ၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 11/4/2024
လွင်ႈသိုၵ်းမၢၼ်ႈတင်ႈၸႂ်ပိုတ်ႇၼႃႈသိုၵ်းၸွမ်းသဵၼ်ႈတၢင်းလူင်ၵၢၼ်ၵႃႉၶၢႆ ၽွင်းပၢင်တိုၵ်း 1027 ၸီႈၸမ်ႈၼႄလွင်ႈသဵၼ်ႈတၢင်းၵၢၼ်လူင်းတိုၼ်းပၢႆးမၢၵ်ႈမီးၶႄႇ-မၢၼ်ႈ (CMEC) မီးၽေးၶဵၼ်
လွင်ႈသိုၵ်းမၢၼ်ႈတင်ႈၸႂ်ဢဝ်ၶိူင်ႈမိၼ် လႄႈၵွင်ႈလူင်တိုၵ်းၸွမ်းသၢႆသဵၼ်ႈတၢင်းၵႃႉၶၢႆ ၼႂ်းႁႃႈၸႄႈဝဵင်း ၼႂ်းၸိုင်ႈတႆးပွတ်းႁွင်ႇ ၽွင်းပၢင်တိုၵ်း 1027 ၼၼ်ႉၸီႉၸမ်ႈၼႄၸႅင်ႈလႅင်းဝႃႈ လွင်ႈတိုၵ်ႉသိုပ်ႇလူင်းတိုၼ်း ၼႂ်းၵၢၼ်ပၢႆးမၢၵ်ႈမီးၶႄႇ-မၢၼ်ႈ (China Myanmar Economic Corridor) ၼၼ်ႉမီးၽေးၶဵၼ်။
ႁၢင်ႈၽႅၼ်ႇတီႈ/လိၼ်ဢၼ်သိုၵ်းမၢၼ်ႈဢဝ်ၶိူင်ႈမိၼ်လႄႈၵွင်ႈလူင်တိုၵ်းၼႂ်းၸႄႈဝဵင်းမူႇၸေႈ၊ ၵူတ်ႉၶၢႆ၊ သႅၼ်ဝီ၊ ၵုၼ်လူင်လႄႈလႃႈသဵဝ်ႈတင်ႈတႄႇပၢင်တိုၵ်း 1027 မိူဝ်ႈဝၼ်းထိ 27/10/2023 တေႃႇထိုင်ၵၢၼ်ၵိုတ်း ယိုဝ်းၼႂ်းၵႄႈသိုၵ်းမၢၼ်ႈလႄႈ ၸုမ်းဢူၺ်းလီသၢမ်ပီႈၼွင်ႉ မိူဝ်ႈဝၼ်းထိ 11/1/2024 ၼၼ်ႉ ၸီႉၸမ်ႈၼႄ ဝႃႈ ပၢင်တိုၵ်းၼႆႉတင်ႈၸႂ် တိုၵ်းၸွမ်းသဵၼ်ႈတၢင်းလူင်ၵၢၼ်ၵႃႉၶၢႆ မူႇၸေႈ-သႅၼ်ဝီ-လႃႈသဵဝ်ႈလႄႈ သဵၼ်ႈ တၢင်းလူင် သႅၼ်ဝီ-ၼမ်ႉၾႃႈ/ၶျိၼ်ႊသူၺ်ႊႁေႃႇ၊ သွင်သဵၼ်ႈတၢင်းလူင်ၼႂ်းမိူင်းတႆးပွတ်းႁွင်ႇ ဢၼ်ၶဝ်ႈ သူႇမိူင်းၶႄႇ။
ပၢင်တိုၵ်းသိုၵ်းမၢၼ်ႈၼႆႉ ႁဵတ်းႁႂ်ႈၵူၼ်းမိူင်းမီးလွင်ႈလုတၢႆ မၢတ်ႇၸဵပ်းတီႈဢႄႇသုတ်း 180 ၵေႃႉလႄႈ ႁႂ်ႈ ႁိူၼ်း/တိုၵ်းလုၵွႆ 300 ပၢႆၼႂ်းမိုဝ်ႉၼႂ်းဝဵင်းလႄႈမူႇဝၢၼ်ႈၸွမ်းသၢႆသဵၼ်ႈတၢင်းၵႃႉၶၢႆၼႆႉ ၼႂ်းႁႃႈၸႄႈဝဵင်း။ ၵူၼ်းမိူင်းၼပ်ႉႁူဝ်မိုၼ်ႇ လႆႈပိုၼ်ႉပွႆႇပႅတ်ႈႁိူၼ်းယေး ပၢႆႈၽေးသိုၵ်းသိူဝ်သေ မၢင်ၸိူဝ်းယင်းပႆႇႁတ်း ပွၵ်ႈ ၶိုၼ်းႁိူၼ်းယွၼ်ႉလွမ်ၵူဝ်ပၢင်တိုၵ်းဢၼ်ၸၢင်ႈၵိူတ်ႇၶိုၼ်ႈလႆႈထႅင်ႈၵူႈၶၢဝ်း။ သိုၵ်းမၢၼ်ႈယင်း သိုပ်ႇၵုမ်းၵမ် ဝဵင်းလႃႈသဵဝ်ႈလႄႈမူႇၸေႈ သေ ယင်းသိုပ်ႇပဵၼ်ပၢင်တိုၵ်းၸွမ်းၸုမ်းသိုၵ်းၶၢင် KIA ဢၼ်ၵုမ်းၵမ်ပွတ်း တွၼ်ႈ သၢႆတၢင်းလူင်မူႇၸေႈ-သႅၼ်ဝီၼၼ်ႉယူႇ။ ၵူၼ်းမိူင်းၼႂ်းပိုၼ်ႉတီႈၸႄႈဝဵင်း ၸိူဝ်းၼႆႉယင်းတိုၵ်ႉ သိုပ်ႇၺႃးမၢၵ်ႇၾင်လိၼ် ဢၼ်ၾင်ဝႆႉၽွင်းပဵၼ်ပၢင်တိုၵ်းၼၼ်ႉ။
မိူဝ်ႈသိုၵ်းမၢၼ်ႈလႄႈၸုမ်းသိုၵ်းၵဝ်ႈၵၢင်ႉ MNDAA လႆႈၶေႃႈတူၵ်းလူင်းၵိုတ်းယိုဝ်းၵၼ်ပိူဝ်ႈတႃႇပိုတ်ႇၽၵ်း တူလႅၼ်လိၼ်ၼမ်ႉၾႃႈ/ၶျိၼ်ႊသူၺ်ႊႁေႃႊ ဝၼ်းထိ 11/3/2024 ၼႆသေတႃႉ ယင်းပႆႇမီးလွင်ႈႁပ်ႉႁွင်း လွင်ႈ ႁူမ်ႇလူမ်ႈၸွမ်းသၢႆသဵၼ်ႈတၢင်းဢၼ်သူႇၸူးလႃႈသဵဝ်ႈ၊ တီႈဢၼ်သိုၵ်းၵဝ်ႈၵၢင်ႉ MNDAA လႄႈသိုၵ်း မၢၼ်ႈ ပဵၼ်ပၢင်တိုၵ်းၵၼ် မိူဝ်ႈဝၼ်းထိ 26/3/2024။ တင်ႈတႄႇလိူၼ်မၢတ်ႉၶျ်သဵင်ႈမႃး သိုၵ်းမၢၼ်ႈဢဝ်ၶိူင်ႈ မိၼ် မႅင်းမီႈသိုပ်ႇထႅမ်ဢဵၼ်ႁႅင်းၼပ်ႉႁူဝ်ပၢၵ်ႇ ၶဝ်ႈၼႂ်းမူႇၸေႈလႄႈလႃႈသဵဝ်ႈထႅင်ႈ။
ၽွင်းပၢင်တိုၵ်းတိုၵ်ႉသိုပ်ႇပဵၼ်ယူႇၼႆႉ လွင်ႈတေသိုပ်ႇၶိုင်ၵၢၼ်လူင်းတိုၼ်းလၢင်းတႃႇပူၵ်းပွင် သဵၼ်ႈတၢင်း ၵႃႉၶၢႆပၢႆးမၢၵ်ႈမီးၶႄႇမၢၼ်ႈ CMEC ၼၼ်ႉတိုၼ်းမီးၽေးၶဵၼ်၊ ပိူင်လူင်မၼ်းလွင်ႈၽႅၼ်ၵၢၼ် သဵၼ်ႈ တၢင်း လူတ်ႉၾႆး တၢင်းဝႆးသုင် မူႇၸေႈ-ဝဵင်းလိူဝ်ႇ ဢၼ်လႅၼ်ႈၸွမ်းပိုၼ်ႉတီႈသဵၼ်ႈတၢင်းဢၼ်သိုၵ်း မၢၼ်ႈ ဢဝ် ၶိူင်ႈမိၼ်ပွႆႇမၢၵ်ႇၸိူဝ်းၼၼ်ႉ။ ပေႃးတူၺ်းၼႂ်းၶၢဝ်ႇၸိုင် သိုၵ်းမၢၼ်ႈတိုၵ်ႉသိုပ်ႇတေၵူႈယိမ်ငိုၼ်း 8.9 ႁဵင် လၢၼ်ႉ တေႃႊလႃႊ ဢမႄႊရိၵၼ်ႊ တီႈမိူင်းၶႄႇ တႃႇတေမႃးၶိုင်ၵေႃႇသၢင်ႈၶူင်းၵၢၼ်သဵၼ်ႈတၢင်းၼႆႉ။
ႁူဝ်ယွႆႈလွင်ႈသိုၵ်းမၢၼ်ႈဢဝ်ၶိူင်ႈမိၼ်၊ ၵွင်ႈလူင်၊ ၵွင်ႈယိုဝ်းလႄႈႁဵတ်းႁႂ်ႈၵူၼ်းမိူင်းမီးလွင်ႈလုသုမ်း/ မၢတ်ႇ ၸဵပ်း ၼႂ်းၸႄႈဝဵင်းမူႇၸေႈ ၽွင်းပၢင်တိုၵ်း 1027
ၸုမ်းဢူၺ်းလီသၢမ်ပီႈၼွင်ႉဢၼ်မီး ၵဝ်ႈၵၢင်ႉ၊ ပလွင်ႈလႄႈရၶႅင်ႇ ပိုတ်ႇပၢင်တိုၵ်းၸူးသိုၵ်းမၢၼ်ႈတီႈ ဝဵင်း လႅၼ်လိၼ်တႆး-ၶႄႇ ၸိူဝ်းပဵၼ်ၵိင်ႇၸႄႈဝဵင်းပၢင်ႇသၢႆးလႄႈမိူင်းၵူဝ်း တင်ႈတႄႇဝၼ်းတႄႇပိုတ်ႇ ပၢင်တိုၵ်း 1027။ သိုၵ်းမၢၼ်ႈယူႇတီႈတပ်ႉၶဝ် 105 ဢွင်ႈတီႈၵႃႉၶၢႆ ၼၼ်ႉသေဢဝ်ၵွင်ႈလူင်ယိုဝ်းတွပ်ႇၶိုၼ်းၵႃႈ ဝႃႈၵႃႈ ပဵၼ်ၸူးတီႈပၢင်ႇသၢႆး ႁဵတ်းႁႂ်ႈႁိူၼ်းၵူၼ်းဝၢၼ်ႈလုၵွႆ 5 လင် မိူဝ်ႈဝၼ်းထိ 30/10/2023 (မၢၵ်ႇလူင်လုၵ်ႈ ၼိုင်ႈ တူၵ်းတၢင်းၾင်ႇမိူင်းၶႄႇၼႂ်းဝဵင်းဝၼ်ႊတိင်ႊ) သေမီးၵူၼ်းမိူင်းလုတၢႆၵေႃႉၼိုင်ႈမိူဝ်ႈဝၼ်းထိ 1/11/2023။ လွင်ႈၸိူဝ်းၼႆႉဢမ်ႇၸၢင်ႈႁႄႉႁၢမ်ႈၸုမ်းဢူၺ်းလီသၢမ်ပီႈၼွင်ႉဢၼ်ႁႃတၢင်းတႄႇၶဝ်ႈယိုတ်း ဝဵင်းပၢင်ႇသၢႆး မိူဝ်ႈဝၼ်းထိ 2/11/2023၊ ဝၢႆးၼၼ်ႉသိုၵ်းမၢၼ်ႈ ႁႃတၢင်းၶတ်းၸႂ်ၶဝ်ႈယိုတ်းဝဵင်းပၢင်ႇသၢႆးသေ ဢဝ်ၵွင်ႈလူင် ယိုဝ်းၶဝ်ႈပၢင်ႇသၢႆး ယဝ်ႉႁဵတ်းႁႂ်ႈၼၢင်းယိင်းၵေႃႉၼိုင်ႈတၢႆမိူဝ်ႈဝၼ်းထိ 19/11/2023၊ ၵူၺ်းၵႃႈ ၸုမ်းဢူၺ်း လီ သၢမ်ပီႈၼွင်ႉၶဝ်သိုပ်ႇၵုမ်းၵမ်ပၢင်ႇသၢႆးဝႆႉၼႂ်းဝၼ်းလဵဝ်ၵၼ်။
ၽွင်းၼၼ်ႉသိုၵ်းမၢၼ်ႈဢဝ်ၶိူင်ႈမိၼ်တိုၵ်းတၢင်းၵၢင်ႁၢဝ်ပိူဝ်ႈတႃႇႁႄႉၵင်ႈ ၸုမ်းဢူၺ်းလီသၢမ်ပီႈၼွင်ႉ ဢၼ်တေၶဝ်ႈယိုတ်းမိူင်းၵူဝ်း။ လွင်ႈသိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇလူင်းမိူဝ်ႈဝၼ်းထိ 4/11/2023 ယၢမ်းၵၢင်ၼႂ်ၼၼ်ႉႁဵတ်းႁႂ်ႈၵူၼ်းမိူင်းတၢႆ 4 ၵေႃႉ ပႃးလုၵ်ႈဢွၼ်ႇ 3 ၵေႃႉ တီႈၼႂ်းဝၢၼ်ႈသျိၼ်ႊၵျိူၵ်ႊ ဢၼ် ယူႇႁိမ်းၸမ်ဝဵင်းမိူင်းၵူဝ်း။ ၵူၺ်းၵႃႈ မိူဝ်ႈဝၼ်းထိ 7/11/2023 ၸုမ်းဢူၺ်းလီသၢမ်ပီႈၼွင်ႉၶဝ် ၶဝ်ႈ ယိုတ်း ၵုမ်းၵမ်မိူင်းၵူဝ်းလႆႈယူႇယဝ်ႉ။
