ၽိုၼ်တၢမ်းငဝ်းလၢႆးၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး
ဝၼ်းထိ 2/12/2022
ၵူၼ်းဝၢၼ်ႈ 700 ပၢႆလႆႈပၢႆၽေးယွၼ်ႉသိုၵ်းမၢၼ်ႈဢဝ်မၢၵ်ႇလူင်ယိုဝ်းလူင်ၵႂႃႇၵူႈႁူးၵူႈတၢင်း ၽွင်းတိုၵ်းယိုဝ်း SSPP/SSA ၼႂ်းၸႄႈဝဵင်းသီႇပေႃႉ
ၵူၼ်းဝၢၼ်ႈ 700 ပၢႆလႆႈၼီပၢႆႈၽေးသိုၵ်းၽွင်းသိုၵ်းမၢၼ်ႈဢဝ်မၢၵ်ႇလူင်ယိုဝ်းလူင်ၵႂႃႇၵူႈႁူးၵူႈတၢင်း ၽွင်းတိုၵ်းယိုဝ်းပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ မိူဝ်ႈဝၼ်းထိ 25/11/2022။
သိုၵ်းမၢၼ်ႈမွၵ်ႈ 80 ပိုတ်ႇပၢင်တိုၵ်းယၢမ်း 6 မူင်းၵၢင်ၼႂ် တီႈဝၢၼ်ႈၵုင်းသႃႇ ဢၼ်ယူႇၼိူဝ်သဵၼ်ႈတၢင်းလူင် ဝဵင်းတႃႈလိူဝ်ႇ-မူႇၸႄႈ ယူႇတၢင်းဢွၵ်ႇဝဵင်းသီႇပေႃႉ ႁၢင်ႇၵႆဝဵင်းမွၵ်ႈ 10 ၵီႊလူဝ်ႊမႄႊတိူဝ်ႊ။ သိုၵ်းမၢၼ်ႈၶီႇ ၼိူဝ်ရူတ်ႊ/ၵႃး 11 လမ်း လုၵ်ႉတၢင်းသီႇပေႃႉမႃး။ သိုၵ်းမၢၼ်ႈၵမ်ႈၽွင်ႈလုၵ်ႉမႃးတီႈတပ်ႉ ၶလယ 68 ဢၼ် ပၵ်းတီႈလႃႈသဵဝ်ႈသေ ၶဝ်ႈဢဝ်တီႈယူႇတီႈၶူဝ်လူင် ဢၼ်ယူႇတၢင်းတူၵ်းဝၢၼ်ႈၵုင်းသႃႇ ယူႇႁၢင်ႇၵႆဝၢၼ်ႈ မွၵ်ႈ 3 ၵီႊလူဝ်ႊမႄႊတိူဝ်ႊလႄႈမၢင်ၸိူဝ်းလုၵ်ႉတီႈတပ်ႉ ၶလယ 23 ဢၼ် ပၵ်းတပ်ႉတီႈသီႇပေႃႉမႃး။
ပၢင်တိုၵ်းၼႆႉ သိုၵ်းမၢၼ်ႈယိူင်းၸူးတပ်ႉသိုၵ်းၸိုင်ႈတႆး SSPP/SSA ဢၼ်မႃးမီးယူႇ ၸွမ်းဝၢၼ်ႈၵုင်းသႃႇ ၽွင်းၶၢဝ်းတၢင်းပီမႂ်ႇတႆး။ တင်းသွင်ၽၢႆႇလႆႈပဵၼ်ပၢင်တိုၵ်းၵၼ် ၶၢဝ်းတၢင်းၶိုင်ႈၸူဝ်ႈမူင်းသေ ၽွင်းၼၼ်ႉသိုၵ်း မၢၼ်ႈဢဝ်မၢၵ်ႇလူင်ယိုဝ်းလူင်ၵႂႃႇ ၼႂ်းဝၢၼ်ႈ ၵူႈႁူးၵူႈတၢင်းလႄႈ တိူဝ်ႉၺႃးႁိူၼ်းယေးၵူၼ်းဝၢၼ်ႈ 14 လင်လုၵွႆ၊ ၵူၺ်းၵႃႈၵၢမ်ႇလီသေ ဢမ်ႇမီးၽႂ်လႂ်လႆႈမၢတ်ႇၸဵပ်း။
ယွၼ်ႉတူၵ်းၸႂ်ၵူဝ်ႁႄ မၢၵ်ႇလူင်သေ ၵူၼ်းဝၢၼ်ႈၵုင်းသႃႇလႄႈ ဝၢၼ်ႈႁိမ်းႁွမ်းမွၵ်ႈ 700 လႆႈဢွၼ် ၵၼ်ပၢႆႈၽေးသိုၵ်း။ ၵမ်ႈၽွင်ႈပၢႆႈသေႃႉႁူမ်ႈၸွမ်း ဝတ်ႉၼႂ်း ဝၢၼ်ႈ၊ ၵျွင်းၽြႃးလရိယၼ်ႇ၊ ၵမ်ႈၽွင်ႈပၢႆႈ သေႃႉႁူမ်ႈတီႈဝတ်ႉ ၼႂ်းဝဵင်းသီႇပေႃႉ။
သဵၼ်ႈမၢႆၵူၼ်းပၢႆႈၽေးမီးၼင်ႇပႃႈတႂ်ႈၼႆႉ-
| ၶပ်ႉမၢႆ | ဢွင်ႈတီႈပၢႆႈၽေး | လင်ႁိူၼ်းၵူၼ်း | ႁူမ်ႈႁူဝ်ၼပ်ႉၵူၼ်း | 18 ၶိုၼ်ႈ ၼိူဝ် | ပႃႈတႂ်ႈ 18 |
| 1 | ဝတ်ႉ/ၵျွင်းၽူဝ်းတေႃႇ ဝဵင်းသီႇပေႃႉ | 117 | 350 | 170 | 180 |
| 2 | ဝတ်ႉ/ၵျွင်းၵုင်းသႃႇ | 73 | 224 | 148 | 76 |
| 3 | ဝတ်ႉၵျွင်းသူပ်းလင်း | 91 | 166 | 133 | 33 |
| 4 | ၵျွင်းၶရိယၼ်ႇ ၵုင်းသႃႇ | 5 | n/a | n/a | n/a |
| 5 | ဝတ်ႉ/ၵျွင်း မႁႃႇသီႇ ဝဵင်းသီႇပေႃႉ | 3 | n/a | n/a | n/a |
| ႁူမ်ႈတင်းသဵင်ႈ | 289 | 740 + | 451 + | 289 + |
ဝၢႆးပၢင်တိုၵ်းယဝ်ႉ တပ်ႉသိုၵ်းၸိုင်ႈတႆး SSPP/SSA ထွႆဢွၵ်ႇဝၢၼ်ႈၵုင်းသႃႇ၊ ၵူၺ်းၵႃႈသိုၵ်းမၢၼ်ႈ သိုပ်ႇယူႇဝႆႉ ၸွမ်းႁူင်းႁဵၼ်းဝၢၼ်ႈ။ ထိုင်ဝၼ်းထိ 30/11/2022 မႃး ၵူၼ်းဝၢၼ်ႈၵမ်ႈၼမ်ဢွၼ်ၵၼ်ပွၵ်ႈႁိူၼ်းၶိုၼ်း။ ၵမ်ႈၽွင်ႈၵေႃႈႁၼ်ၶူဝ်းၶွင်ႁိူၼ်းၶဝ် ၺႃးသိုၵ်းမၢၼ်ႈသွၵ်ႈတဝ်။
ပႃႈတႂ်ႈၼႆႉ ပဵၼ်သဵၼ်ႈမၢႆၵူၼ်းဝၢၼ်ႈၵုင်းသႃႇ ဢၼ်ႁိူၼ်းၶဝ်ၺႃးၸၢၵ်ႇမၢၵ်ႇသိုၵ်း မၢၼ်ႈသေလုၵွႆ မိူဝ်ႈဝၼ်းထိ 25/11/2022-
| ၶပ်ႉမၢႆ | ၸိုဝ်ႈၸဝ်ႈႁိူၼ်း | လွင်ႈလုၵွႆယွၼ်ႉမၢၵ်ႇလူင် |
| 1 | ပႃႈၸၢင်းလူႇ | ႁိူၼ်းလုၵွႆ |
| 2 | ပႃႈမူၺ်းသႃႇ | မၢၵ်ႇလူင်တူၵ်းၼႃႈႁိူၼ်းသေ သၢႆၾႆးၾႃႉၼႃႈႁိူၼ်းၶၢတ်ႇၵႂႃႇ |
| 3 | လုင်းၸေႃးမွင်ႇ | ႁိူၼ်း၊ တူႈယဵၼ်( တိူၵ်ႈၵတ်း ) လႄႈ လွတ်ႇၼမ်ႉၵွႆ |
| 4 | ပႃႈၸၢင်းမႂ်ႇ | လဵၵ်းမုင်းလင်ၶႃးႁိူၼ်းပွင်ႇၵႂႃႇ |
| 5 | ၼၢႆးမွၼ်ႇၵျႃႇ | လဵၵ်းမုင်းႁိူၼ်း ၵွႆ 20 ၽႅၼ်ႇ |
| 6 | ပူႇၸၢင်းမၢတ်ႈ | မၢၵ်ႇၵွင်ႈတိူဝ်ႉလဵၵ်းၽိူၵ်ႇ 20 ၽႅၼ်ႇ |
| 7 | လုင်းၸိင်ႇ | သၢႆၾႆးၾႃႉၼႃႈႁိူၼ်းၶၢတ်ႇ |
| 8 | ပႃႈၵျႃႇ | လဵၵ်းမုင်းႁိူၼ်း 2 ၽႅၼ်ႇ |
| 9 | လုင်းၵျေႃႇတႅတ်ႉ | ၺႃးလဵၵ်းၽိူၵ်ႇ |
| 10 | လုင်းယီႈ | လင်ၶႃးပွင်ႇ |
| 11 | ဢေးယွႆႇ | ၺႃးထူင်ၶဝ်ႈသၢၼ် လႄႈ လဵၵ်းၽိူၵ်ႇ |
| 12 | ပႃႈသူၺ်ႇၸိင်ႇ | လဵၵ်းမုင်းႁိူၼ်းပွင်ႇၵႂႃႇ |
| 13 | လုင်းထုၼ်းသႃႇ | လဵၵ်းမုင်းႁိူၼ်းပွင်ႇၵႂႃႇ |
| 14 | မၵျူၺ်ႇ | ၽႃႁိူၼ်းလႄႈ လင်ၶႃးႁိူၼ်းပွင်ႇၵႂႃႇ |
တၢဝ်းလူတ်ႇဢဝ်ၾၢႆႇ PDF >>>
တွင်ႈထၢမ်
ၸၢႆးႁေႃသႅင် +66: 94-728-6696 (တႆး၊ ဢင်းၵိတ်း)
ယိင်းလႅင်းႁၢၼ် +66 62 569 5220 (မၢၼ်ႈ)