသေ ႁဵတ်း ႁႂ်ႈ ၵူၼ်းဝၢၼ်ႈပၢင်ပွႆး 700 ပၢႆ (ႁူမ်ႈပႃးမႄႈပႃးတွင်ႉ 15 ၵေႃႉ)၊ ဢိၵ်ႇတင်းၵူၼ်းဝၢၼ်ႈႁိမ်းႁွမ်းမွၵ်ႈ 200 မိူၼ်ဝၢၼ်ႈၼႃးလွႆ၊ ဝၢၼ်ႈမူင်ႈ၊ ႁူၺ်ႈၸိုၵ်ႉလႄႈၵုင်းသႃႇၸိူဝ်းၼႆႉလႆႈ ပိုၼ်ႉပွႆႇပႅတ်ႈႁိူၼ်းယေးသေပၢႆႈၽေးသေႃႉႁူမ်ႈတီႈဝတ်ႉ တူင်ႇလၢဝ်းဢၼ် ယူႇ တၢင်းဢွၵ်ႇပၢင်ပွႆးသေႁၢင်ႇၵၼ် မွၵ်ႈ 1 လၵ်းၶိုင်ႈ။ၵူၼ်းမိူင်းၼႂ်းတူင်ႇလၢဝ်းၵေႃႈမွၵ်ႈ 1,000 ၼၼ်ႉၵေႃႈ ၵႂႃႇၼွၼ်းတီႈဝတ်ႉ တူင်ႇ လၢဝ်းၵွပ်ႈဝႃႈ လွမ်ၵူဝ်ပၢင်တိုၵ်းၵိူတ်ႇၶိုၼ်ႈၼႂ်းဝၢၼ်ႈၼၼ်ႉယဝ်ႉ။
မိူဝ်ႈဝၼ်းထိ 03/10/2016 ၼၼ်ႉသိုၵ်းမၢၼ်ႈတပ်ႉ 292 ၶိုၼ်းထွႆဢွၵ်ႇပိုၼ်ႉတီႈဝၢၼ်ႈပၢင်ပွႆးသေဢဝ်ၵူၼ်းမိူင်း တီႈ ၶွၵ်ႈၵုမ်း ၶင် 24 ၵေႃႉလႄႈၵူၼ်းပႂ်ႉၶွၵ်ႈ (ၶွၵ်ႈမူၼ်ႉမႄးတူဝ်ၸႂ်ၵူၼ်းၸပ်းယႃႈမဝ်းၵမ်) 2 ၵေႃႉၼၼ်ႉၸိမ်ၸွမ်ႇ ၸွမ်းၼႂ်းၵႄႈၶဝ်ၵႂႃႇတီႈ တပ်ႉ ၶမယ 505 ဢၼ်မီးၼႂ်းၼမ်ႉလၼ်ႈလႄႈယူႇၼႃႈတၢင်းႁွင်ႇပၢင်ပွႆးသေ ႁၢင်ႇ ၵၼ်မွၵ်ႈ 20 လၵ်း။ ဝႆၢးၼၼ်ႉသိုၵ်းမၢၼ်ႈဢဝ် ၵွင်ႈလူင်ယိုဝ်းသႂ်ႇဝၢၼ်ႈပၢင်ပွႆးလႄႈႁဵတ်းႁႂ်ႈတိူဝ်ႉၺႃးႁိူၼ်းၵူၼ်းဢိၵ်ႇပႃး ရူတ်ႊၵူၼ်းမိူင်းၸိူဝ်းၼႆႉ။ ၵူၼ်းၸိူဝ်းထုၵ်ႇၵုမ်းၶင် ယွၼ်ႉလိူင်ႈယႃႈမဝ်းၵမ်ဢိၵ်ႇတင်းၼၢင်းယိင်းႁူၵ်း ၵေႃႉ ၺႃးသိုၵ်းမၢၼ်ႈတဵၵ်းႁႂ်ႈပႆၼႂ်းၵႄႈသၢႆသိုၵ်းမၢၼ်ႈၶဝ်၊ တိုၼ်းၸႅင်ႈလႅင်း ဝႃႈ မိူၼ်ဢဝ်ၵူၼ်းမိူင်းႁဵတ်းႁူဝ်ႉ ၶႄ တူဝ် ယွၼ်ႉၵူဝ်တပ်ႉသိုၵ်းၸိုင်ႈတႆးRCSS/SSA ယိုဝ်းၶဝ်ၼၼ်ႉယဝ်ႉ။