ဝၼ်းထိ 16/11/2023 ၼၼ်ႉၸုမ်းဢူၺ်းလီသၢမ်ပီႈၼွင်ႉ တႄႇပိုတ်ႇပိုတ်းယိုဝ်းသိုၵ်းမၢၼ်ႈဢၼ်ပၵ်း တီႈ ဢွင်ႈၵႃႉၶၢႆ 105 လၵ်း။ သိုၵ်းမၢၼ်ႈဢဝ်ၶိူင်ႈမိၼ်တိုၵ်းလႄႈၵွင်ႈလူင်ယိုဝ်းၵႂႃႇၵူႈႁူးၵူႈတၢင်းတုမ်ႉတွပ်ႇ ၶိုၼ်းၸွမ်းဝၢၼ်ႈဢၼ်ယူႇႁိမ်းႁွမ်းၸိူဝ်းၼၼ်ႉ ပႃးတင်းတၢင်းဝဵင်းမူႇၸေႈ။ ၼႂ်းၵႄႈဝၼ်းထိ 19/11/2023 ထိုင် 11/12/2023 ၼၼ်ႉ ၵူၼ်းမိူင်းၼႂ်းပိုၼ်ႉတီႈလုတၢႆ 15 ၵေႃႉမၢတ်ႇၸဵပ်း 8 ၵေႃႉ ယွၼ်ႉသိုၵ်းမၢၼ်ႈဢဝ် ၶိူင်ႈမိၼ်တိုၵ်းပွႆႇမၢၵ်ႇလႄႈဢဝ်ၵွင်ႈလူင်ယိုဝ်း။ ၵူၼ်းမိူင်း 2 ၵေႃႉ ၸၢႆးၵေႃႉၼိုင်ႈလႄႈယိင်းၵေႃႉ 1 ၵေႃႈၺႃး သိုၵ်းမၢၼ်ႈဢဝ်ၵွင်ႈယိုဝ်းတၢႆ မိူဝ်ႈဝၼ်းထိ 28/11/2023 ၽွင်းၶဝ်ႁႃတၢင်းပၢႆႈၽေးသိုၵ်းပၢင်တိုၵ်းတီႈဝၢၼ်ႈ 105 လၵ်း။ လိုၼ်းသုတ်းမိူဝ်ႈဝၼ်းထိ 15/12/2023 ၼၼ်ႉ ၸုမ်းဢူၺ်းလီသၢမ်ပီႈၼွင်ႉ ၶဝ်လမ်းလိုပ်ႈ သိုၵ်း မၢၼ်ႈဢွၵ်ႇတပ်ႉၶဝ်တီႈႁိမ်းဝၢၼ်ႈ 105 လၵ်းၼၼ်ႉသေ ယိုတ်းၵုမ်းၵမ် ဢွင်ႈတီႈၵႃႉၶၢႆ ၼိူဝ်သဵၼ်ႈ တၢင်း မူႇၸႄႈ-လႃႈသဵဝ်ႈၼႆႉ ယူႇယဝ်ႉ။
ဝၢႆးတပ်ႉသိုၵ်းမၢၼ်ႈတီႈ 105 လၵ်းၺႃးႁုပ်ႈယိုတ်းယဝ်ႉ သိုၵ်းမၢၼ်ႈတီႈမူႇၸႄႈသိုပ်ႇဢဝ်ၵွင်ႈလူင်ၶဝ်ယိုဝ်း ၶဝ်ႈဢွင်ႈတီႈတပ်ႉၵဝ်ႇၶဝ်ၸိူဝ်းၼၼ်ႉ။ မိူဝ်ႈဝၼ်းထိ 26/12/2023 ၼၼ်ႉသိုၵ်းမၢၼ်ႈ ဢၼ်ယူႇတီႈမူႇၸေႈ ဢဝ်ၵွင်ႈလူင်ယိုဝ်းၶဝ်ႈၵႂႃႇၼႂ်းဝၢၼ်ႈ 105 လၵ်းသေ တိူဝ်ႉၺႃးၵူၼ်းဝၢၼ်ႈ 3 ၵေႃႉတၢႆလႄႈမၢတ်ႇၸဵပ်း 5 ၵေႃႉ။ ၼွၵ်ႈသေၼၼ်ႉၵူၼ်းဝၢၼ်ႈယင်းၺႃးမၢၵ်ႇၾင်လိၼ်ဢၼ်ႁၢင်ႈဝႆႉၽွင်းပဵၼ်ပၢင်တိုၵ်း၊ တီႈဢေႇ သုတ်းမၼ်းၵူၼ်းဝၢၼ်ႈၸၢႆး 6 ၵေႃႉလႄႈၵူၼ်းဝၢၼ်ႈယိင်း 1 ၵေႃႉယဵပ်ႇၺႃးမၢၵ်ႇၾင်လိၼ်ၽွင်းၵႂႃႇႁႆႈသူၼ် ပိူဝ်ႈတႃႇဢဝ်ၽိုၼ်း ၸွမ်းႁိမ်းႁွမ်းမူႇၸေႈ ၽွင်းႁၢင်လိူၼ် ၸၼ်ႊၼႃႊဝႃႊရီႊ 2024။
| ၵူၼ်းမိူင်းၸိူဝ်းလုတၢႆ၊ မၢတ်ႇၸဵပ်း လုသုမ်းၶူဝ်းၶွင် ၽွင်းသိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇ၊ ဢဝ်ၵွင်ႈလူင်ယိုဝ်း ၼႂ်းၸႄႈဝဵင်းမူႇၸေႈ ဝၼ်းထိ 30/10/2023 ထိုင် 30/12/2023 | ||||||
| ၶပ်ႉမၢႆ | ဝၼ်းထိ | ဝၢၼ်ႈ/ ပွၵ်ႉ | ႁူဝ်ယွႆႈ | ၵူၼ်းမိူင်းလုတၢႆ | ၵူၼ်းမိူင်း မၢတ်ႇၸဵပ်း | ၶူဝ်းၶွင်ၵူၼ်း မိူင်းလုသုမ်း |
| 1 | 30.10.2023 | ဝဵင်းပၢင်ႇသၢႆး | သိုၵ်းမၢၼ်ႈတပ်ႉ 105 ဢဝ်ၵွင်ႈလူင် ယိုဝ်း | ႁိူၼ်းၵူၼ်း မိူင်း 5 လင် လုလႅဝ် | ||
| 2 | 1.11.2023 | ပွၵ်ႉ 8 ဝဵင်း ပၢင်ႇသၢႆး | မၢၵ်ႇလူင်လုၵ်ႈ ၼိုင်ႈ မႃးတူၵ်းသႂ်ႇ ၼိူဝ် ႁိူၼ်း | ၸၢႆး 1 ၵေႃႉ (ဢႃယု 23) | ႁိူၼ်းၵူၼ်းမိူင်း လင် 1 | |
| 3 | 1.11.2023 | ဝၢၼ်ႈၼမ်ႉၶူမ် | လုၵ်းပၢႆႈမႅပ်းၵူၼ်ႇ လူင်းသေ ႁဵတ်းႁႂ်ႈ ၵူၼ်းဢၼ်ယူႇၼႂ်းမိူင်းတၢႆ 2 ၵေႃႉ | ယိင်း 1 ၵေႃႉ (ဢႃ ယု 45) လႄႈ 1 ဢွၼ်ႇၸၢႆး 1 ၵေႃႉ (ဢႃယု 12) | ||
| 4 | 4.11.2023 | ဝၢၼ်ႈသျိၼ်ႊ ၵျိုၵ်ႊ ႁိမ်းဝဵင်း မိူင်းၵူဝ်း | တၢႆယွၼ်ႉ သိုၵ်း မၢၼ်ႈဢဝ် ၶိူင်ႈမိၼ် မႃးပွႆႇမၢၵ်ႇ ၶၢဝ်း ယၢမ်းမွၵ်ႈ 4 မူင်း ၵၢင်ၼႂ် | ၸၢႆး 3 ၵေႃႉ (2 ၵေႃႉ ဢႃယုပႃႈတႂ်ႈ 10, ၵေႃႉ 1 ဢႃယု မွၵ်ႈ 30) ယိင်း 2 ၵေႃႉ (ဢႃယု 5 လႄႈ 30) | ႁိူၼ်းၵူၼ်းမိူင်း 2 လင် | |
| 5 | 16.11.2023 | ပွၵ်ႉ 6 ဝဵင်းမိူင်း ၵူဝ်း | တၢႆယွၼ်ႉလဵၼ်ႈ မၢၵ်ႇဢၼ်တူၵ်း ဢမ်ႇတႅၵ်ႇ ၼႂ်းၼႃး ၽွင်းလဵင်ႉဝူဝ်းၵႂၢႆး ၶၢဝ်းယၢမ်းမွၵ်ႈ 2 မူင်း ဝၢႆးဝၼ်း | ၸၢႆး 3 ၵေႃႉ(ဢႃယု 12, 13 လႄႈ 14) | ||
| 6 | 19.11.2023 | ဝဵင်းပၢင်ႇသၢႆး | တၢႆယွၼ်ႉ မၢၵ်ႇလူင် လုၵ်ႈၼိုင်ႈ တူၵ်းမႃး သႂ်ႇႁိူၼ်း ၶၢဝ်း ယၢမ်း 3:30 မူင်းဝၢႆး ဝၼ်း | ၸၢႆး 1 ၵေႃႉ (ဢႃယု 21) | ႁိူၼ်းၵူၼ်းမိူင်း 1 လင် | |
| 7 | 20.11.2023 | ဝၢၼ်ႈၼမ်ႉတဝ်း | တၢႆယွၼ်ႉသိုၵ်း မၢၼ်ႈယူႇတီႈတပ်ႉၶဝ် 105 လၵ်း ၼၼ်ႉ သေ ဢဝ် ၵွင်ႈ လူင်ယိုဝ်း ၶၢဝ်း ယၢမ်းမွၵ်ႈ 2:30 ဝၢႆး | ယိင်း 1 ၵေႃႉ (ဢႃယု 80) | ||
| 8 | 27.11.2023 | ဝၢၼ်ႈ 105 လၵ်း | တၢႆယွၼ်ႉသိုၵ်း မၢၼ်ႈ ဢဝ်ၶိူင်ႈမိၼ် ပွႆႇမၢၵ်ႇလူင်း ၶၢဝ်း ယၢမ်း 4 မူင်းဝၢႆး ဝၼ်း | ၸၢႆး 3 ၵေႃႉ (ဢႃယု 7, 10, 18) | ၸၢႆး 1 ၵေႃႉ (ဢႃယု 16) လႄႈယိင်း 1 ၵေႃႉ(ဢႃယု 38) | ႁိူၼ်းလင် 1 လႄႈ ၶွၵ်ႈဝူဝ်း 1 လင် |
| 9 | 28.11.2023 | ဝၢၼ်ႈမၢၼ်ႈမေႃႈ | တၢႆယွၼ်ႉသိုၵ်း မၢၼ်ႈဢဝ်ၶိူင်ႈ မိၼ်ပွႆႇမၢၵ်ႇ ၶၢဝ်းယၢမ်းမွၵ်ႈ 2 မူင်းဝၢႆးဝၼ်း | ယိင်း 1 ၵေႃႉ (ဢႃယုမွၵ်ႈ 30) | ႁိူၼ်း 1 လင် | |
| 10 | 28.11.2023 | ဝၢၼ်ႈမၢၼ်ႈမေႃႈ | တၢႆယွၼ်ႉသိုၵ်း မၢၼ်ႈဢဝ်ၶိူင်ႈ မိၼ်ပွႆႇမၢၵ်ႇ ၶၢဝ်းယၢမ်းမွၵ်ႈ 7 မူင်းဝၢႆးဝၼ်း | ယိင်း 1 ၵေႃႉ (ဢႃယုမွၵ်ႈ 30) | ႁိူၼ်း 1 လင် | |
| 11 | 28.11.2023 | ဝၢၼ်ႈ 105 လၵ်း | ၺႃးသိုၵ်းမၢၼ်ႈ ဢဝ်ၵွင်ႈယိုဝ်းတၢႆ ၽွင်းၶီႇလူတ်ႉၶိူင်ႈ တေပၢႆႈၽေးသိုၵ်း ၽွင်းပဵၼ်ပၢင်တိုၵ်း | ၸၢႆး 1 ၵေႃႉ (ဢႃယု 26) | ||
| 12 | 28.11.2023 | ဝၢၼ်ႈ 105 လၵ်း | ၺႃးသိုၵ်းမၢၼ်ႈ ဢဝ်ၵွင်ႈယိုဝ်းတၢႆ ၽွင်းၶီႇလူတ်ႉၶိူင်ႈ တေပၢႆႈၽေးသိုၵ်း ၽွင်းပဵၼ်ပၢင်တိုၵ်း။ တၢႆတီႈႁူင်းယႃ မူႇၸေႈ | ယိင်း 1 ၵေႃႉ (ဢႃယု 24) | ||
| 13 | 30.11.2023 | ဝၢၼ်ႈတႃႈလူင် | တၢႆယွၼ်ႉသိုၵ်း မၢၼ်ႈဢဝ်ၵွင်ႈလူင် ယိုဝ်းၶၢဝ်းယၢမ်း မွၵ်ႈ 3 မူင်းဝၢႆးဝၼ်း | ၸၢႆး 1 ၵေႃႉ (ဢႃယု 36) | ||
| 14 | 2.12.2023 | ဝၢၼ်ႈၼမ်ႉၶူမ် | တၢႆယွၼ်ႉသိုၵ်း မၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇ ယၢမ်း 7 မူင်းႁူဝ်ၶမ်ႈ | ယိင်း 1 ၵေႃႉ (ဢႃယု 3 လိူၼ်) | ယိင်း 1 ၵေႃႉ (ဢႃယု 32) | |
| 15 | 2.12.2023 | ဝၢၼ်ႈ 105 လၵ်း | တၢႆယွၼ်ႉသိုၵ်း မၢၼ်ႈဢဝ်ၶိူင်ႈ မိၼ်တိုၵ်းပွႆႇမၢၵ်ႇ | ၸၢႆး 1 ၵေႃႉ (ဢႃယုမွၵ်ႈ 20) | ႁိူၼ်းၵူၼ်း 10 လင် | |
| 16 | 2.12.2023 | ဝၢၼ်ႈ 105 လၵ်း | တၢႆယွၼ်ႉသိုၵ်း မၢၼ်ႈဢဝ်ၶိူင်ႈ မိၼ်တိုၵ်းပွႆႇ မၢၵ်ႇ လူင်းၽွင်းတိုၵ်ႉ ဢွၵ်ႇႁိူၼ်းႁႃ တၢင်းပၢႆႈၽေး သိုၵ်း ၽွင်းပဵၼ် ပၢင်တိုၵ်း | ယိင်း 1 ၵေႃႉ(ဢႃယုမွၵ်ႈ 20) | ||
