ၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 10/3/2025
သိုၵ်းမၢၼ်ႈဢဝ်ၶိူင်ႈမိၼ်တိုၵ်း၊ ဢဝ်ၵွင်ႈလူင်ယိုဝ်းလႄႈဢဝ်ၻရူၼ်ႊပွႆႇမၢၵ်ႇ တိူဝ်ႉၺႃးၵူၼ်းမိူင်းတၢႆ 17၊ မၢတ်ႇ 41၊ ႁိူၼ်းယေး/တိုၵ်း 85 လင်လုၵွႆ ၼႂ်းၸႄႈဝဵင်းၼွင် ၶဵဝ်၊ မိူင်းမိတ်ႈလႄႈမိူင်းၵုတ်ႈ
ၼႂ်းၵႄႈဝၼ်းထိ 6/2/2025 ထိုင် 7/3/2025 ၼၼ်ႉသိုၵ်းမၢၼ်ႈဢဝ်ၶိူင်ႈမိၼ်တိုၵ်း၊ ၵွင်ႈလူင် လႄႈ ၻရူၼ်ႊ ပွႆႇမၢၵ်ႇတိူဝ်ႉၺႃးၵူၼ်းမိူင်းတၢႆ 17 ၵေႃႉ၊ မၢတ်ႇၸဵပ်း 41 လႄႈတိူဝ်ႉၺႃး ႁိူၼ်းယေး/တိုၵ်း 85 လင်ပႃးၸဵမ် ဝတ်ႉ/ ၵျွင်း 2 လင်၊ ႁူင်းယႃ 1 လင် လႄႈႁူင်းႁဵၼ်း 1 လင်လုၵွႆ ၼႂ်းပိုၼ်ႉတီႈၼွင်ၶဵဝ်၊ မိူင်းမိတ်ႈ လႄႈမိူင်း ၵုတ်ႈ ဢၼ်သိုၵ်း ပလွင်ႈ/တဢၢင်း TNLA ၵုမ်းၵမ်ဝႆႉ။
လွင်ႈသိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇၼၼ်ႉ ဢၼ်ႁၢဝ်ႈႁႅင်းသုတ်းပဵၼ်ၼႂ်း ၵၢင်လိူၼ် ၾႄႊၽေႃႊ ဝႃႊရီႊ ႁိမ်းတွင်းၶမ်း ဢၼ်ယူႇတၢင်းၸၢၼ်းဝဵင်းၼွင်ၶဵဝ် တီႈဢၼ်သိုၵ်းမၢၼ်ႈလေႃႇတိုၵ်း ပိူဝ်ႈတႃႇ ၶဝ်ႈ ယိုတ်းဢဝ်ၶိုၼ်းတပ်ႉၵဝ်ႇ ၸိူဝ်းၶဝ်သုမ်းသေလႆႈထွႆ၊ လွင်ႈၼႆႉပဵၼ်ၼႂ်းၶၢဝ်းတၢင်းဢၼ်ၶႄႇ ယူႇၵႄႈၵၢင် ၸတ်းပၢင်ၵုမ်တီႈ ၵုၼ်ႊမိၼ်ႊ မိူင်းၶႄႇ တႃႇႁႃတၢင်းၵိုတ်းသိုၵ်းၼႂ်းၵႄႈ သိုၵ်းမၢၼ်ႈလႄႈ သိုၵ်းပလွင်ႈ။ မိူဝ်ႈ ဝၼ်းထိ 19/2/2025 ဝၢႆးပၢင်ၵုမ်ႁႃလွင်ႈၵိုတ်းယိုဝ်းဢၼ်ဢမ်ႇလႆႈၶေႃႈတွပ်ႇသင်ယဝ်ႉၵႂႃႇလၢႆဝၼ်း ၵူၺ်း သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇၼႂ်းဝဵင်းၼွင်ၶဵဝ် ပႃးတင်းႁူင်းယႃ ႁဵတ်းႁႂ်ႈၵူၼ်းမိူင်းလုတၢႆ 3 ၵေႃႉသေ မၢတ်ႇၸဵပ်း 4 ၵေႃႉ။
လွင်ႈသိုၵ်းမၢၼ်ႈသိုပ်ႇဢဝ်ၶိူင်ႈမိၼ်လႄႈၵွင်ႈလူင်ယိုဝ်းၼႂ်းၸႄႈဝဵင်းၼွင်ၶဵဝ်ၼၼ်ႉ ပဵၼ်ၸွမ်းႁိမ်းႁွမ်းသၢႆ သဵၼ်ႈတၢင်းတေႃႈၵႅတ်ႊလႄႈၼမ်ႉမၼ်းၶႄႇ။ ဝၼ်းထိ 20 လိူၼ်ၾႄႊၾေႃႊဝႃႊရီႊ သိုၵ်းမၢၼ်ႈဢဝ်ၻရူၼ်ႊပွႆႇမၢၵ်ႇတီႈဝၢၼ်ႈ ဢုမ်ႇမႆႉတီး ဢၼ်ႁၢင်ႇၵႆတေႃႈၵႅတ်ႊ မွၵ်ႈ 1 ၵီႊလူဝ်ႊမႄႊတိူဝ်ႊသေ တိူဝ်ႉၺႃး ဝတ်ႉ/ၵျွင်း ဢုမ်ႇမႆႉတီး လုၵွႆ။ ဝၼ်းၼၼ်ႉၵူၺ်းၼင်ႇၵဝ်ႇ သိုၵ်းမၢၼ်ႈဢဝ်ၵွင်ႈလူင်ယိုဝ်းၶဝ်ႈ ဝၢၼ်ႈသၢမ် သိူဝ်လႄႈမၢၼ်ႈၽုၺ်း ဢၼ်ယူႇၸမ်တေႃႈၵႅတ်ႊသေ တိူဝ်ႉၺႃး ႁိူၼ်းၵူၼ်းဝၢၼ်ႈလုၵွႆ 3 လင်။ ဝၼ်းထိ 24 လိူၼ်ၾႄႊၾေႃႊဝႃႊရီႊ ဝၢႆးဝၼ်းၼၼ်ႉ သိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇ 2 လုၵ်ႈတီႈ ႁၢၼ်ႉၶၢႆၶဝ်ႈၽၵ်း /ဢႃးႁၢၼ် ၼႂ်းဝၢၼ်ႈ ဢုမ်ႇမႆႉတီး သေတိူဝ်ႉၺႃးႁၢၼ်ႉၶၢႆၶဝ်ႈၽၵ်းလႄႈႁိူၼ်းၵူၼ်းဝၢၼ်ႈ 5 လင် လုၵွႆ။ တင်ႈ တႄႇဝၼ်းထိ 5-7/3/2025 ၼၼ်ႉသိုၵ်းမၢၼ်ႈဢဝ်ၶိူင်ႈမိၼ်တိုၵ်းတရူၼ်ႊ ပွႆႇမၢၵ်ႇၼိူဝ်ဝၢၼ်ႈဢုမ်ႇမႆႉ တီး သေႁဵတ်းႁႂ်ႈႁိူၼ်းၵူၼ်းဝၢၼ်ႈသိပ်းလင်ၺႃးၾႆးမႆႈ။
ၽွင်းသိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇၵမ်ႈၼမ်ၼႂ်းၸႄႈဝဵင်းၼွင်ၶဵဝ်ယူႇၼၼ်ႉ ၶိူင်ႈမိၼ်သိုၵ်းမၢၼ်ႈ ယိူင်းၸူးဢွင်ႈထၢင်ၶုတ်းမိူင်ႁႄႈသေပွႆႇမၢၵ်ႇလူင်းသွင်လုၵ်ႈၼႂ်း ပိုၼ်ႉတီႈမိူင်းမိတ်ႈလႄႈမိူင်းၵုတ်ႈ။ မိူဝ်ႈ ဝၼ်းထိ 10/2/2025 ၶၢဝ်းယၢမ်းၵၢင်ၼႂ်ၸဝ်ႉ 1 မူင်းသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း Jet fighter Y-12 သေပွႆႇ မၢၵ်ႇ 20 လုၵ်ႈပၢႆတီႈ ထၢင်ၶုတ်းသႅင် ထၢင်ၼိုင်ႈ ဢၼ်မီးတၢင်းၸဵင်ႇႁွင်ႇဝၼ်းတူၵ်းဝဵင်းမိူင်းၵုတ်ႈ ယၢၼ်ၵႆ ၵၼ် 3 ၵီႊ လူဝ်ႊမႄႊတိူဝ်ႊ တိူဝ်ႉၺႃး ၵူၼ်း မိူင်းတၢႆ 5 ၵေႃႉ လႄႈမၢတ်ႇၸဵပ်း 20 ၵေႃႉ။ ဝၼ်းထိ 20/2/2025 ၶၢဝ်း ယၢမ်း ၵၢင်ၶမ်ႈ 8 မူင်း ၶိူင်ႈမိၼ်တိုၵ်း Jet fighter သိုၵ်းမၢၼ်ႈ လမ်းၼိုင်ႈ ပွႆႇမၢၵ်ႇၼမ်ႉၼၵ်း 500 ပွင်ႊ တီႈ ဢွင်ႈၶုတ်းၶမ်း ဝၢၼ်ႈဝၢႆးပွင်း ႁိမ်းဝဵင်းမိူင်းမိတ်ႈသေ တိူဝ်ႉၺႃး ၵူၼ်းဝၢၼ်ႈတၢႆ 3 ၵေႃႉ၊ မၢတ်ႇၸဵပ်း 7 ၵေႃႉ လႄႈ ႁိူၼ်းယေးလုၵွႆ 10 လင်ပႃးၸဵမ်ႁူင်းႁဵၼ်း 1 လင်။
ၸၢႆးႁေႃသႅင် 66 94 728 6696 Signal (တႆး, ဢင်းၵိတ်း)
ယိင်းလႅင်းႁၢၼ် 1 825 425 4099 Signal (မၢၼ်ႈ)
Download PDF files >>>>>