မိူဝ်ႈဝၼ်းထိ 04/10/2016 ၼၼ်ႉသိုၵ်းမၢၼ်ႈဢဵၼ်ႁႅင်းမွၵ်ႈ 180 လုၵ်ႉတၢင်းမိူင်းပၢႆး (လႅၼ်လိၼ်မိူင်းတႆး-မိူင်းယၢင်းလႅင်) မႃး တီႈတူင်ႇလၢဝ်းထႅင်ႈသေႁဵတ်းႁႂ်ႈၵူၼ်းဝၢၼ်ႈၵမ်ႈၼမ်ၸိူဝ်းပၢႆႈၽေးဢမ်ႇႁတ်းပွၵ်ႈႁိူၼ်းၶိုၼ်း။
မိူဝ်ႈဝၼ်းထိ 07/10/2016 ၼၼ်ႉသိုၵ်းမၢၼ်ႈပွႆႇပၼ်ၵူၼ်းၸိူဝ်းထုၵ်ႇၵုမ်းၶင်ဢၼ်ၶဝ်ႁွင်ႉၵႂႃႇၸိူဝ်းၼၼ်ႉ။ ၵူၺ်း ၵႃႈၵူၼ်းပႂ်ႉၶွၵ်ႈ မူၼ်ႉမႄးတူဝ်ၸႂ်သွင်ၵေႃႉၸၢႆးၵျေႃႇလူႇ ဢႃယု 18 လႄႈၸၢႆးဢွင်ႇမျိၼ်ႉဢႃယု 40 ၼၼ်ႉတႄႉ တိုၵ်ႉသိုပ်ႇၵုမ်းၶင်ဝႆႉတီႈ တပ်ႉ မၢၼ်ႈၶမယ 505 ၼမ်ႉလၼ်ႈၼၼ်ႉယဝ်ႉ။မိူဝ်ႈဝၼ်းထိ 09/10/2016 ၼၼ်ႉထဝ်ႈ ဝၢၼ်ႈထဝ်ႈၼႃးဝၢၼ်ႈပၢင်ပွႆး၊ ထဝ်ႈဝၢၼ်ႈ ထဝ်ႈၼႃးတူင်ႇလၢဝ်း၊ တႅၼ်းၽွင်း/ၽွင်းတႅၼ်းပႃႇတီႇႁူဝ် သိူဝ်သီႇပေႃႉဢိၵ်ႇတင်းၽူႈၵွၼ်းဢိူင်ႇၼမ်ႉလၼ်ႈၸိူဝ်းၼႆႉၵႂႃႇယွၼ်း ႁႂ်ႈပွႆႇ ပၼ်ၵူၼ်းပႂ်ႉၶွၵ်ႈ ၵူၼ်းမိူင်းသွင်ၵေႃႉတီႈတပ်ႉၶ လယ 243 ၼမ်ႉလၼ်ႈ။ ၵူၺ်းၵႃႈၽူႈၵွၼ်းတပ်ႉမၢၼ်ႈလၢတ်ႈဝႃႈပေႃး ဢမ်ႇလႆႈၶႂၢင်ႉတီႈၽူႈၵွၼ်းတိူင်းသိုၵ်းပႆႇ ၸၢင်ႈပွႆႇပၼ်ၼႆယဝ်ႉ။ ပေႃႈမႄႈပီႈၼွင်ႉၵူၼ်းမိူင်းသွင်ၵေႃႉၼႆႉတႄႉမႆႈဢူၵ်းမႆႈၸႂ်ၸွမ်း ႁၢဝ်ႉႁႅင်းလႄႈဢမ်ႇႁူႉၸွမ်း လႆႈဝႃႈၶဝ်တေသိုပ်ႇပဵၼ်ၸိူင်ႉႁိုဝ်ၵႂႃႇၼႆယဝ်ႉ။
ၵဝ်ႉငဝ်ႈသုၼ်ႇလႆႈၵူၼ်းႁဝ်းၶႃႈတုၵ်းယွၼ်းႁႂ်ႈပွႆႇပၼ်ၵူၼ်းမိူင်းသွင်ၵေႃႉၽူႈပႂ်ႉၶွၵ်ႈမူၼ်ႉမႄးတူဝ်ၸႂ်ၵူၼ်းတိတ်းယႃႈယွၼ်ႉဝႃႈ ဢမ်ႇလႆႈႁဵတ်းသင်ၽိတ်းလႄႈၶဝ်ႈၸွႆႈထႅမ်ၼႃႈၵၢၼ်တူင်ႇဝူင်းၵူၼ်းၵူၺ်းသေတုၵ်းယွၼ်းႁႂ်ႈသိုၵ်းမၢၼ်ႈၵိုတ်းယိုတ်းလွင်ႈသေႇ ယူင်းပူင်းယႃႉႁႂ်ႈပဵၼ်ပၢင်တိုၵ်းလႄႈထွၼ်သိုၵ်းဢွၵ်ႇၼႂ်းပိုၼ်ႉၼႆႉပိူဝ်ႈတႃႇႁႂ်ႈၵူၼ်းမိူင်းၸိူဝ်းပႆၢႈၽေးသိုၵ်းၼၼ်ႉပေႃးၸၢင်ႈပွၵ်ႈ ၶိုၼ်းဝၢၼ်ႈၶိုၼ်းႁိူၼ်းၽႂ်မၼ်းလွတ်ႈၽေးလီၼၼ်ႉယဝ်ႉ။
ပိုၼ်းလင်ႁူင်းတိုတ်းယႃႈမူၼ်ႉမႄးတူဝ်ၸႂ်တီႈပၢင်ပွႆး
ႁူင်းတိုတ်းယႃႈမူၼ်ႉမႄးတူဝ်ၸႂ်တီႈပၢင်ပွႆးၼႆႉဢိင်ၼိူဝ်ၵူၼ်းမိူင်းတုၵ်းယွၼ်းယွၼ်ႉဝႃႈယႃႈ မဝ်းၵမ်လႄႈၵူၼ်းတိတ်းၸပ်းမၼ်း ၼမ် ၶိုၼ်ႈ ၼႂ်းပိုၼ်ႉတီႈမိူင်းၵိုင် လႄႈၼမ်ႉလၼ်ႈ သေၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်း ၸိုင်ႈတႆး RCSS/SSA လႆႈ ႁူမ်ႈ ၵၼ်တင်းၵူၼ်း မိူင်းတႄႇတင်ႈမႃး။ယႃမၼႂ်းပိုၼ်ႉတီႈၼႆႉ ထုၵ်ႇ ၵေႃႈထုၵ်ႇသေ ႁႃသိုဝ်ႉငၢႆႈ၊လုၵ်ႈဢွၼ်ႇ ဢႃယု 10 ၶူပ်ႇၵေႃႈယင်း ၵိၼ်ၸႂ်ႉတိုဝ်းပႃး။ ယႃမၼိုင်ႈမဵတ်ႉလႂ်လႆႈသိုဝ်ႉ 150 ၵျၢပ်ႈ။ ၵူၼ်းၸိူဝ်းတိတ်းၸပ်းယႃႈမဝ်းၵမ်ၼၼ်ႉလႆႈ တိၺွပ်းၵုမ်း ၶင်ဝႆႉတီႈ ႁူင်းတိုတ်းယႃႈပိူဝ်ႈ တႃႇ မူၼ်ႉမႄးတူဝ်ၸႂ်တႃႇၶၢဝ်းတၢင်း 5-6 လိူၼ်။
သၢႆမၢႆၵူၼ်းၸိူဝ်းၵဵဝ်ႇၶွင်ႈယႃႈမဝ်းၵမ်ဢၼ်ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၵုမ်းၵမ်ဝႆႉ တီႈႁူင်းမူၼ်ႉ မႄးတူဝ်ၸႂ်တီႈပၢင်ပွႆးမိူဝ်ႈဝၼ်းထိ 01/10/2016 ၼၼ်ႉမီးမိူၼ်ၼင်ႇဢၼ်ၼႄဝႆႉပႃႈတႂ်ႈၼႆႉ။ မိူဝ်ႈ ဝၼ်းထိ 09/06/2016 ၼၼ်ႉ ထုၼ်းထုၼ်းဝိၼ်းဢႃယု 21 ၵေႃႉပဵၼ်လုၵ်ႈၸၢႆးၽူႈၵွၼ်းတပ်ႉမၢၼ်ႈ 292 လႆႈ ထုၵ်ႇၶွင်ႇသီႇဢဝ်ၶိုၼ်းၸိုင်ႈတႆး /တပ်ႉသိုၵ်း ၸိုင်ႈတႆး