| 17 | 11.12.2023 | ပွၵ်ႉႁူဝ်ၼႃး | တၢႆယွၼ်ႉသိုၵ်း မၢၼ်ႈယူႇၼိူဝ် ၶိူင်ႈမိၼ် မႅင်းမီႈ သေယိုဝ်းလူင်း ၵႃႈဝႃႈၵႃႈပဵၼ် | ၸၢႆး 1 ၵေႃႉ (ဢႃယု 54) | ||
| 18 | 11.12.2023 | ဝၢၼ်ႈ 105 လၵ်း | တၢႆယွၼ်ႉသိုၵ်း မၢၼ်ႈဢဝ်ၵွင်ႈလူင် ယိုဝ်းၽွင်းပဵၼ် ပၢင်တိုၵ်း | ယိင်း 1 ၵေႃႉ (ဢႃယု 50) | ၵူၼ်းမိူင်း 5 ၵေႃႉ | တီႈဢေႇ သုတ်း ႁိူၼ်း ၵူၼ်း 10 လင် |
| 19 | 26.12.2023 | ဝၢၼ်ႈ 105 လၵ်း | သိုၵ်းမၢၼ်ႈယူႇၼႂ်း ၶူင်ႇ/ၵႂၢင်းမၢၵ်ႇၼင်မူႇၸေႈသေ ဢဝ် ၵွင်ႈလူင်ၶဝ် ယိုဝ်း ၵႂႃႇ ၵူႈႁူးၵူႈ တၢင်း ၽွင်းၶၢဝ်းယၢမ်း 5 မူင်းတၢမ်းၶမ်ႈ | ၵူၼ်းမိူင်း 3 ၵေႃႉ | ၵူၼ်းမိူင်း 5 ၵေႃႉ | တီႈဢေႇသုတ်း ႁိူၼ်းၵူၼ်း မိူင်း 5 လင် |
| 20 | 30.12.2023 | ပွၵ်ႉၵွင်းမူးလူင် ဝဵင်းမူႇၸေႈ | ၺႃးသိုၵ်းမၢၼ်ႈ ယူႇၼိူဝ်ႁိူဝ်းမိၼ် မႅင်းမီႈသေဢဝ် ၵွင်ႈယိုဝ်း ၽွင်း တေဢွၵ်ႇ ႁိူၼ်းပၢႆႈ ၽေးသိုၵ်းၶၢဝ်းယၢမ်းမွၵ်ႈ 2 မူင်းဝၢႆး ဝၼ်း | ယိင်း 1 ၵေႃႉ (ဢႃယုမွၵ်ႈ 40) | ||
| ႁူမ်ႈ | တၢႆ 29 ၵေႃႉ | မၢတ်ႇၸဵပ်း 14 ၵေႃႉ | တီႈဢေႇသုတ်း ႁိူၼ်း လႄႈ တိုၵ်း 38 လင် လုၵွႆ | |||
| ၵူၼ်းမိူင်းလုတၢႆ/မၢတ်ႇၸဵပ်း ယွၼ်ႉမၢၵ်ႇၾင်လိၼ် ၼႂ်းၸႄႈဝဵင်းမူႇၸေႈ ဝၼ်းထိ 23/12/2023 ထိုင် 30/1/2024 | |||||
| ၶပ်ႉမၢႆ | ဝၼ်းထိ | ဝၢၼ်ႈ/ ပွၵ်ႉ | ႁူဝ်ယွႆႈ | ၵူၼ်းမိူင်းလုတၢႆ | ၵူၼ်းမိူင်း မၢတ်ႇၸဵပ်း |
| 1 | 23.12.2023 | ပွၵ်ႉႁူဝ်မိုၼ်ႈ ဝဵင်းမူႇၸေႈ | ယဵပ်ႇၺႃးမၢၵ်ႇၾင်လိၼ် ၽွင်းၵႂႃႇသူၼ်/ႁႆႈ ယၢမ်း 1 မူင်းဝၢႆးဝၼ်း | ၸၢႆး 1 ၵေႃႉ (ဢႃယု 45) | |
| 2 | 11.1.2024 | ပွၵ်ႉၶူးဝဵင်း ဝဵင်းမူႇၸေႈ | ယဵပ်ႇၺႃးမၢၵ်ႇၾင်လိၼ် ၽွင်းၵႂႃႇႁႃၽိုၼ်း | ယိင်း 1 ၵေႃႉ (ဢႃယုမွၵ်ႈ 40) | |
| 3 | 14.1.2024 | ဝၢၼ်ႈ မၢၼ်ႈမႆႇ | ယဵပ်ႇၺႃးမၢၵ်ႇၾင်လိၼ် ၽွင်းၵႂႃႇၼိူဝ်လွႆ | ၸၢႆး 1 ၵေႃႉ (ဢႃယုမွၵ်ႈ 42) | |
| 4 | 15.1.2024 | ဝၢၼ်ႈဝဵင်းၼၢင်း | ယဵပ်ႇၺႃးမၢၵ်ႇၾင်လိၼ် ႁိမ်းၶဵင်ႇၸဝ်ႈတီႈ /ၸဝ်ႈမိူင်း ၽွင်းၵႂႃႇႁႃ တႅပ်းမႆႉၶၢဝ်းယၢမ်း 3 မူင်း ဝၢႆးဝၼ်း | ၸၢႆး 1 ၵေႃႉ (ဢႃယု 44) | |
| 5 | 16.1.2024 | ဝၢၼ်ႈဝဵင်းၼၢင်း | ၸွၼ်ႉယိူဝ်ႈသေ ၺႃးသႂ်ႇ မၢၵ်ႇၾင်လိၼ် | ယိင်း 1 ၵေႃႉ (ဢႃယု45) | |
| 6 | 21.1.2024 | ဝၢၼ်ႈ မၢၼ်ႈမႆႇ | ယဵပ်ႇၺႃးမၢၵ်ႇၾင်လိၼ် ၽွင်းၵႂႃႇႁႃၽိုၼ်းၼိူဝ်လွႆ ယၢမ်းႁူဝ်ၶမ်ႈ | ၸၢႆး 1 ၵေႃႉ (ဢႃယု 31) | |
| 7 | 29.1.2024 | ဝၢၼ်ႈသၼ်းသႃႇ | ယဵပ်ႇၺႃးမၢၵ်ႇၾင်လိၼ် ၽွင်းၵႂႃႇႁႃတႅပ်းၽိုၼ်း ၼိူဝ်လွႆ ယၢမ်းၵၢင်ၼႂ် 8 မူင်း | ၸၢႆး 1 ၵေႃႉ (ဢႃယု 37) | |
| 8 | 30.1.2024 | ဝၢၼ်ႈၼွင်မူဝ် | ယဵပ်ႇၺႃးမၢၵ်ႇၾင်လိၼ် ၽွင်းတႅပ်းမႆႉသေ ပွၵ်ႈ ႁိူၼ်းယၢမ်းတၢမ်းၶမ်ႈ 5 မူင်း | ၸၢႆး 1 ၵေႃႉ (ဢႃယုမွၵ်ႈ 50) | |
| ႁူမ်ႈ | မၢတ်ႇၸဵပ်း 8 ၵေႃႉ | ||||
ႁူဝ်ယွႆႈလွင်ႈသိုၵ်းမၢၼ်ႈဢဝ်ၶိူင်ႈမိၼ်တိုၵ်း၊ ဢဝ်ၵွင်ႈလူင်လႄႈၵွင်ႈဢွၼ်ႇယိုဝ်း ႁဵတ်းႁႂ်ႈၵူၼ်းမိူင်းမီးလွင်ႈ လုတၢႆ မၢတ်ႇၸဵပ်း ၼႂ်းၸႄႈဝဵင်းၵူတ်ႉၶၢႆ ၽွင်းပဵၼ်ပၢင်တိုၵ်း 1027
မိူဝ်ႈဝၼ်းထိ 27/10/2023 ၼၼ်ႉၸုမ်းဢူၺ်းလီသၢမ်ပီႈၼွင်ႉ ဢမ်ႇပိုတ်ႇပၢင်တိုၵ်း ၼႂ်းၸႄႈဝဵင်းၵူတ်ႉၶၢႆ၊ ၵူၺ်းၵႃႈဝၼ်းၼၼ်ႉသိုၵ်းမၢၼ်ႈ ၶလယ 123 ဢၼ်ပၵ်းတီႈၼမ်ႉၽၵ်းၵႃ သမ်ႉဢဝ်ၵွင်ႈလူင်ၶဝ်ယိုဝ်းၶဝ်ႈ ဝၢၼ်ႈၵူၼ်းၵႃႈဝႃႈၵႃႈပဵၼ်သေ ႁဵတ်းႁႂ်ႈၵူၼ်းဝၢၼ်ႈ 2 ၵေႃႉတၢႆ၊ မၢတ်ႇၸဵပ်း 5 ၵေႃႉလႄႈႁိူၼ်းယေးၵူၼ်း ဝၢၼ်ႈလုၵွႆ 5 လင်။
မိူဝ်ႈဝၼ်းထိ 30/10/2023 ၼၼ်ႉၸုမ်းဢူၺ်းလီသၢမ်ပီႈၼွင်ႉ ၶဝ်ႈယိုဝ်းသိုၵ်းမၢၼ်ႈဢၼ်ယူႇဝႆႉတီႈၶူဝ်ၼမ်ႉ ၶၢႆ ၼႂ်းၵႄႈၵူတ်ႉၶၢႆ လႄႈၼမ်ႉၽၵ်းၵႃ၊ ၵူၺ်းဢမ်ႇသိုပ်ႇယိုဝ်းသိုၵ်းမၢၼ်ႈတီႈၵူတ်ႉၶၢႆတေႃႇထိုင်ဝၼ်းထိ 20/12/2023။
မိူဝ်ႈၼႂ်းဝူင်ႈထူၼ်ႈၼိုင်ႈ လိူၼ်ၼူဝ်ႊဝႅမ်ႊပိူဝ်ႊ ၼၼ်ႉ ပဵၵ်ႉသမ်ႉၼႂ်းပိုၼ်ႉတီႈဢမ်ႇမီးပၢင်တိုၵ်းသင်သေ တႃႉ သိုၵ်းမၢၼ်ႈဢဝ်ၶိူင်ႈမိၼ်ၶဝ်မႃးပွႆႇမၢၵ်ႇတီႈဝၢၼ်ႈၵႃႈလႅင်၊ ဝၢၼ်ႈႁူဝ်ၶူဝ်လႄႈဝၢၼ်ႈၼမ်ႉၽၵ်းၵႃ ၼႂ်း ၸႄႈဝဵင်းၵူတ်ႉၶၢႆသေ ႁဵတ်းႁႂ်ႈၵူၼ်းဝၢၼ်ႈၸၢႆး 3 ၵေႃႉတၢႆလႄႈၵူၼ်းဝၢၼ်ႈထႅင်ႈ 3 ၵေႃႉမၢတ်ႇၸဵပ်း။ သိုၵ်း မၢၼ်ႈယင်းဢဝ်ၶိူင်ႈမိၼ်ၶဝ်ၵႂႃႇပွႆႇမၢၵ်ႇဢိူင်ႇမိူင်းၸီးလႄႈဢိူင်ႇတႃႈမိူင်းငႅၼ်း ၼႂ်းၵူတ်ႉၶၢႆၼႃႈတၢင်း ဢွၵ်ႇ တီႈဢၼ်ၸုမ်းသိုၵ်းဢူၺ်းလီသၢမ်ပီႈၼွင်ႉၶဝ် တိုၵ်းၸုမ်းပျီႇတုၸိတ်ႉယူႇၼၼ်ႉသေ ႁဵတ်းႁႂ်ႈၵူၼ်း ဝၢၼ်ႈ 5,000 လႆႈပိုၼ်ႉပွႆႇပႅတ်ႈႁိူၼ်းယေးတူဝ်ၵဝ်ႇသေ ပၢႆႈသေႃႉႁူမ်ႈၼႂ်းထိူၼ်ႇၶိူဝ်းလႄႈ ဝတ်ႉဝႃးတီႈၵိူဝ်းယမ်ဢၼ်ယူႇႁိမ်းႁွမ်း။
မိူဝ်ႈဝၼ်းထိ 12/11/2023 ၼၼ်ႉၵေႃႉ ပဵၵ်ႉသမ်ႉၼႂ်းပိုၼ်ႉတီႈဢမ်ႇမီးပၢင်တိုၵ်းသင်သေတႃႉ သိုၵ်းမၢၼ်ႈ ၶလယ 123 ဢၼ်ပၵ်းတီႈၼမ်ႉၽၵ်းၵႃ ၼၼ်ႉဢဝ်ၵွင်ႈလူင်ၶဝ်ယိုဝ်းလူင်ၵႂႃႇၵႃႈဝႃႈ ၵႃႈပဵၼ်ၸွမ်းသၢႆ သဵၼ်ႈတၢင်းလူင် မူႇၸေႈ-သႅၼ်ဝီ။ မၢၵ်ႇလူင်ၵႂႃႇတူၵ်းၼႂ်းဝၢၼ်ႈမေႃႇႁိတ်ႈသေ ႁဵတ်းႁႂ်ႈၵူၼ်းဝၢၼ်ႈ 2 ၵေႃႉ တၢႆ။
မိူဝ်ႈဝၼ်းထိ 13/11/2023 ဝၢႆးသိုၵ်းမၢၼ်ႈလႄႈသိုၵ်းၶၢင်ပဵၼ်ပၢင်တိုၵ်းၵၼ်တီႈဝၢၼ်ႈတၢၵ်ႇၼၢႆး/တၵ်ႉၵၼၢႆး ဢၼ်ယူႇတၢင်းဢွၵ်ႇသေႁၢင်ႇၵႆၼမ်ႉၽၵ်းၵႃ 20 ၵီႊလူဝ်ႊမႄႊတိူဝ်ႊ ၼၼ်ႉဝၼ်းၼိုင်ႈ သိုၵ်းမၢၼ်ႈဢဝ် ဢဝ်ၶိူင်ႈမိၼ်တိုၵ်းပွႆႇမၢၵ်ႇလူင်းတီႈဝၢၼ်ႈတၢၵ်ႇၼၢႆးသေ ႁဵတ်းႁႂ်ႈၵူၼ်းဝၢၼ်ႈမၢတ်ႇၸဵပ်းၵေႃႉၼိုင်ႈလႄႈ ႁိူၼ်းယေးလုၵွႆလၢႆလၢႆလင်။
ၼႂ်းၵႄႈဝၼ်းထိ 18/11/2023 ထိုင် 10/12/2023 ၼၼ်ႉသိုၵ်းမၢၼ်ႈတီႈၵူတ်ႉၶၢႆလႄႈၼမ်ႉၽၵ်းၵႃ ယူႇတီႈ တပ်ႉၶဝ်သေသိုပ်ႇဢဝ်ၵွင်ႈလူင်လႄႈဢဝ်ၶိူင်ႈမိၼ်တိုၵ်းပွႆႇမၢၵ်ႇလူင်းၼႂ်းဝဵင်းၵူတ်ႉၶၢႆလႄႈဝၢၼ်ႈ ဢၼ်ယူႇ ၸွမ်းသၢႆသဵၼ်ႈတၢင်းလူင် သႅၼ်ဝီ-မူႇၸေႈ၊ ႁဵတ်းႁႂ်ႈၵူၼ်းမိူင်း 6 ၵေႃႉတၢႆယဝ်ႉမၢတ်ႇၸဵပ်း 15 ၵေႃႉ ပႃးလုၵ်ႈ ဢွၼ်ႇ 5 ၵေႃႉဢၼ်ယူႇတီႈႁူင်းသဝ်း/ပေႃႇတႃႇသွင်ႇ) ၼႂ်းၼမ်ႉၽၵ်းၵႃ။
