ၽိုၼ်တၢမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး မၢႆ 11/2017
ဝၼ်းထိ 04/12/2017
သိုၵ်းမၢၼ်ႈၶမရ 147 တဵၵ်းၸႂ်ႉႁႅင်းလၢႆ၊ဢဝ်ၵိၼ်ၶွင်လၢႆလႄႈတဵၵ်းၶၢၼ်းထူဝ်ႈၵူၼ်းဝၢၼ်ႈၽွင်းပဵၼ်ပၢင်တိုၵ်းၸွမ်းပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး ၼႂ်းၸႄႈဝဵင်းသီႇပေႃႉ
ၽွင်းပဵၼ်ပၢင်တိုၵ်းၸွမ်းပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ၼႂ်းႁၢင်လိူၼ်ၼူဝ်ႊဝႅမ်ႊပိူဝ်ႊၼၼ်ႉ သိုၵ်းမၢၼ်ႈၶမရ 147 တဵၵ်းၸႂ်ႉၵူၼ်းဝၢၼ်ႈ၊ဢဝ်ၵိၼ်ၶွင်လၢႆလႄႈတဵၵ်းၶၢၼ်းထူဝ်ႈၵူၼ်းဝၢၼ်ႈ။
မိူဝ်ႈဝၼ်းထိ 28/11/2017 ၼၼ်ႉသိုၵ်းမၢၼ်ႈၶမရ 147 ဢၼ်ပၵ်းတပ်ႉတီႈၼွင်ၵေႃႈမွၵ်ႈ 60 ၵႃးသွင်လမ်းႁွတ်ႈ ၵႂႃႇၼႂ်းဝၢၼ်ႈပႃႇၵၢင်းသေသိုပ်ႇပႆၵႂႃႇတၢင်းဝၢၼ်ႈၶႃးၶဵဝ်၊ၵႂႃႇတဵၵ်းၸႂ်ႉထဝ်ႈၸၢႆးၵေႃႉၼိုင်ႈၸိုဝ်ႈႁွင်ႉလုင်းသုဢႃ ယု 50 ၵႂႃႇသူင်ႇတၢင်းပၼ်ၶဝ်ထိုင်ဝၢၼ်ႈၼမ်ႉလိၼ်း (ဝၢၼ်ႈပလွင်ႈ မီးႁူဝ်လင်ႁိူၼ်းမွၵ်ႈ 30)။ၽွင်းၽႅဝ်ၵႂႃႇတီႈ ဝၢၼ်ႈၼမ်ႉ လိၼ်းယဝ်ႉၼၼ်ႉသိုၵ်း မၢၼ်ႈၶိုၼ်းပွႆႇလုင်းသုပွၵ်ႈႁိူၼ်းသေၶဝ်သိုပ်ႇၼွၼ်းတီႈၼၼ်ႉၶိုၼ်းၼိုင်ႈ။
ဝၼ်းထိ 29/11/2017 ၶၢဝ်းယၢမ်း 8:30 ၵၢင်ၼႂ်သိုၵ်းမၢၼ်ႈဢွၵ်ႇဝၢၼ်ႈၼမ်ႉလိၼ်းသေသိုပ်ႇၶၢဝ်းတၢင်းမုင်ႈၸူးၼႃႈ တၢင်းၸၢၼ်းဢၼ်မီးလွႆၵႂႃႇႁူပ်ႉသႂ်ႇပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆးတီႈ ၵွင်းမႆႉႁုင်း။လႆႈပဵၼ်ပၢင်တိုၵ်း ၵၼ်ႁိုင်မွၵ်ႈ 35 ၼႃးထီး၊ဝၢႆးၼၼ်ႉသိုၵ်းမၢၼ်ႈၶိုၼ်းထွႆပွၵ်ႈၸူးဝၢၼ်ႈၼမ်ႉလိၼ်း။
ဝၼ်းၼၼ်ႉဝၢႆးဝၼ်းလုင်းပုၼ်ႉတင်းၵူၼ်းႁိူၼ်းမၼ်းတိုၵ်ႉႁေႃႈထူဝ်ႈလူင်ၵႂႃႇၶၢႆၶဝ်ႈၵၢပ်ႇ/ၶဝ်ႈၶႄႇၶဝ်တီႈ သီႇ ပေႃႉ သေၶိုၼ်းပွၵ်ႈႁိူၼ်းတီႈဝၢၼ်ႈၼွင်လႄႈႁူပ်ႉသႂ်ႇသိုၵ်းမၢၼ်ႈၶမရ 147 ဢၼ်တိုၵ်ႉထွႆပွၵ်ႈၸူးဝၢၼ်ႈၼမ်ႉလိၼ်း ၼၼ်ႉ ယဝ်ႉ။သိုၵ်းမၢၼ်ႈၸႂ်ႉၶဝ်ၵိုတ်းထူဝ်ႈသေသွၵ်ႈတဝ်ၼႂ်းထူဝ်ႈယဝ်ႉဢဝ်တႅင်တဝ်ႈ/ ၸမ်ႇပူႇ 10 လုၵ်ႈဢမ်ႇပၼ်ၵႃႈမၼ်း။ဝၢႆးၼၼ်ႉၶိုၼ်းဢိုတ်းတၢင်းထူဝ်ႈဢမ်ႇပၼ်သိုပ်ႇၶၢဝ်းတၢင်းထႅင်ႈ။
သိုၵ်းမၢၼ်ႈၼွၼ်းတီႈဝၢၼ်ႈၼမ်ႉလိၼ်းၶိုၼ်းၼိုင်ႈယဝ်ႉၶိုၼ်းသိုပ်ႇၶၢဝ်းတၢင်းၵႂႃႇတၢင်းဝၢၼ်ႈပႃႇၵၢင်း။မိူဝ်ႈ ဝၼ်းထိ 30/11/2017 ယၢမ်းၵၢင်ၼႂ်ၼၼ်ႉသိုၵ်းမၢၼ်ႈၸႂ်ႉပူႇၵႄႇၵႂႃႇႁႃၵႃးပၼ်ၶဝ်သၢမ်လမ်းသေ တဵၵ်းၸႂ်ႉ ၵူၼ်း ဝၢၼ်ႈပႃႇၵၢင်း သၢမ်ၵေႃႉလုင်းၸၢႆးလူင်၊ၼၢင်းဢေးမျႅၼ်ႉလႄႈလုင်းၸၼ်ႇတေႃးႁေႃႈသူင်ႇၶဝ်လုၵ်ႉဢဝ် တီႈ ဝၢၼ်ႈပႃႇၵၢင်းၵႂႃႇၸူး တပ်ႉၶဝ်တီႈသႅင်ၵႅဝ်ႉ။ၵႃႈၼမ်ႉမၼ်းထူဝ်ႈၵေႃႈၶဝ်ဢမ်ႇပၼ်။
ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ၼႆႉလူင်းလၢႆးမိုဝ်းၵိုတ်းယိုဝ်းမႂ်ႇၸွမ်းသိုၵ်းမၢၼ်ႈမိူဝ်ႈပီ 2012 ၵူၺ်းၵႃႈၵႆႉလႆႈၺႃးသိုၵ်မၢၼ်ႈပိုတ်ႇၼႃႈသိုၵ်းသႂ်ႇတင်ႈတႄႇၼၼ်ႉမႃး။
ဢွၼ်ႇၸၢႆးဢႃယု 8 ၶူပ်ႇတၢႆယွၼ်ႉမၢၵ်ႇတႅၵ်ႇသႂ်ႇၼႂ်းၸႄႈဝဵင်းၼမ်ႉတူႈ
မိူဝ်ႈဝၼ်းထိ 28/11/2017 ၼၼ်ႉၸၢႆးလႃႉႁၢၼ်ႇဢႃယု 8 ၶူပ်ႇလုၵ်ႈၸၢႆးလုင်းသၢင်ႇၶႅင်ႇပႃႈသိုဝ်ႉၵႂႃႇၸွမ်း ပေႃႈ မႄႈမၼ်းၼႂ်းသူၼ်ၶဝ်ႈၵၢပ်ႇသူၼ်ႁႆႈႁိမ်းဝၢၼ်ႈၶဝ်ၼႃးသၢင်း၊ဢိူင်ႇၼႃးသၢင်းၸႄႈဝဵင်းၼမ်ႉတူႈ။ၽွင်းၶၢဝ်း ယၢမ်း 4 