RCSS/SSA တိၺွပ်းတီႈလၢၼ်ႇ (ၵဵၵ်ႉ) RCSS/SSA တီႈ ၼိုင်ႈၵွပ်ႈဝႃႈမၼ်းၸၢႆးမီးယႃမမွၵ်ႈ20 မဵတ်ႉသေဢဝ်ၵႂႃႇၵုမ်း ၶင်ဝႆႉ တီႈႁူင်း မူၼ်ႉမႄးတူဝ်ၸႂ်ၵူၼ်းတိတ်းယႃႈ။ၵူၺ်းၵႃႈမၼ်းၸၢႆးလၵ်ႉယႃႉၶွၵ်ႈဢွၵ်ႇသေမိူဝ်ႈဝၼ်းထိ 22/09/2016။ လွင်ႈၼႆႉၸၢင်ႈပဵၼ်လွင်ႈတၢင်းဢၼ်ၽူႈၵွၼ်းတပ်ႉမၢၼ်ႈ 292 ပၼ်ၶႂၢင်ႉႁႂ်ႈသိုၵ်းမၢၼ်ႈၵိုင်ႉၵၢင်ႉၽိုၵ်ႉၽၢၵ်ႉၶဝ်ႈၼႂ်းဢွင်ႈတီႈၵုမ်း ၵမ်မူၼ်ႉမႄးတူဝ်ၸႂ်ၵူၼ်း တိတ်းယႃႈမဝ်းၵမ်မိူဝ်ႈဝၼ်းထိ 01/10/2016 ဢၼ် RCSS/SSA လႄႈ ၵူၼ်းမိူင်းႁူမ်ႈၵၼ်တင်ႈ ႁဵတ်းသၢင်ႈမႃး ၼၼ်ႉယဝ်ႉ။
| မၢႆၶပ်ႉ | ၸိုဝ်ႈ | ဢႃယု | တီႈယူႇ |
| 1 | ဢၢႆႈၸၢႆး | 35 | ၼမ်ႉလၼ်ႈပွၵ်ႉၸၢၼ်း |
| 2 | ဢူးလေႃးၵၼ်ႇ | 47 | ၼမ်ႉလၼ်ႈပွၵ်ႉၸၢၼ်း |
| 3 | ၼၢင်းဢူး | 43 | ၼမ်ႉလၼ်ႈပွၵ်ႉၵျူႇတေႃး |
| 4 | တေႃႇလႃႉၶိၼ်ႇ | 53 | ၼမ်ႉလၼ်ႈပွၵ်ႉႁူင်းၸၢၵ်ႈ |
| 5 | ၸၢႆးၺုၼ်ႉ | 47 | ဝၢၼ်ႈၶူဝ်ႁၵ်းဢိူင်ႇမၢၼ်ႈလီႈ |
| 6 | ၽူဝ်းသႃႇ | 47 | ဝၢၼ်ႈၶူဝ်ႁၵ်းဢိူင်ႇမၢၼ်ႈလီႈ |
| 7 | ၸၢႆးမွင်ႇ | 43 | မၢၼ်ႈလီႈ |
| 8 | ၼၢင်းႁွမ် | 50 | မၢၼ်ႈလီႈ |
| 9 | တေႃႇဢေးလၢၼ်ႈ | 29 | မၢၼ်ႈလီႈ |
| 10 | ၼၢင်းလီ | 30 | မၢၼ်ႈလီႈ |
| 11 | တေႃႇဢေးလၢၼ်ႈ | 30 | မၢၼ်ႈလီႈ |
| 12 | ၸၢႆးလၢၼ် | 28 | ဝၢၼ်ႈၼမ်ႉသွင်ၵူးဢိူင်ႇဝၢၼ်ႈၸိင်း |
| 13 | လုင်းၸၼ်ႇတႃႇ | 50 | ဝၢၼ်ႈၵုင်းသႃႇဢိူင်ႇဝၢၼ်ႈၸိင်း |
| 14 | လႃႉသူၺ်ႇ | 21 | မၢၼ်ႈပၢင်ႇဢိူင်ႇမိူင်းၶိူဝ်း |