လိူဝ်ၼၼ်ႉသိုၵ်းမၢၼ်ႈဢၼ်ယူႇၼႂ်းဝဵင်းၵူတ်ႉၶၢႆ တင်ႈၸႂ်ႈယိုဝ်းၵူၼ်းမိူင်း 2 ၵေႃႉတၢႆသေ ၵူၼ်းမိူင်းထႅင်ႈ သွင် ၵေႃႉဢၼ်ပႆၼိူဝ်သဵၼ်ႈတၢင်းၽွင်းဝၼ်းထိ 15-19/12/2023 ၵေႃႈၺႃးမၢတ်ႇၸဵပ်း။
မိူဝ်ႈဝၼ်းထိ 20/12/2023 ၼၼ်ႉ သိုၵ်းမၢၼ်ႈလႄႈသိုၵ်းတဢၢင်း/ပလွင်ႈပဵၼ်ပၢင်တိုၵ်းၵၼ် ႁၢဝ်ႉႁႅင်း ၼႂ်း ဝဵင်ၵူတ်ႉၶၢႆ။ ၼႂ်းၵႄႈဝၼ်းထိ 20/12/2023 ထိုင်ဝၼ်းထိ 3/1/2024 သမ်ႉယွၼ်ႉသိုၵ်းမၢၼ်ႈဢဝ်ၵွင်ႈလူင် လႄႈၶိူင်ႈမိၼ်တိုၵ်းပွႆႇမၢၵ်ႇလူင်းၼႂ်းဝဵင်းလႄႈဝၢၼ်ႈၸိူဝ်းယူႇႁွပ်ႈဝဵင်းသေ ၵူၼ်းမိူင်း 6 ၵေႃႉတၢႆ မၢတ်ႇ ၸဵပ်းထႅင်ႈ 10 ၵေႃႉ။ ဝၼ်းထိ 7/1/2024 သိုၵ်းပလွင်ႈၶဝ်ႈယိုတ်းၵုမ်းၵမ်ဝဵင်းၵူတ်ႉၶၢႆသေ ဝၼ်းၼၼ်ႉ ၵူၺ်း ၼင်ႇၵဝ်ႇ သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇႁဵတ်းႁႂ်ႈႁိူၼ်းၵူၼ်းမိူင်းၼႂ်းဝဵင်းၵူတ်ႉၶၢႆ 15 လင်လုၵွႆ။
ၼႂ်းၶၢဝ်းယၢမ်းလဵဝ်ၵၼ် ပၢင်တိုၵ်းသိုၵ်းမၢၼ်ႈလႄႈသိုၵ်းၶၢင် ပဵၼ်ထႅင်ႈၼႂ်းဢိူင်ႇၼမ်ႉၽၵ်းၵႃမိူဝ်ႈဝၼ်းထိ 29/12/2023။ ဝၢႆးၼၼ်ႉထႅင်ႈမွၵ်ႈလိူၼ်ၼိုင်ႈ သိုၵ်းၶၢင်ၶဝ်ႈႁုပ်ႈယိုတ်းလႆႈတပ်ႉမၢၼ်ႈၶလယ 123 မိူဝ်ႈဝၼ်း ထိ 24/1/2024 သေ ၵုမ်းၵမ်ဝႆႉၼမ်ႉၽၵ်းၵႃ။ ၽွင်းပဵၼ်ပၢင်တိုၵ်းယူႇၼၼ်ႉ သိုၵ်းမၢၼ်ႈၵမ်းၵမ်း ဢဝ်ၶိူင်ႈ မိၼ် မႃးပွႆႇမၢၵ်ႇ တီႈၼမ်ႉၽၵ်းၵႃ သေႁဵတ်းႁႂ်ႈၵူၼ်းဝၢၼ်ႈၼႂ်းထုင်ႉဢိူင်ႇၼမ်ႉၽၵ်းၵႃမွၵ်ႈ 2,000 လႆႈဢွၼ် ၵၼ်ပွႆႇပႅတ်ႈႁိူၼ်းယေးသေပၢႆႈၽေးသိုၵ်းသိူဝ်။ ယွၼ်ႉသိုၵ်းမၢၼ်ႈတတ်းၶၢတ်ႇပႅတ်ႈ လွင်ႈၵပ်းသိုပ်ႇ ၵပ်း သၢၼ် လႄႈ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး ဢမ်ႇၸၢင်ႈယိုၼ်ယၼ်လႆႈလွင်ႈတုမ်ႉတိူဝ်ႉ ဢၼ် သိုၵ်း မၢၼ်ႈဢဝ်ၶိူင်ႈမိၼ်တိုၵ်းမႃးပွႆႇမၢၵ်ႇၼႂ်းၼမ်ႉၽၵ်းၵႃ၊ ၵူၺ်းၵႃႈ ၵူၼ်းမိူင်ၼႂ်းပိုၼ်ႉတီႈ ၸွႆႈပၼ်ၶေႃႈ မုၼ်း ၶၢဝ်ႇသၢၼ်လွင်ႈၵူၼ်းမိူင်းမွၵ်ႈ 30 ၵေႃႉလႆႈလုတၢႆလႄႈၵူၼ်းမိူင်း 20 လႆႈမၢတ်ႇၸဵပ်းသေ ႁိူၼ်းၵူၼ်း ဝၢၼ်ႈ မွၵ်ႈ 500 လင်လႆႈလုၵွႆ ပႃး ၸဵမ်လွင်ႈႁိူၼ်းၵူၼ်းဝၢၼ်ႈတီႈဢေႇသုတ်း မၼ်း 25 လင်ၺႃး ၾႆးမႆႈ ပဵၼ်ၽဝ်ႇ ၼၼ်ႉပၼ်။
| ၵူၼ်းမိူင်းလုတၢႆ၊ မၢတ်ႇၸဵပ်းလႄႈၶူဝ်းၶွင်ႁိူၼ်းယေးလုၵွႆ ယွၼ်ႉသိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇ မၢၵ်ႇလူင်း လႄႈယိုဝ်းၵွင်ႈလူင်ၵွင်ႈဢွၼ်ႇ ၼႂ်းၸႄႈဝဵင်းၵူတ်ႉၶၢႆ ဝၼ်းထိ 27/10/2023 ထိုင်ဝၼ်းထိ 7/1/2024 | |||||||
| ၶပ်ႉမၢႆ | ဝၼ်းထိ | ဝၢၼ်ႈ/ ပွၵ်ႉ | ႁူဝ်ယွႆႈ | ၵူၼ်းမိူင်းလုတၢႆ | ၵူၼ်းမိူင်း မၢတ်ႇၸဵပ်း | ၶူဝ်းၶွင်ၵူၼ်း မိူင်းလုသုမ်း | |
| 1 | 27.10.2023 | ဝၢၼ်ႈၼမ်ႉၽၵ်းၵႃ | သိုၵ်းမၢၼ်ႈၶလယ 123 ယူႇတီႈတပ်ႉ ၶဝ် သေဢဝ်ၵွင်ႈ လူင်ယိုဝ်း ၶၢဝ်း ယၢမ်း ၵၢင် 5 မူင်း မၢၵ်ႇလူင်တူၵ်းၼႂ်းဝၢၼ်ႈ | ယိင်း 2 ၵေႃႉ (ဢႃ ယု 33 လႄႈ 7) | ၸၢႆး 3 ၵေႃႉ လႄႈ ယိင်း 2 ၵေႃႉ | ႁိူၼ်းၵူၼ်း မိူင်း 5 လင် လုၵွႆ | |
| 2 | 30.10.2023 | ဝၢၼ်ႈၼမ်ႉၽၵ်းၵႃ | မၢၵ်ႇလူင်သိုၵ်းမၢၼ်ႈဢၼ်ယိုဝ်းမိူဝ်ႈၶၢဝ်းယၢမ်း 5 မူင်း ႁူဝ် ၶမ်ႈ တူၵ်းသႂ်ႇ လၢၼ်ႉ/သႅင်ႇၶၢႆပူႉ | ၸၢႆး 2 ၵေႃႉ (ဢႃ ယု 18 လႄႈ 20) တင်းယိင်း 1 ၵေႃႉ (ဢႃယုမွၵ်ႈ 20) | လၢၼ်ႉ/သႅင်ႇၶၢႆပူႉဢၼ် 1 ၵွႆ | ||
| 3 | 1.11.2023 | ဝၢၼ်ႈယီႇယၼ်ႇ | မၢၵ်ႇလူင်သိုၵ်းမၢၼ်ႈၶလယ 123 ယိုဝ်းမိူဝ်ႈၶၢဝ်း ယၢမ်း 3:35 တူၵ်း သႂ်ႇ ႁိူၼ်းလင်ၼိုင်ႈ | ယိင်း 1 ၵေႃႉ (ဢႃယု 66) | ႁိူၼ်း 1 လင် | ||
| 4 | 2.11.2023 | ဝၢၼ်ႈၵႃလႅင် | မၢၵ်ႇဢၼ်သိုၵ်းမၢၼ်ႈယူႇၼိူဝ်ၶိူင်ႈမိၼ် ပွႆႇမိူဝ်ႈၶၢဝ်း ယၢမ်း 2 မူင်းဝၢႆး ဝၼ်းလူင်းတူၵ်းသႂ်ႇ ၼႂ်းဝၢၼ်ႈလႄႈ သူၼ်ႁႆႈ ႁိမ်းဝၢၼ်ႈ | ယိင်း 1 ၵေႃႉ (ဢႃယု 50) | ႁိူၼ် 3 လင် | ||
| 5 | 5.11.2023 | မၢၼ်ႈၵၢတ်ႇ | မၢၵ်ႇလူင်သိုၵ်းမၢၼ်ႈ ဢၼ်ယူႇ တီႈ ပၢပ်ႉ ၼမ်ႉမၼ်း ၼမ်ႉၽၵ်းၵႃသေ ယိုဝ်း | ယိင်း 2 ၵေႃႉ (ဢႃယု 80 လႄႈ 39) ၸၢႆး 1 ၵေႃႉ (ဢႃယု 10 လိူၼ်) | ႁိူၼ်း 1 လင် | ||
| 6 | 6.11.2023 | ဝၢၼ်ႈႁူဝ်ၶူဝ် | သိုၵ်းမၢၼ်ႈ ၶလယ 123 ဢၼ်ပၵ်း တီႈၼမ်ႉ ၽၵ်းၵႃ ဢဝ်ၵွင်ႈ လူင်ၶဝ် ယိုဝ်းၶဝ်ႈ ၼႂ်းဝၢၼ်ႈ ပဵၵ်ႉသမ်ႉ ဢမ်ႇမီး ပၢင်တိုၵ်း သင်။ မၢၵ်ႇလူင်လုၵ်ႈၼိုင်ႈတူၵ်းႁိမ်းသူၼ်ႁႆႈၶၢဝ်းယၢမ်း 1 မူင်းဝၢႆးဝၼ်းသေ ထဝ်ႈၸၢႆးၵေႃႉၼိုင်ႈတၢႆ | ၸၢႆး 1 ၵေႃႉ (ဢႃယု 60) | |||
| 7 | 12.11.2023 | ဝၢၼ်ႈမေႃႇႁိတ်ႈ | မၢတ်ႇၸဵပ်းယွၼ်ႉၸၢၵ်ႇမၢၵ်ႇလူင် သိုၵ်းမၢၼ်ႈဢၼ် ယိုဝ်းၶဝ်ႈဝၢၼ်ႈ ပဵၵ်ႉသမ်ႉဢမ်ႇမီး ပၢင်တိုၵ်းၼႂ်းပိုၼ်ႉ တီႈ | ၸၢႆး 1 ၵေႃႉ (ဢႃယု 35) လႄႈ ယိင်း 1 ၵေႃႉ (ဢႃယု 36) | |||
| 8 | 13.11.2023 | ဝၢၼ်ႈတၢၵ်ႇၼၢႆး | သိုၵ်းမၢၼ်ႈဢဝ် ၶိူင်ႈမိၼ် မႅင်းမီႈ ပွႆႇမၢၵ်ႇလူင်း ယၢမ်း ၵၢင်ၼႂ်ၸဝ်ႉ | ၸၢႆး 1 ၵေႃႉ (ဢႃယု မွၵ်ႈ 40) | ႁိူၼ်း 3 လင် | ||
| 9 | 18.11.2023 | ဝၢၼ်ႈၶူဝ်မုင်း | သိုၵ်းမၢၼ်ႈ ၶလယ 123 ၼမ်ႉၽၵ်း ၵႃ ဢဝ်မၢၵ်ႇလူင် ယိုဝ်းၶဝ်ႈၼႂ်းဝၢၼ်ႈၶၢဝ်းယၢမ်းမွၵ်ႈ 9 မူင်းၵၢင်ၶမ်ႈ၊ ဢမ်ႇမီးပၢင်တိုၵ်း သင် | ယိင်း 1 ၵေႃႉ (ဢႃယု 80) | ႁိူၼ်း 1 လင် | ||
| 10 | 29.11.2023 | ဝၢၼ်ႈတူင်ႈသိမ်ႇလူင် ဢိူင်ႇႁူဝ်ၼွင် | သိုၵ်းမၢၼ်ႈဢဝ် ၵွင်ႈ လူင်ယိုဝ်း ၶဝ်ႈ ဝၢၼ်ႈတိူဝ်ႉၺႃး ႁိူၼ်း 1 လင် | ၸၢႆး 1 ၵေႃႉ (ဢႃယု 35), ယိင်း 2 ၵေႃႉ (ဢႃယု 32 လႄႈ 7) | ၸၢႆး 1 ၵေႃႉ (ဢႃယု 2) | ႁိူၼ်း 1 လင် | |
| 11 | 30.11.203 | ၼမ်ႉၽၵ်းၵႃ၊ ပွၵ်ႉ 1 | သိုၵ်းမၢၼ်ႈၶလယ 123 ၼမ်ႉၽၵ်း ၵႃ ဢဝ်ၵွင်ႈလူင် ယိုဝ်းၶဝ်ႈၼႂ်းဝၢၼ်ႈ လႄႈတိူဝ်ႉၺႃးႁူင်းသဝ်းလုၵ်ႈႁဵၼ်း လင် 1 | ၸၢႆး 4 ၵေႃႉ (ဢႃယု 11, 12, 13 လႄႈ 14) ယိင်း 1 ၵေႃႉ (ဢႃယု 12) | ႁိူၼ်း 2 လင် | ||