မူင်းဝၢႆးဝၼ်းၼၼ်ႉပေႃႈမႄႈမၼ်းၸၢႆးၸႂ်ႉႁႂ်ႈၵႂႃႇၵဵပ်းၽၵ်းပၵ်ႉၼႆလႄႈမၼ်းၸၢႆးၵေႃႈလုၵ်ႉတီႈထဵင်သူၼ်ၶဝ်ႈၵၢပ်ႇ ၶဝ် သေ ၵႂႃႇၵဵပ်းၽၵ်းပၵ်ႉလႄႈၵႂႃႇယဵပ်ႇၺႃးမၢၵ်ႇ M9 ၼႂ်းၵေႃၵူၺ်ႈယုမ်းၽၵ်းပၵ်ႉယဝ်ႉမၢၵ်ႇတႅၵ်ႇ လႄႈမၼ်း ၸၢႆးတၢႆ ထင်တီႈၵမ်းလဵဝ်။
ၽွင်းလႆႈငိၼ်းသဵင်မၢၵ်ႇတႅၵ်ႇယဝ်ႉၼၼ်ႉပေႃႈမႄႈမၼ်းၸၢႆး လႅၼ်ႈ ၸူးတၢင်းသဵင်မၢၵ်ႇတႅၵ်ႇၼၼ်ႉသေ ထူပ်းႁၼ်မၼ်း ၸၢႆး ၼွၼ်း တၢႆဝႆႉယဝ်ႉ။ပေႃႈမႄႈမၼ်း ၸၢႆးၶိုၼ်း ဢဝ်ၶၢပ်ႈ တူဝ်တၢႆမၼ်း ၾင်ႁိမ်းသူၼ်ႁႆႈဝၼ်းၼၼ်ႉယဝ်ႉ။မၼ်းၸၢႆး ပဵၼ် လုၵ်ႈၸၢႆးၵေႃႉလဵဝ်။
ၵူၼ်းဝၢၼ်ႈလွမ်တူၵ်ႇတၵ်ႉၵၼ်ဝႃႈမၢၵ်ႇၼၼ်ႉပဵၼ်မၢၵ်ႇ သိုၵ်း မၢၼ်ႈၵွပ်ႈဝႃႈသိုၵ်းမၢၼ်ႈတပ်ႉၵွင် 110 မွၵ်ႈ 100 ၵေႃႉဢၼ်ယူႇ ပႃႈတႂ်ႈ တပ်ႉၸုမ်းလူင် 33 လႄႈသိုၵ်းလွႆ/တဢၢင်းလႆႈပဵၼ်ပၢင် တိုၵ်း ၵၼ်မိူဝ်ႈဝၼ်းထိ 02/10/2017 ၶၢဝ်းယၢမ်း 4 မူင်းဝၢႆးဝၼ်းၼႂ်းပိုၼ်ႉတီႈၼၼ်ႉသေၵူၼ်းဝၢၼ်ႈ လႆႈႁၼ်သိုၵ်းမၢၼ်ႈ မႅၵ်ႇ မၢၵ်ႇ ၼၼ်ႉပႃး။ဢွင်ႈတီႈဢၼ်ၸၢႆးလႃႉႁၢၼ်ႇတၢႆၼၼ်ႉ ၵေႃႈ ပဵၼ်ပိုၼ်ႉတီႈ ဢၼ်သိုၵ်းမၢၼ်ႈလႄႈသိုၵ်းလွႆ ပဵၼ်ပၢင်ၵၼ် ၼႂ်းလိူၼ်ပူၼ်ႉမႃးၼၼ်ႉယဝ်ႉ။
ၼႂ်းဝၢၼ်ႈၼႃးသၢင်းၼႆႉမီးလင်ႁိူၼ်းၵူၼ်းမွၵ်ႈ 70၊ယူႇတၢင်း ႁွင်ႇမိူင်းယဵၼ်ၸႄႈဝဵင်းၼမ်ႉတူႈႁိမ်းၾင်ႇၼမ်ႉတူႈ။သူၼ်ၶဝ်ႈၵၢပ်ႇတီႈဢၼ်ၸၢႆးလႃႉႁၢၼ်ႇတၢႆၼၼ်ႉၵေႃႈပေႃးပႆ ဢဝ် တေၵႆဝၢၼ်ႈၼႃးသၢင်းမွၵ်ႈ 40 ၼႃးထီး။
ၵပ်းသိုပ်ႇတွင်ႈထၢမ်
ၸၢႆးႁေႃသႅင် +66: (0) 62- 941-9600 (တႆး၊ဢင်းၵိတ်း)
ၼၢင်းလွၼ်ႉလႅင်း +66: (0) 63-838-9029 (မၢၼ်ႈ၊ဢင်းၵိတ်း)
လုမ်း +66: (0) 93-297-7754
Download PDF files