| 15 | ဢၢႆႈၸၢႆး | 50 | ပွၵ်ႉ 4 မိူင်းၵိုင် |
| 16 | လုင်းၺူဝ်ႇ | 51 | ဝၢၼ်ႈႁူဝ်ၶၢႆးမိူင်းၵိုင် |
| 17 | ၸၢႆးမိူင်း | 23 | ပွၵ်ႉ 3 မိူင်းၵိုင် |
| 18 | ၸၢႆးၼွင်ႉ | 34 | ဝၢၼ်ႈၶေးဢူဝ်း (ၶၢႆးဢုင်) မိူင်းၵိုင် |
| 19 | ဢၢႆႈၽူးၸိင်ႇ | 36 | ဝၢၼ်ႈၼမ်ႉမၢၵ်ႇၵိၼ်ဢိူင်ႇပၢင်ၵႄႇတုမိူင်းၵိုင် |
| 20 | ဢႆၢႈဢေႃး | 44 | ဝၢၼ်ႈၶူးဢိူင်ႇပၢင်ၵႄႇတုမိူင်းၵိုင် |
| 21 | ဢၢႆႈလူႇ | 18 | ဝၢၼ်ႈလုၵၢၼ်ႇဢိူင်ႇတူင်ႇလၢဝ်း |
| 22 | ဢူးသၢင်ႇသေႃး | 51 | ဝၢၼ်ႈပၢင်ႇၵၢတ်ႇမိူင်းၵိုင် |
| 23 | မျိၼ်ႉဝိၼ်း | 19 | ဝၢၼ်ႈတႃႇသီႇဢိူင်ႇၼွင်လူင်ဝဵင်းၼွင်ၶဵဝ် |
| 24 | ၸၢႆးလိၼ်း | 31 | ဝၢၼ်ႈၼမ်ႉၵူႇဢၢင်ႇတေႃးလွၵ်ႉၸွၵ်ႇ |
သၢႆမၢႆၵူၼ်းပႆၢႈၽေးသိုၵ်းတီႈတူင်ႇလၢဝ်း (ဝၼ်းထိ 11/10/2016)
သၢႆမၢႆၵူၼ်းဝၢၼ်ႈၸိူဝ်းႁၢမ်းတီႈယူႇသေလႆႈၵႂႃႇပိုင်ႈႁူမ်ႈၽူၺ်းၼႂ်းတူင်ႇလၢဝ်းဝၼ်းထိ 11/10/2016 ၼၼ်ႉ ၼင်ႇ ပႃႈတႂ်ႈၼႆႉ
|
ၸိုဝ်ႈဝၢၼ်ႈ |
ဢႃယု 5 လူင်းတႂ်ႈ | ဢႃယု 5-17 | ဢႃယု 18-49 | ဢႃယု 50 ၶိုၼ်ႈၼိူဝ် |
ႁူမ်ႈတင်းမူတ်း |
| ၸၢႆး/ယိင်း | ၸၢႆး/ယိင်း | ၸၢႆး/ယိင်း | ၸၢႆး/ယိင်း | ||
| ပၢင်ပွႆး | 63/76 | 70/63 | 183/196 | 50/67 | 768 |
| ၵုင်းသႃႇ | 13/12 | 36/47 | 53/75 | 16/21 | 273 |
| 1,041 | |||||
ၵပ်းသိုပ်ႇတွင်ႈထၢမ်
ၸၢႆးႁေႃသႅင် +66: (0) 62-941-9600 (ဢင်းၵိတ်း၊တႆး)
ယိင်းလွၼ်ႉလႅင်း +66: (0) 63-838-9029 (ဢင်းၵိတ်း၊မၢၼ်ႈ)