| 12 | 5.12.2023 | ၵိင်ႇၸႄႈဝဵင်း တႃႈမိူင်းငႅၼ်း | သိုၵ်းမၢၼ်ႈဢဝ် ၶိူင်ႈမိၼ်တိုၵ်းပွႆႇ | ၸၢႆး 1 ၵေႃႉ (ဢႃယုမွၵ်ႈ 40) | ယိင်း 1 ၵေႃႉ | ႁိူၼ်း 5 လင် | |
| 13 | 10.12.2023 | ၵၢင်ဝဵင်းၵူတ်ႉၶၢႆ | သိုၵ်းမၢၼ်ႈဢဝ် ၶိူင်ႈမိၼ်တိုၵ်းပွႆႇ | ၸၢႆး 1 ၵေႃႉ (ဢႃယု 10) | ၸၢႆး 1 ၵေႃႉ လႄႈ ယိင်း 2 ၵေႃႉ | ႁိူၼ်း 4 လင် | |
| 14 | 10.12.2023 | ဝၢၼ်ႈလွႆသႅင် | မၢၵ်ႇလူင်သိုၵ်းမၢၼ်ႈ တူၵ်းလူင်း ၼႂ်းပၢင် သဝ်းၵူၼ်း ပၢႆႈၽေးၼႂ်းဝတ်ႉ/ၵျွင်း ၶၢဝ်းယၢမ်း မွၵ်ႈ 10 မူင်းၵၢင်ၼႂ် | ၸၢႆး 1 ၵေႃႉယိင်း 1 ၵေႃႉ | |||
| 15 | 10.12.2023 | ဝၢၼ်ႈမၢၼ်ႈမၢဝ်း၊ ၼမ်ႉၽၵ်းၵႃ | မၢၵ်ႇလူင်သိုၵ်း မၢၼ်ႈ ၶလယ 123 တပ်ႉၼမ်ႉ ၽၵ်းၵႃ | ၸၢႆး 3 ၵေႃႉ | ႁိူၼ်း 3 လင် | ||
| 16 | 15.12.2023 | ပွၵ်ႉ 2, ဝဵင်းၵူတ်ႉၶၢႆ | သိုၵ်းမၢၼ်ႈဢဝ် ၵွင်ႈ ယိုဝ်းၵူၼ်းပၢႆႈ ၽေး2 ဢၼ်ပွၵ်ႈ ၶိုၼ်း ႁိူၼ်းတၢႆ ၽွင်းၶၢဝ်း ယၢမ်း 9 မူင်းၵၢင် ၶမ်ႈ | ၸၢႆး 2 ၵေႃႉ (ဢႃယုမွၵ်ႈ 30) | |||
| 17 | 19.12.2023 | ပွၵ်ႉ 2, ဝဵင်းၵူတ်ႉၶၢႆ | သိုၵ်းမၢၼ်ႈယိုဝ်း ၵူၼ်းမိူင်း ဢၼ်ပႆ ၼိူဝ် သဵၼ်ႈတၢင်း | ၸၢႆး 2 ၵေႃႉ (ဢႃယုမွၵ်ႈ 25) | |||
| 18 | 20.12.2023 | ဝၢၼ်ႈႁူဝ်ၸၢင်ႉ | ၺႃးၸၢၵ်ႇမၢၵ်ႇလူင် သိုၵ်းမၢၼ်ႈ ဢၼ် တူၵ်းၼႂ်းဝၢၼ်ႈ | ၸၢႆး 1 ၵေႃႉ (ဢႃယု 55) | |||
| 19 | 21.12.2023 | ဝၢၼ်ႈလွႆပျီႉသုသီး | သိုၵ်းမၢၼ်ႈဢဝ် ၶိူင်ႈမိၼ်တိုၵ်းပွႆႇ | ၸၢႆး 1 ၵေႃႉ (ဢႃယု 25) | ယိင်း 1 ၵေႃႉ (ဢႃယု 24) | ႁိူၼ်း 4 လင် | |
| 20 | 1.1.2024 | ဝၢၼ်ႈႁူၺ်ႈၶူၵ်ႉ | သိုၵ်းမၢၼ်ႈ ဢဝ် ၶိူင်ႈ မိၼ်တိုၵ်း ပွႆႇမၢၵ်ႇသႂ်ႇဝၢၼ်ႈ | ၸၢႆး 1 ၵေႃႉ | ယိင်း 4 ၵေႃႉ | ႁိူၼ်း 1 လင် | |
| 21 | 2.1.2024 | ဝၢၼ်ႈႁူဝ်ၼွင် | သိုၵ်းမၢၼ်ႈၵူတ်ႉၶၢႆ ဢဝ်မၢၵ်ႇလူင်ယိုဝ်း ၶဝ်ႈဝၢၼ်ႈၵူႈႁူးၵူႈတၢင်း | ယိင်း 2 ၵေႃႉလႄႈၸၢႆး 1 ၵေႃႉ | ႁိူၼ်း 3 လင် | ||
| 21 | 2.1.2024 | ဝၢၼ်ႈႁူဝ်ဢိုတ်ႈ | ၼၢင်းယိင်းၵေႃႉ ၼိုင်ႈ ဢၼ်ပၢႆႈ ၽေး ပၢင်တိုၵ်းသေ သွၼ်ႈတူဝ်ဝႆႉၼႂ်းသူၼ်ႁႆႈၼၼ်ႉ တိူဝ်ႉၺႃးၸၢၵ်ႇ မၢၵ်ႇဢၼ်သိုၵ်း မၢၼ်ႈယူႇၼိူဝ် ၶိူင်ႈ မိၼ်သေ ပွႆႇလူင်း ၽွင်းၶၢဝ်း ယၢမ်း 10 မူင်းၵၢင်ၼႂ် | ယိင်း 1 ၵေႃႉ | |||
| 22 | 2.1.2024 | ပွၵ်ႉ 5, ဝဵင်းၵူတ်ႉၶၢႆ | သိုၵ်းမၢၼ်ႈဢဝ် ၶိူင်ႈမိၼ်တိုၵ်းပွႆႇ | ၸၢႆး 2 ၵေႃႉ (ဢႃယု မွၵ်ႈ 50 လႄႈ 30) | ႁိူၼ်း 8 လင် | ||
| 23 | 3.1.2024 | ပွၵ်ႉ 8 ဝဵင်းၵူတ်ႉၶၢႆ | ၺႃးၸၢၵ်ႇမၢၵ်ႇ ဢၼ်သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း ပွႆႇလူင်းယၢမ်း 11 မူင်းၵၢင်ၼႂ် | ၸၢႆး 2 ၵေႃႉ (ဢႃယု 22 လႄႈ 29) | ႁိူၼ်း 2 လင် | ||
| 24 | 7.1.2024 | ဝဵင်းၵူတ်ႉၶၢႆ | သိုၵ်းမၢၼ်ႈဢဝ် ၶိူင်ႈမိၼ်တိုၵ်းပွႆႇ | ႁိူၼ်း 15 လင် | |||
| ႁူမ်ႈ | တၢႆ 23 ၵေႃႉ | မၢတ်ႇၸဵပ်း 37 ၵေႃႉ | ႁိူၼ်း/တိုၵ်း 63 လင်လုၵွႆ | ||||
| လွင်ႈၵူၼ်းမိူင်းလုသုမ်း/မၢတ်ႇၸဵပ်းယွၼ်ႉမၢၵ်ႇၾင်လိၼ် ၼႂ်းၸႄႈဝဵင်းၵူတ်ႉၶၢႆ ဝၼ်းထိ22-24/12/2023 | |||||
| ၶပ်ႉမၢႆ | ဝၼ်းထိ | ဝၢၼ်ႈ/ ပွၵ်ႉ | ႁူဝ်ယွႆႈ | ၵူၼ်းမိူင်းလုတၢႆ | ၵူၼ်းမိူင်း မၢတ်ႇၸဵပ်း |
| 1 | 10.11.2023 | မၢၼ်ႈၼွင်ရၢၼ်ႊ ဢိူင်ႇၼမ်ႉၽၵ်းၵႃ | ၵႂႃႇၽႃႇၺႃးၸိူၵ်ႈမၢၵ်ႇ ဢၼ်ႁၢင်ႈဝႆႉ ၽွင်း ၵႂႃႇ တီႈႁေႃၸဝ်ႈ မိူင်း | ၸၢႆး 1 ၵေႃႉ (ဢႃယု 36) | |
| 2
|
22.12.2023 | ဝၢၼ်ႈမၢၼ်ႈထၢၼ် | ယဵပ်ႇၺႃးမၢၵ်ႇၾင်လိၼ် ၽွင်းၵႂႃႇႁႃၽိုၼ်း | ၸၢႆး 1 ၵေႃႉ (ဢႃယု 30) | |
| 3 | 24.12.2023 | ဝၢၼ်ႈပၢင်ႇၸေႈ | ယဵပ်ႇၺႃးမၢၵ်ႇသိုၵ်းမၢၼ်ႈ ဢၼ်ၾင်လိၼ်ဝႆႉ ၶၢဝ်း ယၢမ်း 5 မူင်းၵၢင်ၼႂ် ႁိမ်းတၢင်းၶဝ်ႈဝၢၼ်ႈ | ၸၢႆး 1 ၵေႃႉ (ဢႃယု 18) | |
| ႁူမ်ႈ | မၢတ်ႇၸဵပ်း 3 ၵေႃႉ | ||||
ႁူဝ်ယွႆႈလွင်ႈသိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇ၊ ဢဝ်ၵွင်ႈလူင်လႄႈၵွင်ႈဢွၼ်ႇယိုဝ်း ႁဵတ်းႁႂ်ႈၵူၼ်းမိူင်း မီးလွင်ႈ လုတၢႆ/မၢတ်ႇၸဵပ်း/သုမ်းၶူဝ်းၶွင် ၼႂ်းၸႄႈဝဵင်းသႅၼ်ဝီ ၽွင်းပၢင်တိုၵ်း 1027
ဝဵင်းသႅၼ်ဝီၼႆႉ ပဵၼ်ဝဵင်းတၢင်းၶွႆႈသဵၼ်ႈတၢင်းလူင်ၼႂ်းၵၢၼ်တေႃႉသူင်ႇၸူးလႅၼ်လိၼ်ၶႄႇ၊ ၵွပ်ႈၼၼ် ၸင်ႇ ပဵၼ်ပဝ်ႉမၢႆလမ်ႇလွင်ႈဢၼ်ၼိုင်ႈတႃႇၸုမ်းဢူၺ်းလီသၢမ်ပီႈၼွင်ႉလႄႈၸုမ်းၵႅတ်ႇၶႄၵူၼ်းမိူင်း PDF ၶဝ် တင်ႈ တႄႇပိုတ်ႇပၢင်တိုၵ်း 1027 ယဝ်ႉ။ ပၢင်တိုၵ်းဢၼ်ၵိူတ်ႇၶိုၼ်ႈႁၢဝ်ႉႁႅင်းၼႂ်းဝဵင်းသႅၼ်ဝီ မိူဝ်ႈဝၼ်းထိ 27/10/2023 ၼၼ်ႉႁဵတ်းႁႂ်ႈၵူၼ်းမိူင်းတင်းၼမ်လႆႈဢွၼ်ၵၼ်ပၢႆႈၽေးသိုၵ်းပိုင်ႈႁူမ်ႈၸွမ်းဝတ်ႉ/ၵျွင်းၼႂ်း ပိုၼ်ႉ တီႈသေ သိုၵ်းမၢၼ်ႈတီႈတပ်ႉငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း ၸၵၶ 16 ဢၼ်ပၵ်းဝႆႉ တၢင်း ၸၢၼ်းမႄႈၼမ်ႉတူႈၼၼ်ႉ ၸင်ႇတႄႇဢဝ်ၵွင်ႈလူင်ၶဝ်ယိုဝ်းၶဝ်ႈၼႂ်းဝဵင်းလႄႈဝၢၼ်ႈ ၵူၼ်းၸိူဝ်းယူႇ ႁိမ်း ႁွမ်းပႃးၸဵမ် ဝၢၼ်ႈၵွင်းႁေႃ တီႈဢၼ်ၵူၼ်းပၢႆႈၽေးၶဝ်ၵႂႃႇပိုင်ႈႁူမ်ႈဝႆႉတီႈဝတ်ႉ/ၵျွင်းၶမ်း ၼၼ်ႉယဝ်ႉ။ ဝၼ်း ထိ 28/10/2023 ၼၼ်ႉၵူၺ်း သိုၵ်းမၢၼ်ႈဢဝ်ၵွင်ႈလူင်ယိုဝ်းလႄႈႁဵတ်းႁႂ်ႈႁိူၼ်းၵူၼ်းဝၢၼ်ႈၵူၼ်းမိူင်း 50 လင်ပၢႆလုၵွႆ၊ ၵူၼ်းမိူင်းတၢႆ 1 ၵေႃႉမၢတ်ႇၸဵပ်း 2 ၵေႃႉ။
ဝၼ်းထိ 29/10/2023 ၸုမ်းဢူၺ်းလီ သၢမ်ပီႈၼွင်ႉၶဝ် ၶဝ်ႈယိုတ်းလႆႈဝဵင်းသႅၼ်ဝီ၊ ၵူၺ်းၵႃႈပႆႇပႃးတပ်ႉ မၢၼ်ႈဢၼ်ပၵ်းဝႆႉတၢင်းၸၢၼ်းဝဵင်း ပႃးၸဵမ်ၸၵၶ 16။ ဝၢႆးၼၼ်ႉသိုၵ်းမၢၼ်ႈဢဝ်မၢၵ်ႇလူင်လႄႈၶိူင်ႈမိၼ် မႅင်းမီႈ ယိုဝ်းလူင်းၸူးၼႂ်းဝဵင်းလႄႈဝၢၼ်ႈဢၼ်မီးၸွမ်းႁိမ်းႁွမ်းသေ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ လႆႈပၢႆႈ ၽေး တင်းၼမ်။ ၶမ်ႈၼၼ်ႉ မၢၵ်ႇလူင်သိုၵ်းမၢၼ်ႈတီႈတပ်ႉ ၸၵၶ 16 မႃးတူၵ်းၼႂ်းဝၢၼ်ႈၶူးဝဵင်း လႄႈဝၢၼ်ႈ တႅင်ႇယႅတ်ႈ ဢၼ်မီးတၢင်းၸၢၼ်းဝဵင်းသေ ႁဵတ်းႁႂ်ႈၾႆးလုၵ်ႉမႆႈႁိူၼ်းၵူၼ်းဝၢၼ်ႈမွၵ်ႈ 20 လင် ပဵၼ်ၽဝ်ႇ ယူႇယဝ်ႉ။
ၽွင်းၸိူင်ႉၼၼ် သိုၵ်းမၢၼ်ႈၸင်ႇတႄႇဢဝ်ၵူၼ်းပၢႆႈၽေးမွၵ်ႈ 3,000 ၵေႃႉဢၼ်ပိုင်ႈႁူမ်ႈဝႆႉယူႇတီႈဝတ်ႉ ၵျွင်းၶမ်း ၼႂ်းဝၢၼ်ႈၵွင်းႁေႃ တေႃႇၼႃႈတပ်ႉၸၵၶ 16 ၶဝ်ၼၼ်ႉ ပဵၼ်ႁူဝ်ႉၶႄတူဝ်–ဢမ်ႇပၼ်ၵူၼ်းပၢႆႈၽေး ဢွၵ်ႇၵႂႃႇတၢင်းလႂ်၊ ၸႅတ်ႈတူၺ်းၼႂ်းၾူၼ်းၵူၼ်းပၢႆႈၽေးၶဝ်လႄႈ ဢမ်ႇပၼ်ၸုမ်းၸွႆႈထႅမ်ၶဝ်ႈၼမ်ႉတၢင်း ၵိၼ်ၶဝ်ႈၸူးပၢင်သဝ်းၵူၼ်းပၢႆႈၽေး။ လွင်ႈၼႆႉ ပဵၵ်ႉသမ်ႉ မၢၵ်ႇလူင်သိုၵ်းမၢၼ်ႈ ၸၵၶ 16 ဢၼ်ယိုဝ်း လူင်ၵႂႃႇၵူႈႁူးၵူႈတၢင်းၼၼ်ႉမႃးတူၵ်းၼႂ်းဝၢၼ်ႈၵွင်းႁေႃၵမ်းသိုဝ်ႈယူႇသေတႃႉၵေႃႈယဝ်ႉ။ ၼႂ်းၵႄႈဝၼ်းထိ 28 ထိုင် 31 လိူၼ်ဢွၵ်ႊထူဝ်ႊပိူဝ်ႊ ၵူၼ်းပၢႆႈၽေးၺႃးၸၢၵ်ႇမၢၵ်ႇလူင်သိုၵ်းမၢၼ်ႈ ဢၼ်ယိုဝ်းမႃးတူၵ်းၼႂ်း ပၢင်သဝ်းၵူၼ်းပၢႆႈၽေးၵျွင်းၶမ်းၼၼ်ႉသေ လႆႈတၢႆ 3 ၵေႃႉ။ ၵေႃႉၼိုင်ႈတၢႆ ယွၼ်ႉလိူတ်ႈဢွၵ်ႇၼမ်ပူၼ်ႉ လႄႈဢမ်ႇတၼ်းလႆႈယူတ်းယႃၶိုတ်းတၼ်း။
တင်ႈတႄႇလိူၼ်ဢွၵ်ႊထူဝ်ႊပိူဝ်ႊသဵင်ႈထိုင် ဝူင်ႈထူၼ်ႈၼိုင်ႈလိူၼ်ၸၼ်ႊၼႃႊဝႃႊရီႊ 2024 သိုၵ်းမၢၼ်ႈ သိုပ်ႇဢဝ်ၵွင်ႈလူင်ယိုဝ်းလူင်ၵႂႃႇၵူႈႁူးၵူႈတၢင်းလႄႈဢဝ်ၶိူင်ႈမိၼ်ပွႆႇမၢၵ်ႇလူင်းၼႂ်းဝဵင်းပႃးၸဵမ်ဝၢၼ်ႈႁိမ်း ႁွမ်း။ ဝၼ်းထိ 7/1/2024 မႃးၸုမ်းဢူၺ်းလီသၢမ်ပီႈၼွင်ႉၸင်ႇႁုပ်ႈယိုတ်းလႆႈတပ်ႉမၢၼ်ႈၸၵၶ 16 လႄႈ လၢႆလၢႆတပ်ႉၸိူဝ်းမီးတၢင်းၸၢၼ်းဝဵင်းသႅၼ်ဝီၼၼ်ႉ။
ႁူဝ်ၼပ်ႉၵူၼ်းမိူင်းၸိူဝ်းၺႃးလုတၢႆ မၢတ်ႇၸဵပ်း ယွၼ်ႉသိုၵ်းမၢၼ်ႈပိုတ်ႇတိုၵ်းၼႂ်းၸႄႈဝဵင်းသႅၼ်ဝီ ၽွင်း ပၢင်တိုၵ်း 1027 ၼၼ်ႉ ၵူၼ်းမိူင်းတၢႆ 17 ၵေႃႉ၊ မၢတ်ႇၸဵပ်း 27 လႄႈႁိူၼ်း/တိုၵ်းလုၵွႆ 165 လင်ပၢႆ။
| ၵူၼ်းမိူင်းလုတၢႆ မၢတ်ႇၸဵပ်း ၶူဝ်းၶွင်ႁိူၼ်းယေးလုၵွႆ ယွၼ်ႉသိုၵ်းမၢၼ်ႈ ဢဝ်ၶိူင်ႈမိၼ်တိုၵ်းပွႆႇမၢၵ်ႇ၊ ဢဝ်မၢၵ်ႇလူင်လႄႈၵွင်ႈယိုဝ်း ၼႂ်းၸႄႈဝဵင်းသႅၼ်ဝီ ဝၼ်းထိ 28/10/2023 ထိုင် 3/1/2024 | |||||||
| ၶပ်ႉမၢႆ | ဝၼ်းထိ | ဝၢၼ်ႈ/ပွၵ်ႉ | ႁူဝ်ယွႆႈ | ၵူၼ်းမိူင်းတၢႆ | ၵူၼ်းမိူင်း မၢတ်ႇၸဵပ်း | ၶူဝ်းၶွင်လု သုမ်း/ၵွႆ | |
| 1 | 28.10.2023 | ပွၵ်ႉ 1, ဝဵင်း သႅၼ်ဝီ | ၺႃးၸၢၵ်ႇမၢၵ်ႇ သိုၵ်းမၢၼ်ႈ ဢၼ် ယူႇတီႈတပ်ႉၶဝ် ယိုဝ်းမႃး | ၸၢႆး 2 ၵေႃႉ (ဢႃယု 40, လႄႈပႃႈတႂ်ႈ 10) | ႁိူၼ်း 6 လင် | ||
| 2 | 28.10.2023 | ဝၢၼ်ႈၵွင်းႁေႃ၊ ပၢင်သဝ်းၵူၼ်း ပၢႆႈၽေး တီႈ ၵျွင်းၶမ်း | တၢႆယွၼ်ႉမၢၵ်ႇလူင် သိုၵ်းမၢၼ်ႈဢၼ် ယိုဝ်းမႃးတီႈပၢင် သဝ်းၵူၼ်းပၢႆႈၽေး ၶၢဝ်းယၢမ်းမွၵ်ႈ 8 မူင်းၵၢင်ၶမ်ႈ | ၸၢႆး 1 ၵေႃႉ (ဢႃယု 60) | ႁိူၼ်းၵူၼ်း မွၵ်ႈ 50 လင် | ||
| 3 | 29.10.2023 | ဝၢၼ်ႈၵွင်းႁေႃ၊ ပၢင်သဝ်းၵူၼ်း ပၢႆႈၽေး တီႈ ၵျွင်းၶမ်း | တၢႆယွၼ်ႉမၢၵ်ႇလူင် သိုၵ်းမၢၼ်ႈဢၼ် ယိုဝ်းမႃးတီႈပၢင် သဝ်းၵူၼ်းပၢႆႈၽေး ၶၢဝ်းယၢမ်းမွၵ်ႈ 6 မူင်းႁူဝ်ၶမ်ႈ | ၸၢႆး 1 ၵေႃႉ (ဢႃယု 54) | |||
| 4 | 29.10.2023 | ဝၢၼ်ႈၶူးဝဵင်းလႄႈ ဝၢၼ်ႈ တႅၵ်ႇယႅၵ်ႈ | ၺႃးၸၢၵ်ႇမၢၵ်ႇ သိုၵ်းမၢၼ်ႈ ဢၼ်ယူႇတီႈတပ်ႉ ၶဝ်ယိုဝ်း | ႁိူၼ်း 20 လင် | |||
| 5 | 31.10.2023 | ဝၢၼ်ႈၵွင်းႁေႃ၊ ပၢင်သဝ်းၵူၼ်း ပၢႆႈၽေး တီႈ ၵျွင်းၶမ်း | တၢႆယွၼ်ႉမၢၵ်ႇလူင် သိုၵ်းမၢၼ်ႈဢၼ် ယိုဝ်းမႃးတီႈပၢင် သဝ်းၵူၼ်းပၢႆႈၽေး ၶၢဝ်းယၢမ်းမွၵ်ႈ 7 မူင်းႁူဝ်ၶမ်ႈ | ၸၢႆး 1 ၵေႃႉ (ဢႃယု 30) | |||
| 6 | 1.11.2023 | ပွၵ်ႉ 3 | တၢႆယွၼ်ႉမၢၵ်ႇလူင် ဢၼ်မႃးတူၵ်းသႂ်ႇ ႁိူၼ်းၽွင်းတိုၵ်ႉႁူမ်ႈ ၵၼ်ၵိၼ်ၶဝ်ႈ ၽွင်းၶၢဝ်းယၢမ်း 3 မူင်း ဝၢႆးဝၼ်း | ယိင်း 2 ၵေႃႉ (ဢႃယု 52, 24) | ႁိူၼ်း 1 လင် | ||
| 7 | 4.11.2023 | မၢၼ်ႈၵွင်း ဢိူင်ႇၼမ်ႉၸလၢပ်ႈ | ၺႃးသိုၵ်းမၢၼ်ႈ ယိုဝ်း ၽွင်းပွၵ်ႈ ႁိူၼ်း တေမိူဝ်းဢဝ် သိူဝ်ႈၶူဝ်း ယၢမ်း ၵၢင်ဝၼ်း | ၸၢႆး 1 ၵေႃႉ (ဢႃယု 30) | ယိင်း 1 ၵေႃႉ (ဢႃယု 36), ၸၢႆး 1 ၵေႃႉ (ဢႃယု 8) | ||
| 8 | 4.11.2023 | ဝဵင်းသႅၼ်ဝီ | သိုၵ်းမၢၼ်ႈ ဢဝ် ၶိူင်ႈမိၼ်တိုၵ်း ပွႆႇ မၢၵ်ႇ ၶိူင်ႈမိၼ် မႅင်း မီႈ 4 လမ်း ၶိူင်ႈ မိၼ်တိုၵ်း ၸႅတ်ႊ 2 လမ်း တင်းဝၼ်း | တီႈဢေႇသုတ်း ႁိူၼ်း ၵူၼ်း 50 လင် | |||
| 9 | 5.11.2023 | ပွၵ်ႉ 3 | မၢတ်ႇၸဵပ်းယွၼ်ႉ မၢၵ်ႇလူင်သိုၵ်း မၢၼ်ႈ ၽွင်းသႂ်ႇ ၼမ်ႉမၼ်းလူတ်ႉ ၶိူင်ႈ | ၸၢႆး 1 ၵေႃႉ | |||
| 10 | 21.11.2023 | ဝၢၼ်ႈၼမ်ႉၸလၢပ်ႈ | တၢႆယွၼ်ႉ မၢၵ်ႇ လူင်သိုၵ်း မၢၼ်ႈ ၽွင်းပဵၼ်ပၢင်တိုၵ်းယၢမ်းတဵင်ႈဝၼ်း | ၸၢႆး 1 ၵေႃႉ (ဢႃယု 33) | ႁိူၼ်း 10 လင် | ||
| 11 | 30.11.2023 | ဝၢၼ်ႈၼွင်ၵေႃႈ ဢိူင်ႇၵုင်းၺွင်ႇ | တၢႆယွၼ်ႉမၢၵ်ႇလူင် သိုၵ်းမၢၼ်ႈဢၼ် မႃးတူၵ်းသႂ်ႇႁိူၼ်း ၽွင်းတိုၵ်ႉၼွၼ်း လပ်း ယၢမ်းၵၢင် ၶိုၼ်း | ၸၢႆး 2 ၵေႃႉ (ဢႃယု 54 လႄႈ 28), ယိင်း 1 ၵေႃႉ (ဢႃယု 53) | ၸၢႆး 1 ၵေႃႉ (ဢႃယု 7), ယိင်း 1 ၵေႃႉ (ဢႃယု 2) | ႁိူၼ်း 1 လင် | |
| 12 | 4.12.2023 | ပၢင်သဝ်းၵူၼ်းပၢႆႈၽေး ၵျွင်းၶမ်း | တၢႆယွၼ်ႉမၢၵ်ႇလူင် သိုၵ်းမၢၼ်ႈ ဢၼ် မႃးတူၵ်းၼႂ်း ပၢင် သဝ်းၵူၼ်း ပၢႆႈၽေး | ယိင်း 1 ၵေႃႉ (ဢႃယု 60) | ယိင်း 2 ၵေႃႉ | ||
| 13 | 10.12.2023 | ပွၵ်ႉ 1,
ဝဵင်းသႅၼ်ဝီ |
သိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇ | ယိင်း 1 ၵေႃႉ (ဢႃယု 14) | ႁိူၼ်း 10 လင် | ||
| 14 | 18.12.2023 | ဝၢၼ်ႈပဵင်းႁုင်း၊ ဝၢၼ်ႈၵုၼ်ၵွၵ်ႇ | တၢႆယွၼ်ႉသိုၵ်းမၢၼ်ႈ ဢဝ်ၶိူင်ႈမိၼ် တိုၵ်းပွႆႇမၢၵ်ႇ | ယိင်း 1 ၵေႃႉ (ဢႃယု 14) | ဝတ်ႉ/ၵျွင်း လုၵွႆ | ||
| 15 | 23.12.2023 | ဝဵင်းသႅၼ်ဝီ | သိုၵ်းမၢၼ်ႈ ဢဝ်ၶိူင်ႈမိၼ် တိုၵ်းပွႆႇမၢၵ်ႇ | ၵူၼ်းမိူင်း 3 ၵေႃႉ | ၵူၼ်းမိူင်း 6 ၵေႃႉ | ႁိူၼ်း 15 လင် | |
| 16 | 2.1.2024 | ဝၢၼ်ႈပၢင်လေႃႉ | သိုၵ်းမၢၼ်ႈဢဝ် မၢၵ်ႇလူင်ယိုဝ်း ၵူႈႁူးၵူႈတၢင်း | ၸၢႆး 3 ၵေႃႉလႄႈ ယိင်း 1 ၵေႃႉ | ႁိူၼ်း 1 လင် | ||
| 17 | 3.1.2024 | ပၢင်သဝ်းၵူၼ်းပၢႆႈၽေးတီႈၵျွင်းၶမ်း ၼႂ်းဝၢၼ်ႈ ၵွင်းႁေႃ | ၻရူၼ်ႊ ပွႆႇမၢၵ်ႇလူင်းၼႂ်း ပၢင်သဝ်းၵူၼ်းပၢႆႈ ၽေးမွၵ်ႈယၢမ်းၵၢင် ဝၼ်းတဵင်ႈ | ယိင်း 1 ၵေႃႉ ( ဢႃယု 16) | ၵူၼ်းမူင်း 8 ၵေႃႉ | ||
| ႁူမ်ႈ | တၢႆ 17 ၵေႃႉ | မၢတ်ႇၸဵပ်း 27 ၵေႃႉ | တီႈဢေႇ သုတ်းႁိူၼ်း/တိုၵ်း 165 လင် | ||||
ႁူဝ်ယွႆႈလွင်ႈသိုၵ်းမၢၼ်ႈဢဝ်ၶိူင်ႈမိၼ်တိုၵ်း ႁဵတ်းႁႂ်ႈၵူၼ်းမိူင်းမီးလွင်ႈလုတၢႆ/ မၢတ်ႇၸဵပ်း ၶူဝ်းၶွင်လုလႅဝ် ၼႂ်းၸႄႈဝဵင်းၵုၼ်လူင်ၽွင်းပၢင်တိုၵ်း 1027
ၸုမ်းဢူၺ်းလီသၢမ်ပီႈၼွင်ႉလႄႈၸုမ်းၵႅတ်ႇၶႄၵူၼ်းမိူင်း PDF ႁူမ်ႈၵၼ်လေႃႇတိုၵ်းႁူင်းပလိၵ်ႊ/ယႄး တီႈ ၼမ်ႉၾႃႈ/ၶျိၼ်ႊသူၺ်ႊႁေႃႊ ၼိူဝ်သဵၼ်ႈတၢင်းလႅၼ်လိၼ်ၶႄႇ မိူဝ်ႈဝၼ်းထိ 27/10/2023 လႄႈ သိုပ်ႇၶဝ်ႈ တိုၵ်းတပ်ႉမၢၼ်ႈၼႂ်းၸႄႈဝဵင်းၵုၼ်လူင် ၸွမ်းသၢႆသဵၼ်ႈတၢင်းလူင် သႅၼ်ဝီ-ၼမ်ႉၾႃႈ/ၶျိၼ်ႊသူၺ်ႊႁေႃႊ။
ၽွင်းယၢမ်းၼႆႉ သိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇမၢၵ်ႇၸွမ်းဝဵင်းၵုၼ်လူင်။ မိူဝ်ႈဝၼ်းထိ 30/10/2023 မၢၵ်ႇ ဢၼ်သိုၵ်းမၢၼ်ႈပွႆႇလူင်းတၢင်းၶိူင်ႈမိၼ်တူၵ်းတီႈဝၢၼ်ႈႁူဝ်ၶူဝ် ၶၢင်ႈတၢင်းၶူဝ်ၵုၼ်လူင်ၵဝ်ႇ ၼိူဝ်မႄႈ ၼမ်ႉ ၶူင်း၊ မီးၵူၼ်းမိူင်းၵေႃႉၼိုင်ႈတၢႆလႄႈ ႁိူၼ်းလင်ၼိုင်ႈလုၵွႆ။ ၶူဝ်ၵုၼ်လူင်ၵဝ်ႇၼၼ်ႉၵေႃႈ လုၵွႆယွၼ်ႉ မၢၵ်ႇလူင်ၽွင်ႈ။ ဝၼ်းထိ 31/10/2023 ၵူၼ်းဝၢၼ်ႈမၢၵ်ႇၶၢမ် ဢၼ်ယူႇတၢင်းၸၢၼ်းဝဵင်းၵုၼ်လူင်ၵေႃႉ 1 တၢႆယွၼ်ႉမၢၵ်ႇလူင်သိုၵ်းမၢၼ်ႈ။
ၶူဝ်လူင်ၵုၼ်လူင်မႂ်ႇၼႆႉ ၶႄႇၸွႆႈၵၢၼ်ငိုၼ်းသေၵေႃႇသၢင်ႈဝႆႉ ၼိူဝ်မႄႈၼမ်ႉၶူင်း၊ ယဝ်ႉတူဝ်ႈၼႂ်းပီ 2023၊ ၵူၺ်းၵႃႈ ပၢင်ပိုတ်ႇၶူဝ်မႂ်ႇတႄႉၸၼ်ၶပ်ႉမၢႆဝႆႉၼႂ်းလိူၼ် ၼူဝ်ႊဝႅမ်ႊပိူဝ်ႊ 2023 ယွၼ်ႉပၢင်တိုၵ်း 1027 လႄႈ ဢမ်ႇၸၢင်ႈပိုတ်ႇ။
ၸႄႈဝဵင်းၵုၼ်လူင်
| ၶပ်ႉမၢႆ | ဝၼ်းထိ | ဝၢၼ်ႈ/ပွၵ်ႉ | ႁူဝ်ယွႆႈ | ၵူၼ်းမိူင်းတၢႆ | ၵူၼ်းမိူင်း မၢတ်ႇၸဵပ်း | ၶူဝ်းၶွင်လု သုမ်း/ၵွႆ |
| 1 | 30.10.2023 | ဝၢၼ်ႈႁူဝ်ၶူဝ် | တၢႆယွၼ်ႉ သိုၵ်း မၢၼ်ႈဢဝ် ၶိူင်ႈ မိၼ်တိုၵ်း ပွႆႇမၢၵ်ႇ ယၢမ်းၵၢင်ဝၼ်း | ၸၢႆး 1 ၵေႃႉ (ဢႃယု 30 ပၢႆ) | ႁိူၼ်း 1 လင် | |
| 2 | 31.10.2023 | ဝၢၼ်ႈမၢၵ်ႇၶၢမ် | တၢႆယွၼ်ႉသိုၵ်း မၢၼ်ႈဢဝ်ၶိူင်ႈမိၼ် တိုၵ်းပွႆႇမၢၵ်ႇ ၽွင်းယူႇၼႂ်းလၢၼ်ႉၶဝ်ႈၽၵ်း ယၢမ်း 8 မူင်းၵၢင်ၼႂ် | ၸၢႆး 1 ၵေႃႉ (ဢႃယု 13) | လၢၼ်ႉၶဝ်ႈၽၵ်း1 ဢၼ် | |
| ႁူမ်ႈ | တၢႆ 2 ၵေႃႉ | တိုၵ်း 2 လင် | ||||
ႁူဝ်ယွႆႈလွင်ႈသိုၵ်းမၢၼ်ႈဢဝ်ၶိူင်ႈမိၼ်တိုၵ်း ႁဵတ်းႁႂ်ႈၵူၼ်းမိူင်းမီးလွင်ႈလုတၢႆ/ မၢတ်ႇၸဵပ်း ၶူဝ်းၶွင်လုလႅဝ် ၼႂ်းၸႄႈဝဵင်းလႃႈသဵဝ်ႈၽွင်းပၢင်တိုၵ်း 1027
တင်ႈတႄႇ ဝၼ်းထိ 27/10/2023 မီးပၢင်တိုၵ်းႁၢဝ်ႉႁႅင်းၼႂ်းၵႄႈ သိုၵ်းမၢၼ်ႈလႄႈၸုမ်းဢူၺ်းလီသၢမ်ပီႈ ၼွင်ႉတီႈလၢၼ်ႇ/ၵဵတ်ႊ ၵဵပ်းၶွၼ်ႇ ၼိူဝ်သဵၼ်ႈတၢင်းလႃႈသဵဝ်ႈ-မူႇၸေႈ တီႈႁူဝ်ပိုၵ်ႉ ဢၼ်ယူႇတၢင်းႁွင်ႇဝဵင်း လႃႈသဵဝ်ႈ ႁၢင်ႇၵႆမွၵ်ႈ 10 ၵီႊလူဝ်ႊမႄႊတိူဝ်ႊ လႄႈၼိူဝ်သဵၼ်ႈတၢင်းလႃႈသဵဝ်ႈ-မိူင်းယေႃ ဢၼ်ယူႇတၢင်း ဢွၵ်ႇဝဵင်း။ ပၢင်တိုၵ်းသိုပ်ႇလၢမ်းၽႄႈၸူးဝၢၼ်ႈဢၼ်ယူႇတၢင်းႁွင်ႇလႄႈတၢင်းဢွၵ်ႇဝဵင်း ပႃးၸဵမ်ဢိူင်ႇမိူင်း ၵႅတ်ႈ ႁိမ်းမႄႈၼမ်ႉၶူင်း တီႈဢၼ်သိုၵ်းမၢၼ်ႈၶဝ် ပၵ်းတပ်ႉဝႆႉတင်းၼမ်။ သိုၵ်းမၢၼ်ႈဢဝ်ၶိူင်ႈမိၼ်တိုၵ်းပွႆႇ မၢၵ်ႇလႄႈဢဝ်မၢၵ်ႇလူင်ယိုဝ်းလူင်ၵႂႃႇၵူႈႁူးၵူႈတၢင်း ၶဝ်ႈၼႂ်းဝၢၼ်ႈဢၼ်ႁိမ်းႁွမ်းဝဵင်းလႄႈ ၽၢႆႇတၢင်းဢွၵ်ႇ ဝဵင်းၸိူဝ်းၼၼ်ႉ။
ၸုမ်းဢူၺ်းလီသၢမ်ပီႈၼွင်ႉၶဝ် ႁုပ်ႈယိုတ်းလႆႈဢိူင်ႇမိူင်းၵႅတ်ႈလႄႈမိူင်းယေႃ မိူဝ်ႈႁၢင်လိူၼ်ၼူဝ်ႊဝႅမ်ႊပိူဝ်ႊ သေ ၵိုတ်းၵၢၼ်လေႃႇတိုၵ်းမၼ်းၸွမ်းႁိမ်းႁွမ်းဝဵင်းလႃႈသဵဝ်ႈ၊ ၵူၺ်းၵႃႈသိုၵ်းမၢၼ်ႈသိုပ်ႇဢဝ်မၢၵ်ႇလူင်ယိုဝ်း လႄႈသိုပ်ႇဢဝ်ၶိူင်ႈမိၼ်တိုၵ်းပွႆႇမၢၵ်ႇၼႂ်းပိုၼ်ႉတီႈတေႃႇထိုင်ၸဝ်ႉလိူၼ် ၸၼ်ႊၼႃႊဝႃႊရီႊ 2024။ တင်ႈ တႄႇဝၼ်းထိ 27/10/2023 ထိုင် ဝၼ်းထိ 7/1/2024 သိုၵ်းမၢၼ်ႈယူႇတီႈတိူင်းသိုၵ်း ၸဵင်ႇႁွင်ႇဝၼ်း ဢွၵ်ႇ မၼ်းလႄႈတပ်ႉမၼ်းဢၼ်မီးၼႂ်းဝဵင်း ဢဝ်ၶိူင်ႈမိၼ်တိုၵ်းပွႆႇမၵ်ႇလႄႈ ဢဝ်ၵွင်ႈလူင်ယိုဝ်းသေ ႁဵတ်းႁႂ်ႈ ၵူၼ်းမိူင်းလုတၢႆ 18 ၵေႃႉ၊ မၢတ်ႇၸဵပ်း 6 ၵေႃႉလႄႈ ႁဵတ်းႁႂ်ႈႁိူၼ်းယေး/တိုၵ်း 40 လင်လုၵွႆ ၼႂ်းဝၢၼ်ႈ ဢၼ်ယူႇႁိမ်းႁွမ်းလႃႈသဵဝ်ႈ။
လိူဝ်ၼၼ်ႉသိုၵ်းမၢၼ်ႈယင်းလႃလီ ယိုဝ်းၵူၼ်းမိူင်းတၢႆၼိူဝ်သဵၼ်ႈတၢင်း။ တင်ႈတႄႇဝၼ်းထိ 3/11/2023 ထိုင် 16/12/2024 သိုၵ်းမၢၼ်ႈယိုဝ်းၵူၼ်းမိူင်းတၢႆ 7 ၵေႃႉၸိူဝ်းဢွၵ်ႇပႆၼိူဝ်သဵၼ်ႈတၢင်းဢမ်ႇၼၼ် ၶီႇလူတ်ႉ ၶိူင်ႈ၊ ၵေႃႉၼိုင်ႈတီႈဝၢၼ်ႈၼမ်ႉပွင်ႈလႄႈ 6 ၵေႃႉၼႂ်းဝဵင်းလႃႈသဵဝ်ႈ ပႃးၸဵမ်ၵူၼ်းဢၼ်မီးတၢင်းပဵၼ်ပၢႆးၸႂ် သေႁႃသင်သိင်ၼႂ်းၵူၺ်ယုၵ်းယၢၵ်း ၼႂ်းပွၵ်ႉ 3။
တင်ႈတႄႇ တႄႇမီးပၢင်တိုၵ်း 1027 တေႃႇထိုင်ပေႃးမီးၵၢၼ်ၵိုတ်းယိုဝ်းၵၼ်ၼႂ်းဝၼ်းထိ 11/1/2024 ၼၼ်ႉမီး ၵူၼ်းမိူင်း 20,000 ပၢႆၸိူဝ်းယူႇၸွမ်းဝၢၼ်ႈႁိမ်းႁွမ်းလႄႈဝဵင်းလႃႈသဵဝ်ႈဢွၼ်ၵၼ်ပၢႆႈၽေးသိုၵ်း ပိုင်ႈႁူမ်ႈ ၸွမ်း ဝတ်ႉ/ၵျွင်း/ ၵျွင်းၽြႃးၶရိယၼ်ႊ ၼႂ်းဝဵင်းလႃႈသဵဝ်ႈ။ ၵူၼ်းပၢႆႈၽေးၸိူဝ်းၼႆႉ ၵမ်ႈၼမ်ဢွၼ် ၵၼ်ပွၵ်ႈ ၶိုၼ်းယဝ်ႉၵူၺ်းၵိုတ်းမွၵ်ႈ 500 ၵေႃႉၵူၺ်း။
| ၵူၼ်းမိူင်းလုတၢႆ မၢတ်ႇၸဵပ်း ၶူဝ်းၶွင်ႁိူၼ်းယေးလုၵွႆ ယွၼ်ႉသိုၵ်းမၢၼ်ႈ ဢဝ်ၶိူင်ႈမိၼ်တိုၵ်းပွႆႇမၢၵ်ႇ၊ ဢဝ်မၢၵ်ႇလူင်လႄႈၵွင်ႈယိုဝ်း ၼႂ်းၸႄႈဝဵင်းလႃႈသဵဝ်ႈ ဝၼ်းထိ 27/10/2023 ထိုင် 7/1/2024 | |||||||
| ၶပ်ႉမၢႆ | ဝၼ်းထိ | ဝၢၼ်ႈ/ပွၵ်ႉ | ႁူဝ်ယွႆႈ | ၵူၼ်းမိူင်းတၢႆ | ၵူၼ်းမိူင်း မၢတ်ႇၸဵပ်း | ၶူဝ်းၶွင်လု သုမ်း/ၵွႆ | |
| 1 | 27.10.2023 | ပွၵ်ႉ 5, ဝဵင်းလႃႈ သဵဝ်ႈ | တၢႆယွၼ်ႉတၢင်း ပဵၼ်ႁူဝ်ၸႂ် ၽွင်း လႆႈယိၼ်း သဵင်ၵွင်ႈ လူင် သိုၵ်းမၢၼ်ႈ ယိုဝ်း ၶၢဝ်းယၢမ်း 10 ၵၢင်ၶိုၼ်း | ယိင်း 1 ၵေႃႉ (ဢႃယု 68) | |||
| 2 | 3.11.2023 | ဝၢၼ်ႈၼမ်ႉပွင်ႈ | ၺႃးသိုၵ်းမၢၼ်ႈယိုဝ်းတၢႆ ၽွင်းဢွၵ်ႇ တၢင်းလုၵ်ႉမိူင်းယႆ ၵႂႃႇလႃႈသဵဝ်ႈ ၶၢဝ်း ယၢမ်းမွၵ်ႈ 4-5 မူင်း ႁူဝ်ၶမ်ႈ | ၸၢႆး 1 ၵေႃႉ (ဢႃယု 26) | |||
| 3 | 4.11.2023 | ဝၢၼ်ႈပၢင်ႁုင်း | တၢႆယွၼ်ႉမၢၵ်ႇလူင် သိုၵ်းမၢၼ်ႈဢၼ် မႃးတူၵ်းၼႂ်းသွင်ႇ ၾႆး၊ ၼၢင်းၵေႃႉတၢႆ ၼၼ်ႉပဵၼ်မႄႈ လုၵ်ႈဢွၼ်ႇလႅင် ဢၼ် ဢႃယုၸင်ႇ ႁႃလႆႈ 2 လိူၼ် | ယိင်း 1 ၵေႃႉ (ဢႃယု 38) | ႁိူၼ်း 1 လင် | ||
| 4 | 9.11.2023 | ဝၢၼ်ႈမၢၼ်ႈ မွၼ်း | ဢမ်ႇမီးပၢင်တိုၵ်း သင်သေ သိုၵ်း မၢၼ်ႈ တင်ႈၸႂ် ဢဝ် ၵွင်ႈလူင်ယိုဝ်း ယၢမ်းၵၢင်ဝၼ်း တဵင်ႈ | ၸၢႆး 2 ၵေႃႉ (ဢႃယု မွၵ်ႈ 30) | ႁိူၼ်း 1 လင် | ||
| 5 | 9.11.2023 | ဝၢၼ်ႈဝဵင်းထၢၼ် ဢိူင်ႇမိူင်းတၢင်ႈ | တၢႆယွၼ်ႉမၢၵ်ႇလူင် သိုၵ်း မၢၼ်ႈဢၼ် ယိုဝ်း ၶၢဝ်းယၢမ်း မွၵ်ႈ 7 မူင်းၵၢင်ၼႂ် ၽွင်းတိုၵ်ႉႁုင်ၶဝ်ႈၽၵ်း ၼႂ်းပၢင်သဝ်း ၵူၼ်းပၢႆႈၽေး | ယိင်း 3 ၵေႃႉ (ဢႃယု 12, 40 လႄႈ 60) | တိုၵ်းဝတ်ႉ/ ၵျွင်း 1 လင် လႄႈ ႁိူၼ်း 4 လင် | ||
| 6 | 14.11.2023 | ပွၵ်ႉ 5, ဝဵင်းလႃႈသဵဝ်ႈ | သိုၵ်းမၢၼ်ႈဢၼ် ပၵ်းတပ်ႉ ႁိမ်းႁူင်း ႁဵၼ်းၸၼ်ႉၵၢင် မၢႆ 6 ၼၼ်ႉယိုဝ်း ၶီႇ လူတ်ႉၶိူင်ႈ | ၸၢႆး 2 ၵေႃႉ (ဢႃယု 20-30) | |||
| 7 | 15.11.2023 | ဝၢၼ်ႈၵုၼ်ၵႅင်း | သိုၵ်းမၢၼ်ႈ ဢဝ် ၶိူင်ႈ မိၼ် တိုၵ်းပွႆႇ မၢၵ်ႇတူၵ်းႁိမ်းထဵင်ႁႆႈ ယၢမ်း 3 မူင်းဝၢႆး ဝၼ်း၊ ၼၢင်းယိင်း ၵေႃႉ တၢႆၵမ်းလဵဝ် ထႅင်ႈၵေႃႉၼိုင်ႈ မၢတ်ႇၸဵပ်းႁၢဝ်ႉ ႁႅင်းသေလႆႈလု သဵင်ႈ ၽွင်းယူတ်း ယႃတူဝ်ထႅင်ႈဝၼ်းၼိုင်ႈ | ယိင်း 2 ၵေႃႉ (ဢႃယု 40 လႄႈ 50) | သုမ်ႉထဵင် ႁႆႈ 1 လင် | ||
| 8 | 16.11.2023 | ပွၵ်ႉ 3 | ၺႃးသိုၵ်းမၢၼ်ႈ ယိုဝ်းတၢႆ ၽွင်းႁႃ သွၵ်ႈတဝ် ၼႂ်းၵူၺ်း ယုၵ်းယၢၵ်းၽွင်း ၶၢဝ်းယၢမ်း 4 မူင်း ဝၢႆးဝၼ်း။ ပဵၼ်ၵူၼ်း ဢၼ်မီးတၢင်းပဵၼ်ႁူဝ်ၸႂ်ဢမ်ႇပေႃး ၶႅမ်ႉ | ၸၢႆး 1 ၵေႃႉ (ဢႃယုမွၵ်ႈ 40) | |||
| 9 | 18.11.2023 | ပွၵ်ႉ 1 | ၺႃးသိုၵ်းမၢၼ်ႈ ယိုဝ်းတၢႆ ၽွင်းဢွၵ်ႇ ၼွၵ်ႈ ႁိူၼ်းယၢမ်း ၵၢင်ၶမ်ႈ | ၸၢႆး 1 ၵေႃႉ (ဢႃယု 38) | |||
| 10 | 23.11.2023 | မၢၼ်ႈပၢတ်ႈ | ၺႃးၸၢၵ်ႇမၢၵ်ႇလူင် သိုၵ်းမၢၼ်ႈသေတၢႆ ၽွင်းပဵၼ်ပၢင်တိုၵ်း ယၢမ်းၵၢင်ၶမ်ႈမွၵ်ႈ 8 မူင်း | ၸၢႆး 1 ၵေႃႉ (ဢႃယု 41) | |||
| 11 | 30.11.203 | ဝၢၼ်ႈႁူဝ်ၼႃး ဢိူင်ႇၼမ်ႉပွင်ႈ | ၺႃးၸၢၵ်ႇမၢၵ်ႇလူင် သိုၵ်းမၢၼ်ႈ ဢၼ် မႃးတူၵ်း ၼႂ်းသူၼ် ၶဝ်ႈၵၢပ်ႇ၊ ၼႂ်းပိုၼ်ႉ တီႈ ဢမ်ႇမီးပၢင် တိုၵ်းသင် | ယိင်း 1 ၵေႃႉ (ဢႃယု 27) | |||
| 12 | 2.12.2023 | ဝၢၼ်ႈလူင် တူၺ် ဢိူင်ႇမိူင်း ယေႃ | သိုၵ်းမၢၼ်ႈ ဢဝ် ၶိူင်ႈ မိၼ်တိုၵ်း ပွႆႇ မၢၵ်ႇ 500 ပွင်ႊ လူင်း၊ ၼႂ်းပိုၼ်ႉတီႈ ဢမ်ႇမီးပၢင်တိုၵ်း သင် | ယိင်း 2 ၵေႃႉ | ယိင်း 1 ၵေႃႉ | ႁိူၼ်း 11 လင် | |
| 13 | 12.12.2023 | ပွၵ်ႉ 4 | ၺႃးသိုၵ်းမၢၼ်ႈ တင်ႈၸႂ်ယိုဝ်းတၢႆ ၽွင်းၶီႇလူတ်ႉၶိူင်ႈ ၼိူဝ်သဵၼ်ႈတၢင်း လူင် | ၸၢႆး 1 ၵေႃႉ (ဢႃယု 40) | |||
| 14 | 16.12.2023 | ပွၵ်ႉ 12 | ၺႃးသိုၵ်းမၢၼ်ႈ ယိုဝ်းတၢႆ ၽွင်းၶၢမ်ႈ ၶူဝ် A.D. | ၸၢႆး 1 ၵေႃႉ (ဢႃယု 44) | |||
| 15 | 21.12.2023 | ဝၢၼ်ႈဢီႇၼၢႆး | မၢတ်ႇၸဵပ်းယွၼ်ႉ မၢၵ်ႇလူင်သိုၵ်း မၢၼ်ႈဢၼ်တူၵ်းသႂ်ႇႁိူၼ်း 2 လင် ၽွင်းၵၢင်ၼႂ် မွၵ်ႈ 9 မူင်း၊ ၼႂ်းပိုၼ်ႉတီႈ ဢမ်ႇမီးပၢင်တိုၵ်း သင် | ယိင်း 2 ၵေႃႉ (ဢႃယုမွၵ်ႈ 30), ၸၢႆး 1 ၵေႃႉ (ဢႃယု ပႃႈတႂ်ႈ 10) | ႁိူၼ်း 2 လင် | ||
| 16 | 23.12.2023 | ဝၢၼ်ႈပၢင်မၢတ်ႈ | ၺႃးသိုၵ်းမၢၼ်ႈ ယိုဝ်းၽွင်းလုၵ်ႉ တီႈဝၢၼ်ႈပၢႆႈၽေး သိုၵ်း ယၢမ်းၵၢင်ၼႂ် မွၵ်ႈ 7 မူင်း | ၸၢႆး 1 ၵေႃႉ (ဢႃယု 50) | |||
| 17 | 29.12.2023 | ဝၢၼ်ႈဢီႇၼၢႆး | ၺႃးၸၢၵ်ႇမၢၵ်ႇလူင် သိုၵ်းမၢၼ်ႈ ဢၼ် ယိုဝ်း ယၢမ်း 11 မူင်း ၵၢင်ၼႂ် ၽွင်းပဵၼ် ပၢင်တိုၵ်း | ယိင်း 1 ၵေႃႉ (ဢႃယု 33) | |||
| 18 | 5.1.2024 | ဝၢၼ်ႈမၢၵ်ႇၶီႈၼူ | မၢၵ်ႇလူင် လုၵ်ႉ တၢင်း တိူင်းသိုၵ်း ၸဵင်ႇ ႁွင်ႇဝၼ်း ဢွၵ်ႇမႃး၊ ၼႂ်းပိုၼ်ႉ တီႈ ဢမ်ႇမီးပၢင် တိုၵ်း သင်ၶၢဝ်း ၼၼ်ႉ | ႁိူၼ်း 2 လင် ၾႆးမႆႈ | |||
| 19 | 7.1.2024 | ဝၢၼ်ႈမိူင်းယေႃ | သိုၵ်းမၢၼ်ႈဢဝ် ၶိူင်ႈမိၼ်တိုၵ်း ပွႆႇမၢၵ်ႇလူင်း ၼႂ်း ဝၢၼ်ႈ | လုၵ်ႈဢွၼ်ႇ 4 ၵေႃႉလႄႈၼၢင်း ယိင်း 1 ၵေႃႉ | ႁိူၼ်း 20 | ||
| ႁူမ်ႈ | တၢႆ 24 ၵေႃႉ | မၢတ်ႇၸဵပ်း 7 ၵေႃႉ | ႁိူၼ်း/တိုၵ်း 43 လင် | ||||
| ၵူၼ်းမိူင်း မၢတ်ႇၸဵပ်း ယွၼ်ႉမၢၵ်ႇၾင်လိၼ် ၼႂ်းၸႄႈဝဵင်းလႃႈသဵဝ်ႈ ဝၼ်းထိ 6-13/12/2023 | |||||
| ၶပ်ႉမၢႆ | ဝၼ်းထိ | ဝၢၼ်ႈ/ ပွၵ်ႉ | ႁူဝ်ယွႆႈ | ၵူၼ်းမိူင်းလုတၢႆ | ၵူၼ်းမိူင်း မၢတ်ႇၸဵပ်း |
| 1 | 6.12.2023 | ဝၢၼ်ႈၼမ်ႉၵႅၼ် | ယဵပ်ႇၺႃးမၢၵ်ႇသိုၵ်း မၢၼ်ႈၶမယ 507 ဢၼ်ၾင်ဝႆႉ ႁိမ်း တပ်ႉၶဝ် ၽွင်းၵႂႃႇႁႃ ၽိုင်ႈ ၼႂ်းထိူၼ်ႇ | ၸၢႆး 1 ၵေႃႉ (ဢႃယု 18) | |
| 2 | 13.12.2023 | ဝၢၼ်ႈတွင်ၼဝ်ႈ | ယဵပ်ႇၺႃးမၢၵ်ႇၾင် လိၼ် ၽွင်းၵႂႃႇ တႅပ်းမႆႉ ၼိူဝ်လွႆ | ၸၢႆး 1 ၵေႃႉ (ဢႃယု22) | |
| ႁူမ်ႈ | မၢတ်ႇၸဵပ်း 2 ၵေႃႉ | ||||
တွင်ႈထၢမ်
ၸၢႆးႁေႃသႅင် 66 99 246 5673/ +66 94 728 6696 Signal (တႆး, ဢင်းၵိတ်း)
ယိင်းလႅင်းႁၢၼ် 66 99 289 6080 Signal (မၢၼ်ႈ)
Download PDF files >>>